ຂ່າວດີທີ່ຂຽນໂດຍລູກາ 1:1-80

ເປີດ

ຂຽນຫາເທໂອຟີໂລ (1-4)
ຄັບຣີເອນບອກລ່ວງໜ້າເລື່ອງທີ່ໂຢຮັນຜູ້ໃຫ້ບັບເຕມາຈະເກີດ (5-25)
ຄັບຣີເອນບອກລ່ວງໜ້າເລື່ອງທີ່ພະເຢຊູຈະເກີດ (26-38)
ມາຣິອາໄປຫາເອລີຊາເບັດ (39-45)
ມາຣິອາຍົກຍ້ອງພະເຢໂຫວາ (46-56)
ການເກີດແລະການຕັ້ງຊື່ໂຢຮັນ (57-66)
ເຊຄາຣີຢາພະຍາກອນ (67-80)

1 ທ່ານເທໂອຟີໂລທີ່ນັບຖືຢ່າງສູງ. ມີຫຼາຍຄົນໄດ້ລວບລວມແລະບັນທຶກເລື່ອງກ່ຽວກັບເຫດການທີ່ເກີດຂຶ້ນ ເຊິ່ງພວກເຮົາຍອມຮັບວ່າເຊື່ອຖືໄດ້ແນ່ນອນ+ ² ເປັນເລື່ອງທີ່ພວກເຮົາໄດ້ຍິນມາຈາກຄົນທີ່ປະກາດເລື່ອງການປົກຄອງຂອງພະເຈົ້າ+ເຊິ່ງເຫັນເຫດການຕັ້ງແຕ່ທຳອິດ.+ ³ ຂ້ອຍເອງໄດ້ຕັ້ງໃຈຄົ້ນຄວ້າທຸກສິ່ງຕັ້ງແຕ່ຕົ້ນຢ່າງລະອຽດຖີ່ຖ້ວນ ແລະຮຽບຮຽງເລື່ອງຢ່າງຖືກຕ້ອງຕາມລຳດັບເພື່ອຂຽນສົ່ງມາໃຫ້ທ່ານ.+ ⁴ ທ່ານຈະໄດ້ໝັ້ນໃຈວ່າເລື່ອງທີ່ທ່ານໄດ້ຮັບການສອນນັ້ນເປັນຄວາມຈິງ.+ ⁵ ໃນສະໄໝທີ່ເຮໂຣດ*+ເປັນກະສັດແຂວງຢູດາຍ ມີປະໂລຫິດຄົນໜຶ່ງຊື່ເຊຄາຣີຢາຢູ່ໃນກຸ່ມອາບີຢາ.+ ລາວມີເມຍຊື່ເອລີຊາເບັດທີ່ເປັນລູກຫຼານຂອງອາໂຣນ. ⁶ ພະເຈົ້າຖືວ່າທັງສອງຄົນເປັນຄົນດີແລະຮັບໃຊ້ເພິ່ນແບບບໍ່ມີບ່ອນຕິເລີຍ. ເຂົາເຈົ້າພະຍາຍາມເຮັດຕາມຄຳສັ່ງແລະກົດໝາຍຂອງພະເຢໂຫວາ*ທຸກຂໍ້. ⁷ ແຕ່ເຂົາເຈົ້າບໍ່ມີລູກຍ້ອນເອລີຊາເບັດເປັນໝັນ ແລະທັງສອງຄົນກໍເຖົ້າຫຼາຍແລ້ວ. ⁸ ເມື່ອຮອດຜຽນຂອງກຸ່ມເຊຄາຣີຢາຕ້ອງເຮັດໜ້າທີ່ປະໂລຫິດ+ຕໍ່ໜ້າພະເຈົ້າ ⁹ ເຂົາເຈົ້າກໍຈົກສະຫຼາກຕາມທຳນຽມຂອງປະໂລຫິດເພື່ອເລືອກຄົນທີ່ຈະເຜົາເຄື່ອງຫອມ+ແລະເຊຄາຣີຢາກໍຖືກເລືອກ ແລ້ວລາວກໍເຂົ້າໄປໃນວິຫານຂອງພະເຢໂຫວາ.