Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN GO KƆREJ YU WE YU GƐT PRƆBLƐM?

Wetin Go Kɔrej Wi we Wi Gɛt Prɔblɛm?

Wetin Go Kɔrej Wi we Wi Gɛt Prɔblɛm?

Wi kin gɛt difrɛn kayn prɔblɛm dɛn. Wi nɔ go ebul fɔ tɔk bɔt dɛn ɔl na ya, bɔt lɛ wi tɔk mɔ bɔt di 4 ɛgzampul dɛn we wi bin dɔn tɔk bɔt. Notis aw Gɔd dɔn rili kɔrej pipul dɛn we gɛt difrɛn prɔblɛm dɛn.

WE WI LƆS WI WOK

Wan man we nem Sɛt * tɔk se: “Mi ɛn mi wɛf bin lɔs wi wok di sem tɛm. Fɔ tu ia, na di smɔl smɔl tin dɛn we wi fambul dɛn bin de gi wi ɛn di smɔl smɔl wok dɛn we wi de du na in bin de ɛp wi fɔ manej wi layf. Dat bin mek mi wɛf we nem Prisila, in at rili pwɛl, ɛn a bin de fil lɛk se a nɔ gɛt wan yus.”

Sɛt bin se: “Wetin bin ɛp wi fɔ bia? Ɔltɛm, Prisila bin de mɛmba wetin Jizɔs tɔk na Matyu 6:​34. I bin se wi nɔ fɔ de wɔri bɔt tumara bikɔs ɛvride gɛt in yon wɔri. Ɛn di pre we Prisila bin de pre bin ɛp am fɔ kɔntinyu fɔ bia. Fɔ mi, Sam 55:​22 bin ɛp fɔ kɔrej mi. Jɔs lɛk wan pan di man dɛn we rayt di Sam buk, a bin lɛf ɔl mi prɔblɛm dɛn to Jiova ɛn a kam fɔ si se i bin ɛp mi. Pan ɔl we a dɔn gɛt wok, wi stil de fala di advays we de na Matyu 6:​20-22 (NW) fɔ liv simpul layf. Pantap dat, wi bin kam nia Gɔd mɔ ɛn di padi biznɛs bitwin mi ɛn mi wɛf bin tayt mɔ ɛn mɔ.”

Jonɛtan bin tɔk se: “A bin de fred wetin go apin tumara bambay we wi nɔ bin gɛt mɔni igen fɔ kɔntinyu di smɔl biznɛs we wi bin de du. Bikɔs mɔni biznɛs bin tranga, di 20 ia we a bin wok fɔ ɔl go fɔ natin. Mi ɛn mi wɛf bigin fɔ agyu bɔt mɔni biznɛs. Wi nɔ bin ivin ebul fɔ yuz wi krɛdit kad * bikɔs wi bin de fred se dɛn nɔ go sɛl gi wi.

“Bɔt Gɔd in Wɔd ɛn in spirit bin ɛp wi fɔ disayd fɔ du di rayt tin. A bin de tek ɛnikayn wok, ɛn wi nɔ bin de spɛn mɔni pan tin dɛn we nɔ impɔtant. As Jiova Witnɛs dɛn, wi brɔda ɛn sista dɛnsɛf bin de sɔpɔt wi. Dɛn ɛp wi fɔ rɛspɛkt wisɛf ɛn dɛn ɛp wi di tɛm dɛn we tin bin rili tranga.”

WE MARED-OS SKATA

Rakɛl bin tɔk se: “We mi man bin jɔs lɛf mi lɛk dat, a bin fil bad ɛn a vɛks. Ɛn mi at bin pwɛl bad bad wan. Bɔt a go nia Gɔd, ɛn i bin kɔrej mi. We a bin de pre to am ɛvride, i bin de mek a gɛt kol at. I bin tan lɛk se Gɔd dɔn ɛp mi fɔ bia di pen we de na mi at.

