Kɔɔna Seiyaa Chɛhowaa ke wana o wana bɛɛleŋ te o hiŋ pɛ o di ŋ nɔ le yooŋgula numndaŋ ndo. Le sinaa mɛɛ kɔɔna nɔ Sawalaŋ le Yooŋgulaŋ Biyɔɔ Nyɛkɛndɛi yɛ, yandii chuku naŋ.

Sawalaŋ le Yooŋgulaŋ Biyɔɔ Nyɛkɛndɛi chɔm mɛɛ kɔɔna Seiyaa Chɛhowaa bii yooŋgula numndaŋ yɛ. Okoŋ kɔɔli, nɛila chɔmaala kpeekpeila tɛɛŋgei hei la ŋ tual kɔɔli laŋ, la cho la chɔmaa lebɛŋgu.

Tɛɛŋgei hei, Watchtower Bible and Tract Society of New York, Inc. (“Watchtower”), nɔ ndi ni. Kɔɔna cho Niu Yɔk wo. O cho le leyula le tɛɛŋgei hei kilaŋ te, kɛ, le walta Seiyaa Chɛhowaa tooloo le waŋnda Baabuiyo pɛɛkoo. Maasiila tosa mi tɛɛŋgei hei tosa wallo laŋ lapum Amɛlika la cho ni.

Te o yɔŋ pɛ ma yɔŋ yooŋgula numndaŋ o tɛɛŋgei hei, le sabu ŋ yɔŋ ndaŋ ndo koni o soliŋ ndaŋ kpeku ni.

Ŋ piɔu yooŋgula numndaŋ o wanaa cheleŋndo le, mɛɛ dɔɔ miŋ che maa o bɛnda le tosaa lende le miŋ tosa nyɛ ŋ dimul naa le tosaa wo, miŋ chɔm num tɛɛ tɛɛ, te koŋ te, mɛɛ miŋ nɔ laalaŋndo a tiindaŋndo kɛsɛ maa lende sawaa dimi ni. Mɛɛ dɔɔ miŋ che vɛlɛ maa le choola le viilaŋ kɛɛloo, te koŋ te, le waŋndo kɛɛloo maasiiyo tɛɛmboo. Te a soliŋ pɛ tɛɛŋgei hei kpeku, mɛɛ a chɛl le miŋ soliŋ yooŋgula numndaŋ kpeku o nɛila waa naa choo. “Watchtower” pisi yooŋgula num ndaŋ kposoŋ te. Nduyɛ, o tosa leyula a laŋ te, kɛlɛŋgaa mbo you wana laŋ.

Wana Yaa leYulaa. Teleŋndaŋ lapum, tɛɛŋgei hei cho nɔ fondaŋnda yaa num o tɛɛŋguŋ wana yaa leyulaa woŋ choo, o naŋ bii le naa makolaŋ solullo wo (le tamaseliiyo, le yaulaŋ poonyiaa o intanɛtiiyo choo). A cho sina maa a cho o tɛɛŋgii wana yaa leyulaa choo kanifuule, o cho nɔ kɔɔleŋ nduyɛ, nyɛ yaasial num tɛɛŋgeiyo bɛɛ siŋgaŋ. Te o wa pɛ miŋ chua wana yaa leyulaa, teleŋ o teleŋ, ŋ yaasiaa miŋ sina te mɛɛ nda bii yooŋgulaŋ yɛ chɛlaŋ a mɛɛ sawala naalaŋ la cho le yooŋgulaŋ biyɔɔ nyɛkɛndɛi yɛ. Te a nɔ pɛ nyunaa a sawala cho a wana yaa leyulaa okɔɔ laŋ, yandii tofa sawala nda nɔ laŋ o tɛɛŋgii ndɛi choo.

Mandaŋndo pila naŋ mandaŋ a yooŋgula numndaŋ ni. Lelaŋ, ŋ chue suɛi nduɛi a lamamɔɔ le. Ŋ manda yooŋgula numndaŋ teleŋ ŋ wa laŋ yɔŋndo wo. Ŋ soliŋ “Transport Layer Security” (TLS) kpeku le laŋ mandaa. Ŋ soliŋ nyɔŋ pum o kɔmpitɛiyo niŋ kpeku, ŋ wana nɔla ma fuulaŋ ba yoona yoona le woŋ, ŋ cho kpendekele woŋ, ŋ cho o maasiiyo niŋndo a mɛɛ sɔɔŋ nɔ miŋ kuɛ le yooŋgulaŋ mandaa yɛ le mɛɛ wanaa yaa a hiɔɔlu sina a yooŋgula ŋ yɔŋ naa laŋ okɔɔ le yɛ.

