Jehovap ilaqutariinnermik aaqqissuussinera asannittoq

’Tamanna pissutigalugu Ataataq seeqqumiarfigaara, qilammilu nunamilu ataataasut tamarmik ateqaatigisaat.’ — EVFISUMIUT 3:14, 15.

1, 2. (a) Sooq Jehovap ilaqutariinneq pilersissimavaa? (b) Ullumikkut ilaqutariit Jehovap aaqqissuussinerani qanoq pingaaruteqarpat?

JEHOVAP ilaqutariinneq pilersissimavaa. Tamanna aqqutigalugu inuit ikinngutigiinnermik, tapersersoqatigiinnissamik tatigeqatigiinnissamillu pisariaqartitaat kisiartaatinnagit tunniuppai. (1 Moses 2:18) Ilaqutariit aqqutigalugit Guutip siunertani ataqqinartoq naammassissavaa nunarsuaq inunnik ulikkaartissagamiuk. Aappariit siulliit ima peqquai: „Kinguaassiorlusi amerliartoritsi nuna tamakkerlugu ilissinnullu naalatsigitillugu.“ (1 Moses 1:28) Avatangiisit kiattut inuummarinnartullu Adamikkut kinguaaviisalu amerlasoorpassuit inunngorumaartussat tamarmik iluaqutigisussavaat.

² Aappariilli siulliit taakku naalakkumanngillat — imminnut kinguaassaminnullu aserornartumik kingunilimmik. (Rûmamiut 5:12) Taamaattumik ullumikkut ilaqutariittut inuuneq Guutip kissaatigisaanit allaalluinnarpoq. Taamaattorli Jehovap aaqqissuussinerani ilaqutariit suli pingaaruteqaqaat, ilagiinni kristumiuusuni tunngaviusuummata. Tamannali ima paasisariaqanngilaq akornatsinni kristumiorpassuit aappaqanngitsut sulilluarnerat pingaartinngikkipput. Imaannerullunili ilaqutariit kristumiutut aaqqissuussaanerup tamarmiusup anersaakkut peqqissiuunissaanut tapersersueqataasuusut. Ilaqutariit nukittuut ilagiinnut nukittuunut tunngaviusarput. Ilissili ilaqutariillusi qanoq ilillusi peqqissiartorsinnaavisi ullumikkut artornartut eqqarsaatigalugit? Tamanna akiniarlugu ilaqutariinnik aaqqissuussaaneq pillugu Biibilimi allassimasut misissoriartigik.

Biibilip nalaani ilaqutariinneq

3. Ataataanerpaat nalaanni uiusoq nuliaasorlu qanoq inissisimaffeqarpat?

³ Adamip Evallu tamarmik Guutip siulersuinermik aaqqissuussinera tunuartissimavaat. Kisianni upperluartut, soorlu Noa, Abraham, Isak, Jakob Jobilu ilaqutariinni ittuunermik atorfimmut eqqortumik iliorput. (Eprîarit 7:4) Ataataanerpaat nalaanni ilaqutariit naalakkersuisutut issimapput, ataataasoq upperisarsiornikkut siulersuisuulluni, ilinniartitsisuulluni eqqartuussisuullunilu. (1 Moses 8:20; 18:19) Nuliaasuttaaq pingaarutilimmik inissisimaffeqarput,  inussiaanatik illumili pisortaasumut ikiortaallutik.

4. Mosesip inatsisaasa ataanni ilaqutariittut inuuneq qanoq allanngorsimava, angajoqqaallu suli qanoq inissisimaffeqarpat?

