KUUMA NGOTHI-INĨ | HIHI NĨ KŨRĨ SHAITANI?
Hihi nĩ Twagĩrĩirũo Gwĩtigĩra Shaitani?
Rĩera rĩa kaboni monoksaidi rĩtionekaga na nĩ ũgwati
Ti ũndũ mũhũthũ kũmenya kana nĩ ũrarĩhuhia. Tondũ rĩtionekaga na rĩtinungaga, kaingĩ andũ marĩhuhagia matekũmenya. Kwahoteka makĩria ma nuthu ya ikuũ iria cionekaga nĩ ũndũ wa thumu thĩinĩ wa thĩ yothe, cionekaga nĩ ũndũ wa rĩera rĩrĩ: kaboni monoksaidi. O na kũrĩ ũguo, tũtiagĩrĩirũo nĩ kũrĩĩtigĩra. Nĩ kũrĩ njĩra cia kũmenya kana kũrĩ na rĩera rĩu, na cia kwĩgitĩra. Andũ aingĩ nĩ mekĩraga nyũmba ciao macini cia kũmateithia kũmenya. Na rĩrĩa ciamamenyithia atĩ kwĩ na rĩera rĩu, makoya ikinya rĩrĩa rĩagĩrĩire.
O ta rĩera rĩa kaboni monoksaidi, Shaitani ndonekaga, ti ũndũ mũhũthũ andũ kũmenya harĩa arĩ, na akoragwo arĩ ũgwati mũnene. No Ngai nĩ atũheete ũteithio. Ndwagĩrĩirũo gwĩtigĩra Shaitani angĩkorũo nĩ ũkũhũthĩra wega iheo ici Ngai atũheete:
Ũhoti wa gwĩthuurĩra. Rĩandĩko rĩa Jakubu 4:7 rĩtwĩraga ũũ: “Reganagai na mũcukani, nake nĩekũmũũrĩra.” O na gũtuĩka Shaitani nĩ arĩ hinya, ndangĩhota gũtũma wĩke kĩa hinya maũndũ marĩa ũtangĩenda gwĩka. Wĩ na ũhoti wa gwĩthuurĩra. 1 Petero 5:9 yugaga ũũ: “Mũmwĩtiirie [Mũcukani] mũrũmĩtie ũhoro ũrĩa mwĩtĩkĩtie.” Ririkana atĩ, Jesu eehereirũo nĩ Shaitani hĩndĩ ĩrĩa aaregire magerio matatũ arũmĩtie. (Mathayo 4:
Ũrata hamwe na Ngai. Rĩandĩko rĩa Jakubu 4:8 rĩtwĩkĩraga ngoro ‘tũkuhĩrĩrie Ngai.’ Jehova we mwene nĩwe ũrakũũria ũgĩe na ũrata wa hakuhĩ hamwe nake. Ũngĩka ũguo atĩa? Njĩra ĩrĩa njega biũ ya gwĩka ũguo nĩ kwĩruta ũhoro wake makĩria kũgerera Bibilia. (Johana 17:3) Maũndũ marĩa ũkwĩruta megiĩ Jehova nĩ megũtũma ũmwende, naguo wendo ũcio ũgũtindĩke gwĩkaga wendi wake. (1 Johana 5:3) Hihi nake Ithe witũ wa igũrũ arĩkaga atĩa o ũrĩa ũrĩthiaga ũkĩmũkuhagĩrĩria? Jakubu agathiĩ na mbere kuuga, Ngai ‘nake nĩ ekũmũkuhĩrĩria inyuĩ.’
Jehova nĩ atũheete iheo iria itũteithagia kwĩgitĩra
Kĩĩranĩro kĩa ũgitĩri. Thimo 18:10 yugaga ũũ: “Rĩĩtwa rĩa Jehova nĩ nyũmba ya hinya njake mũthiringo; nĩyo mũndũ mũthingu ahanyũkagĩra agatonya, akarema gũkinyĩrĩrĩka.” No ningĩ ti kuuga atĩ rĩĩtwa rĩa Ngai no rĩhũthĩrũo rĩrĩ ta kĩndũ gĩa gũkũrehera mũnyaka. Handũ ha ũguo, nĩ kuuga atĩ arĩa maheete rĩĩtwa rĩu gĩtĩo no mamũhoe ũgitĩri hĩndĩ o yothe.
