Jehovap biibilip nalaani kiffani aniguisittarpai

„Ornikkasuannga Guuti! Illit tassa ikiortiga aniguisitsisigalu.“ — TUSSIAAT 70:6.

1, 2. (a) Guutip kiffai qaqugukkut taassumunnga ikioqqullutik qinusarpat? (b) Apeqqut suna pilerpa, aamma apeqqummut tamatumunnga akissut sumi paasisinnaavarput?

ARNAMUT 23-nik ukiulimmut aappalimmut angajoqqaajusut feeriartillutik paasivaat panitsik sumik pissuteqaraluarnersumik tammarsimasoq. Pinerluttoqarsimanissaa pasitsaanneqarpoq. Tassuuguinnaq poortueriarlutik angerlamut aallapallapput, Jehovamut ikioqqullutik qamannga pisumik kipisuitsumik qinuutigalutik. Jehovamut nalunaajaasoq 20-nik ukiulik naggataatigut nukillaarluinnassutigisassaminik nappaateqalerpoq. Jehova qinunikkut ingerlaannaq saaffigaa. Anaanaq kisimiittoq ilungersorluni suliffissarsiortoq imminut panimminullu aqqaneq-marlunnik ukiulimmut nerisassarsinissaminut akissaqanngilaq. Uummammiuni Jehovamut aniatippai. Aap, ilungersunartunik misilinneqartilluni ajornartorsiortilluniluunniit Guutimut ikioqqulluni qinuneq taassuma kiffaanut pissusissamisoorluinnarpoq. Ikiorneqarnissannik pisariaqartitsingaarfinni Jehovamut kimigiiserlutit qinusimavit?

² Tamanna apeqqummik pingaarutilimmik matuminnga pilersitsivoq: Jehovap ikioqqulluta qinnutitsinnik akisinissaa ilumut naatsorsuutigisinnaavarput? Apeqqummut tamatumunnga akissut uppernikkut nakussatsinnartoq Tussiaat 70-imiippoq. Tussiaat killitsinnartoq taanna Daavimit, Jehovamik ilumoorfiginnilluni pallorfiginnittumit arlaleriaqaluni ilungersunartunik misilinneqarlunilu unamminiagassarpassuaqarsimasumit, allanneqarpoq. Tussiaasiortoq taanna isumassarsisitaalluni Jehovamut ima oqarnissaminut killinneqarpoq: „Guuti! Illit tassa ikiortiga aniguisitsisigalu.“ (Tussiaat 70:6) Tussiaat 70-imik misissuineq ikiorneqartariaqaraangatta sooq uaguttaaq Jehovamik saaffiginnissinnaanitsinnik aamma taassuma uagutsinnik ’aniguisitsiumaarneranik’ sooq qularutiginninngilluinnarsinnaanitsinnik paasinninnissamut iluaqutigisinnaavarput.

„Illit tassa . . . aniguisitsisiga“

3. (a) Ikiorneqarnissamik ilungersorluni qinnut suna Tussiaat 70-imiippa? (b) Tussiaat 70-imi Daavip sumik qularutiginninnginnini ersersippaa?

³ Tussiaat 70 Guutimit ikiorneqarnissamik ilungersorluni qinnummik aallarnerneqarlunilu naggaserneqarpoq. (Atuaruk Tussiaat 70:2-6.) Daavip Jehova ilungersorluni qinnuigaa ’ikioriartorasuaqqulluni’ ’ornikkasuaqqullunilu’ aniguisinniassammani. Versini akornanniittuni Daavip pisussat tallimat, Biibilimi allassimaqqaarfinni qinnutaallutilluunniit kissaataasut, saqqummiuppai. Qinnutigisamini siullerni pingasuni  imminik toqutsiniarsarisut pivai. Daavip Jehova ilungersorluni qinnuigaa imminut akeraasut taakkua ajugaaffigeqqullugit ajussusiallu pillugu kanngusutseqqullugit. Qinnutigisai tulliuttut marluk, versimi 5-imi, Guutip innuttaanut tunngassuteqarput. Daavip Jehovamik ujarlersut taassuminnga qiimmattaatiginninnissaat unnersiutiginninnissaallu qinnutigaa. Daavip tussiaasiani naggaserpaa Jehova ima oqarfigalugu: „Illit tassa ikiortiga aniguisitsisigalu.“ Maluginiaruk Daavi allanngimmat „Qanortoq illit . . .“, suli allamik qinnuteqartutullusooq illuni. Allapporli „Illit tassa“ taamaalillunilu tatiginninnini ersersillugu. Daavip Guutimit ikiorneqarumaarnini qularutiginngilaa.

