ບົດທີ 19
ພະຍານພະເຢໂຫວາເປັນຄລິດສະຕຽນແທ້ບໍ?
ພວກເຮົາທີ່ເປັນພະຍານພະເຢໂຫວາໝັ້ນໃຈວ່າເຮົາເປັນຄລິດສະຕຽນແທ້. ເປັນຫຍັງເຮົາຈຶ່ງໝັ້ນໃຈແບບນັ້ນ? ໃຫ້ເຮົາມາເບິ່ງເຫດຜົນບາງຢ່າງກ່ຽວກັບຄຳສອນທີ່ເຮົາເຊື່ອ ຊື່ທີ່ເຮົາໃຊ້ ແລະຄວາມຮັກທີ່ເຮົາມີຕໍ່ກັນ.
1. ຄຳສອນຂອງພະຍານພະເຢໂຫວາມາຈາກໃສ?
ພະເຢຊູບອກວ່າ: ‘ຖ້ອຍຄຳຂອງພະເຈົ້າເປັນຄວາມຈິງ.’ (ໂຢຮັນ 17:17) ພະເຢຊູສອນສິ່ງທີ່ມາຈາກຄຳພີໄບເບິນທີ່ເປັນຖ້ອຍຄຳຂອງພະເຈົ້າ ພະຍານພະເຢໂຫວາກໍເຮັດແບບນັ້ນຄືກັນ. ໃຫ້ເຮົາມາເບິ່ງປະຫວັດຄວາມເປັນມາຂອງພະຍານພະເຢໂຫວາເຊິ່ງເຄີຍເປັນທີ່ຮູ້ຈັກກັນວ່າ ກຸ່ມນັກສຶກສາຄຳພີໄບເບິນ. ໃນໄລຍະປີ ຄ.ສ 1870 ເຂົາເຈົ້າເລີ່ມສຶກສາຄົ້ນຄວ້າຄຳສອນໃນຄຳພີໄບເບິນຢ່າງລະອຽດ. ເຂົາເຈົ້າຈະເຊື່ອສະເພາະສິ່ງທີ່ຄຳພີໄບເບິນບອກເທົ່ານັ້ນ ເຖິງວ່າຄຳສອນນັ້ນບໍ່ຄືກັບຄຳສອນຂອງສາສະໜາຄລິດກຸ່ມອື່ນໆ. ແລະເມື່ອກຸ່ມນັກສຶກສາຄຳພີໄບເບິນເຂົ້າໃຈຄຳສອນໃນຄຳພີໄບເບິນແລ້ວ ເຂົາເຈົ້າກໍເລີ່ມບອກໃຫ້ຄົນອື່ນຮູ້. a
2. ເປັນຫຍັງພວກເຮົາຈຶ່ງມີຊື່ວ່າພະຍານພະເຢໂຫວາ?
ພະເຢໂຫວາເອີ້ນຄົນທີ່ນະມັດສະການເພິ່ນວ່າເປັນພະຍານຂອງເພິ່ນຍ້ອນເຂົາເຈົ້າບອກຄວາມຈິງກ່ຽວກັບເພິ່ນ. (ເຮັບເຣີ 11:4-12:1) ຕົວຢ່າງເຊັ່ນ ໃນສະໄໝບູຮານ ພະເຈົ້າບອກຄົນຂອງເພິ່ນວ່າ: “ພວກເຈົ້າເປັນພະຍານຂອງເຮົາ.” (ອ່ານເອຊາອີ 43:10, ລ.ມ.) ພະເຢຊູເອງກໍຖືກເອີ້ນວ່າ “ພະຍານທີ່ສັດຊື່.” (ພະນິມິດ 1:5) ດັ່ງນັ້ນ ຕັ້ງແຕ່ປີ ຄ.ສ 1931 ເຮົາຈຶ່ງເອີ້ນໂຕເອງວ່າພະຍານພະເຢໂຫວາ. ເຮົາພູມໃຈຫຼາຍທີ່ໄດ້ໃຊ້ຊື່ນີ້.
