1. (a) Jehovap pissusiisa ilaannik eqqaasaqarit. (b) Guutip pissusiinik misissueqqissaarnerit qanoq iluaqutigissaviuk?

JEHOVA eqqarsaatigigaangakku pissuserineqartussat suut eqqarsaatigisarpigit? Immaqa asanninneq, naapertuilluassuseq, ilisimassuseq pissaaneqarnerlu eqqarsaatigaatit. Soorunami nalunngilarput Jehova allanik ajunngitsorpassuarnik pissuseqartoq. Tassami ukiut ingerlaneranni Jehovap pissusii 40-t assigiinngitsut sinnerlugit saqqummersittakkatsinni sammineqarnikuupput. Pissuserineqartussat taakku ataasiakkaarlugit kisimiillutit ilaquttatilluunniit peqatigalugit misissoqqissaarukkit Jehova pillugu paasisaqangaarsinnaavutit! Allaat pissusii pingaartinnerulissavatit. Tamatuma kingunerisaanik Jehova ilaarusunnerulissallugulu ikinngutigilluarnerulissavat. — Jos 23:8; Tuss 73:28.

2. (a) Qanoq Jehovap pissusiinik pingaartitsinerulersinnaanerput assersuuteqarlutit nassuiaruk. (b) Allaaserisami matumani allaaserisanilu marlunni tulliuttuni suut eqqartussavavut?

² Qanoq pingaartitsinerulersinnaavit? Takorlooruk nerisassanik misilinnikuunngisannik nerillutit. Siullermik nerisassat tipiginnerat naamavat. Taava usserpatit paasillugulu mamarluinnartut. Tamatumalu kingorna nammineq nerisassiarisalerpatit. Taamatuttaaq Jehovap pissusiisa ilaannik ilinniarnerunitsigut, tamatumalu kingorna pissusiminik qanoq ersersitsisarneranik eqqarsaatiginneqqissaarnitsigut kiisalu pissusianik ilaarsinitsigut taassuma pissusia pingaartinnerulersinnaavarput. (Ef 5:1) Allaaserisami matumani allaaserisanilu marlunni tulliuttuni Jehovap pissusiisa ilaat eqqartussavavut. Pissusiisa samminerini apeqqutit uku akissutissarsissavavut: Pissuseq taanna qanoq paasisariaqarpa? Jehovap tamanna qanoq ersersittarpaa? Jehovap pissusermik tamatuminnga ersersitsisarneranut tunngatillugu qanoq ilaarsinnaavarput?

3, 4. (a) Saaffigiuminartuuneq qanoq paasisariaqarpa? (b) Jehovap saaffigiuminartuunini qanoq uppernarsarpaa?

³ Siullertut saaffigiuminartuuneq qanoq paasisariaqarnersoq eqqartussavarput. Inussiarnersuunertut, oqaloqatigiuminartuunertut allanik oqaloqateqarnissamut ulapippallaartannginnertut paasisariaqarpoq. Inuup saaffigiuminartup tusarnaarusunnini ikiuerusunninilu oqaatsimigut, ussersornermigut kiinneraartuunermigullu ersersittarpaa.

⁴ Jehova taamatorpiaq ippoq. Qilammi nunarsuarmilu pissaaneqarnerpaagaluarluni imminut qinoqqusarpaatigut. Qinnutivut tusarnaartarlugillu pisariaqartitatsinnik tunisarpaatigut. (Tussiaat 145:18; Esaja 30:18, 19 atuakkit). Sumiikkaluaruttaluunniit, qaqugukkulluunniit qanorluunniillu sivisutigisumik Guuti oqaluussinnaavarput. Guutip oqaluunneqarnini paamitsassutiginngisaannarpaa. (Tuss 65:3; Jaak 1:5) Biibilimi ersersinneqarpoq Jehova inunnit qinunikkut saaffigineqarusuttoq. Assersuutigalugu Daavi allappoq Jehovap isai tungitsinnut ‘sammisut’ ‘talerpimminillu najummigaatigut’. (Tuss 34:16; 63:9) Aamma pruffiitip Esajap Jehova savanik paarsisumut assersuullugu ima allappoq: ‘Savaatini talerminik katersorpai; savaaqqat pakkuppai.’ (Es 40:11) Takorlooriaruk! Savaaqqap savanik paarsisumit asannittumit kissumiarneqarneratut Jehovap namminerminut qanitsigitikkusuppaatigut. Ataatarput taamatut eqqarsaatigisarutsigu asanerulissavarput! Jehova qanoq ilaarnerusinnaavarput?

