Malaki 2:1-17
2 “Neryo inywe bahereri, ekihano eki ni kyenyu.
2 Mwamaghana eriha erina lyaghe ly’olhukengerwa omw’ighana erihulikirira n’erikihira okwa muthima,” Yehova w’amahe athya, “Iningendi bathumako omukino, kandi iningendi syahindulha emighisa yenyu mwa mikino. Ee, nabirihindulha emighisa mwa mikino, kundi simuthakihira okwa muthima.”
3 “Lebaya! Ngendi syatsandalikania* embuthu yenyu eyibibire busana nenyu, kandi ngendi syatsatsanga omwa busu bwenyu mw’ebise, ebise by’emikonga yenyu; kandi mukendi syahekerwa eyo biri.*
4 Neryo mukendi syaminya ngoku nabiribaha ekihano eki nuku endaghane yaghe na Lawi yanga lholha embere,” Yehova w’amahe athya.
5 “Endaghane yaghe eyo nakolha haghuma nayu yabya y’engebe n’obuholho, eyo namuha, angubaha.* Mwanyubaha, ee, mwathikira erina lyaghe.
6 Omughambo* w’okwenene abya omwa buno bwiwe, kandi ebithathunganene mubithabanika okwa minywe yiwe. Mwalendera haghuma naghe omwa buholho n’obuthunganene, kandi mwalhusya abangyi okwa kibi.
7 Kundi eminywe y’omuhereri yitholere iyatheya eriminya, n’abandu batholere ibasondekania omughambo* erilhua omwa buno bwiwe, kundi ni muthumwa wa Yehova w’amahe.
8 “Aliwe inywe inywibene-bene mwabirilhua okwa nzira. Mwabirileka abangyi ibathwikalibwa omwa mighambo.* Mwabiritsandya endaghane ya Lawi,” Yehova w’amahe athya.
9 “Neryo ngendileka imwaponwa n’eriyirwa mw’ab’ahisi omwa bandu bosi, kundi mumuthakwama esyonzira syaghe aliwe mumwakangania akasolholho omwa mibere mwakoleserayamu emighambo.”
10 “Mbwino ithwe bosi sithuwithe thatha mughuma? Mbwino oyuwathuhangika si Nyamuhanga mughuma? Neryo busana naki ithwakolerana omwa bughobya, eritsandya endaghane y’abathatha-kulhu wethu?
11 Yuda abirikolha omwa buthebya, kandi ekindu ekikitha nye kyabirikolhwa omwa Israeli n’omwa Yerusalemu; kundi Yuda abiritsandya obubuyirire* bwa Yehova, obo anzire, kandi abirimya mwali w’enyamuhanga y’ehandi mwa mughole wiwe.
12 Yehova akendi syathoghothya omwa syohema sya Yakobo mw’owosi-wosi oyukakolha eki, mbulha nindi,* nomw’angaha Yehova w’amahe y’ekihembo.”
13 “Kandi hane ekindi* kindu ekyo mukakolha, ekikaleka ekiherero kya Yehova iky’usulha kw’emisoni, ekiriro, n’obulighe, ikyaleka iniabya isyanga thasyatsomana ekihembo ekyo mukahayo kutse erisima ekyosi-kyosi ekikalhua omwa byalha byenyu.
14 Neryo mukabugha muthi, ‘Enzumwa ni yahi?’ Kundi Yehova abirikolha ng’omwema omwa kathi-kathi kawu n’omukali w’obunyethu bwawu, oyo wabirikolera omwa bughobya, nomwakine indi ni w’okw’iwe kandi mukali wawu w’endaghane.*
15 Aliwe hane oyuwaghana erikikolha, kundi abya iniane n’ekyasaka okwa mulimu. Kandi oyo aby’akasondyaki? Ow’olhubuthu* lhwa Nyamuhanga. Neryo muyitheghaye erikwamana n’ekirimu kyenyu, kandi siwukolere omukali w’obunyethu bwawu omwa bughobya.
16 Kundi ngaponire* erikomolha,” Yehova Nyamuhanga we Israeli athya, “n’oyukaswika eby’amalhwa* omwa lhukimba lhwiwe,” Yehova w’amahe athya. “Kandi muyitheghaye erikwamana n’ekirimu kyenyu, kandi simutholere mukakolha omwa bughobya.
17 “Mwabirilhuhya Yehova omwa binywe byenyu. Aliwe mukabugha muthi, ‘Thwabirimulhuhya thuthi?’ Omw’ibugha muthi, ‘Obuli oyukakolha ekithuwene ni mubuya embere sya Yehova, kandi akamutsemera,’ kutse omw’ibugha muthi, ‘Nyamuhanga w’obulingirirania ali hayi?’”
Emyatsi Ahikwa
^ Kinywe okwa kinywe, “erisuyira.”
^ Ni bugha ambu, omo mwanya eyo ebise by’ebihongo bikaghusawa.”
^ Kutse “erisikya.”
^ Kutse “obusondoli.”
^ Kutse “obusondoli.”
^ Kutse obundi, “omwa busondoli bwawu.”
^ Kutse obundi, “ahabuyirire.”
^ Kinywe okwa kinywe, “oyulholire kandi oyukasubiraya.”
^ Kinywe okwa kinywe, “ekyakabiri.”
^ Kutse “mukali wawu omwa bilhaghiro.”
^ Kinywe okwa kinywe, “embutho.”
^ Kinywe okwa kinywe, “akapona.”
^ Kutse “oyukasangira omwa by’amalhwa.”