Ngerekano ya Bibilia. Rĩandĩko rĩa Atũmwo 19:19 nĩ rĩtũheaga ngerekano njega ĩgiĩ andũ arĩa maatuĩkaga Akristiano bũrũri-inĩ wa Efeso, riugaga ũũ: “O na andũ aingĩ arĩa maatũire maragũraga makĩũngania mabuku mao, makĩmacina andũ othe makĩĩonagĩra: magĩcoka magĩtara mbia iria mangĩoimire, makĩona atĩ nĩ mbia ciakuo ngiri mĩrongo ĩtano.” * Akristiano acio maacinire indo iria ciothe ciahutanĩtie na ũragũri, gũtekũmakania thogora wacio. Kĩonereria kĩu no gĩtũteithie mũno ũmũthĩ. Ũrongoria wa ndaimono na ũragũri nĩ ũtheremete mũno thĩinĩ wa thĩ. Kĩndũ o gĩothe, kana mũtugo o wothe ũhutanĩtie na ũrongoria wa ndaimono o na ũkĩonekaga ta ũtarĩ mũũru, no ũgucĩrĩrie ndaimono harĩ ithuĩ. Nĩ harĩ bata ũgerie ũrĩa wothe ũngĩhota nĩguo ndũgakorũo na indo ta icio.
Rogelio, ũrĩa ũgwetetwo gĩcunjĩ-inĩ kĩa mbere, kuuma e mũnyinyi nginya rĩrĩa akinyirie mĩaka 50, ndeetĩkĩtie atĩ nĩ kũrĩ Mũcukani. No nĩ aagarũrĩire mawoni make. Nĩkĩ? Rogelio oigire ũũ: “Ihinda-inĩ rĩu nĩrĩo ndagĩire na Bibilia rita rĩa mbere, na ũmenyo ũrĩa ndagĩire naguo wa Maandĩko nĩ watũmire njĩtĩkie biũ atĩ Mũcukani e kuo. Na ũmenyo ũcio nĩ ũndeithagia ndikagwe mĩtego-inĩ yake.”
“Ũmenyo ũrĩa ndagĩire naguo wa Maandĩko nĩ watũmire njĩtĩkie biũ atĩ Mũcukani e kuo. Na ũmenyo ũcio nĩ ũndeithagia ndikagwe mĩtego-inĩ yake”
Hihi wee no wende gũkoona ihinda rĩrĩa Shaitani atagaakorwo kuo rĩngĩ? No kũhoteke. Maandĩko nĩ matwĩraga ũhoro wa ihinda rĩũkĩte rĩrĩa Mũcukani, ũrĩa ũhĩtithagia andũ aingĩ ‘agaikio thĩinĩ wa iria rĩrĩa rĩa mwaki na ũbiriti.’ (Kũguũrĩrio 20:10) Ma nĩ atĩ, mwaki na ũbiriti itingĩhota gũcina kĩũmbe gĩa kĩĩroho. Kwoguo iria rĩu rĩa mwaki-rĩ, no mũhaka rĩkorũo rĩrarũgamĩrĩra kũniinwo kaimana. Shaitani ndagaakorũo kuo rĩngĩ tene na tene. Na githĩ gĩtigagĩkorũo kĩrĩ gĩkeno kĩnene harĩ arĩa mendete Ngai!
No kwa ihinda rĩrĩ, geria gũthiĩ na mbere kwĩruta maũndũ maingĩ o ũrĩa ũngĩhota, megiĩ Jehova na njĩra ciake. * Ta hũũra mbica wĩ kuo ihinda-inĩ rĩu, rĩrĩa andũ makauga na ma atĩ, “gũtirĩ Shaitani!”
^ kib. 8 Angĩkorũo mbia icio igwetetwo ciarĩ dinari ya Roma, ingĩkorũo irĩ mbeca nyingĩ mũno! Mũndũ ũmwe angĩacithũkũmire na thikũ 50,000.
^ kib. 11 Nĩguo wone ũhoro makĩria wĩgiĩ Shaitani na mawoni ma Ngai kwerekera ũgo na ũragũri, thoma gĩcunjĩ gĩa 10 kĩa ibuku rĩa Bibilia Ĩrutanaga Atĩa Kũna? No ũhoe Mũira wa Jehova ibuku rĩu.