5. Sooq utoqqaanertat saaffigiuminartuunissaat pingaaruteqarpa?

⁵ Ungasinngitsukkut nalunaajaasut ilaat nunanit tamalaaneersut ima aperineqarput: “Utoqqaanertap pissusiisa ilaat sorleq pingaarnerpaatippiuk?” Amerlanerit ima akipput: “Saaffigiuminartuunera.” Soorunami tamatta saaffigiuminartuusariaqarpugut,  utoqqaanertalli ingammik taamatut pissuseqartariaqarput. (Es 32:1, 2) Utoqqaanertat saaffigiuminartuunissaat sooq taama pingaaruteqartigaa? Qatanngut arnaq ima oqaluttuarpoq: “Utoqqaanertaq aatsaat saaffigiuminartuuppat taassuma pissusii ajunngitsut allat suugaluartulluunniit iluaqutigisinnaavavut.” Oqaatsit taakku ilumoorluinnarput. Inulli qanoq saaffigiuminartuusinnaagami?

6. Qanoq saaffigiuminartuunerit ersersissinnaaviuk?

⁶ Allanik ilumoorlutit isumassuinikkut ikiuerusunnikkullu saaffigiuminartuunerit ersersissinnaavat. Taama iliortaruit qatanngutivit, aamma inuusuttut, toqqissillutik oqaloqatigisinnaalissavaatsit. (Mark 10:13-16) Nukappiaraq Carlosimik atilik aqqaneq-marlunnik ukiulik ima oqaluttuarpoq: “Utoqqaanertat naalagaaffilersaarfimmi qungujulasarnerat inussiarnertarnerallu nuannaraara.” Soorunami utoqqaanertap saaffigiuminartuunini oqaasiinnartigut ersersiinnarnagu iliuutsikkut ersersittariaqarpaa. (1 Joh 3:18) Qanoq taama iliorsinnaava?

7. Ataatsimeersuarnermi allagartaq atoraangatsigu sooq inuit ilaasa toqqissillutik oqaloqatigiumasarpaatigut, tamannalu qanoq ilinniarfigisinnaavarput?

⁷ Assersuut: Ungasinngitsukkut qatanngut angut nunami allami ataatsimeersuaqataavoq. Angerlamut timmisartortilluni ataatsimeersuarnermi allagartaq atugaa “Guutip naalagaaffia tikiulli!”-mik qulequtaqarpoq. Saqisup allagartaq takugamiuk ima oqarpoq: “Tikiulli!” Oqaloqatigiipput, saqisorlu atuagassiaatitsinnik piumavoq. Ataatsimeersuarnermi allagartaq atoraangatsigu sooq inuit toqqissillutik oqaloqatigiumasarpaatigut? Allagartaq ima oqartaramilusooq: “Saaffigiinnariannga. Sumukarniarnersunga aperinnga.” Upperisarput pillugu oqaloqateqarusunnitsinnut allagartaq takussutissaavoq. Taamatuttaaq utoqqaanertap qatanngutini oqaloqatigerusuttuaannarlugit ersersittariaqarpaa. Utoqqaanertat qanoq taama iliorsinnaappat?

8. Utoqqaanertat allanik soqutiginninnertik qanoq ersersissinnaavaat, tamannalu ilagiinniittunut qanoq sunniuteqartarpa?

⁸ Nunani amerlanerni kiinneraartuunikkut, qatanngutinnik assamminnittarnikkut ilassinnittarnikkullu taakkuninnga soqutiginninnerit ersersissinnaavat. Kikkut siulliullutik taamatut iliuuseqartariaqarpat? Biibilimi allassimavoq ataatsimiinnermi Jiisusip ajoqersukkani ‘ornikkai oqaloqatigalugillu’. (Matt 28:18) Taamatuttaaq ullumikkut utoqqaanertat qatanngutitik ornittarpaat oqaloqatigalugillu. Tamanna ilagiinniittunut qanoq sunniuteqartarpa? Qatanngut arnaq pioneriusoq 88-inillu ukiulik ima oqarpoq: “Naalagaaffilersaarfimmut iseraangama utoqqaanertat qungujulasarnerat qiimmaallannartunillu oqaaseqartarnerat taakkuninnga asanninnerulissutigisarpara.” Qatanngut arnaq alla ima oqaluttuarpoq: “Ataatsimiinnerni utoqqaanertamit qungujulasumit tikilluaqquneqartarnera qujamasuutigingaartarpara.”