Adilɛsii ŋ soliŋ kpeku ma poonyial naa wo ko naŋ cho soliŋ kpeku ni le num poonyiallo o tɛɛŋgei hei niŋ. Le tamaseliiyo, te o yɔŋ pɛ ma puɛɛnuŋ diola ŋ dɔu laŋ, te koŋ te, pasiwɔɔdii numndo okoŋ ma nyuna le malaa, ŋ cho num mala. Ŋ cho num miŋgul poonyial o yooŋgula numpila soliŋ kpeku le sinaa a num okɔɔ o tɛɛŋgei hei niŋ ndaŋ choo.

Te o yɔŋ pɛ ma yɔŋgu toolu ikanioo o intanɛtiiyo choo, ŋ bii diola numndaŋ a yooŋgula tosa mi wana suukaŋ a numndaŋ. Te a yɔŋgu pɛ yau chuaa ikanioo le toolo, le miŋ chɛl toolu koŋ, ŋ soliŋ paawaa o intanɛtiiyo cho kpeku a nɛila cheleŋ chieeŋndo soliŋ kpekulaŋ. Ŋ kɛsul num yau num chuaa ŋkanioo a sɔɔŋ cho a ndu okɔɔ woŋ te, nimbolo num ŋ chua kanioŋ ndo le, ɔɔ sɔɔŋ cheleŋ cho a ndu o kɔɔ woŋ te. Wana chua toolu koŋ ndo, kɛsi yaula cho a toolu koŋ okɔɔ laŋ ni le wɔsioŋ tɔ. Muŋ cho ni, paale waŋndo yɔŋgu tooloo leŋ, mɛɛ kpɛ o yɔŋgu tooloo yɛ, a nɛi o yɔŋgu toolu koŋ ndo. Hei cho naa mala miŋ sina mɛɛ kpɛ tooloo cho yɛ, nduyɛ miŋ muli nyuna kɛ kɛ ŋ nyuna pɛ o teleŋ koŋ bɛŋgu. Ŋ cho num veelu le nyunaa a toolu cheleŋ okɔɔ le.

A yɔŋgu sɔɔŋ cheleŋ a numpila okɔɔ (mɛɛ diola numndaŋ la cho naa yɛ, fondaŋ ŋ cho wo, a nimbolo foŋ numndo) le sɔɔŋ cheleŋ o fulawɔ le tooloo yɔŋgoo a kuoo biyɔɔ okɔɔ (mɛɛ le pɛɛku Baabui ŋ yɔŋgu nyɛ le wo cho naa yɛ). Miŋ bii, miŋ kɛsi, nduyɛ miŋ soliŋ sɔɔŋ muŋ kpeku le sabu ŋ yɔŋgu muŋ le teleŋ ŋ yeema miŋ wa naa o ba wo kinɛi.

Miŋ sɔla sɔɔŋ cheleŋ o yoole mapuululeŋ choo te a kuɛ pɛ o tɛɛŋgii nɛi. Miŋ sɔla sɔɔŋ muŋ a “kukis,” “nɛila yoole mapuululeŋ” a sɔɔŋ cho o yoole mapuululeŋ choo maa ndu wo. Diomndo hoo kukis, ŋ soliŋ ndu kpeku mɛɛ naŋ soliŋ yuei mapuului cheleŋ kpeku yɛ, mɛɛ “local storage” cho naa yɛ.

Kukis. Maa tɛɛŋguŋ bɔɔbɔɔ, te a kuɛ pɛ o tɛɛŋgei hei, sɔɔŋ tiŋ cho fula maa “kukis” miŋ wa o foŋ numndo, o tabilɛtii numndo, ɔɔ o kɔmpitɛi numndo choo. Kukisiilaŋ la cho tau nduyɛ walta yɛ yɛlaŋ la tosa ni le num malaa ma chaa yoole mapuululeŋ soliŋ kpeku. Miŋ soliŋ kukis kpeku le naa chɔmndo te a soliŋ niŋ pɛ yoole mapuululeŋ kpeku ɔɔ le naa loonɔŋndo sɔɔŋ ŋ hɛli o tɛɛŋgei hei choo wo. Le tamaseliiyo suɛi maŋgalɛi ŋ hɛli ve cho wa i kɛsiaa o kukis le ma hɛli suɛi maŋgalɛi hei lɔɔ ŋ miiŋgu pɛ o tɛɛŋgei hei. Ŋ soliŋ kukis kpeku le yooŋgulaŋ piɔuwo le.

