ພະລັງບໍລິສຸດແມ່ນຫຍັງ?
ຄຳຕອບຈາກຄຳພີໄບເບິນ
ພະລັງບໍລິສຸດຫຼືພະວິນຍານບໍລິສຸດຂອງພະເຈົ້າ ແມ່ນພະລັງທີ່ເພິ່ນໃຊ້ເຮັດສິ່ງຕ່າງໆ. (ມີເກ 3:8; ລູກາ 1:35) ພະເຈົ້າສົ່ງພະວິນຍານບໍລິສຸດອອກໄປໄດ້ທຸກບ່ອນເພື່ອເຮັດສິ່ງທີ່ເພິ່ນຕ້ອງການໃຫ້ສຳເລັດ.—ຄຳເພງ 104:30; 139:7
ໃນຄຳພີໄບເບິນ ຄຳວ່າ “ວິນຍານ” ແປມາຈາກຄຳວ່າຣູອາໃນພາສາເຮັບເຣີແລະພະນູມາໃນພາສາກຣີກ. ສອງຄຳນີ້ໃຊ້ເພື່ອໝາຍເຖິງພະລັງຂອງພະເຈົ້າຫຼືພະວິນຍານບໍລິສຸດ. (ຕົ້ນເດີມ 1:2) ແຕ່ຄຳພີໄບເບິນກໍໃຊ້ໃນຄວາມໝາຍອື່ນນຳເຊັ່ນ:
ລົມຫາຍໃຈ.—ຫາບາກຸກ 2:19; ພະນິມິດ 13:15
ລົມ.—ຕົ້ນເດີມ 8:1; ໂຢຮັນ 3:8
ການເຕັ້ນຂອງຫົວໃຈຫຼືຊີພະຈອນທີ່ເຮັດໃຫ້ສິ່ງມີຊີວິດຢູ່ຕໍ່ໄປໄດ້.—ໂຢບ 34:14, 15
ຄວາມຄິດຫຼືລັກສະນະນິດໄສຂອງຄົນເຮົາ.—ຈົດເຊັນບັນຊີ 14:24
ກາຍວິນຍານ ເຊັ່ນ ພະເຈົ້າແລະທູດສະຫວັນ.—1 ກະສັດ 22:21; ໂຢຮັນ 4:24
ຄວາມໝາຍທັງໝົດນີ້ສະແດງວ່າມີບາງຢ່າງທີ່ເບິ່ງບໍ່ເຫັນແຕ່ສາມາດເຮັດໃຫ້ເກີດຜົນກະທົບທີ່ມະນຸດເບິ່ງເຫັນໄດ້. ພະວິນຍານຂອງພະເຈົ້າ “ເປັນຄືກັນກັບລົມ ຄືເບິ່ງບໍ່ເຫັນ ບໍ່ມີໂຕຕົນ ແລະມີພະລັງອຳນາດ.”—ວັດຈະນານຸກົມອະທິບາຍສັບຄຳພີພາກພັນທະສັນຍາໃໝ່ ຂອງວິນລຽມ ອີ. ໄວນ໌ (ພາສາອັງກິດ).