*+ ¹⁰ ເມື່ອຮອດເວລາເຜົາເຄື່ອງຫອມ ປະຊາຊົນກໍພາກັນອະທິດຖານຢູ່ທາງນອກ. ¹¹ ທູດສະຫວັນຂອງພະເຢໂຫວາ*ມາຫາເຊຄາຣີຢາແລະຢືນຢູ່ເບື້ອງຂວາຂອງແທ່ນເຜົາເຄື່ອງຫອມ. ¹² ເມື່ອລາວເຫັນແບບນັ້ນ ກໍຕົກໃຈແລະຢ້ານຫຼາຍ. ¹³ ແຕ່ທູດສະຫວັນບອກລາວວ່າ: “ເຊຄາຣີຢາ ບໍ່ຕ້ອງຢ້ານ. ພະເຈົ້າໄດ້ຍິນຄຳອ້ອນວອນຂອງເຈົ້າແລ້ວ. ເອລີຊາເບັດເມຍຂອງເຈົ້າຈະໄດ້ລູກຊາຍ. ໃຫ້ເຈົ້າຕັ້ງຊື່ລາວວ່າໂຢຮັນ.+ ¹⁴ ເຈົ້າຈະມີຄວາມສຸກຫຼາຍ ແລະຫຼາຍຄົນຈະດີໃຈທີ່ເດັກນ້ອຍຄົນນີ້ເກີດມາ.+ ¹⁵ ພະເຢໂຫວາ*ຈະຖືວ່າລາວເປັນຄົນສຳຄັນ.+ ລາວຕ້ອງບໍ່ກິນເຫຼົ້າແວງຫຼືເຄື່ອງດື່ມທີ່ມຶນເມົາ+ ແລະພະເຈົ້າຈະເອົາພະລັງບໍລິສຸດຂອງເພິ່ນໃຫ້ລາວຕັ້ງແຕ່ຍັງຢູ່ໃນທ້ອງແມ່.+ ¹⁶ ລາວຈະຊ່ວຍຄົນອິດສະຣາເອນຈຳນວນຫຼາຍໃຫ້ກັບມາຫາພະເຢໂຫວາ*ພະເຈົ້າຂອງເຂົາເຈົ້າ.+ ¹⁷ ພະເຈົ້າຈະໃຊ້ລາວໃຫ້ໄປກ່ອນເພິ່ນ ແລະໃຫ້ລາວມີນ້ຳໃຈແລະມີກຳລັງຄືກັບເອລີຢາ+ເພື່ອຈະເຮັດໃຫ້ໃຈຂອງພໍ່ເປັນຄືກັບໃຈຂອງລູກ*+ ແລະເຮັດໃຫ້ຄົນທີ່ຫົວແຂງມີສະຕິປັນຍາແລະເຮັດສິ່ງທີ່ຖືກຕ້ອງ. ລາວຈະກຽມຊົນຊາດໜຶ່ງໄວ້ໃຫ້ພ້ອມສຳລັບພະເຢໂຫວາ.”*+ ¹⁸ ເຊຄາຣີຢາເວົ້າກັບທູດສະຫວັນວ່າ: “ຂ້ອຍຈະຮູ້ໄດ້ແນວໃດວ່າເລື່ອງນີ້ຈະເກີດຂຶ້ນແທ້? ຂ້ອຍເອງກໍເຖົ້າປານນີ້ແລ້ວ ແລະເມຍຂອງຂ້ອຍກໍເຖົ້າຫຼາຍຄືກັນ.” ¹⁹ ທູດສະຫວັນຈຶ່ງຕອບລາວວ່າ: “ຂ້ອຍແມ່ນຄັບຣີເອນ+ ຂ້ອຍຮັບໃຊ້ຢູ່ຕໍ່ໜ້າພະເຈົ້າຕະຫຼອດ.