Nyɔɔŋ ŋpum cho ŋ tɛɛmbuu naa kɔllo tau woŋ. Ipilɛ cho ni, te wanayɛi nɛi kɛɛ pɛ le yɔŋ ndɔ wɔɔŋndo malɔɔ, nduyɛ mbo sɔla solioo po o kundaa niŋ. Mɛɛ naŋ bii nyɛ Baabuiyo dimi a wana soliaa okɔɔ wo cho chɔm ni mɛɛ kpɛ naŋ kaala Mɛlɛka, nduyɛ miŋ diikuŋ nyɛ o dimi wo yɛ. * Ŋ yaasiaŋndɔ nyunala cho a hei okɔɔ laŋ.

Vɛɛ naŋ nɔ yɛ miŋ bii wana sɔla solioo o kundaa niŋndo? Baabuiyo dimi aa, “Wana o wana dimi pɛ maa wana laalaŋndo o cho ni, kɛ nduyɛ, mbo wa o niilu kaa ihinii nɔɔlɛiye niŋ, mbo luɛi hɔlteŋ o nyɛm pilaŋ niŋ, mbo sooluu nyɛm cheleŋndoŋ, mbo suaa diomnda wɔɔŋndaŋ a chaaŋaa nduaa waŋnda chieeya okɔɔ, mbo wa wana kolaa, mbo yɔŋ viileŋ, la muuliaŋ a wana waa lende le. La chal bɛɛ mi la de nyɛdiaa naapilɛ a ndu le.” (Kɔliŋtiaŋ Tasoo 5:​11, NW) Mi Baabuiyo hiau lachi a dimioo aa, “wana o wana lo o pɛɛku Kilitioo choo” le, “la yiya ndu o la nya lo chiɛi niŋ te. La yil ndu bɛɛ a ba le. Wana o wana yil ndu pɛ, mɛɛ nya ndu cho o yɔŋ wɔɔŋ koŋ niŋ ni.” (Chɔŋ Diiŋ Ndɔɔ 9-11) Ŋ nɔ kposoŋ miŋ tosa chaŋyɛi a wana soliaa o Mɛlɛka piɛiyo niŋ, ɔɔ o yelelaŋndo choo le. Bandu Mɛŋgɛlaa Tapioo 15, 1981, pei 25 dimi aa, “Dimioo kinɛi bɛɛ naŋ dimi ni aa, ‘Isɛ alɛɛ’, mɛɛ baltaŋ naŋ kandu laŋ dɔuwɔɔ a ndu ni. Nduyɛ, chaŋyɛi naŋ kandu vɛlɛ keŋ tosaa a ndu ni. Ŋ yeema pa miŋ kandu hei ndoo tosaa a wana soliaa?”

O bɛnda pa kpeekpei miŋ fafaŋ wana waa naa? Ei. O bɛnda le sabulaŋ La yaa. O tasoo cho ni, o chɔm maa ŋ cho Mɛlɛka o ba bɛŋgu, vɛlɛ a Diom ndɔɔ. O cho ko teleŋ nyɔɔ bɛnda a naa wo le naŋ diikuŋ Chɛhowa le, kɛ teleŋ naŋ komal simultaŋ o yoomu naa niŋndo bɛɛ. Kaala naŋ nɔ le Mɛlɛka wo nyindu naa ni miŋ bii sawala ndɔlaŋ. Ŋ nɔ vɛlɛ  miŋ sina maa Mɛlɛka kaalaa o cho ni, nduyɛ o cho sakpo. Le tɔnɔ naa sawala ndɔlaŋ la cho ni. (Aisaya 48:​17; Chɔŋ Tasoo 5:​3) O diiŋ ndɔɔ, te ŋ fafaŋ pɛ wana sɔla hoo solioo wo, o nɔla mbo sui naa, vɛlɛ a kundaa, kaa ndɔ wɔɔŋndo le. Nduyɛ diola kɛndɛlaŋ la wa kundaa choo. (Kɔliŋtiaŋ Tasoo 5:​6, 7) O yaa ndɔɔ, te ŋ bii pɛ sawala Baabuiyo kpiŋ a wana soliaa okɔɔ, i mala ndu tau. Te ŋ chɛl pɛ kɛɛsiaa wanaa chua chilaŋ o kundaa niŋnda, o pilaŋ wana soliaa kɔllo o ndoo kɛɛ le nda nilaŋ yaŋɔɔ wo. Te wana soliaa ve chaŋyɛi tosaa a wanaa kaala ndu wa le, o nɔla mbo chal mbo yiyaŋ a suɛi wɔɔŋ o tosa ve, nduyɛ mbo nuuviaa nɛilaŋ le mbo miiŋgu Chɛhowa o ibuŋ.—Luku 15:​17.

