Gũkena Nĩ Ũndũ Wa Kĩĩrĩgĩrĩro Giitũ
Gũkena Nĩ Ũndũ Wa Kĩĩrĩgĩrĩro Giitũ
‘Kũrĩ na kĩĩrĩgĩrĩro kĩa muoyo ũtagathira, o muoyo ũcio weranĩirũo nĩ Ngai mbere ya mĩndĩ na mĩndĩ.’—TIT. 1:2.
GŨCOKERA NA NJĨRA NGUHĨ
Tũmenyaga atĩa atĩ nĩ gũkoragwo na gĩkeno igũrũ rĩrĩa Mũkristiano mũitĩrĩrie maguta arũmia wĩkindĩru wake nginya mũico?
Gũkinyanĩra gwa kĩĩrĩgĩrĩro kĩa arĩa a ng’ondu ingĩ gũkonainie atĩa na gũkinyanĩra gwa kĩĩrĩgĩrĩro kĩa arĩa aitĩrĩrie maguta?
Nĩguo kĩĩrĩgĩrĩro giitũ gĩkinyanĩre, nĩ ‘mĩtũũrĩre ĩrĩkũ ya ũtheru’ na “ya kwĩamũrĩra Ngai” arĩ o mũhaka tũkorũo nayo?
1. Kĩĩrĩgĩrĩro kĩrĩa Jehova atũheete kĩngĩtũteithia atĩa gũkirĩrĩria?
JEHOVA nĩwe “Ngai mwene kĩĩrĩgĩrĩro giitũ.” Ũguo nĩguo mũtũmwo Paulo oigire, agĩcoka akiuga atĩ Jehova no ‘atũme tũiyũragwo o kũiyũrũo nĩ gĩkeno o na thayũ tondũ wa ũrĩa twĩtĩkĩtie, nĩ getha tũkĩragĩrĩrie kũgĩa na kĩĩrĩgĩrĩro nĩ ũndũ wa hinya wa roho mũtheru.’ (Rom. 15:13) Tũngĩkĩrĩrĩria kũgĩa na kĩĩrĩgĩrĩro nĩ tũrĩhotaga kũũmĩrĩria moritũ o mothe marĩa mangiumĩra, tũrĩ na ngoro ciyũrĩtio nĩ gĩkeno na thayũ. Kĩĩrĩgĩrĩro kĩu kĩrĩkoragwo kĩrĩ ‘nanga ya roho, gĩa kwĩhokeka, na kĩrũmu’ harĩ Akristiano arĩa angĩ, o ta ũrĩa gĩkoragwo harĩ Akristiano arĩa aitĩrĩrie maguta. (Ahib. 6:18, 19) Kĩĩrĩgĩrĩro giitũ no gĩtũtirĩrĩre hĩndĩ ya mathĩna, na no gĩtũteithie tũtikagĩe na mathangania kana twage wĩtĩkio.—Thoma Ahibirania 2:1; 6:11.
2. Nĩ ciĩrĩgĩrĩro irĩkũ igĩrĩ Akristiano marĩ nacio ũmũthĩ, na arĩa a “ngo’ndu ingĩ” mahutagio atĩa nĩ kĩĩrĩgĩrĩro kĩa arĩa aitĩrĩrie maguta?
2 Akristiano arĩa maraatũũra mahinda-inĩ maya ma kũrigĩrĩria marĩ na kĩmwe gĩa ciĩrĩgĩrĩro iria igĩrĩ. Akristiano aitĩrĩrie maguta arĩa matigarĩte a ‘karũũru kanini’ marĩ na kĩĩrĩgĩrĩro kĩa muoyo ũtagakua igũrũ marĩ athamaki na athĩnjĩri Ngai hamwe na Kristo Ũthamaki-inĩ wake. (Luk. 12:32; Kũg. 5:9, 10) Nakĩo “kĩrĩndĩ kĩingĩ” gĩtangĩgereka kĩa “ng’ondu ingĩ” kĩrĩ na kĩĩrĩgĩrĩro gĩa gũgatũũra tene na tene thĩinĩ wa paradiso gũkũ thĩ ta raia a Ũthamaki wa Kĩĩmesia. (Kũg. 7:9, 10; Joh. 10:16) Arĩa a ng’ondu ingĩ magĩrĩirũo nĩ kũririkana atĩ ũhonokio wao wĩhocetie harĩ gũthiĩ na mbere kũnyita mbaru ‘ariũ a Ithe’ na Kristo arĩa matigarĩte gũkũ thĩ. (Mat. 25:34-40) Arĩa aitĩrĩrie maguta nĩ makaamũkĩra kĩheo kĩao, ĩndĩ arĩa a ng’ondu ingĩ hatarĩ nganja nĩ makaamũkĩra igai rĩao. (Thoma Ahibirania 11:39, 40.) Rekei twambe twarĩrĩrie kĩĩrĩgĩrĩro kĩa arĩa aitĩrĩrie maguta.