4, 5. Tussiaat 70 Daavi pillugu sumik ilinniarfigisinnaavarput, sunalu qularutiginngilluinnarsinnaavarput?

⁴ Tussiaat 70-imi Daavi pillugu suut ersersinneqarpat? Imminut akeraasut narrutsassimasut imminik toqutsiniarsarigaangata nammineq iliuuseqarniarnani aalajangertarpoq. Jehovalli kissaatigisamisut piffissarlu aalajangikkani nalliuppat akerlilersuisunik pillaanissaa Daavip qularutiginngilaa. (1 Samueli 26:10) Qularutiginngilluinnarpaa Jehovap ujarlersiminik ikiuisarlunilu aniguisitsisarnera. (Hebræerit 11:6) Upperaa Guutip kiffai ilumoortut nuannaarnissamut Jehovalu pillugu allanut oqaluttuarnermikkut taassuminnga unnersiutiginninnissamut pissutissaqarluartut. — Tussiaat 5:12; 35:27.

⁵ Daavip pisimaneratut uagut qularutiginngilluinnarsinnaavarput Jehova ikiortigalugulu ’aniguisitsisigigipput’. Ilungersunartunik misilinneqaraangatta ikiortariaqavissutullu misigigaangatta naleqqulluartumik Jehova qinnuigisinnaavarput ikiorniapallaqqulluta. (Tussiaat 71:12) Ikioqqullutali qinnutivut Jehovap qanoq ililluni akissavai? Uagutsinnik immaqa qanoq ikiuiumaarneranik misissuinnginnitsinni Daavimik aniguisitsineri ajornartorsiorneranilu ikiuineri pingasut sammeriartigit.

Akerlilersuisunit aniguisitaasoq

6. Daavip qanoq ililluni nalunnginnamiuk Jehova naapertuilluartunik aniguisitsisartoq?

⁶ Daavip oqaluttuanit Biibilimiittunit isumassarsiarititaasunit taamanikkut atuarneqarsinnaasunit nalunngilaa naapertuilluartut Jehovamit ikiorneqarnissartik qularutiginngilluinnarsinnaagaat. Jehovap silarsuarmut guutiitsumut ulersuartitsigami Noa taassumalu ilaqutai Guutimik mianerinnittut inuuinnartippai. (1 Mosesi 7:23) Jehovap Sodomami Gomorramilu innuttaasunut ajortunut aamanik innerusunik ikuallassaammillu siallersitsigami Loti naapertuilluartoq paniilu aniguinissaannut ikiorpai. (1 Mosesi 19:12-26) Jehovap Farao makitasooq sakkutuuilu Immami Aappalaartumi piuneerukkamigit innuttani sernissorpai piuneerussaatikkumanagit. (2 Mosesi 14:19-28) Taamaattumik tupinnanngilaq Daavip tussiaammi allami Jehova ’annatsitsisartutut’ unnersiutigimmagu! — Tussiaat 68:21.

7-9. (a) Sooq Daavi Guutip annaassinissamut pissaaneqarneranik qularutiginninnginnissamut pissutissaqarpa? (b) Daavip aniguisinneqarnini kimut ataqqinaataatippaa?

⁷ Aamma Daavi Jehovap annaassinissamut pissaaneqarneranik qularutiginninngilluinnarnissaminut nammineq inuttut pissutissaqarluarpoq. Jehovap ’taliisa ittuinnartut’ imminut kiffartortunik aniguisitsisinnaanerat Daavip nammineq misigisimavaa. (5 Mosesi 33:27) Jehovap ataasiaannarnani Daavi ’akeraanit’ annaassimavaa. (Tussiaat 18:18-20, 49) Assersuuteqariarta.