ຄຳພີໄບເບິນເວົ້າເຖິງພະວິນຍານບໍລິສຸດວ່າເປັນຄືກັບ “ມື” ຫຼື “ນິ້ວມື” ຂອງພະເຈົ້າ. (ຄຳເພງ 8:3; 19:1; ລູກາ 11:20; ທຽບກັບມັດທາຍ 12:28) ຄືກັບຊ່າງທີ່ໃຊ້ມືແລະນິ້ວມືຂອງລາວເພື່ອເຮັດວຽກ ພະເຈົ້າກໍໃຊ້ພະລັງບໍລິສຸດເພື່ອເຮັດສິ່ງຕ່າງໆເຊັ່ນ:
ສ້າງເອກະພົບ.—ຄຳເພງ 33:6; ເອຊາອີ 66:1, 2
ດົນໃຈໃຫ້ມະນຸດຂຽນຄຳພີໄບເບິນ.—2 ເປໂຕ 1:20, 21
ໃຫ້ຜູ້ຮັບໃຊ້ຂອງເພິ່ນໃນສະໄໝບູຮານເຮັດການອັດສະຈັນແລະປະກາດຢ່າງດຸໝັ່ນຫ້າວຫັນ—ລູກາ 4:18; ກິດຈະການ 1:8; 1 ໂກຣິນໂທ 12:4-11
ຊ່ວຍຄົນທີ່ເຊື່ອຟັງເພິ່ນໃຫ້ສະແດງລັກສະນະນິດໄສທີ່ດີ.—ຄາລາເຕຍ 5:22, 23
ພະລັງບໍລິສຸດຂອງພະເຈົ້າບໍ່ແມ່ນບຸກຄົນ
ຄຳພີໄບເບິນສະແດງໃຫ້ເຫັນຈະແຈ້ງວ່າພະລັງບໍລິສຸດບໍ່ແມ່ນບຸກຄົນ ໂດຍມັກຈະເວົ້າເຖິງວ່າເປັນ “ມື” “ນິ້ວມື” ຫຼື “ລົມ.” (ອົບພະຍົບ 15:8, 10) ມືຂອງຊ່າງເຮັດວຽກເອງບໍ່ໄດ້ຖ້າຮ່າງກາຍແລະສະໝອງບໍ່ຄອຍສັ່ງວຽກ ພະວິນຍານຫຼືພະລັງຂອງພະເຈົ້າກໍເຮັດວຽກບໍ່ໄດ້ຖ້າພະເຈົ້າບໍ່ສັ່ງ. (ລູກາ 11:13) ຄຳພີໄບເບິນຍັງສົມທຽບພະລັງບໍລິສຸດເປັນຄືກັບນ້ຳນຳ ແລະບາງເທື່ອກໍໃຊ້ໃນຄວາມໝາຍທີ່ກ່ຽວຂ້ອງກັບຄວາມເຊື່ອແລະຄວາມຮູ້. ການປຽບທຽບເຫຼົ່ານີ້ເຮັດໃຫ້ເຂົ້າໃຈຈະແຈ້ງວ່າພະລັງບໍລິສຸດບໍ່ແມ່ນບຸກຄົນ.—ເອຊາອີ 44:3; ກິດຈະການ 6:5; 2 ໂກຣິນໂທ 6:6
ຄຳພີໄບເບິນບອກໃຫ້ເຮົາຮູ້ວ່າຊື່ຂອງພະເຈົ້າແມ່ນເຢໂຫວາ ແລະລູກຂອງເພິ່ນແມ່ນເຢຊູຄລິດ ແຕ່ບໍ່ມີບ່ອນໃດໃນຄຳພີໄບເບິນບອກວ່າພະລັງບໍລິສຸດມີຊື່. (ເອຊາອີ 42:8; ລູກາ 1:31) ຊະເຕຟາໂນເປັນຄລິດສະຕຽນຄົນໜຶ່ງທີ່ຍອມສະລະຊີວິດເພາະຄວາມເຊື່ອ ຕອນທີ່ລາວເຫັນນິມິດຈາກສະຫວັນດ້ວຍວິທີອັດສະຈັນ ລາວເຫັນພຽງແຕ່ 2 ບຸກຄົນ ບໍ່ໄດ້ເຫັນ 3 ບຸກຄົນ. ຄຳພີໄບເບິນບອກວ່າ: “ຊະເຕຟາໂນເຊິ່ງເຕັມໄປດ້ວຍພະລັງບໍລິສຸດໄດ້ແນມເບິ່ງຟ້າແລະເຫັນສະຫງ່າລາສີຂອງພະເຈົ້າແລະເຫັນພະເຢຊູຢືນຢູ່ເບື້ອງຂວາມືຂອງພະອົງ.” (ກິດຈະການ 7:55) ຕອນນັ້ນພະເຈົ້າໃຊ້ພະວິນຍານບໍລິສຸດຫຼືພະລັງຂອງເພິ່ນເພື່ອເຮັດໃຫ້ຊະເຕຟາໂນເຫັນພາບນິມິດ.