3. ພະຍານພະເຢໂຫວາຮັກກັນຄືກັບທີ່ພະເຢຊູຮັກລູກສິດຂອງເພິ່ນແນວໃດ?
ພະເຢຊູຮັກລູກສິດຂອງເພິ່ນຫຼາຍແລະເບິ່ງວ່າເຂົາເຈົ້າເປັນຄືກັບຄົນໃນຄອບຄົວ. (ອ່ານມາຣະໂກ 3:35) ພະຍານພະເຢໂຫວາໃນທຸກມື້ນີ້ກໍຄືກັນ ເຮົາເອີ້ນກັນວ່າພີ່ນ້ອງຍ້ອນເຮົາເປັນຄືຄົນໃນຄອບຄົວດຽວກັນ. ບໍ່ວ່າຈະຢູ່ບ່ອນໃດເຮົາກໍເປັນໜຶ່ງດຽວກັນ. (ຟີເລໂມນ 1, 2) ນອກຈາກນັ້ນ ເຮົາຍັງເຮັດຕາມຄຳສັ່ງທີ່ບອກວ່າ: “ໃຫ້ຮັກພີ່ນ້ອງຄລິດສະຕຽນທຸກຄົນ.” (1 ເປໂຕ 2:17) ພະຍານພະເຢໂຫວາເຮັດຫຼາຍຢ່າງທີ່ສະແດງວ່າຮັກກັນແທ້ໆ ເຊັ່ນ ເຮົາຄອຍຊ່ວຍເຫຼືອພີ່ນ້ອງທີ່ຢູ່ທົ່ວໂລກທີ່ເຈິກັບຄວາມຍາກລຳບາກ.
ຮຽນຮູ້ຫຼາຍຂຶ້ນ
ມາເບິ່ງວ່າພວກເຮົາທີ່ເປັນພະຍານພະເຢໂຫວາມີປະຫວັດຄວາມເປັນມາແນວໃດ ແລະມີຫຍັງອີກທີ່ເຮັດໃຫ້ຮູ້ວ່າເຮົາເປັນຄລິດສະຕຽນແທ້.
4. ສິ່ງທີ່ເຮົາສອນມາຈາກຄຳພີໄບເບິນ
ພະເຢໂຫວາບອກໄວ້ວ່າຄວາມຈິງໃນຄຳພີໄບເບິນຈະແຈ້ງຂຶ້ນເລື້ອຍໆ. ອ່ານດານຽນ 12:4, ລ.ມ. ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເມື່ອຄົນຂອງພະເຈົ້າຄົ້ນເບິ່ງຄຳພີໄບເບິນຢ່າງລະອຽດຖີ່ຖ້ວນເຂົາເຈົ້າຈະມີຫຍັງ “ຢ່າງຫຼວງຫຼາຍ”?
ລອງເບິ່ງວ່າກຸ່ມນັກສຶກສາຄຳພີໄບເບິນທີ່ມີ ຊານ ຣັດເຊວກັບໝູ່ຂອງລາວ ຮຽນຄຳພີໄບເບິນແນວໃດ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນວິດີໂອ ຊານ ຣັດເຊວແລະໝູ່ຂອງລາວໃຊ້ວິທີໃດເພື່ອສຶກສາຄຳພີໄບເບິນ?
ເຈົ້າຮູ້ບໍ?
ເປັນຫຍັງບາງເທື່ອເຮົາຕ້ອງປັບປ່ຽນຄຳສອນບາງຢ່າງຂອງເຮົາ? ຄືກັບແສງຕາເວັນທີ່ຄ່ອຍໆແຈ້ງຂຶ້ນແລະເຮັດໃຫ້ເຫັນທິວທັດຊັດເຈນຫຼາຍຂຶ້ນ ພະເຈົ້າກໍຊ່ວຍເຮົາໃຫ້ເຂົ້າໃຈຄຳພີໄບເບິນຫຼາຍຂຶ້ນເລື້ອຍໆຕາມເວລາທີ່ເໝາະສົມ. (ອ່ານສຸພາສິດ 4:18) ແລະເມື່ອເຮົາເຂົ້າໃຈຄຳພີໄບເບິນຫຼາຍຂຶ້ນ ເຮົາກໍເລີຍປັບປ່ຽນຄຳສອນຂອງເຮົາໃຫ້ກົງກັບທີ່ຄຳພີໄບເບິນສອນແທ້ໆ.