+ ເພິ່ນໃຊ້ຂ້ອຍໃຫ້ມາບອກຂ່າວດີນີ້ກັບເຈົ້າ. ²⁰ ແຕ່ຍ້ອນເຈົ້າບໍ່ເຊື່ອຄຳເວົ້າຂອງຂ້ອຍ ເຈົ້າຈະປາກກືກແລະເວົ້າບໍ່ໄດ້ຈົນກວ່າເລື່ອງທັງໝົດນີ້ເກີດຂຶ້ນ. ເມື່ອຮອດເວລາກຳນົດໄວ້ ສິ່ງທີ່ຂ້ອຍບອກຈະເກີດຂຶ້ນແທ້.” ²¹ ໃນຕອນນັ້ນ ປະຊາຊົນທີ່ຖ້າເຊຄາຣີຢາຢູ່ທາງນອກກໍແປກໃຈວ່າເປັນຫຍັງລາວຈຶ່ງເຂົ້າໄປໃນວິຫານດົນແທ້. ²² ເມື່ອເຊຄາຣີຢາອອກມາກໍເວົ້າບໍ່ໄດ້ ປະຊາຊົນຈຶ່ງຮູ້ວ່າລາວໄດ້ເຫັນບາງຢ່າງທີ່ເໜືອທຳມະຊາດ*ຢູ່ໃນວິຫານ. ຈາກນັ້ນ ລາວກໍມີແຕ່ເຮັດທ່າທາງບອກເຂົາເຈົ້າ. ²³ ຫຼັງຈາກເຊຄາຣີຢາຮັບໃຊ້ຢູ່ວິຫານ*ຈົນຄົບຕາມກຳນົດແລ້ວ ລາວກໍເມືອເຮືອນ. ²⁴ ຫຼັງຈາກນັ້ນບໍ່ດົນ ເອລີຊາເບັດເມຍຂອງເຊຄາຣີຢາກໍຖືພາແລະລາວບໍ່ໄດ້ອອກຈາກເຮືອນໄປໃສເລີຍເປັນເວລາ 5 ເດືອນ. ເອລີຊາເບັດເວົ້າວ່າ: ²⁵ “ເບິ່ງສິ່ງທີ່ພະເຢໂຫວາ*ເຮັດສຳລັບຂ້ອຍໃນຕອນນີ້ແມ້! ເພິ່ນສົນໃຈຂ້ອຍແລ້ວ ຂ້ອຍບໍ່ຕ້ອງອັບອາຍຄົນອື່ນອີກຕໍ່ໄປ.”*+ ²⁶ ເມື່ອເອລີຊາເບັດຖືພາເຂົ້າເດືອນທີ 6 ພະເຈົ້າສົ່ງທູດສະຫວັນຄັບຣີເອນ+ໃຫ້ມາເມືອງນາຊາເຣັດໃນແຂວງຄາລີເລ ²⁷ ເພື່ອມາຫາສາວບໍລິສຸດ+ຄົນໜຶ່ງຊື່ມາຣິອາ. ລາວໝັ້ນກັບຜູ້ຊາຍຄົນໜຶ່ງຊື່ໂຢເຊັບທີ່ເປັນລູກຫຼານຂອງດາວິດ.+ ²⁸ ທູດສະຫວັນມາຫາລາວແລະເວົ້າວ່າ: “ສະບາຍດີ ມາຣິອາ. ເຈົ້າເປັນຄົນທີ່ພະເຢໂຫວາ*ພໍໃຈຫຼາຍ. ເພິ່ນຢູ່ກັບເຈົ້າສະເໝີ.” ²⁹ ເມື່ອໄດ້ຍິນທູດສະຫວັນເວົ້າແບບນັ້ນ ມາຣິອາກໍແປກໃຈ. ລາວຢາກຮູ້ວ່າຄຳເວົ້າຂອງທູດສະຫວັນໝາຍຄວາມວ່າແນວໃດ. ³⁰ ທູດສະຫວັນຈຶ່ງບອກລາວວ່າ: “ມາຣິອາ ບໍ່ຕ້ອງຢ້ານ. ພະເຈົ້າພໍໃຈເຈົ້າແທ້ໆ. ³¹ ຖ້າເບິ່ງເດີ້! ເຈົ້າຈະຖືພາແລະເກີດລູກຊາຍ.