“In Wɔd, di Baybul, bin ɛp mi fɔ bia wit di bad we aw a bin de fil ɛn di vɛks we a bin vɛks. A bin de mɛmba di wɔd dɛn we di apɔsul Pɔl bin tɔk na Lɛta Fɔ Rom 12:​21, we i se: ‘Una nɔ mek ɛni bad tin mek una at pwɛl, bɔt una fɔ du gud to ɛnibɔdi we du una bad, da we de ɛnibɔdi we du una bad ɔ mɛmba bad fɔ una, nɔ go ebul una.’

“Wan mi gud padi bin ɛp mi fɔ si se a fɔ kɔntinyu wit mi layf. I bin sho mi Ɛkliziastis 3:​6 ɛn tek tɛm tɛl mi se tɛm de fɔ tek am se sɔntin dɔn lɔs. Dis advays nɔ bin izi, bɔt na bin wetin a nid. Naw a dɔn stɔp fɔ tink bɔt mi prɔblɛm ɛn a dɔn bigin fɔ du tin dɛn we go mek a gladi.”

Ilizabɛt bin tɔk se: “We yu mared-os skata, yu nid pipul dɛn fɔ sɔpɔt yu. A gɛt wan mi gud padi we bin de sɔpɔt mi ɔltɛm. I bin de kray we a de kray, kɔrej mi, ɛn mek a fil se pɔsin de we lɛk mi. A biliv se Jiova yuz am fɔ ɛp mi fɔ bia di pen we bin de insay mi at.”

WE WI SIK Ɔ WE WI OL

Luis, we wi bin dɔn tɔk bɔt insay di fɔs atikul, gɛt siriɔs at prɔblɛm, ɛn i bin lɛf smɔl lɛ i day tu difrɛn tɛm dɛn. Ɛvride, i nid fɔ de ɔnda ɔksijɛn fɔ  16 awa. I tɔk se: “A de pre to Jiova ɔltɛm. Ɛn afta a kin dɔn pre to Gɔd dɔn, a kin fil in spirit de gi mi trɛnk. Di pre we a de pre de ɛp mi fɔ gɛt kɔrej fɔ bia bikɔs a gɛt fet pan Gɔd ɛn a no se i kia fɔ mi.”

Petra we dɔn pas 80 ia bin ɛksplen se: “A want fɔ du bɔku tin, bɔt a jɔs nɔ ebul. We a de si se a nɔ gɛt bɛtɛ trɛnk igen, i kin rili mɔna mi. A kin taya pasmak, ɛn a nid fɔ drink mɛrɛsin ɔltɛm. Bɔku tɛm, a kin tink bɔt di we aw Jizɔs bin aks in Papa if i pɔsibul mek i pul wan patikyula prɔblɛm pan am. Bɔt Jiova bin gi Jizɔs trɛnk ɛn i de kɔrej mi. Prea tan lɛk mɛrɛsin we a de tek ɛvride. A kin rili fil bɛtɛ afta a kin dɔn tɔk to Gɔd.”—Matyu 26:​39.

Fɔ lɛk 30 ia naw, Julian dɔn gɛt wan sik we dɛn kɔl multiple sclerosis *, ɛn i de fil da sem we de. I bin se: “A dɔn ɛkschenj ɔfis chia fɔ wilchia. Bɔt mi layf stil gɛt minin bikɔs a de yuz mi tɛm fɔ ɛp ɔda pipul dɛn. We yu de gi, dat de ɛp yu fɔ bia we yu de sɔfa ɛn Jiova kin kip in prɔmis fɔ gi wi trɛnk di tɛm we wi nid am. Jɔs lɛk di apɔsul Pɔl, a go tɔk fɔ tru se: ‘A ebul fɔ du ɔltin bikɔs sɔmbɔdi de we de gi mi pawa.’”—Lɛta Fɔ Filipay 4:​13, NW.

WE PƆSIN DAY

Antonio bin tɔk se: “We mi papa day na wan motoka aksidɛnt, a nɔ bin biliv fɔs. Da kayn tin nɔ bin fɔ apin to am; na pas nɔmɔ i bin de pas. Bɔt a nɔ bin ebul fɔ du ɛnitin. I nɔ bin no natin fɔ fayv dez bifo i day. We a kin de bifo mi mama, a kin tray nɔ fɔ kray, bɔt a kin kray bita bita wan we mi wangren de. A bin de aks misɛf se, ‘Wetin mek? Wetin mek?’