Kukisiila naŋ soliŋ kpeku o tɛɛŋgei hei laŋ la cho nɛilaŋ sala yaa:

1. Kukisiila Kpeekpei la Hiou Bɛnda Laŋ​—La mala num le ma soliŋ nɛilaŋ lapum kpeku o yoole mapuululeŋ choo, naapum le tɛɛŋgei hei kumbioo a yooŋgula cheleŋ yɔŋ ndo. Te kukisiilaŋ ndaŋ la ve le, a nɔla sɔɔŋ muŋ tosaa le, mɛɛ tooloo yɔŋgoo cho naa yɛ. Kukisiilaŋ ndaŋ la mala naa miŋ mala num a sɔɔŋ kpeekpei ŋ hauba le muŋ teleŋ ŋ cho wa yaasiaa o yoole mapuululeŋ cho wo. Kukisiilaŋ ndaŋ la kɛsi ŋsɔɔ a num okɔɔ le miŋ soliŋ muŋ kpeku le muŋ pisioo ɔɔ le naa loonɔŋndo maa a soliŋ niŋ Intanɛtiiyo kpeku le.

2. Kukisiila Tosa Wallo Laŋ​—La mala tɛɛŋgei le loonɔŋndo a chuaŋ chuala ŋ tosa laŋ (mɛɛ diola numndaŋ, suɛi maŋgalɛi, ɔɔ tanda ŋ cho wo) nduyɛ la mala num le chɔɔloo sinapɛŋgoo sɔlaa a mɛɛ ŋ soliŋ yoole mapuululeŋ kpeku yɛ.

3. Kukisiila Kɛsi Sɔɔŋ Ndaŋ​—La mala naa le sɔɔŋ sinaa mɛɛ kpɛ waŋnda soliŋ tɛɛŋgei hei kpeku yɛ, le tamaseliiyo, le sinaa wanaa wa o tɛɛŋgei ya a teleŋ nda chiiyo. Ŋ soliŋ sɔɔŋ mun kpeku kinɛi le hiouwɔɔ lachi a tɛɛŋgei hei soliŋndo kpeku.

Kukisiilaŋ lapum tɛɛŋgii nɛi toosiaa laŋ ni. La pum yɛ kunda cheleŋ toosiaa laŋ ni. Kukisiila taselaŋ kinɛi naŋ soliŋ kpeku ni le “Google reCAPTCHA” kumbioo. Ŋ soliŋ “Google reCAPTCHA” kpeku le yɛ yiɔɔ chɔmndo wanaa soliŋ ndu kpeku wa tɛɛŋ a kɔmpitɛila paaliaŋ tɛɛŋgeilaŋ. Yandii tofawɔ “Google’s privacy policy at https://www.google.com/intl/en/policies/privacy/.

Sɔɔŋ Nda Dimi o Tɛɛŋgei Yoŋ. Sɔɔŋ yɛ yɛ cho o tɛɛŋgii nɛi yoŋ nɔ yuei mapuuluei ma veelu ndi aa, sɔɔŋ nda dimi o tɛɛŋgei yoŋ. Sɔɔŋ mun mala naa le sɔɔŋ loonɔŋndo, naapum te waŋndo kuɛ pɛ o tɛɛŋgii nɛi. Sɔɔŋ nda dimi o tɛɛŋgei yoŋ chɔm wana nɛiyo le kɔlaŋ o tɛɛŋgei hei choo nduyɛ ma wa tofaa nyɛ ŋ kuɛ tosaa wo.

Mɛɛ ŋ soliŋ nɛi chɔmaa “IP” wo kpeku yɛ. Nɛi chɔmaa “IP” wo cho chɔm kɔmpitɛi numndo o intanɛtiiyo choo ni. Ŋ soliŋ nɛi chɔmaa “IP” wo kpeku le sinaa mɛɛ ŋ soliŋ kɔmpitɛi numndo kpeku yɛ nduyɛ le sinaa bahawɛila cho o tɛɛŋgei hei laŋ. Nduyɛ miŋ chɔɔlu hiouwɔɔ lachioo tosa le num malaa.

Chuaŋ Chua Numndo. Wana bɔɔbɔɔ kua o intanɛtiiyo choo wa chɛl num le ma nyumi kukis ɔɔ le ma sɔla silaa tuupa mi kukis wa o nyɛ num mapuuloo choo. Yandii miŋgi wɔ hɔlteŋ kei o nɛi chɔmaa ŋ sɔla le kɔlaŋ o intanɛtiiyo choo wo le sinaa mɛɛ ŋ tosa hei yɛ. Yandii kɛsiŋ o kɔl maa te o cho a kukis te a nɔla ma sɔla tɔnɔɔ o sɔɔŋ cho o tɛɛŋgii nɛi hei wo le.

Nyɛ nda veelu hoo aa “Scripting” ndo, ŋ soliŋ ndu kpeku le hiouwɔɔ lachioo tosaa a tɛɛŋgei. Ŋ soliŋ nyɛ mapuuloo hoo kpeku le sɔɔŋ sɔlaa chɔ chɔ o tɛɛŋgei. Ŋ soliŋ nyɛ nda veelu hoo aa “Scripting” ndo kpeku le sɔɔŋ dɔuwɔɔ o kɔmpitɛi numndo choo ɔɔ le sɔɔŋ naŋ nɔ di le woŋ sɔlaa num o ba le.

