Pakuba Bakaboni ba Yehova, tukubomba ivinthu ivyakughomya imbumba zyitu sona ni zyabapalamani bitu. Tukumuchindika u Chala yo akandisya imbumba. (Ubwandilo 2.21-24; Aba Efeso 3.14, 15) Mu Bayibolo muli ubulongozi bo bwavwa abanthu pachisu chosi ukuti babe ni mbumba izyakughoma sona izyakuhoboka.

 Tukubomba chilichosi cho tungakwanisya ukuti tubombezye ubulongozi ubwa mu Bayibolo, ukubomba bunubu kukutwavwa ukuti tube swe balume, abachi sona abapapi abiza. (Isya Mbupingamu 31.10-31; Aba Efeso 5.22–6.4; 1 Timoti 5.8) Amahala gho ghakwayiwa mu Bayibolo ghakwavwa sona abanthu aba mumbumba bo bapambanite amachalichi ukuti bikalaghe akiza. (1 Pitala 3.1, 2) Ennya vyo abanthu bamo bakanena bo uwamwabo uwa musendwa aba we Kaboni wa Yehova:

•   “Imyaka 6 iyabwandilo musendwa tukalimbanagha bulo. Bo u Ivete aba we Kaboni wa Yehova akiza aba walughano sona mufisalyoyo. Ivi vikavwa ukuti isendwa yitu yitakamale”—Clauir, uwa ku Brazil.

•   “Nthakahoboka bo umulume wane u Chansa anda pakumanyila Ibayibolo na Bakaboni ba Yehova, ichifukwa nkhinong’onagha ukuti bakumazya isendwa zya banthu. Ukufuma pa kabalilo kala, namanya ukuti Ibayibolo lyavwa sana imbumba yitu.”—Agness, uwa ku Zambia.

 Nanthi tuli mu bulumbilili tukulangizya abapalamani bitu ubwiza bwa kubombezya ifundo zya mu Bayibolo nanthi bakulonda

•   Ukusala akiza uwamwabo uwa musendwa

•   Ukwikala akiza po basendana bulo

•   Ukuti bakolelanaghe na bakamu babo

•   Ukuti basungaghe akiza indalama

•   Ukuleka ukulimbana

•   Ukuti bamanyile vyo vingabavwa ukuti bahobokelanaghe

•   Ukubamanyisya abana

 Akabalilo kamo vingabombiwa. Umwakufwanikizya, mu 1998 ikampani yimo iya Sofres yikagha ukuti pa mbumba 20 zyo weka te we Kaboni wa Yehova, imbumba yoka yoyo yikayiwa ni nthamyo inkhulu.

 U Yesu akanenela zila ukuti bo bakukonkha vyo akumanyisya akabalilo kamo bakukomana ni nthamyo mu mbumba. (Matayi 10.32-36) Uwakumanya ivya mbili u Will Durant akazyaghannya ukuti mubulaghili ubwa Roma “Abakilisitu bakabapanga inongwa iyakuti bakumazya isendwa zya banthu,” a sona amasiku ghano bope Abakaboni ba Yehova bakubatamanthila. Ka ivi vikung’anamula ukuti Abakaboni ba Yehova bakumazya naloli isendwa?

 Pakudumula inongwa iyakuti Abakaboni ba Yehova bakumazya isendwa, ikhoti ilyakwenelezya ubwabuke ubwa banthu ilya ku Europe (European Court of Human Rights) likati abanthu bo bakumazya isendwa bakamu ba munthu uwa mu sendwa bo bakukana “ukwitikizya ukuti aliwesi ali nu bwabuke ubwakusala ichalichi sona ukubomba ivinthu ivya ku chalichi chache.” Ikhoti ili likanena sona ukuti: “Ivi vikubombiwa nkhani mu mbumba zyo abanthu bapambanite amachalichi sona Abakaboni ba Yehova batakusendapo ichigaba pakumazya isendwa zya banthu.” b Napo abanthu bangababombela ivinthu ivisita ubugholosu, Abakaboni ba Yehova bakukonkha ubulongozi bwa mu Bayibolo ubwakuti: ‘Utakatanizyanje ububibi pa bubibi. Yezya pakubomba ivinthu vivyo vyiza pamaso pa banthu bosi.’—Aba Loma 12.17, 18.

 Abakaboni ba Yehova bakukonkha ubulongozi bwa mu Bayibolo ubwakuti musendaghe “mwa Mwene,” cho chikung’anamula ukusenda umunthu yo mukusubila ivinthu ivyakuyana. (1 Aba Kolinti 7.39) Ululaghilo ulu lwa mu Bayibolo sona lwakwavwa. Umwakufwanikizya, inkhani yimo mu 2010 iya mutu uwakuti Journal of Marriage and Family yikanena ukuti “imbumba yo umulume nu muchi bakwiputa ichalichi choka’ yikuba yakukolelana sana. c

 Loli, Abakaboni batakulimbikisya abanthu bo uwamwabo uwa mu sendwa te we Kaboni wa Yehova ukuti bamazye isendwa yabo. Ibayibolo likunena ukuti: ‘Nanthi umukamu asendite umukolo yo atakusubila, sona akwitika ukwikala nawe, atakamulekaghe. Nanthi umukolo ali nu mwanavuli yo atakusubila loli akwitika ukwikala nawe atakamuleke umulume wache.’ (1 Aba Kolinti 7.12, 13) Abakaboni ba Yehova bakukonkha ululaghilo ulu.