⁴ Ukiumi 1513-imi u.n.s. Israelikkut inuiaqatigiinngormata inuiaqatigiit inatsisaat Mosesikkut tunniunneqartut ilaqutariit inatsisaannit pingaarnerulerput. (2 Moses 24:3-8) Maanna eqqartuussisunngortitat aalajangiisinnaassuseqalerput, aamma inuuneq toqulu pineqaraangata. (2 Moses 18:13-26) Palasit Levikkuusut pallorfiginninnermi pilliutit akissusaaffigilerpaat. (3 Moses 1:2-5) Ataataasulli suli pingaarutilimmik inissisimaffeqarput. Mosesip ataataasut ima oqaaqqissaarsimavai: „Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ (5 Moses 6:6, 7) Anaanaasut mikinngitsumik sunniuteqartarsimapput. Ussatit 1:8-mi inuusuttut ima oqarfigineqarput: „Ernera, ataatavit oqaaqqissaarutai naalattarniakkit anaanannillu ilinniakkatit puigornagit!“ Aap, uiusup oqartussaanerata iluani nuliaasoq hebriiariusoq ilaqutariinnut inatsisiliorsinnaavoq — malinneqartissinnaallugillu. Allaat utoqqalinermini meeqqaminit ataqqineqartarpoq. — Ussatit 23:22.

5. Meeqqat ilaqutariit iluanni inissisimanerat Mosesip inatsisaani qanoq nassuiarneqarpa?

⁵ Meeqqat inissisimaffiat Guutip inatsisaani aamma ersarissumik allaatigineqarpoq. 5 Moses 5:16-imi ima allassimavoq: „Ataatat anaanallu ataqqikkit — soorlu [Jehovap] Guutivit taama peqqugaatit — inuummersoqqullutit atugarissaaqqullutillu nunami [Jehovap] Guutivit ilinnut tunniukkumaagaani.“ Angajoqqaanik ataqqinninnginneq Mosesip inatsisaani sualuttumik unioqqutitsineruvoq. (2 Moses 21:15, 17) „Ataataminik anaanaminilluunniit perloqqusisoq toqunneqassaaq,“ inatsisini taama allassimasoqarpoq.  (3 Moses 20:9) Angajoqqaanut pikitsitsineq tassaavoq Guutimut pikitsitsineq.

Uiusut kristumiuusut inissisimaffiat

6, 7. Paulusip Evfisumiut 5:23-29-mi oqaasii sooq taamanikkut allanngortitsilluinnarsimappat?

⁶ Kristumiuussuseq ilaqutariinnik aaqqissuussaanermik paasissutisiisuuvoq, pingaartumik uiusup inissisimaffia pillugu. Ukiuni hundredelinni siullerni kristumiut ilagiissaasa avataanni uiusut nuliatik naakkittaatsuliorfigalugit qunutittarpaat. Angutit arnat pisinnaatitaaffinnik tunngaviusunik ataqqinassutsimillu tuniumanngivippaat. The Expositor’s Bible-mi ima allassimavoq: „Griikerit atugartuujusut nuliartarput meeqqiortinniarlugit. Angutip kinguaassiuutitigut pilerissusia nuliaasup pisinnaatitaaffiinit killilerneqarsimanngilaq. Aappariinnerup asanninneq ilannguttariaqanngilaa. . . . Nuliaq inussiaq pisinnaatitaaffeqarneq ajorpoq. Timaa piginnittuata atorsinnaasarpaa.“

⁷ Taama atuuttoqarnerata nalaani Paulusip oqaatsit Evfisumiut 5:23-29-miittut allassimavai: „Arnap uini niaqorimmagu, soorluttaaq ilagiit Kristus niaqorigaat; taanna timaata annaassisigaa. . . . Ilissi, angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit . . . Angutit nuliatik asasariaqarpaat soorlu timitik. Nuliaminik asannittoq imminik asasaraaq. Inummi uinimminik qinngarsuinngisaannarpoq, nerisittarluguli paaqqisarpaa.“ Taamanikkut oqaatsit taakku allanngortitsilluinnarsimapput. The Expositor’s Bible-mi ima allassimavoq: „Taamanikkut inuunerlunneq eqqarsaatigissagaanni kristumiut aappariinnermik isiginninnerat tassaavoq kristumiuussutsimi nutaanerpaaq sukannernerpaarlu. . . . Inuiannut ullut nutaajusut aallartissimapput.“

8, 9. Anguterpassuit arnat qanoq eqqunngitsumik isigisarpaat, sunalu pillugu angutit kristumiuusut taama isumaqarsinnaanngillat?