⁸ Israelikkut arnartaasa Daavi sakkutuutut pikkorinnerunera pillugu unnersiutigilermassuk kunngi Sauli ima sinngatigaaq qalugiusiani marloriarluni Daavimut naakkiullugu. (1 Samueli 18:6-9) Pisimasuni taakkunani marlunni Daavi qalugiusamit eqqortinngitsoorpoq. Tamatumunnga pissutaasutuaasoq tassaava Daavip sorsuttartutut aalassarissuullunilu misilittagaqarnera? Naagga. Biibilimi oqaluttuarineqarpoq ’Jehovamit najorneqartoq’. (Atuaruk 1 Samueli 18:11-14.) Kingusinnerusukkut Saulip Daavip filisterinit toqunneqarnissaa pilersaarutigaa, pilersaarutinili iluatsinngitsoormat „Saulip paasivaa [Jehovap] Daavi najoraa“. — 1 Samueli 18:17-28.

⁹ Daavip aniguisinneqarnini kimut ataqqinaataatippaa? Tussiaat 18:1-imi, tassa tussiaatip qulequtaani, allassimavoq Daavip ’erinarsugassiaq manna Jehovamut erinarsuutigigaa taamani Jehovap aniguisimmani akeqqaminit tamanit Saulillu assaanit’. Daavip misigissutsini ersersippai ima erinarsorluni: „[Jehova] tassa qaarsora, pallittaalisara, aniguisitsisiga, Guutiga, qaqqara qimarnguffiga.“  (Tussiaat 18:3) Jehovap innuttaminik aniguisitsisinnaanera nalunagu uppernikkut nakussatsinnaq, ilaa? — Tussiaat 35:10.

Napparsimalluni nallavimmini nakussatsinneqartoq

10, 11. Daavip Tussiaat 41-mi eqqaaneqartutut qanga napparsimalersimanerata paasinissaanut suut iluaqutigaavut?

¹⁰ Taamaalluni kunngi Daavi perululluni napparsimalerpoq, soorlu Tussiaat 41-mi eqqaaneqartoq. Piffissap ilaani nallavimminiippoq imalu napparsimatigaluni taassumunnga akeraasut isumaqarlutik ’nallavimminit makeqqittussaajunnaartoq’. (Versit 8, 9) Qanga Daavi taama perulutsigilerpa? Pissutsit tussiaammi eqqartorneqartut Daavip inuunerani piffissamut pisoqarfioqisumut, ernerata Absalomip imminut kunnginngortinniarnerata nalaani pisunut, naapertuussinnaapput. — 2 Samueli 15:6, 13, 14.

¹¹ Assersuutigalugu Daavip ikinngutiminit tatigisaminit, timiusamik nereqatigisartakkaminit, killuutigineqarnini eqqartorpaa. (Versi 10) Matumani immaqa Daavip inuunerani pisimasumik eqqaasaqarpugut. Absalomip pikitsitsinerani Daavi siunnersuisartuminit tatigisaminit Akitofelimit, kunngimullu pikitsitsinermi Absalomimut ilaliuttumit, killuutigineqarpoq. (2 Samueli 15:31; 16:15) Takorloorsinnaaviuk kunngi sanngiillisimasoq napparsimalluni nallavimminiittoq, makinnissaminut sanngiippallaartoq, killuussisunillu pilersaarutipilumminnik naammassinnissinnaaniassagamik toqunissaminik kissaateqartunit avatangerneqarsimanerminik eqqarsaatiginnittoq? — Versi 6.

12, 13. (a) Daavip suna qularutiginagu ersersippaa? (b) Guutip Daavi immaqa qanoq nakussatsippaa?

¹² Daavi ’aniguisitsisiminik’ tatiginnittuarpoq. Angut Guutimik mianerinnittoq napparsimalersoq pillugu Daavi ima allappoq: „[Jehovap] annaakkumaarpaa ullormi perlulimmi. Napparsimalluni nallaviani [Jehovap] ikiussavaa, napparsimaleraluaraangat peqqissisittarpat.“ (Tussiaat 41:2, 4) Matumani maluginiaruttaaq Daavip tatiginninnera oqaatsini ukunani ersertoq: „[Jehovap] ikiussavaa.“ Daavip Jehovamit aniguisinneqarnissani qularutiginngilaa. Qanoq aniguisinneqassagami?

