Musamu wa tiari, bu nayizi bâ na mvula 13, tindiku tiani na Yehova tiayizi batika mu wola. Mbo ndieri monaka ti bampwana’ani ku lukolo ntiana timpwanza tieri nawu mu misamu miamiansoni, mpe mbo ndieri dingaka mu bâ na timpwanza tio. Mbo ndieri monaka ti misiku mia bibuti biani na mitieno mia Bakristo nkatika ngolo miena, mpe mbo ndieri monaka ti nsambululu ya Yehova dema yena. Ni bu sa ti ka nayizi’â tiyula ko tala ti Yehova kô kena, ka nayizi’â vutu bâ nandi penepene ko.

Ka nabika ko mu samuna, kâ ka ndieri’â vutu samunaka kwakwingi ko. Bu ndieri kwe samunaka, ka ndieri’â kubamaka ko, buna mbo ndieri wa monaka musamu wa mpasi mu batika timoko. Tisalu tiani ka tieri’â butaka mbutu ko, mpe ka tieri’â kuntâka nsayi ko; mio miamiansoni miayikama mu mbanzulu zani za mbi. Nayizi tiyula: ‘Bwe muntu wulendi tatamana mu samuna tumingu twatwansoni mpe ngonda zazansoni?’

Bu nayizi bâ na mvula 17, nayizi bâ na nsatu yayingi ya bâ na timpwanza. Ntiangu nakutika valize zani mu kwenda ku Australie. Bibuti biani biayizi bâ mu tiari bu ndieri kwendaka. Lwaka lweri  nawu, kâ mbo beri banzaka ti mbo naketi tatamana mu sarila Yehova.

Ku Australie, timpeve tiani tiayizi vutu tomo wola. Ka ndieri’â vutu kwendaka ku tukutakanu twatwansoni ko. Nayizi sa tindiku na ntwenia zeri na nsayi mu kwendaka ku tukutakanu mu nkokela ntiana meno, kâ mpimpa zeri landaka mbo tweri kwe nwaka malavu mpe mbo tweri kwe biembaka matinu mu boîte de nuit. Bu nidimbitilaka mu misamu mio, mbo nibakulaka ti kulu kumosi kweri nani mu matieleka kwakaka mu nza.

Kampe ha manima ma mvula zole, nayizi bwabana na mpangi yimosi ya yikento, na kondo kwa zaba wasa ti nabatika mu banza mu mpila yi ndieri natinaka luzingu lwani. Na mpangi za zikento za 5 tweri bâka nzo yimosi, mpe tabwana munkengi wa tizunga na mukento’andi, Tamara, mpe tayôkesa nawu lumingu lumosi. Mu ntangu bakala diandi bu dieri kipaka misamu mia timvuka, Tamara mbo keri yôkesaka ntangu na beto mu kwe sehe. Ntangu yo ya nazolo. Keri’â na nkakutu ko mpe ka wabâ musamu wa mpasi ko mu mu zonzesa. Nayizi yituku mu mona muntu we na timpeve tiatingi wuzololo mpe nsaka.

Tamara tiya twatwingi tweri nandi. Luzolo lwandi mu bungu dia matieleka na mu bungu dia tisalu tia samuna nsobolo lweri nataka kwe bantu bakaka. Nsayi yayingi yeri nandi mu sarila Yehova mu mutima’andi wawansoni, kâ meno ka ndieri’â na nsayi ko mu bungu ti ka ndieri’â tomo tihanaka ko mu tisalu tia Yehova. Ndiatulu’andi ya mbote na nsayi’andi ya matieleka yanata nsobolo mu luzingu lwani. Tifwani tiandi tiakunata mu banza matieleka ema ma mfunu: Yehova zololo ti beto bansoni tamusarila “mu nsayi” na “bu [tukwe] kawuri mu nsayi.”​—Mik. 100:2.

Weri nani nabâ na nsayi yeri na Tamara, kâ mu baka nsayi yo, wafwanakana nasa nsobolo za zinene. Ka nasoba ko mu pa-pulukusu, kâ nabatika mu sa nsobolo malembe-malembe. Nabatika mu kubamaka mu bungu dia tisalu tia samuna, ntangu zakaka mbo ndieri salaka tisalu tia mupasuri-nzila wa ntangu fioti. Mpila yo yakumbakisa mu lembo vutu  bâka na bunkuta mpe nabâ na lukwikulu mu me beni. Mu bungu ti Bibila ndieri vulu sarilaka mu tisalu tia samuna, nayizi tomo zolo tisalu tia samuna. Ha manima, mbo ndieri salaka tisalu tia mupasuri-nzila wa ntangu fioti ngonda zazansoni.

Nabatika mu sa tindiku na bantu ba mvula zazansoni beri tomo sarilaka ngolo zawu mu matieleka, mpe beri zoloko tisalu tiawu mu bungu dia Yehova. Tifwani tiawu tia mbote tiakumbakisa mu banza ka nti biyôkele mfunu kwe meno, mpe nabatika mu tangaka Bibila bilumbu biabiansoni. Nabatika mu tomo zolo tisalu tia samuna, ha manima nayizi bâ mupasuri-nzila wa ntangu zazansoni. Mu mbala’ani ya ntete tûka mivu, nayizi bâ wa sikama mpe mu nsayi; mu timvuka mpe nayizi bâ mu nsayi.