Kɛ te wanayɛi nɛi sɔla yɛ solioo? O hei niŋ, mi diikɔŋ naa o Chɛhowa lo sɔla simullo le wanayɛi nɛi sɔla hei solioo ve. Vɛɛ naŋ nɔ yɛ miŋ bii wanayɛi nɛi hei? Ŋ nɔla miŋ soo a nyɛ naŋ nɔ miŋ tosa wo kpou okɔɔ le. Kɛ, ŋ yaasiaŋndɔ sɔɔŋ kulloŋ ŋmuuŋ.

O teleŋndaŋ lapum niŋ, mi wanayɛi nɛi sɔla solioo ve wa wɔ kɛ a yuŋgoo latulu. Soli ndɔɔ chɔm naa maa o cho lɛ o yuŋgoo choo le le. O hiau lachi a walta ndoo tosa paandu o yuŋgoo niŋndaŋ. Kɛ, kaa ndɔ wɔɔŋndo chɔm maa o nɔ lɛ ichaŋya o Mɛlɛka piɛiyo niŋ a yuŋgu ndɔ laalaŋndo latulu le. Yuŋgu ndɔɔ nɔ lɛ mbo holnuŋ ndu o Mɛlɛka piɛiyo niŋ te. Le taamaseliiyo, te yuŋgoo wa pɛ pɛɛku leyuŋgoo mi wanayɛi ndɛi soliɛi wa loŋ, a nɔ ma chɛl mbo soo le. Te o wa pɛ chuaambɔ pɔmbɔ cho wɔ yuŋgu ndɔɔ o ba bɛŋgu wo sɔla solioo ni, wanaa velu ndu wa nɔ wɔ kɛ le ndu silaa, vɛlɛ a ndu miŋgioo o nɛi. O hei niŋ, a nɔ ma chɔm kaala ndaa le ma pɛɛku Baabuiyo a ndu latulu. *—Pulɔwaa 6:​20-22; 29:​17.

Lepum, wanayɛi num sɔla solioo ve, o ve o yuŋgu numndo choo kpeekpei le o fula le. Koŋ cho ni, o cho finya num a kala num te velu ndu le. Naapum, mi yuŋgoo yeema  le kɛɛsiaa o pum tosaa, a veelu wanayɛi ndɛi soliɛi le mbo wa ikɛi. Kɛ, o nɔ mbo hiu nda holnɔŋ mbo yiŋnuŋ leniŋ pɔŋgeŋ te. Le mi yuŋgu leKilisiɔŋndo chɔm maa o diikuŋ Mɛlɛka, vɛlɛ a kɔɔna ndɔɔ, a nɔ ma chɛl kɛɛsiaa cho o Baabuiyo niŋ a solioo okɔɔ wo. Diikɔŋ ndaa o Mɛlɛka lo mala wana soliaa o yuŋgoo niŋ le mbo chua sila o sɔla wo, nduyɛ mbo miiŋgu Mɛlɛka o ibuŋ. *—Hibuluiya 12:​11.