ຄວາມເຂົ້າໃຈຜິດກ່ຽວກັບພະລັງຫຼືພະວິນຍານບໍລິສຸດ
ຄວາມເຂົ້າໃຈຜິດ: ຫຼາຍຄົນເຊື່ອວ່າ “ພະຈິດ” ຫຼືພະວິນຍານບໍລິສຸດເປັນພະເຈົ້າອົງໜຶ່ງໃນຕີເອການຸພາບ ຄືຢູ່ໃນ 1 ໂຢຮັນ 5:7, 8 ຈາກຄຳພີໄບເບິນສະບັບແປຄິງເຈມສ໌.
ຄວາມຈິງ: 1 ໂຢຮັນ 5:7, 8 ໃນຄຳພີໄບເບິນສະບັບແປຄິງເຈມສ໌ ມີຂໍ້ຄວາມທີ່ບອກວ່າ “ໃນສະຫວັນ ຄືພະບິດາ ພະວາທະ ແລະພະວິນຍານບໍລິສຸດ ແລະພະຍານທັງສາມນີ້ເປັນອົງດຽວກັນ. ມີພະຍານຢູ່ສາມພະຍານໃນແຜ່ນດິນໂລກ.” ແຕ່ນັກວິຊາການພົບວ່າອັກຄະສາວົກໂຢຮັນບໍ່ໄດ້ຂຽນຂໍ້ຄວາມນີ້ ແລະຂໍ້ຄວາມນີ້ບໍ່ເຄີຍມີໃນຄຳພີໄບເບິນ. ນັກວິຊາການດ້ານຄຳພີໄບເບິນຊື່ບຣູດຊ໌ ເອັມ. ເມດຊ໌ເກີ ຂຽນວ່າ: “ເຮົາແນ່ໃຈວ່າຂໍ້ຄວາມນີ້ເປັນຂອງປອມແລະບໍ່ຄວນຢູ່ໃນພະຄຳພີພາກພັນທະສັນຍາໃໝ່.”—ຄຳອະທິບາຍຂໍ້ຄວາມໃນພັນທະສັນຍາໃໝ່ພາສາກຣີກ
ຄວາມເຂົ້າໃຈຜິດ: ບາງເທື່ອຄຳພີໄບເບິນບອກວ່າພະວິນຍານບໍລິສຸດເຮັດກິລິຍາບາງຢ່າງຄືກັບຄົນ ນີ້ເປັນຂໍ້ພິສູດວ່າພະວິນຍານບໍລິສຸດເປັນບຸກຄົນ.
ຄວາມຈິງ: ບາງຄັ້ງພະຄຳພີປຽບທຽບພະວິນຍານບໍລິສຸດເປັນຄືກັບບຸກຄົນ. ຕົວຢ່າງເຊັ່ນ ພະເຢຊູບອກວ່າພະວິນຍານບໍລິສຸດເປັນຄືກັບ “ຜູ້ຊ່ວຍ” (ພາຣາຄຼີໂທດສ໌) ຜູ້ຊ່ວຍນີ້ເຮັດໜ້າທີ່ຫຼາຍຢ່າງ ເຊັ່ນ ບອກແລະຮັບຟັງຂ່າວສານ ຊ່ວຍລູກສິດໃຫ້ເຂົ້າໃຈຄວາມຈິງ ແລະເຮັດໃຫ້ພະເຈົ້າແລະພະເຢຊູໄດ້ຮັບກຽດ. (ໂຢຮັນ 16:7-15) ແຕ່ນີ້ບໍ່ໄດ້ເປັນຂໍ້ພິສູດວ່າພະວິນຍານຫຼືພະລັງບໍລິສຸດເປັນບຸກຄົນ. ຄຳພີໄບເບິນຍັງໄດ້ປຽບທຽບສະຕິປັນຍາ ຄວາມຕາຍ ແລະບາບເປັນຄືກັບບຸກຄົນນຳ. (ສຸພາສິດ 1:20; ໂຣມ 5:17, 21) ຕົວຢ່າງເຊັ່ນ ຄຳພີໄບເບິນບອກວ່າສະຕິປັນຍາເຮັດໃຫ້ເກີດ “ຜົນ” ໄດ້ ແລະບາບເຮັດໃຫ້ເກີດຄວາມໂລບ ລໍ້ລວງ ແລະຂ້າຫຼືເຮັດໃຫ້ຕາຍ.—ມັດທາຍ 11:19; ລູກາ 7:35; ໂຣມ 7:8, 11
ຄວາມເຂົ້າໃຈຜິດ: ການຮັບບັບເຕມາໃນນາມຂອງພະວິນຍານບໍລິສຸດເປັນຂໍ້ພິສູດວ່າພະວິນຍານບໍລິສຸດເປັນບຸກຄົນ.
ຄວາມຈິງ: ບາງເທື່ອຄຳພີໄບເບິນໃຊ້ຄຳວ່າ “ໃນນາມ” ເພື່ອໝາຍເຖິງອຳນາດ. (ພະບັນຍັດ 18:5, 19-22; ເອເຊເທຣ 8:10) ຄືກັບໃນພາສາລາວທີ່ບາງເທື່ອກໍໃຊ້ຄຳວ່າ “ໃນນາມຂອງກົດໝາຍ” ແຕ່ນີ້ບໍ່ໄດ້ໝາຍຄວາມວ່າກົດໝາຍເປັນບຸກຄົນ. ຄົນທີ່ຮັບບັບເຕມາ “ໃນນາມ” ຂອງພະວິນຍານບໍລິສຸດ ກໍໝາຍຄວາມວ່າລາວຍອມຮັບວ່າພະວິນຍານບໍລິສຸດເປັນພະລັງທີ່ພະເຈົ້າໃຊ້ເພື່ອເຮັດສິ່ງທີ່ເພິ່ນຕ້ອງການໃຫ້ສຳເລັດ.—ມັດທາຍ 28:19
ຄວາມເຂົ້າໃຈຜິດ: ອັກຄະສາວົກຂອງພະເຢຊູແລະລູກສິດໃນສະໄໝທຳອິດເຊື່ອວ່າພະວິນຍານບໍລິສຸດເປັນບຸກຄົນ.
ຄວາມຈິງ: ຄຳພີໄບເບິນບໍ່ໄດ້ບອກແບບນັ້ນ ແລະເລື່ອງນີ້ກໍບໍ່ກົງກັບປະຫວັດສາດ. ສາລານຸກົມບຣິແທນນິກາບອກວ່າ: “ຄວາມຄິດທີ່ວ່າພະວິນຍານບໍລິສຸດເປັນບຸກຄົນ . . . ມາຈາກສະພາແຫ່ງຄອນສະແຕນຕິໂນເປິນໃນປີ ຄ.ສ 381.” ຄຳສອນນີ້ເກີດຂຶ້ນຫຼັງຈາກອັກຄະສາວົກຄົນສຸດທ້າຍຕາຍໄປດົນກວ່າ 250 ປີແລ້ວ.
ເລື່ອງທີ່ເຈົ້າອາດຈະມັກ
ຄຳສອນທີ່ສຳຄັນໃນຄຳພີໄບເບິນ
ພະເຢຊູເປັນພະເຈົ້າບໍ?
ພະເຢຊູກັບພະເຈົ້າຜູ້ມີພະລັງອຳນາດສູງສຸດເປັນຄົນດຽວກັນບໍ? ຫຼືເປັນສອງບຸກຄົນທີ່ແຍກຈາກກັນຢ່າງຈະແຈ້ງ?