5. ຊື່ຂອງເຮົາບອກໃຫ້ຮູ້ວ່າເຮົາເຮັດຫຍັງ
ໃຫ້ເຮົາມາເບິ່ງວ່າເປັນຫຍັງເຮົາຈຶ່ງມີຊື່ວ່າພະຍານພະເຢໂຫວາ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເປັນຫຍັງຈຶ່ງເໝາະສົມທີ່ເຮົາຈະໃຊ້ຊື່ວ່າພະຍານພະເຢໂຫວາ?
ຫຼາຍຄົນບໍ່ຮູ້ຄວາມຈິງກ່ຽວກັບພະເຢໂຫວາ ເພິ່ນກໍເລີຍໃຫ້ມີຄົນທີ່ເປັນພະຍານຂອງເພິ່ນ. ພະຍານຂອງພະເຢໂຫວາຈະບອກໃຫ້ຄົນອື່ນຮູ້ວ່າເພິ່ນເປັນພະເຈົ້າແບບໃດແທ້ໆ. ຕອນນີ້ໃຫ້ເຮົາມາເບິ່ງຄຳສອນຜິດໆ 2 ເລື່ອງນຳກັນ.
ບາງສາສະໜາສອນວ່າພະເຈົ້າຢາກໃຫ້ເຮົາໃຊ້ຮູບບູຊາໃນການນະມັດສະການເພິ່ນ ແຕ່ຄຳພີໄບເບິນເວົ້າແນວໃດ. ອ່ານພວກເລວີ 26:1 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ແທ້ໆແລ້ວ ພະເຈົ້າຢາກໃຫ້ເຮົາໃຊ້ຮູບບູຊາບໍ? ເຈົ້າຄິດວ່າເພິ່ນຮູ້ສຶກແນວໃດກັບການໃຊ້ຮູບບູຊາ?
ບາງສາສະໜາສອນວ່າພະເຢຊູເປັນພະເຈົ້າ ແຕ່ນັ້ນເປັນຄວາມຈິງບໍ. ອ່ານໂຢຮັນ 20:17 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຂໍ້ຄຳພີນີ້ບອກວ່າແທ້ໆແລ້ວພະເຢຊູເປັນພະເຈົ້າບໍ?
-
ພະເຢໂຫວາໃຫ້ພະຍານຂອງເພິ່ນມາບອກຄວາມຈິງເລື່ອງເພິ່ນແລະພະເຢຊູ ເມື່ອຮູ້ແບບນີ້ແລ້ວເຈົ້າຮູ້ສຶກແນວໃດ?
6. ພວກເຮົາຮັກກັນ
ຄຳພີໄບເບິນປຽບທຽບຄລິດສະຕຽນແຕ່ລະຄົນວ່າເປັນຄືກັບອະໄວຍະວະຕ່າງໆໃນຮ່າງກາຍ. ອ່ານ 1 ໂກຣິນໂທ 12:25, 26 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຄລິດສະຕຽນແທ້ຈະເຮັດຫຍັງຖ້າເຫັນໝູ່ຄລິດສະຕຽນເຈິກັບຄວາມຍາກລຳບາກ?
-
ເຈົ້າສັງເກດເຫັນຫຍັງທີ່ເຮັດໃຫ້ຮູ້ວ່າພະຍານພະເຢໂຫວາຮັກກັນແທ້ໆ?