+ ໃຫ້ຕັ້ງຊື່ລູກວ່າເຢຊູ.+ ³² ລາວຈະເປັນຜູ້ຍິ່ງໃຫຍ່+ແລະຈະຖືກເອີ້ນວ່າລູກຂອງພະເຈົ້າສູງສຸດ.+ ພະເຢໂຫວາ*ພະເຈົ້າຈະຍົກບັນລັງຂອງດາວິດປູ່ຍ່າຕານາຍຂອງລາວໃຫ້ລາວ.+ ³³ ລາວຈະເປັນກະສັດປົກຄອງລູກຫຼານຂອງຢາໂຄບຕະຫຼອດໄປ ແລະການປົກຄອງຂອງລາວຈະບໍ່ມີວັນສິ້ນສຸດເລີຍ.”+ ³⁴ ແຕ່ມາຣິອາເວົ້າກັບທູດສະຫວັນວ່າ: “ຊິເປັນໄປໄດ້ແນວໃດ ຍ້ອນຂ້ອຍບໍ່ເຄີຍນອນນຳຜູ້ຊາຍຈັກເທື່ອ?”+ ³⁵ ທູດສະຫວັນຕອບລາວວ່າ: “ເຈົ້າຈະໄດ້ຮັບພະລັງບໍລິສຸດ+ ແລະລິດເດດຂອງພະເຈົ້າສູງສຸດຈະປົກປ້ອງເຈົ້າໄວ້. ດັ່ງນັ້ນ ເດັກນ້ອຍທີ່ເກີດມາຈະຖືກເອີ້ນວ່າເປັນຜູ້ບໍລິສຸດ+ແລະເປັນລູກຂອງພະເຈົ້າ.+ ³⁶ ຕອນນີ້ເອລີຊາເບັດພີ່ນ້ອງຂອງເຈົ້າກໍຖືພາໄດ້ 6 ເດືອນແລ້ວ. ລາວກຳລັງຈະໄດ້ລູກຊາຍທັງໆທີ່ເຖົ້າແລ້ວແລະຄົນກໍເຄີຍເວົ້າວ່າລາວເປັນໝັນ. ³⁷ ພະເຈົ້າເຮັດໃຫ້ທຸກຢ່າງເປັນໄປໄດ້.”*+ ³⁸ ມາຣິອາເວົ້າວ່າ: “ຂ້ອຍເປັນທາດຍິງທີ່ຮັບໃຊ້ພະເຢໂຫວາ.* ຂໍໃຫ້ເປັນໄປຕາມທີ່ທ່ານເວົ້າ.” ແລ້ວທູດສະຫວັນກໍໄປຈາກລາວ. ³⁹ ຫຼັງຈາກນັ້ນ ມາຣິອາກໍຟ້າວໄປເມືອງໜຶ່ງໃນເຂດພູທີ່ຢູ່ໃນເຂດຂອງຕະກູນຢູດາ. ⁴⁰ ເມື່ອໄປຮອດ ລາວກໍເຂົ້າໄປໃນເຮືອນຂອງເຊຄາຣີຢາແລະທັກທາຍເອລີຊາເບັດ. ⁴¹ ເມື່ອເອລີຊາເບັດໄດ້ຍິນສຽງທັກທາຍຂອງມາຣິອາ ລູກທີ່ຢູ່ໃນທ້ອງຂອງລາວກໍດີ້ນ ແລະລາວກໍໄດ້ຮັບພະລັງບໍລິສຸດ. ⁴² ເອລີຊາເບັດຈຶ່ງເວົ້າດັງໆວ່າ: “ເຈົ້າໄດ້ຮັບພອນຈາກພະເຈົ້າຫຼາຍກວ່າຜູ້ຍິງຄົນອື່ນ ແລະລູກທີ່ຢູ່ໃນທ້ອງຂອງເຈົ້າກໍໄດ້ຮັບພອນຄືກັນ. ⁴³ ຂ້ອຍໄດ້ຮັບກຽດຫຼາຍແທ້ໆທີ່ແມ່ຂອງຜູ້ເປັນນາຍຂອງຂ້ອຍມາຢາມຂ້ອຍຮອດເຮືອນ. ⁴⁴ ເບິ່ງແມ້! ເມື່ອຂ້ອຍໄດ້ຍິນສຽງທັກທາຍຂອງເຈົ້າ ລູກທີ່ຢູ່ໃນທ້ອງຂອງຂ້ອຍກໍດີ້ນດ້ວຍຄວາມດີໃຈ. ⁴⁵ ເຈົ້າມີຄວາມສຸກທີ່ເຊື່ອເລື່ອງນີ້ ເພາະທຸກສິ່ງທີ່ພະເຢໂຫວາ*ບອກເຈົ້າຈະເກີດຂຶ້ນແທ້ແນ່ນອນ.” ⁴⁶ ມາຣິອາເວົ້າວ່າ: “ຂ້ອຍຂໍສັນລະເສີນພະເຢໂຫວາ.*+ ⁴⁷ ຂ້ອຍມີຄວາມສຸກຫຼາຍແທ້ໆຍ້ອນພະເຈົ້າຂອງຂ້ອຍເປັນຜູ້ຊ່ວຍໃຫ້ລອດ.+ ⁴⁸ ເພິ່ນໃຫ້ຄວາມສຳຄັນກັບທາດຍິງຜູ້ຕ່ຳຕ້ອຍຂອງເພິ່ນຫຼາຍປານນີ້.+ ຈາກນີ້ໄປ ຄົນທຸກຍຸກທຸກສະໄໝຈະເວົ້າວ່າຂ້ອຍເປັນຄົນທີ່ມີຄວາມສຸກ.+ ⁴⁹ ພະເຈົ້າຜູ້ມີລິດເດດໄດ້ເຮັດໃຫ້ສິ່ງອັດສະຈັນເກີດຂຶ້ນກັບຂ້ອຍ ແລະຊື່ຂອງເພິ່ນກໍບໍລິສຸດ.+ ⁵⁰ ເພິ່ນເມດຕາຄົນທີ່ຢ້ານຢຳເພິ່ນຕະຫຼອດທຸກຍຸກທຸກສະໄໝ.+ ⁵¹ ເພິ່ນໃຊ້ລິດເດດເຮັດສິ່ງທີ່ຍິ່ງໃຫຍ່. ເພິ່ນເຮັດໃຫ້ຄົນຈອງຫອງກະຈັດກະຈາຍກັນໄປ.+ ⁵² ເພິ່ນປົດຜູ້ມີອຳນາດລົງຈາກບັນລັງ+ແລະເຮັດໃຫ້ຄົນຕ່ຳຕ້ອຍໄດ້ຮັບກຽດ.+ ⁵³ ເພິ່ນເຮັດໃຫ້ຄົນຫິວໄດ້ກິນແນວດີໆຈົນອີ່ມ+ ແຕ່ໃຫ້ຄົນຮັ່ງກັບໄປມືເປົ່າ. ⁵⁴ ເພິ່ນມາຊ່ວຍຄົນອິດສະຣາເອນຜູ້ຮັບໃຊ້ຂອງເພິ່ນ ຍ້ອນເພິ່ນບໍ່ລືມຄຳສັນຍາວ່າຈະສະແດງຄວາມເມດຕາ+ ⁵⁵ ຕໍ່ອັບຣາຮາມແລະລູກຫຼານຂອງລາວ+ຕະຫຼອດໄປຕາມທີ່ເພິ່ນໄດ້ບອກກັບປູ່ຍ່າຕານາຍຂອງພວກເຮົາ.” ⁵⁶ ມາຣິອາຢູ່ກັບເອລີຊາເບັດປະມານ 3 ເດືອນແລ້ວກໍກັບເມືອເຮືອນຂອງລາວ. ⁵⁷ ເມື່ອຮອດຕອນເກີດລູກ ເອລີຊາເບັດກໍເກີດລູກຊາຍ. ⁵⁸ ເມື່ອເພື່ອນບ້ານແລະຍາດຕິພີ່ນ້ອງຂອງລາວໄດ້ຂ່າວວ່າພະເຢໂຫວາ*ເມດຕາລາວຫຼາຍປານນີ້ ເຂົາເຈົ້າຈຶ່ງມາສະແດງຄວາມຍິນດີນຳລາວ.+ ⁵⁹ ໃນມື້ທີ 8 ເຂົາເຈົ້າກໍມາຕອນທີ່ແອນ້ອຍຈະຮັບສິນຕັດ*+ ແລະຈະຕັ້ງຊື່ແອນ້ອຍວ່າເຊຄາຣີຢາຕາມຊື່ພໍ່. ⁶⁰ ແຕ່ຜູ້ເປັນແມ່ບອກວ່າ: “ບໍ່ໄດ້! ລາວຕ້ອງຊື່ໂຢຮັນ.” ⁶¹ ເຂົາເຈົ້າກໍເວົ້າກັບລາວວ່າ: “ຍາດຕິພີ່ນ້ອງຂອງເຈົ້າບໍ່ມີຜູ້ໃດມີຊື່ແບບນີ້ໄດ໋.” ⁶² ແລ້ວເຂົາເຈົ້າກໍເຮັດທ່າທາງເພື່ອຖາມພໍ່ຂອງແອນ້ອຍວ່າຢາກໃຫ້ລູກຊື່ຫຍັງ. ⁶³ ເຊຄາຣີຢາຈຶ່ງຂໍໃຫ້ເອົາກະດານມາແລະຂຽນວ່າ: “ຊື່ໂຢຮັນ.”+ ທຸກຄົນກໍແປກໃຈ. ⁶⁴ ທັນໃດນັ້ນ ລາວກໍເວົ້າໄດ້ເປັນປົກກະຕິ+ແລະສັນລະເສີນພະເຈົ້າ. ⁶⁵ ຄົນທີ່ຢູ່ແຖວນັ້ນກໍພາກັນຢ້ານຫຼາຍ ແລະເລື່ອງທັງໝົດນີ້ກໍຊ່າລືກັນໄປທົ່ວເຂດພູໃນແຂວງຢູດາຍ. ⁶⁶ ຄົນທີ່ໄດ້ຍິນເລື່ອງນັ້ນກໍຄິດໃນໃຈວ່າ: “ແອນ້ອຍຜູ້ນີ້ຈະເປັນແນວໃດເມື່ອໃຫຍ່ຂຶ້ນ?” ເຂົາເຈົ້າເວົ້າແນວນີ້ຍ້ອນວ່າພະເຢໂຫວາ*ຢູ່ກັບແອນ້ອຍຜູ້ນີ້.* ⁶⁷ ຈາກນັ້ນ ເຊຄາຣີຢາພໍ່ຂອງແອນ້ອຍກໍໄດ້ຮັບພະລັງບໍລິສຸດແລະພະຍາກອນວ່າ: ⁶⁸ “ຂໍໃຫ້ພະເຢໂຫວາ*ພະເຈົ້າຂອງອິດສະຣາເອນໄດ້ຮັບການສັນລະເສີນ+ ຍ້ອນເພິ່ນໄດ້ສົນໃຈປະຊາຊົນຂອງເພິ່ນແລະໄດ້ຊ່ວຍເຂົາເຈົ້າໃຫ້ລອດ.