⁸ Biibilimi uiusunut unnersuussutit ullumikkuttaaq allanngortitsilluinnartuupput. Naak arnat kiffaanngissuseqalernerat oqallisigineqaraluaqisoq, anguterpassuit arnat kinguaassiuutitigut naammatsinnissamut atortussaannartut suli isigisarpaat. Arnat naqisimaneqarnermik, naalakkersorneqarnermik soqqusaatsuliorfigineqarnermillu ilumut nuannarisaqartuunerannik isumaliortaaseq upperigamikku anguterpassuit timikkut misigissutsikkullu nuliatik atornerluttarpaat. Angutip kristumiuusup eqqarsariaatsimit silamiorpaluttumit sunnerneqarluni nuliani ajuallannartuliorfigigaluarpagu, ila, kanngunassusissaa! „Uiga ilagiinni kiffartortuuvoq oqalugiartarlunilu,“ arnaq kristumiu taama oqarsimavoq. Kisianni „pinerluttuliorfigineqartarpunga“. Ersarippoq ilioriaaseq tamanna Guutip aaqqissuussineranut naapertuutinngitsoq. Angut taanna allamit allaanerussuteqarpoq, tassa kamakkajussutsi qaangerniarlugu ikiortissarsiorami Guutimit iluarisaanissani neriuutigalugu. — Galâsiamiut 5:19-21.

⁹ Guutip uiusut peqquai nuliatik namminneq timimissut asaqqullugit. Taamaaliorumannginneq Guutip aaqqissuussineranit pikitsitsineruvoq Guutimullu attaveqarnermik qajannarsisitsisinnaalluni. Apustili Peterip oqaasii ersaripput: ’Angutaasusi nuliasi silalimmik inooqatigisigik, pisattatut qajannarnerusutut iliorlugit,  . . . qinusarnisi akornuseqqunagit.’ (1 Pîtruse 3:7) Nuliamik naakkittaatsuliorfiginninnerup taassuma meeqqallu anersaakkut uummaarissusiannik aseruinermik kinguneqarsinnaavoq.

10. Uiusut ilaatigut qanoq ilillutik Kristusitut siulersuisinnaappat?

¹⁰ Ilissi uiusut, Kristusitut siulersuisarussi ilaqutasi peqqissiartussapput. Kristus naakkittaatsuliorneq imaluunniit soqqusaatsuliorneq ajorpoq. Akerlianik ima oqarsimavoq: ’Ilinniarfigisinga, qanilaarama uummatikkullu makitajuikkama; taava tarnissinnut qasuerfissarsiumaarpusi.’ (Matîuse 11:29) Ilaquttavit illit taama oqaatigisinnaavaatsit? Kristusip ajoqersukkani ikinngutimisut iliorfigisarpai tatiginninnermillu ersersitsivigisarlugit. (Juánase 15:15) Illit nuliat aamma taama iliorfigisarpiuk? Biibilimi „nuliaalluartoq“ ima allaatigineqarpoq: „Uiata tamatigoorluinnaq tatigisarpaa.“ (Ussatit 31:10, 11) Tamanna isumaqarpoq ilaatigut kiffaanngissuseqartariaqartoq, pissutissaqanngitsumillu killilersorneqartariaqanngitsoq. Jesusip ajoqersukkani aamma kajumissaartarpai misigissutsiminnik isummaminnillu aniatitsisaqqullugit. (Matîuse 9:28; 16:13-15) Illit nuliat taama iliorfigisarpiuk? Imaluunniit isumaqarpit ilumoorluni isumaqatiginngippatit oqartussaanerit saassunneqartoq? Nuliavit misigissusiisa soqutiginerisigut sumiginnannginnerisigullu siulersuininnik ataqqinninnera alliartortissavat.