ເມື່ອພະຍານພະເຢໂຫວາໃນບາງປະເທດເຈິກັບຄວາມຍາກລຳບາກ ພະຍານພະເຢໂຫວາຈາກທົ່ວໂລກກໍໃຫ້ຄວາມຊ່ວຍເຫຼືອທັນທີ. ໃຫ້ເຮົາມາເບິ່ງຕົວຢ່າງໜຶ່ງນຳກັນ ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນວິດີໂອ ພະຍານພະເຢໂຫວາຊ່ວຍເຫຼືອກັນແນວໃດ? ນີ້ສະແດງໃຫ້ເຫັນວ່າເຂົາເຈົ້າຮັກກັນແທ້ໆບໍ?
ບາງຄົນເວົ້າວ່າ: “ພະຍານພະເຢໂຫວາເປັນສາສະໜາໃໝ່ຫວາ?”
-
ຄຳພີໄບເບິນບອກວ່າ ພະເຢໂຫວາເອີ້ນຄົນທີ່ນະມັດສະການເພິ່ນວ່າເປັນພະຍານຕັ້ງແຕ່ຕອນໃດ?
ສະຫຼຸບ
ພະຍານພະເຢໂຫວາເປັນຄລິດສະຕຽນແທ້. ພວກເຮົາທີ່ຢູ່ທົ່ວໂລກເປັນຄືກັບຄອບຄົວດຽວກັນ ສິ່ງທີ່ເຮົາສອນມາຈາກຄຳພີໄບເບິນແລະເຮົາບອກຄວາມຈິງເລື່ອງພະເຢໂຫວາໃຫ້ຄົນອື່ນຮູ້.
ຄຳຖາມທົບທວນ
-
ເປັນຫຍັງພວກເຮົາຈຶ່ງມີຊື່ວ່າພະຍານພະເຢໂຫວາ?
-
ເຮົາເຮັດຫຍັງແດ່ທີ່ສະແດງວ່າເຮົາຮັກກັນແທ້ໆ?
-
ເຈົ້າຄິດວ່າພະຍານພະເຢໂຫວາເປັນຄລິດສະຕຽນແທ້ບໍ?
ເບິ່ງເພີ່ມເຕີມ
ຮູ້ຈັກຄວາມເປັນມາຂອງເຮົາຫຼາຍຂຶ້ນ.
ພະຍານພະເຢໂຫວາ—ຜູ້ປະຕິບັດຕາມຄວາມເຊື່ອ ພາກ 1: ອອກມາຈາກຄວາມມືດ (1:00:53)
ພະຍານພະເຢໂຫວາເຮັດໃຫ້ຜູ້ຄົນຮູ້ວ່າຄຳສອນເລື່ອງຫຍັງແດ່ທີ່ບໍ່ເປັນຄວາມຈິງ ໃຫ້ເຮົາມາເບິ່ງຕົວຢ່າງໜຶ່ງນຳກັນ.
ມາເບິ່ງຄຳຕອບສຳລັບເລື່ອງທີ່ເຈົ້າອາດຢາກຮູ້ກ່ຽວກັບພະຍານພະເຢໂຫວາ.
“ຄຳຖາມທີ່ພົບເລື້ອຍໆກ່ຽວກັບພະຍານພະເຢໂຫວາ” (ເນື້ອຫາໃນເວັບໄຊ)
ສະຕີເວັນຊັງຄົນເຊື້ອຊາດອື່ນຫຼາຍເຖິງຂັ້ນທີ່ລົງມືທຳຮ້າຍເຂົາເຈົ້າ. ແຕ່ເມື່ອລາວໄດ້ມາຮູ້ຈັກກັບພະຍານພະເຢໂຫວາ ລາວກໍປ່ຽນໄປ ຍ້ອນຫຍັງ.
“ຂ້ອຍເຄີຍເປັນຄົນຊົ່ວຫຼາຍ” (ຫໍສັງເກດການ 1 ກໍລະກົດ 2015)
a ຕັ້ງແຕ່ປີ 1879 ພະຍານພະເຢໂຫວາໄດ້ພິມວາລະສານຫໍສັງເກດການ ເພື່ອອະທິບາຍຄຳສອນຕ່າງໆໃນຄຳພີໄບເບິນ.