PWONY ME 25
Atwero loyo tim me tuko kede koma me imuŋ niŋo?
“Acako tuku kede koma me imuŋ ame atye kede mwaka aboro. Icennere ate pwonynyo neno Obaŋa i kom kop man. Onwoŋo awinyo arac tutwal kare luŋ ame dok adok cen i tim man. “Apenyere kena kena ni, ‘Twere niŋo me Obaŋa imaro ŋat a bedo bala an?”—Luiz.
Acalo adwoggi mere, itwero donyo i tim me tuko kede komi me imuŋ. a Jo apol twero kobbo ni ginnoro arac iye pe. Gin opyem ni: “Pe wano ŋattoro.” Cite, tye tyen kop aber me gwokere i tim man. Akwena Paulo ocoo ni: “Pi manno, nek wunu doŋ oko gigi mogo a tye iyiwu . . . bala . . . miti me buto.” (Jo Kolocai 3:5) Tuko kede komwa me imuŋ pe neko miti me buto ento dok gal meddo ameda. Meddo i kom mannono, nen jammi magi ame lubo:
● Tuko kede komwa me imuŋ nyuto cuny me paro pi cobbo mitiwa dok tutwal. Me apor, ka ŋattoro tye a tuko kede kome me imuŋ, en doŋ luŋu wie i cobbo ka gin ame kome a mitto.
● Tuko kede komwa me imuŋ mio ŋattoro-ni neno jo ame pe obedo ico nyo dako bala en calo ginnoro keken, nyo bala gi-yomoro yic keken.
● Tam me paro pirwa kenwa ame odonyo i cunywa pi bedo tuko kede komwa me imuŋ twero wekko bedo tek me cobbo mitiwa me buto i nyom.
Akaka cobbo mitiwa me buto kun obedo tuko kede komwa me imuŋ, tutte me doŋŋo kit me jukere ken. (1 Jo Tecalonika 4:4, 5) Me konynyi timmo mannono, Baibul mio tam ni igwokere i ginnoro keken ame twero cakko tuggo mitini me buto. (Carokop 5:8, 9) Ento, kara ka doŋ idoko opi me tuko kede komi me imuŋ kono? Twero bedo ni doŋ itemo wekko ento pe olarre. Twero bedo ayot me yin ikobbo ni doŋ oloi oko, ni pe doŋ itwero kwo a lubere kede rwom me kit atira Obaŋa. Mannono aye kit ame awobi moro ame nyiŋe Pedro onwoŋo nenne kede. En okobo ni: “I kare ame adok dok cen, awinyo arac tutwal.” “Atamo ni onwoŋo doŋ pe obino timma kica pi gin ame onwoŋo atimo. Anwoŋo ni tek tutwal me lego.”
Ka mannono aye kit ame iwinyo kede, bed kede tekcuny. Gen pwod tye piri. Jo ayot apol—kede jo adoŋo—doŋ oloo tim me tuko kede komgi me imuŋ. Yin daŋ itwero loyo!
Lweny Kede Par me Bal
Kit ame doŋ oneno kede, jo ame opoto i bal me tuko kede komgi me imuŋ par me bal corre i komgi. Aboŋo akalakala moro, bedo kede “cuny acwer i yo Obaŋa” twero miyi teko me loyo kit arac. (2 Jo Korinti 7:11) Ento par ame okato kare pi bal twero bedo me oluŋtuke. Twero miyi ibedo kede turcuny ame te miyi mitto jallo lwenynyi oko.—Carokop 24:10.
Doŋ tutte me bedo kede neno ame tye atir. Tuko kede komwa me imuŋ obedo tim cilo. Twero miyi doko ‘opii a miti kede yomcuny/raa apapat,’ dok doŋo cuny arac. (Tito 3:3) I tuŋcel, tuko kede komwa me imuŋ pe obedo tim me buto arac tutwal, bala buto i kin jo ame pe onyomere. (Juda 7) Ka itye kede peko me tuko kede komi me i muŋ, pe mitte ni ibed kede cwercuny okato kare ni itimo bal ame pe obino timmi kica iye. Agam pi peko man tye ni myero ikwer cuny ame pyette pi tim me buto dok pe ijal lwenynyi!
Yot tutwal me bedo kede turcuny iŋe dok cen. Ka mannono otimere, ket i cunyi kop a tye i Carokop 24:16: ‘Ŋat ame kite atira twero rette kadi naka tyen abiro twal, cite pwod ya oko malo; ento jo akitegi reco can retogi oko atwal.’ Jer dok cen anok pe weki doŋ idoko ŋat akite arac oko. Doŋ pe ijal. Akaka mannono, keboro ŋo odwoki cen, eka ite gwokere i nwoyo ballono.
Kwany kare me tam atut i kom mar kede kica Obaŋa. Acoo Jabuli Daudi, ame onwoŋo pe welo i bedo kede goro, okobo ni: ‘Kit acalo papo nyuto kede kica baŋ awobe mere, Jeova nyuto kica baŋ jo ame lwore. Pien en ikome ŋeo kit ame ocweowa kede, en ŋeo aber ni wan obedo apua.’ (Jabuli 103:13, 14) Tye ateni ni, Jeova paro gorowa me bal alaka dok tye ‘atera me timmowa kica.’ (Jabuli 86:5) Ituŋcel, en mito ni wan oket tek me timmo alokaloka i kwowa. Doŋ tyelo tyelo aŋo ame itwero kwanynyo wek ilo kit arac?