11. (a) Ataataasut qanoq ilillutik meeqqamik anersaakkut pisariaqartitaat isumagisinnaavaat? (b) Utoqqaanertat ilagiinnilu kiffartortut ilaqutaminnik paarsillutik sooq maligassaalluartariaqarpat?

¹¹ Ataataaguit meeqqavit anersaakkut, misigissutsikkut timikkullu pisariaqartitaat isumagalugit siulersuisariaqarputit. Taamaaliorniarlutit ilaqutannut anersaakkut pitsaasumik ileqquliussaqartariaqarputit: oqaluussinermi suleqatigisarlugit, angerlarsimaffissinni Biibilimik atuaqqissaaqatigisarlugit ullormullu allassimaffik oqaloqatigiissutigisarlugu. Soqutiginartumik Biibilimi takutinneqarpoq utoqqaanertaq ilagiinnilu kiffartortoq tassaasariaqartoq ’inoqutiminik paarsilluartoq,’. Angutit taama kiffartuutillit ittutut maligassaalluartariaqarput. Naak ilagiinni akisussaaffeqqortuujugaluarlutik namminneq ilaqutatik salliutittariaqarpaat.  Paulusip naasuiarpaa sooq: ’Namminermi inoqutiminik paarsineq nalusup qanoq ililluni Guutip ilagiissai paaqqissavai?’ — 1 Timûtiuse 3:4, 5, 12.

Nuliaasut kristumiuusut tapersersuisut?

12. Aaqqissuussaanermi kristumiuusumi nuliaasut qanoq inissisimaffeqarpat?

¹² Nuliaavit kristumiuusoq? Taava illittaaq ilaqutariinnik aaqqissuussaanermi pingaaruteqarputit. Nuliat kristumiuusut kajumissaarneqarput ’uitik asaqqullugit qitornatillu asaqqullugit, piitaajuitsooqqullugit, titsiitsooqqullugit, illumi paarsilluaqqullugit, avaaginnittaqqullugit, uitik naalaqqullugit’. (Títuse 2:4, 5) Taamaalillutit nuliaasutut maligassaalluarniartariaqarputit, ilaqutannut angerlarsimaffik eqqiluitsuutillugu najoruminartuutillugulu. Illumi suliassat ilaannikkut qasunarsinnaasarput, kisianni tamanna nikanarsaataanani pingaaruteqartarpoq. Nuliaagavit ’illut paarisarpat’ taamaaliorninnilu ilaatigut namminersorsinnaasarlutit. (1 Timûtiuse 5:14) Assersuutigalugu, ’nuliaalluartoq’ illumi atugassanik pissarsiortarpoq, illumik arsaammilluunniit pissarsisinnaalluni allaallu namminersorluni akissarsiaqartarsimalluni. Tupinnanngilaq uiminit nersorneqartariaqarmat! (Ussatit kapitali 31) Soorunami suliniutit tamakku uiusup akuersinera malillugu ingerlanneqassapput.

13. (a) Arnat ilaasa sooq naalatsigitinneq artorpaat? (b) Arnat kristumiuusut uiminnut naalatsigitinneq qanoq iluaqutigissavaat?

¹³ Taamaattorli uigisamut naalatsigitinneq tamatigut oqitsuinnaasarsinnaanngilaq. Uiusut ilaat ataqqinnaammik pigisaqanngillat. Immaqalu illit aningaasarsiornermut, pilersaarussiornermut aaqqissuinermullu piukkunnaateqarluarputit. Immaqa suliffeqarputit taamaalillutillu ilaqutariinnut tapersersuilluartuullutit. Immaqaluunniit siornatigut angummit naqisimaneqarneq annikilliuutigisimavat maannalu angummut naalatsigitinneq artorsaatigalugu. Taamaattorli uiit ataqqigukku imaluunniit ’mianerigukku’ Guutip siulersuinera ataqqissavat. (Evfisumiut 5:33; 1 Korintumiut 11:3) Naalatsigitinneq ilaqutariittut iluatsitsinissatsinnut aamma pingaaruteqaqaaq; taamaaliornikkut aappariinnersi pisariaqanngitsunik artorsaatissinngitsoorsinnaavat.