“Dɛn tɛm dɛn de we tin nɔ bin izi, a kɔntinyu fɔ aks Jiova fɔ mek i ɛp mi fɔ kɔntrol di we aw a de fil ɛn fɔ mek a gɛt kolat. Ɛn smɔl smɔl a bigin fil fayn. A bin mɛmba wetin di Baybul tɔk we i se ‘tin dɛn we wi nɔ no se go apin’ kin mit ɛni wan pan wi. A no se Gɔd nɔ de lay, so a biliv se a go si mi papa we i go gɛt layf bak.”—Ɛkliziastis 9:​11, NW; Jɔn 11:​25; Taytɔs 1:2.

“Pan ɔl we wi bɔy pikin bin day pan di plen krash, wi stil gɛt bɔku fayn fayn tin dɛn we wi de mɛmba bɔt di tɛm we wi bin de togɛda.”—Rɔbɔt

Rɔbɔt, we wi bin tɔk bɔt insay di fɔs atikul, de tink dis sem we. I bin tɔk se: “Mi ɛn mi wɛf bin gɛt di kolat we Lɛta Fɔ Filipay 4:​6, 7 tɔk bɔt. Wi bin ebul fɔ gɛt dis kol at bikɔs wi bin de pre to Jiova. Dis kolat we wi gɛt bin ɛp wi fɔ tɔk to nyus ripɔta dɛn bɔt di op we wi gɛt fɔ se di wan dɛn we dɔn day go gɛt layf bak. Pan ɔl we wi bɔy pikin bin day pan di plen krash, wi stil gɛt bɔku fayn fayn tin dɛn we wi de mɛmba bɔt di tɛm we wi bin de togɛda. Na dɛn fayn fayn tin ya wi kin tray fɔ tink bɔt mɔ.

“We wi brɔda ɛn sista dɛn tɛl wi se dɛn si wi we wi de ɛksplen bɔt wi fet fayn wan na tɛlivishɔn, wi bin tɛl dɛn se na bikɔs dɛn bin dɔn pre fɔ wi bɔku bɔku wan. A rili biliv se di mɛsej dɛn we dɛn bin de sɛn to wi fɔ kɔrej wi, na in Jiova bin de yuz fɔ sɔpɔt wi.”

Frɔm di ɛgzampul dɛn we wi dɔn tɔk bɔt, wi dɔn si se Gɔd kin kɔrej pipul dɛn we gɛt difrɛn difrɛn prɔblɛm dɛn. We yu? Pan ɔl we yu go gɛt prɔblɛm dɛn, Pɔsin de we go ɛp yu wit yu prɔblɛm dɛn. * So, wetin mek yu nɔ go pre to Jiova fɔ lɛ i ɛp yu? Na in “de kɔrej wi ɔltɛm.”—Sɛkɛn Lɛta Fɔ Kɔrint 1:​3.

^ par. 5 Dɛn dɔn chenj sɔm nem dɛn na dis atikul.

^ par. 7 Krɛdit kad na kad we dɛn kin gi pɔsin fɔ pe fɔ sɔntin we i want bay. We pɔsin gɛt dis kad, dɛn kin trɔs am, dɔn leta i pe fɔ wetin i dɔn tek.

^ par. 17 Multiple sclerosis na wan sik we de wɔs as tɛm de go. Bɔku tɛm, i kin mek pɔsin nɔ ebul yuz in an ɛn in fut dɛn fayn. Sɔntɛnde, i kin mek pɔsin nɔ ebul fɔ si ɛn tɔk fayn, ɔ nɔ ivin ebul fɔ ɔndastand bɛtɛ igen.

^ par. 23 If yu go want lɛ dɛn ɛp yu fɔ kam nia Gɔd ɛn gɛt di kɔrej we i de gi, duya tɔk to Jiova Witnɛs dɛn we de na yu eria ɔ rayt to di branch ɔfis we de nia yu.