¹³ Daavip naatsorsuutiginngilaa Jehovap tupinnartuliorluni napparsimajunnaarsissagaani. Jehovamilli ’ikiorneqarnissani’, imaluunniit nakussatsinneqarnissani — tassa napparsimalluni nallavimmiinnermini taassumannga annertoqqusersorneqarlunilu ikiorneqarnissani — qularutiginngilluinnarpaa. Daavip taamatut ikiorneqarnissani pisariaqartilluinnarpaa. Napparsimanini sanngiillissutigiinnanngilaa, aammali imminut akeraasunit imminik oqaluuserinerluisunit avatangerneqarsimavoq. (Versit 6, 7) Jehovap Daavi nakussatsissimasinnaavaa tuppallersaataasunik eqqaasillugu. Soqutiginarpoq Daavi ima oqarmat: „Uanga napatipparma — assuarnaassusera pissutigalugu.“ (Versi 13, NV) Daavi aamma sanngiillisimagaluarluni imminullu akeraasunit oqaluuserinerlunneqaraluarluni Jehovamit assuarnaatsutut isigineqarnerminik eqqarsaatiginninnini nakussatsissutigisimasinnaavaa. Naggataatigut Daavi peqqissivoq. Jehovap napparsimasunik nakussatsitsisarnera nalunagu nuanningaarami, ilaa? — 2 Korinthimiut 1:3.

Inuussutissanut tunngatillugu ikiorneqartoq

14, 15. Daavi angutitaalu qanga ajornartorsiulerpat, qanorlu ikiorneqarpat?

¹⁴ Daavi Israelimi kunnginngorami nerisassat imigassallu pitsaanerpaat mamarsaatigisinnaavai allaallu nerrivimmini nereqatissaminik allanik qaaqqusarpassuaqarsinnaalluni. (2 Samueli 9:10) Daavilli aamma pisariaqarnerpaanik allaat peqannginneq qanoq innersoq nalunngilaa. Ernini Absalomi pikitsitsillunilu kunnginngorniarsarimmat, Daavip angutit ilumoorfiginnittut ikittunnguit ilagalugit Jerusalemi qimappaa. Gileadimut, inoqajuitsumut kuussuup Jordanip kangiatungaaniittumut, qimaapput. (2 Samueli 17:22, 24) Maanna Daavip angutitaasalu qimaasutut inuusariaqartillutik sivitsunngitsoq nerinissartik, imernissartik qasuersaarnissartillu pisariaqartingaalerpaat. Inuilaamiitsillutilli sumi ikiortissarsisinnaappat?

¹⁵ Naggataatigut Daavi angutitaalu illoqarfimmut Mahanajimimut pipput. Taavani angutit sapiitsut pingasut — Shobi, Makiri Barzillajilu — naapippaat. Taakkua Guutip kunnginngortitaanik ikiuiniarlutik inuunerminnik  ulorianartorsiortitsinissaminnut piumassuseqarput, Absalomimmi kunngisut naalakkersuilissagaluaruni qularnanngitsumik Daavimik tapersersuisimasut tamaasa sakkortuumik pillassammagit. Innuttaasut ilumoorfiginnittut taakkua pingasut paasigamikku Daavi angutitaalu ajornartorsiortut pisariaqartingaagaannik, ilaatigut siniffinnik, qajuusiassanik, suaasiassanik, karrinik sikatsitanik, eertaasanik linsinillu, tungusunnitsuummik, immummik kinersitamik savanillu, aatsivigaat. (Atuaruk 2 Samueli 17:27-29.) Angutit taakkua pingasut ilumoorfiginninnerat inoroorsaarusussusiallu immikkorluinnaq ittut Daavip qamuuna killinneqaatigisimassavai. Qanormi ililluni Daavip taakkua imminut iliuuserisimasaat puiussagamigit?

16. Daavip angutitaasalu pisariaqartitaminnik pinissaannik isumaginnittuviusoq kinaava?

¹⁶ Daavilli angutitaasalu pisariaqartitaannik isumaginnittuviusoq kinaava? Jehovap innuttaminik isumassuisarnera Daavip qularutiginngilaa. Qularutissaanngilaq Jehova kiffaminik tinnersaasinnaasorlusooq uppeqammik ajornartorsiortumik ikiuiniassammata. Daavip Gileadimi pisimasut eqqarsaatigigaangamigit, qularnanngitsumik angutit taakkua pingasut inussiarnisaarnerat Jehovap asannilluni isumassuineranut ersiutitut isigisarsimassavaa. Toqungajalerluni ima allappoq: „Inuusuttuusimavunga utoqqalisimallungalu maanna, takusimanngisaannarpungali iluartumik [ilaatigut nammineq] qimagaasumik qitornaanilluunniit nerisassanik qinnuuloortunik.“ (Tussiaat 37:25) Jehovap taliata naappallaanngisaannarneranik ilisimanninnerput tuppallersaataangaarami, ilaa? — Ussatit 10:3.