14. Nuliaasup uimi aalajangernerisa ilaat isumaqatiginngikkuniuk qanoq iliorsinnaava?

¹⁴ Tamannali ima paasisariaqarpa uiit ilaqutariinnut ajoqutaasinnaasumik aalajangiilerpat illit nipangersimasariaqartutit? Immaqa naamik. Ernermi Isakip alliartorneranut aarlerinartoq malugigamiuk, Abrahamip nulia Sara nipangersimaannanngilaq. (1 Moses 21:8-10) Illittaaq ilaannikkut misigissutsinnik aniatitsisariaqartarsinnaavutit. Ataqqinnittumik ’oqaaserineqarfissamikkut’ oqaatigineqarpata angutit kristumiuusut amerlanersaasa tusarnaassavaat. (Ussatit 25:11) Illilli siunnersuutit maleruanngippagu najoqqutassiarlu pingaartoq Biibilimeersoq unioqqutinneqanngippat, nunullutit uivit kissaatigisai akuerissannginnerpigit? Eqqaamajuk, ’arnat ilisimassuseqartut angerlarsimaffik sanasaraat, kisianni arnap sianiitsup assamminik ingutsertaraa’. (Ussatit 14:1) ’Illut sanasinnaavat’ ilaatigut uivit siulersuinerata tapersersorneratigut, naammassisimasaanik nersorlugu kukkugaangallu sallaallutit pisarukku.

15. Nuliaasup qanoq ililluni meeqqat perorsaanerannut ilinniartitsinerannullu peqatarsinnaava?

 ¹⁵ Illut aamma sanasinnaavat meeqqavit perorsarnerannut ilinniartinneqarnerannullu peqataasarnikkut. Assersuutigalugu, ilaqutariittut akuttuunngitsumik ineriartornartumillu Biibilimik atuaqqissaartarnersi tapersersorsinnaavat. „Assatit sarliaannartarnagit“ periarfissat tamaasa atorlugit sallusuissut Guutimeersoq meeqqannut tunniuttaruk — angalagaangassi pisiniartaraangassilu. (Nalunaajaasup oqaasii 11:6) Ataatsimiinnerni akissutissaannik Teokratiimik ilinniarfimmilu pisassaannik ikiortakkit. Ikinngutaat kikkuunersut maluginiartakkit. (1 Korintumiut 15:33) Najoqqutassiat Guutimeersut perorsaanerlu eqqarsaatigalugit meeqqatit paasitinniartakkit illit uiillu isumaqatigiittusi. Taakkua illit uiillu saqitsaatilersinniarpasi akuerissanngilasi.

16. (a) Biibilimi maligassiat suut angajoqqaanut kisimiittunut imaluunniit uppinngitsumik aappalinnut kajumissinarpat? (b) Allat ilagiinniittut qanoq ilillutik taakku ikiorsinnaavaat?

¹⁶ Anaanaaguit ataataaguilluunniit kisimiittoq imaluunniit uppinngitsumik aappaqaruit, illit anersakkut siulersuisariaqarputit. Tamanna artornarsinnaavoq ilaannikkullu nikallornarsinnaalluni. Uniinnaqinalli. Timotiusip anaanaata, Eunikep, iluatsitsilluni Timoteus ’meeraaneranit’ Allakkanik Illernartunik ilinniartissimavaa, naak uppinngitsumik aappaqaraluarluni. (2 Timûtiuse 1:5; 3:15) Akornatsinnilu allarpassuit taamaaliortarput. Taamaaliorniarninni ikiorneqartariaqaruit utoqqaanertanut tamanna eqqartorsinnaavat. Immaqa isumagisinnaavaat ataatsimiinnernut aggertarnissinni oqaluusseqataanissinnilu ikiorneqarnissarsi. Allanut kajumissaarisinnaapput asiarnissamut katisimaarnissamulluunniit ilissi peqataateqqullusi. Imaluunniit oqaluussisartoq misilittagaqarluartoq qinnuigisinnaavaat ilaqutariittut atuaqqissaaqatigiittalernissassinnut ikiuuteqqullugu.

