Enda ku bidi'mo

Lelo Bidi na Mvubu Kwikala mu Kipwilo Kampanda?

Lelo Bidi na Mvubu Kwikala mu Kipwilo Kampanda?

Bilondolola Bible

En-en, mwanda Leza usakanga bantu bebungile pamo mwanda wa kutōta. Bible unena’mba, “twitei mityima batwe bene na bene mwanda wa kwitonwena ku buswe ne ku mingilo milumbuluke, ne kuleka’byo kwibungila pamo kwetu mpika.”​—Bahebelu 10:24, 25, kunshi kwa dyani.

Yesu wālombwele amba balondi bandi bakekala mu kisumpi kiteakanibwe paānenene amba: “Pa kino bonso bakayuka’mba mwi bami bana ba bwanga​—shi mudi na buswe umbukata mwenu.” (Yoano 13:35) Ku bene Kidishitu, muswelo mubajinji wa kulombola buno buswe, wādi wa kwibungila pamo na banababo mu lwitabijo. Bādi ba kwikala mu bipwilo bitana kitatyi ne kitatyi mwanda wa kutōta. (1 Bene Kodinda 16:19) Abo bonso bādi ba kwikala bana na bana ba ntanda yonso.​—1 Petelo 2:17.

Kwikala mu kipwilo kekubwenepo

Nansha Bible byanena’mba bantu bafwaninwe kwibungila pamo mwanda wa kutōta Leza, ino kafundijangapo amba muntu ubwanya kusangaja Leza mwanda’po’tu udi mu kipwilo. Pa kwitabijibwa na Leza, kipwilo kifwaninwe kumukwasha ashinte mu būmi bwandi. Kimfwa, Bible unena’mba: “Butōtyi [bwine butōka] tō, [bwampikwa] disubi ku meso a Leza wetu Tata i [buno]: kukwasha bana ba nshiye ne bakaji ba kishala mu byamalwa byabo, ne kwilama pampikwa dikeme dya ino ntanda.”​—Yakoba 1:27, kunshi kwa dyani.