Ha manima ma mvula mosi nayizi bwabana na Alex, weri muntu wa nsayi wuzololo Yehova na tisalu tia samuna. Tibakisi tieri mu tisalu mpe mupasuri-nzila weri tûka mvula 6. Alex mpe wasala tisalu tia samuna tûka mwa ntangu ku mbuka yeri na nsatu bisamuni ku Malawi. Wayôkesa ntangu na bamisionere beri bifwani bia mbote kwe yandi, mpe bamutindisa mu tatamana mu tomo sarila Yehova na mu mu tûla ha tibuka tia ntete mu luzingu lwandi.

Mu 2003, Alex na meno tayizi kwelana, mpe tatatamana mu sala tisalu tia samuna tia ntangu zazansoni. Ndongosolo za mbote zazingi tayizi longoka, mpe Yehova watusakumuna mu mpila zazingi.

Mu 2009, batutambika mu kwe sala tisalu tia timisionere ku Timor oriental die hata dia fioti dia archipel indonésien. Tayizi yituku, nsayi yeri neto, kâ mpe bunkuta bweri neto. Ha manima ma ngonda 5, tatula ku Dili ye kapitale ya nsi yo.

Luzingu mu nzo’eto ya môna lwa swaswana lweri na luzingu lweto lwa ntama. Wafwanakana tayukunu na tikulu tia môna, na zu dia môna, na bidia bia môna mpe na mbelo ya môna. Mu tisalu tia samuna, mbo tweri vulu bwabanaka na bantu beri na  bumputu bwabwingi, balembo tomo sa lukolo peleko balembo sa lukolo mpe ba beri mwisaka mpasi. Mpe tayizi bwabana na bantu babingi beri na biwa mu nitu mpe beri na maniongo mu bungu dia muzingu na miangu. *

Diangana tisalu tia samuna tia nzitukulu tieri! Mu tifwani, nayizi bwabana na mwana wa mukento we na nkumbu Maria weri na mvula 13 mpe weri mu tiari. * Nguri’andi yafwa tûka bala ba mivu, mpe keri’â vulu monaka tata’andi ko. Ntiana bala bakaka ba beri mvula zimosi, Maria keri’â zabaka ko ka nti kaketi sa mu luzingu lwandi. Mbo nibambukaka Iumbu ti kadila bu keri kuntêlaka ka bwe keri monaka ku mutima. Kâ, ka ndieri’â bakulaka misamu mi keri tâka ko, mu bungu ti ka natizabila zu di keri zonzaka ko. Nasambila Yehova, namulomba kakumbakisa mu mu tindisa, mpe nabatika mu mu tangilaka matsonoko matindisaka. Mu mvula zeri landaka, namona ka bwe matieleka masobesela ndiatulu’andi, mpila yi keri monekenaka na luzingu lwandi lwalwansoni. Wayizi baka bateme, bwawu bu bantu bê nandi ba kalongesaka Bibila. Lumbu ti, Maria kanda dia dinene die nandi dia timpeve mpe mbo kamonaka ti yandi bazololo.

Yehova mbo kasakumunaka tisalu tia samuna ku Timor oriental. Ni bu sa ti bisamuni biabîngi mu mivu 10 kwa miayôkele babatusu, babingi bê mipasuri-nzila, bê bibakisi mu tisalu peleko bakuluntu. Bakaka mu mabiro ma mbangululu basalaka mpe mbo babakisaka mu bangula mikanda misikamanaka mu Bibila mu mazu mawu. Nsayi yayingi yeri bâka nani bu beri tangaka mikunga ku tukutakanu, bu ndieri monaka bidiri biawu bieri mu nsayi mpe bu beri kwizi bâka ndiku za Yehova.

Mbelo’eto ya ku Timor oriental ya nkatika ya swaswana yeri na ya ku Australie, kâ luzingu lwa nkatika lwa nsayi lweri. Ntangu zakaka, mbo tweri kotaka mu bus ya fioti ya fuluka mu bantu, na mbizi za yuma mu kati na mikuta mia ndunda mia ku zandu. Bilumbu biakaka mbo tweri twarisaka ndongokolo ya Bibila mu nzo ya fioti yeri na tiototo (humidité), yeri na yaninga diadingi, yeri na mutoto wu belembo lenga ciment mpe na nsusu zeri kwe dioke. Kâ ntono misamu mio mia mpasi, mbo ndieri vulu banzaka ti ‘musamu wa nzitukulu wena!’

Bu nibanzaka misamu mia ntama, mbo nitondaka bibuti biani biakundongesa nzila ya Yehova mpe biakunkorela, ni bu sa ti mu ntangu ya mpasi ya buntwenia bwani. Verse ya Bingana 22:6 yalungana kwe meno. Tata’ani na nguri’ani nsayi yibâka nawu mu bungu dia Alex na meno; nsayi yibâka nawu mpe mu mona ti Yehova sarila katusarilaka. Tûka 2016 mbo tusalaka mu tisalu tia tizunga ku teritware ya filiale ya Australasie.

Ka nikwikilaka ko ti ntangu yeri kô yi ndieri lembo zoloko tisalu tia samuna. Bwawu bu, tisalu tia samuna tia nzololo! Nayizi bakula ti ntono misamu mia mpasi mia luzingu, nsayi ya matieleka mu tisalu ti tusarilaka Nzambi mu mutima wawansoni yitûkaka. Diangana, mivu mia 18 mi tuyôkese mu tisalu tia Yehova na Alex, mio ni mivu miayôkele mu nsayi mu luzingu lwani. Bwawu bu, mbo nibakulaka matieleka ma misamu mia tâ Davide kwe Yehova ti: “Bô babansoni baswaminaka mu nge mbo bayangalala, ntangu zazansoni mbo bakawula mu nsayi. [. . .] Mbo bâ titeko tia nsayi tia bô bazololo nkumbu’aku.”​—Mik. 5:11.