Meeqqat qujaginnittut

17. (a) Inuusuttut qanoq ilillutik ilaqutariit iluaqutissaannut peqataasinnaappat? (b) Jesus tamatumani qanoq maligassaalluarsimava?

¹⁷ Inuusuttut kristumiuusut ilaqutariit iluaqutissaannut peqataasinnaapput siunnersuutip Evfisumiut 6:1-3-miittup maleruarneratigut: ’Ilissi meeqqat, angajoqqaasi naalassigik Naalakkami, taama iluarmat. „Ataatat anaanallu ataqqikkit“, tassa inassut siulleq unnersuummik ilalik: „nunami pilluaqqullutit inuummersoqqullutillu.“’ Angajoqqaavit suleqatiginerisigut Jehovamut ataqqinninnerit takutissavat. Jesus Kristus naammalluinnartuugami isumaqarsimasinnaalluaraluarpoq angajoqqaanut naammalluinnanngitsunut naalatsigitittariaqarani. Kisianni ’naalalluarpai. . . . Jesus alliartorpoq ilisimassutsimigut ukiumigullu nuannarineqarnermigullu Guutimi inunnilu.’ — Lúkarse 2:51, 52.

18, 19. (a) Angajoqqaanik ataqqinninneq qanoq paasisariaqarpa? (b) Angerlarsimaffik qanoq inuummarissinnarsinnaava?

¹⁸ Illittaaq angajoqqaatit taamatut ataqqissannginnerpigit? ’Ataqqinninneq’ isumaqarpoq oqartussaassuseqartitanik akuerinninneq. (Naleqqiuguk 1 Pîtruse 2:17.) Amerlanertigut ataqqinninneq naleqqulluartuuvoq, allaat ataatat anaanalluunniit uppertuunngippat imaluunniit maligassaalluanngippat. Angajoqqaatit kristumiuullutik maligassaalluarpata annerusumik ataqqissannginnerpigit? Eqqaamajullu, angajoqqaavit perorsaatissikkaangamitsit sualuppallaartumik killilertarnianngimmatsit. Kisiannili illersorniarpaatsit  ’inuuginnarsinnaaqqullutit’. — Ussatit 7:1, 2.

¹⁹ Ilaqutariinneq tassaavoq asannittumik aaqqissuussaaneq! Uiusut, nuliaasut meeqqallu tamarmik Guutip ilaqutariinnut maleruagassai maleruaraangamikkik, angerlarsimaffik tassaalersarpoq qimaaffissaq inuummarissinartoq. Taamaattorli attaveqarnikkut meeqqanillu perorsaanikkut ajornartorsiutit takkussinnaasarput. Ilanngutassiami tulliuttumi ajornartorsiutit taamaattut ilaat qanoq qaangerneqarsinnaasut sammissavavut. (wD 15/10)

Eqqaamavigit?

□ Biibilip nalaani uiusut, nuliaasut meeqqallu Guutimik mianerinnittut sunik maleruagassaqarpat?

□ Kristumiuussuseq uiusup inissisimaffianik qanoq paasissutisiinerua?

□ Ilaqutariinni kristumiuusuni nuliaasoq qanoq inissisimaffeqarpa?

□ Inuusuttut qanoq ilillutik ilaqutariit iluaqutissaannut peqataasinnaappat?

[Atuaqqissaarnermi apeqqutit]

[Qupp. 11-mi assiliartaq]

„Taamanikkut inuunerlunneq eqqarsaatigissagaanni kristumiut aappariinnermik isiginninnerat tassaavoq kristumiuussutsimi nutaanerpaaq sukannernerparlu. . . . Inuiaannut ullut nutaavissut aallartissimapput.“

[Qupp. 12-mi assiliartaq]

Uiusut kristumiuusut nuliatik kajumissaartarpaat misigissutsiminnik aniatitseqqullugit, misigissusii soqutigalugit