9, 10. (a) Jehova qanoq maligassaalluarpa? (b) Utoqqaanertat Jehovamik qanoq ilaarsisinnaappat?

 ⁹ Soorunami saaffigiuminartuussagutta allanik oqaloqateqarnissatsinnut piffissaqartariaqarpugut. Jehova maligassaalluarpoq. Biibilimi ima allassimasoqarpoq: ‘Ilatsinnit kimilluunniit ungasinngilaq.’ (ApS 17:27) Utoqqaanertat ilaatigut qatanngutiminnik, inuusuttunik utoqqarnillu, ataatsimiinnerup aallartinnginnerani  kingornalu oqaloqateqartarnermikkut Jehovamik ilaarsisinnaapput. Qatanngut angut pioneriusoq ima oqarpoq: “Utoqqaanertaq qanoq innersunga aperigaangat akissutinnullu tusarnaaqqissaaraangat pingaartinneqartutut misigisarpunga.” Qatanngut arnaq ukiuni 50-ingajanni Jehovamut kiffartorsimasoq ima oqarpoq: “Ataatsimiinnerup kingorna utoqqaanertat uannik oqaloqateqarnissaminnut piffissaqartarnerat pingaartinneqartutut misigilissutigisarpara.”

¹⁰ Utoqqaanertat akisussaaffippassuaqarnerat ilumoorpoq. Ataatsimiinnernili qatanngutiminnik oqaloqateqarnissaminnut piffissaqarnissartik qulakkeertariaqarpaat.

11, 12. (a) Kinaassusersiortuunnginneq qanoq paasisariaqarpa? (b) Jehovap kinaassusersiortuunngitsuunera Biibilimi qanoq ersersinneqarpa?

¹¹ Kinaassusersiortuunnginneq Jehovap pissusiisa nuannersut aamma ilagaat. (ApS 10:34) Kinaassusersiortuunnginneq qanoq paasisariaqarpa? Kimilluunniit immikkoortitsisannginnertut paasisariaqarpoq. Isumaqavikkutta inuit assigiimmik pineqartussaasut aatsaat kinaassusersiortuussanngilagut. Inuup isikkua qanorlu aningaasaateqartiginera kinaassusersiortuunngitsup apeqqutaatinneq ajorpaa. Kinaassusersiortuunngitsup allat kinaassusiviat naapertorlugu pisarpai.

¹² Kinaassusersiortuunnginnermut tunngatillugu Jehova maligassaalluarnerpaavoq. Oqaasiani allassimavoq taanna “kinaassusersiortuunngitsoq” aamma “nakerisarsiortuunngitsoq”. (Apustilit Suliaat 10:34, 35; 5 Mosesi 10:17 atuakkit). Assersuut tamatuminnga ersersitsisoq sammeriartigu.

13, 14. (a) Selofkadip panii tallimat sumik ajornartorsiuteqalerpat? (b) Jehovap kinaassusersiortuunnginnini qanoq ersersippaa?

 ¹³ Israelikkut nunamut neriorsuutigisamut isinngitsiartut angutip Selofkadimik atillip panii tallimat aaqqinneqartariaqartumik ajornartorsiuteqarput. Suna ajornartorsiutigigamikku? Angutaat toqummat nunaataa kingornussarsiarisinnaanngilaat. Sooq? Inatsisit naapertorlugit angutit taamaallaat nunamik kingornussarsisinnaammata. Angutaalli erneqarnani toquvoq. (4 Mosesi 26:33, 52-55) Nuna ilaqutaannut allanut tunniunneqassava? Selofkadip panii qanoq iliorsinnaappat?

¹⁴ Mosesimukarput ikioqqullutillu ima kimigiiserfigalugu: “Ataatatta aqqa eqqarleriissortanit peerneqassanerpa erneqannginnera pissutigalugu?” Mosesip ima akinagit: ‘Inatsisini taama allassimasoqarmat ikiorsinnaanngilassi.’ Kissaatigisaat Jehovamut saqqummiuppaa. (4 Mos 27:2-5) Jehova qanoq oqarpa? Mosesi ima oqarfigaa: “Selofkadip panii eqqortumik oqarput.  Ataataata qatanngutaanut angutinut naligitillugit nunaammik pigisassaannik tunikkit, ataatamillu kingornussarisimasaa taakkua pigisarilerlissuk.” Jehovalu suli annerusumik iliuuseqarpoq. Mosesi oqarfigaa una inatsisinut ilanngunneqassasoq: “Angut erneqarnani toqugaangat pania kingornussisuutittassavarsi.” (4 Mos 27:6-8; Jos 17:1-6) Taamanimiilli arnat taamatut nalaataqartut kingornussisinnaanngorput.