+ ⁶⁹ ເພິ່ນໄດ້ສົ່ງຜູ້ຊ່ວຍໃຫ້ລອດທີ່ມີພະລັງເຂັ້ມແຂງ*+ມາໃຫ້ພວກເຮົາ. ລາວເປັນລູກຫຼານຂອງດາວິດຜູ້ຮັບໃຊ້ຂອງເພິ່ນ.+ ⁷⁰ ເພິ່ນບອກເລື່ອງນີ້ຜ່ານທາງຜູ້ພະຍາກອນທີ່ສັດຊື່ຂອງເພິ່ນຕັ້ງແຕ່ສະໄໝແຕ່ກີ້.+ ⁷¹ ເພິ່ນສັນຍາວ່າຈະຊ່ວຍພວກເຮົາໃຫ້ລອດຈາກສັດຕູແລະຈາກຄົນທີ່ຊັງພວກເຮົາ.+ ⁷² ເພິ່ນຈະເມດຕາພວກເຮົາຕາມທີ່ໄດ້ບອກໄວ້ກັບປູ່ຍ່າຕານາຍຂອງພວກເຮົາ ເພື່ອສະແດງວ່າເພິ່ນບໍ່ໄດ້ລືມສັນຍາສັກສິດ+ ⁷³ ທີ່ໄດ້ສາບານໄວ້ກັບອັບຣາຮາມປູ່ຍ່າຕານາຍຂອງພວກເຮົາ.+ ⁷⁴ ເພິ່ນຮັບປະກັນວ່າຈະຊ່ວຍພວກເຮົາໃຫ້ພົ້ນຈາກພວກສັດຕູ ແລະຈະໃຫ້ພວກເຮົາໄດ້ຮັບໃຊ້ເພິ່ນ*ໂດຍບໍ່ຕ້ອງຢ້ານ ⁷⁵ ເພື່ອພວກເຮົາຈະພັກດີແລະເຊື່ອຟັງເພິ່ນ*ຕະຫຼອດຊີວິດຂອງພວກເຮົາ. ⁷⁶ ສ່ວນໂຢຮັນລູກຂອງພໍ່ ຄົນຈະເອີ້ນລູກວ່າຜູ້ພະຍາກອນຂອງພະເຈົ້າສູງສຸດ. ພະເຢໂຫວາ*ຈະໃຊ້ລູກໃຫ້ໄປກ່ອນເພື່ອກຽມທາງຂອງເພິ່ນໄວ້.+ ⁷⁷ ເພິ່ນຈະໃຫ້ລູກໄປບອກປະຊາຊົນຂອງພະເຈົ້າວ່າເພິ່ນຈະຊ່ວຍເຂົາເຈົ້າໃຫ້ລອດໂດຍຍົກໂທດຄວາມຜິດໃຫ້ເຂົາເຈົ້າ.+ ⁷⁸ ເພິ່ນຈະເຮັດແນວນີ້ຍ້ອນອີ່ຕົນເຂົາເຈົ້າ. ຄວາມອີ່ຕົນນີ້ມາຈາກສະຫວັນຄືກັບແສງສະຫວ່າງຂອງມື້ໃໝ່. ⁷⁹ ແສງສະຫວ່າງນີ້ຈະສ່ອງໃສ່ຄົນທີ່ຢູ່ໃນຄວາມມືດແລະໃນເງົາຂອງຄວາມຕາຍ+ ແລະຈະນຳທາງພວກເຮົາໃຫ້ຍ່າງເທິງເສັ້ນທາງຂອງຄວາມສະຫງົບສຸກ.” ⁸⁰ ໂຢຮັນໃຫຍ່ຂຶ້ນແລະພະລັງຂອງພະເຈົ້າຊ່ວຍໃຫ້ລາວເຂັ້ມແຂງຂຶ້ນ. ລາວໄປຢູ່ບ່ອນກັນດານຈົນຮອດເວລາທີ່ລາວຕ້ອງອອກໄປປະກາດໃຫ້ຄົນອິດສະຣາເອນຟັງ.