Keboro jammi ame igalo kede waŋi. Yin imaro nenno cinema nyo yik me telebijon nyo limmo kabedo me intanet ame tugo miti me buto? Acoo Jabuli olego kede ryeko baŋ Obaŋa ni: ‘Kur imia abed nenno jammi atata ame konygi mom.’ b—Jabuli 119:37.
Ket tammi i kom jammi okene. Akricitayo moro ame nyiŋe William omio tam ni: “Ame pwod pe iwoto i kabuto, kwan ginnoro ame kubere kede jammi me cuny. Pire tek tutwal ni tam me agikki pi nino moro-ni bed en ame obedo me cuny.”—Jo Pilipi 4:8.
Kob kede ŋattoro i kom peko-nono. Lewic twero miyo bedo atek piri me kello imuŋ me kop man baŋ ŋattoro. Cite, timmo amannono twero konynyi me loyo kodi kittono! Mannono aye gin ame Akricitayo moro ame nyiŋe David oniaŋ iye. “Akobo kede abaawa wan aryo,” en okobo ni. “Wia mom bino wil i kom gin ame en okobba. Kede bwonyo i waŋe, en okobo ni, ‘Imio cunya yom tutwal i komi.’ En onwoŋo ŋeo tekcuny ame onwoŋo mitte me kobbe koppono. Man onwoŋo obedo cukoro cuny ame amito dok okonya me mokko tam me timmo doŋ aber.
“Abaawa te nyutta ginacoa mogo anok me konynya nenno ni onwoŋo pwod pe ‘awoto abor tutwal,’ kede dok ginacoa okene me nenno ni aniaŋ rac a balla. En okobba ni ‘gwok imuŋŋono’ tuno naka i nino moro okene, eka dok ote kop i ye. En okobba ni pe awek mia goro tutwal ka ajer adok cen, ento ni ater kare moro alalac aboŋo dok donyo i ballono i kare moro okene.” David ogiko koppere niŋo? En okobo ni: “Miyo ŋattoro ŋeyo pekona kede konynya obedo me kony adwoŋ akato.” c
I PWONY AME LUBO
Tim me buto i yo me odal pe obedo gi-cino. Nen piŋo.
[Coc i tere piŋ]
a Pe myero ruc tuko kede komwa me imuŋ kede miti me buto ame bino pire kene aboŋo ginnoro i tuggo. Me apor, awobi moro twero coo odikko ame yie i moo ni ecobo miti mere me buto nyo ame pig kome me ico oony i kabuto. I kite- acellono, anyira mogo twero nwoŋŋo ni mitigi me buto otugere pire kene, tutwallere i ŋe nyo ame pwod pe oneno two dwegi. Ituŋcel, tuko kede komwa me imuŋ kwako tuggo mitiwa me buto apirwa-kenwa.
b Pi ŋec okene, nen Volume 2, Dul me 33.
c Pi ŋec okene, nen Volume 2, pot papara 239-241.
GINACOA ME WI PWONY
“Cac doŋ oko agoma yic a jo ayot, ento yeny kite atir, iyee, mar, kuc, karacel i jo ame lwoŋo nyiŋ Rwot kede cuny aler.”—2 Temoteo 2:22, NWT
TAM
Leg ame lyeto me cobbo mitini pwod pe odoko atek. Peny Obaŋa Jeova me miyi “teko ame loo kit teko moro luŋ” me loyo abita.—2 Jo Korinti 4:7, NWT
ANAKA ONWOŊO IŊEO . . . ?
Ŋattoro keken agoro twero ŋoye oko i lyeto me cobbo miti mere me buto. Ento ico nyo dako ikokome nyuto cuny me jukere ken akadi naka ka tye kene.
GI-ME ATIMA!
Atwero ketto tamma i kom jammi acil ka ․․․․․
Akaka nyoye i lyeto me cobbo mitina me kom, abino ․․․․․
Gin ame amito penynyo onywalla iye i kom kop man obedo ․․․․․
ITAMO NIŊO IYE?
● Piŋo pire tek me poyo ni Jeova tye “atera me timmo kica”?—Jabuli 86:5.
● Kit ame Obaŋa, ame ocweo miti me buto i komwa, daŋ kobo ni myero idoŋ kit me jukere keni-ni, gen aŋo ame en tye kede i komi?
[Ŋec a pire tek]
Cakere anaka aloo peko-ni, atwero doŋ bedo kede cuny aler i nyim Jeova, dok mannono obedo gin ame pe atwero poro kede ginnoro!’’—Sarah
[Cal]
Ka itye iŋwec eka ite rette pe te koppere ni myero dok i cak ŋwec acaka—onyo dok cen i tim me tuko kede komi me imuŋ pe jwao doŋo me cuny ame onwoŋo doŋ itimo