15. (a) Jehovap innuttani, ingammik allanik ikiortissaqanngitsut, qanoq pisarpai? (b) Biibilimi oqaluttuanik allanik Jehovap kinaassusersiortuunnginneranik ersersitsisunik eqqaasaqarsinnaavit?

¹⁵ Tamanna ilumut aalajangiineruvoq kinaassusersiornerunngitsoq! Taakku qatanngutigiit tallimat allanit ikiorneqarsinnaanngitsut Jehovap Israelikkunnik allanik pinnittarnermisut immikkoortinnagillu ataqqinnittuliorfigai. (Tuss 68:6) Tamanna Jehovap innuttaminik immikkoortitsisannginneranik Biibilimi oqaluttuarpassuit ilaannaraat. — 1 Sam 16:1-13; ApS 10:30-35, 44-48.

16. Qanoq Jehovatut kinaassusersiortuunngissinnaavugut?

¹⁶ Qanoq Jehovatut kinaassusersiortuunngissinnaavugut? Eqqaamajuk isumaqavikkutta inuit assigiimmik pineqartussaasut aatsaat kinaassusersiortuussanngitsugut. Immaqa kinaassusersiortuunngitsuusorivutit. Ilaannikkulli allat qanoq misigissuseqarfiginerlugit paasiuminaatsissinnaavarput. Taamaattumik qanoq paasisinnaaviuk ilumut kinaassusersiortuunnginnerlutit? Jiisusi maligassaalluarpoq. Allat nammineq pilluni qanoq oqartarnersut paaserusukkamiuk ikinngutini ima aperai: “Inuit Inuup Ernera kinaanerarpaat?” (Matt 16:13, 14) Ikinngutit unneqqarissoq ima aperisinnaavat: ‘Inuit assigiimmik pisarpakka? Allanit kinaassusersiortutut isigineqarpunga?’ Imaassinnaavoq oqarfigigaatit inuit naggueqatitit allanit ajunnginnerusumik pisaritit aningaasaateqarnerusunullu qaffasinnerusumilluunniit ilinniagaqarsimasunut inussiarnernerusartutit. Taamatut oqarfigippatit susariaqarpit? Jehovamut qinusariaqarputit immikkoortitsisarunnaarniassagavillu inunnut allanut tunngatillugu misigissutsinnik allannguiniarninni ikioqqullutit kimigiiserfigisariaqarlugu. — Matt 7:7; Kol 3:10, 11.

17. Qanoq kinaassusersiortuunnginnitsinnik ilaatigut ersersitsisinnaavugut?

 ¹⁷ Ilagiinniittut tamaasa ataqqinnittuliorfigisarnerisigut inussiarnerfigisarnerisigullu Jehova ilaarsinnaavarput. Assersuutigalugu qatanngutinnik pulaaqqusigaangavit assigiinngitsunik kulturilinnik qaaqqusisarsinnaavutit. Imaluunniit ilinnit aningaasaatikinnerusut, aapparminnik toqukkut annaasaqarsimasut inuusuttulluunniit sallusuissut malillugu inuunngitsunik ilaquttallit ilanngullugit qaaqqusarsinnaavatit. (Galatiamiut 2:10; Jaaku 1:27 atuakkit). Oqaluussinermi inuppassuit assigiinngitsunik tunuliaqutallit, aamma allamiut, oqaloqatigisarpavut. Jehovap peqatigiissortaanit Biibililersaarutit oqaatsinut 600-nit amerlanerusunut saqqummersinneqartarput. Kinaassusersiortuunnginnitsinnik ersersitsinissatsinnut ilumut periarfissarpassuaqarpugut!

18. Jehovap saaffigiuminartuuneranik kinaassusersiortuunnginneranillu pingaartitsinerit qanoq ersersissinnaaviuk?

¹⁸ Jehovap saaffigiuminartuuneranik kinaassusersiortuunnginneranillu eqqarsaatiginnittarutta taassuma pissusii pingaartinneruleriartulissavavut. Tamatuma kingunerisaanik Jehova ilaarusulissallugulu pissuserineqartussat taakku qatanngutitsinnut oqaluussiffigisatsinnullu ersersikkusulissavavut.