’Jehovap mianerinnitsini aniguisinneq sapinngilai’

17. Jehovap suna uppernarsaqattaareerpaa?

¹⁷ Daavi Biibilip nalaani Jehovamit aniguisinneqartorpassuit ilaannaraat. Taamanerniilli Guutip uppernarsaqattaareerpaa apustilip Petrusip allagaasa ukua ilumoornerat: „[Jehovap] mianerinnitsini ussernartunit aniguisinneq sapinngilai.“ (2 Petrusi 2:9) Oqaluttuat suli marluk misissoriartigik.

18. Hizkijap nalaani Jehovap kiffani qanoq aniguisippai?

¹⁸ Ukiuni 700-kkunni u.n.s. Assyriamiut sakkutuuisa pissaaneqaqisut Juda tiguarmassuk Jerusalemimullu sioorasaarimmata kunngi Hizkija ima qinuvoq: „Annaatsigut, [Jehova] Guuterput, nunarsuarmi kunngeqarfinnut tamanut ilisimaleqqullugu illit [Jehova] kisivit Guutiusutit.“ (Esaja 37:20) Hizkijap isumakuluutiginerpaasaa tassaavoq Guutip aqqata tusaamanerlugaalersinnaanera. Qamannga pisumik qinnut taanna Jehovap akivaa. Unnuap ataatsip ingerlanerani inngilip ataasiinnaap Assyriamiut 185.000-it toquppai Jehovallu kiffai aalajaatsut aniguisillugit. — Esaja 37:32, 36.

19. Ukiuni hundredelinni siullerni kristumiut mianersoqqussut suna malillugu iliorpat, tamannalu qanoq kinguneqarpa?

 ¹⁹ Jiisusi ullualuit qaangiuppata toqusussaalluni ajoqersukkami Judæamiittut iluaqutissaannut siulittuutaasumik mianersoqqusivoq. (Atuaruk Lukasi 21:20-22.) Tamatuma kingorna ukiut qulikkuutaat arlallit ingerlapput, ukiumili 66-imi u.n.k. juutit pikitsitsimmata Romamiut sakkutuui Jerusalemimukaapput. Romamiut sakkutuui Cestius Gallusimit siulersorneqarlutik naalaffiup qarmaata ilaanik qajannarsisitsipput; taavali uteriataarput. Kristumiut aalajaatsut paasivaat tamanna pissutigalugu aseruinermit Jiisusip siulittuutigisaanit aniguinissaminnut periarfissaqalerlutik, qaqqanullu qimaapput. Romamiut sakkutuui ukiumi 70-imi u.n.k. uterput. Maanna tunuanngillat, Jerusalemilu piuneerunneqarpoq. Kristumiut Jiisusip mianersoqqussutaa malillugu iliuuseqartut ajunaarnersuarmit tataannartumit tamatumannga aniguipput. — Lukasi 19:41-44.

20. Sooq Jehovap uagutsinnik ’aniguisitsisuunera’ qularutiginngilluinnarsinnaavarput?

²⁰ Jehovap innuttaminik ikiuisarneranik uppernarsaatit eqqarsaatigalugit uppernikkut nakussatsinnarpoq. Qanga iliuuserisimasai pissutigalugit tatigisinnaavarput. Maanna siunissamiluunniit sunilluunniit ajornartorsiuteqalissagaluarutta qularutiginngilluinnarsinnaavarput Jehovap uagutsinnik ’aniguisitsisuunera’. Qanorli ililluni Jehovap uagut aniguisissinnaavaatigut? Aamma allaaserisap aallaqqaataatungaani eqqaaneqartut qanoq pippat? Tamanna allaaserisami tulliuttumi paasissavarput.

Eqqaamavigit?

• Tussiaat 70-imi allassimasut pissutigalugit suna qularutiginngilluinnarsinnaavarput?

• Daavi napparsimanermini qanoq napatinneqarpa?

• Oqaluttuani suni ersersinneqarpa Jehovap innuttani akerlilersuisunit aniguisissinnaagai?

[Atuaqqissaarnermi apeqqutit]

[Qupp. 14-mi assiliartaq]

Jehovap Hizkijap qinnutaa akivaa