Wana cho “Active Scripting or JavaScript” soliŋ ndo kpeku wo nɔ mbo sina sɔɔŋ nyɛkɛndɛi a tɛɛŋgei hei okɔɔ. Wanaa bɔɔbɔɔ kua o Intanɛtiiyo choo wa tiuba le nɛiyo hoo soliŋndo kpeku kɛ o cho o tɛɛŋgoŋ fau le. Nyuna wana cho kɔlaŋ o intanɛtiiyo wo mbo mala num mɛɛ ŋ soliŋ nɛiyo hoo kpeku o tɛɛŋguŋ ŋ hɛli woŋ yɛ.

Te a soliŋ tɛɛŋgei hei kpeku pɛ, naapum le yaulaŋ hivioo, vidueilaŋ, ɔɔ diomnda nda chua laŋ, a yɔŋgu nyɛ o nyɛ le. O cho mɛɛ ma kumbi fɛŋ fondɛi o intanɛtiiyo choo, ma yɔŋgu tooloo, ɔɔ ma chɔm sɔɔŋ a numpila okɔɔ malaŋ ŋ sɔla tɔnɔɔ o tɛɛŋgei hei niŋ te. Kɛ o wa bɛɛ lende, te a kɛɛsiaa pɛ a kɔllo wulee le fondɛi kumbioo o intanɛtiiyo choo, ma yɔŋgu tooloo, ma nyuna le pɛɛku Baabuiyo, ɔɔ ma chɔm sɔɔŋ a numpila okɔɔ, o wɔu le. Chɛlɔɔ ŋ cho le kɛɛsiaa laŋ tolɔɔ kɔɔli a sɔɔŋ cho a kukis okɔɔ woŋ, fondaŋ nda yɛ yɛla nda cho ndu soliŋndo kpeku Amɛlika laŋ, fondaŋ nda o cho ba o ba fee laŋ, mɛɛ ŋ looku ndu sɔla yɛ, yɔŋ yɛ, a naa ŋ kɛsi sɔɔŋ a numpila okɔɔ o “Watchtower” lo a kɔɔnala cheleŋ mala Seiyaa Chɛhowaa o lɛŋii bɔɔbɔɔ niŋ le num malaa yɛ. Mɛɛ ŋ yeema malaa yɛ nda mala num ni. Le tamaseliiyo, te a yɔŋgu pɛ tooloo o kɔɔnaa lo o lɛŋndeŋ niŋ, mɛɛ a cho diola numndaŋ a sɔɔŋ wana looku num saalɔŋ ndoŋ kɔɔna koŋ ke sanaa a mɛɛ ŋ chɔm teleŋ ŋ wa toolo yɔŋgoo wo yɛ. Le tamaselii cheleŋ, te a nyuna pɛ le pɛɛku Baabuiyo, mɛɛ a cho diola numndaŋ yɔŋgɔɔ o lɛuvii Seiyaa Chɛhowaa le num malaa.

Te a yɔŋgu yooŋgoo a numpila okɔɔ ma chɔm e-mail adilɛsiiyo le, ma yɔŋgu tooloo, ɔɔ le tɔnɔ cheleŋ ŋ yeema sɔlaa o tɛɛŋgei heiyo, ŋ nɔla miŋ muli nyɛ ŋ nyuna le ndu wo le.

Te o bɛnda niŋ pɛ miŋ siŋga sawala naalaŋ a kukis okɔɔ, ŋ cho siŋgaŋndaŋ handɔɔ o peeleŋ ndeŋ choo le ma sina lɔɔlɔɔ sɔɔŋ naŋ nɔ woŋ a mɛɛ naŋ soliŋ muŋ kpeku yɛ.

A mɛɛ sawaa dimi yɛ, a cho nɔ dila cheleŋ le sinaa sanaa a sɔɔŋ numpila woŋ okɔɔ. Mun cho ni, dioo le ndu sɔlaa, siŋgaa, ɔɔ faŋaa sɔɔŋ numpila yɔŋgu miŋ wa o tɛɛŋgei yoŋ. Te a soliŋ pɛ sɔɔŋ muŋ kpeku o lɛŋnde numndeŋ niŋ, a cho chɔ mɛɛ ŋ looku naa saalɔŋ yɛ o fondaa hoo naŋ. Te a nɔ pɛ le nyɛ yɔŋgu le yaasiaa numndo, yandii dimul wana ŋ cho kioo wo maa num yɔŋgu ni le mbo poonyiaa diola numndaŋ o yau choo.