‘KĨĨRĨGĨRĨRO KĨRĨA KĨRĨ MUOYO’ KĨA AKRISTIANO ARĨA AITĨRĨRIE MAGUTA
3, 4. Nĩ atĩa Akristiano aitĩrĩrie maguta ‘maciaragwo rĩngĩ nĩguo magĩe na kĩĩrĩgĩrĩro kĩrĩ muoyo,’ na kĩĩrĩgĩrĩro kĩu nĩ kĩrĩkũ?
3 Thĩinĩ wa marũa meerĩ marĩa mũtũmwo Petero aandĩkĩire Akristiano arĩa aitĩrĩrie maguta, aametire ‘arĩa athuure.’ (1 Pet. 1:1) Nĩ aaririe maũndũ maingĩ megiĩ kĩĩrĩgĩrĩro kĩa magegania kĩrĩa kĩhetwo karũũru karĩa kanini. Thĩinĩ wa marũa make ma mbere, Petero aandĩkire ũũ: “Atĩrĩrĩ, we ũrĩa ũrĩ Ngai wa Mwathani witũ Jesu Kristo, na nowe Ithe, arogathwo, o we watũciarire rĩngĩ nĩ ũndũ wa tha ciake nyingĩ, nĩ getha tũgĩe na kĩĩrĩgĩrĩro kĩĩ muoyo, nĩ ũndũ wa ũrĩa Jesu Kristo aariũkire akiuma kũrĩ arĩa akuũ, na nĩ getha tũgwate igai rĩrĩa rĩtangĩbutha, rĩrĩa rĩtheru rĩtangĩhwererekera; narĩo nĩrĩo mũigĩirũo Igũrũ, o inyuĩ mũtũire mũrangagĩrũo nĩ hinya wa Ngai, nĩ ũndũ wa ũrĩa mwĩtĩkĩtie, nĩ getha mũkona ũhonokio ũrĩa ũhaarĩirio wa gũkaguũranĩrio mahinda-inĩ marĩa ma kũrigĩrĩria. Na ũhoro ũcio nĩguo mũkenagĩra mũno.”—1 Pet. 1:3-6.
4 Gakundi kanini ka Akristiano arĩa Jehova athuurĩte magaathamaka hamwe na Kristo thirikari-inĩ ya Ũthamaki wa igũrũ nĩ ‘maciaragwo rĩngĩ’ marĩ ariũ a Ngai a kĩĩroho. Maitĩrĩirio maguta kũgerera roho mũtheru nĩguo magaatuĩka athamaki na athĩnjĩri Ngai hamwe na Kristo. (Kũg. 20:6) Petero oigire* atĩ ‘gũciarũo rĩngĩ’ gũtũmaga magĩe na “kĩĩrĩgĩrĩro kĩĩ muoyo” kĩrĩa eetire “igai rĩrĩa rĩtangĩbutha, rĩrĩa rĩtheru rĩtangĩhwererekera” rĩrĩa maigĩirũo “Igũrũ.” Kĩĩrĩgĩrĩro kĩu kĩa magegania nĩ gĩtũmaga arĩa aitĩrĩrie maguta makorũo na gĩkeno. O na kũrĩ ũguo, nĩguo makinyĩre kĩĩrĩgĩrĩro kĩu, no mũhaka matũũrie wĩhokeku wao.
5, 6. Nĩkĩ no mũhaka arĩa aitĩrĩrie maguta merutanĩrie biũ nĩguo rĩĩtana rĩao rĩa gũthiĩ igũrũ rĩkinyanĩre?
5 Thĩinĩ wa marũa make ma kerĩ, Petero aahinyĩrĩirie Akristiano arĩa aitĩrĩrie maguta ‘mekagĩre kĩyo makĩria, nĩguo gwĩtwo na gũthuurũo kwao gũtuĩke kũrũmu.’ (2 Pet. 1:10) No mũhaka merutanĩrie gũkũria ngumo cia Gĩkristiano ta wĩtĩkio, wĩyamũrĩri Ngai, mendage Akristiano arĩa angĩ, na makoragwo na wendo. Petero oigire ũũ: “Mũngĩkorũo mwĩ na maũndũ macio na makamũingĩhĩra mũno-rĩ, nĩmo mangĩgiria mũkorũo mũgũtarĩte kana mũkaga gũciara maciaro.”—Thoma 2 Petero 1:5-8.
6 Thĩinĩ wa ndũmĩrĩri yake kũrĩ athuri aitĩrĩrie maguta a kĩũngano kĩa Filadelfia gĩa karine ya mbere thĩinĩ wa Asia, Kristo oigire ũũ: “Tondũ wee nĩũtũire ũmenyereire uuge ũrĩa wakwa wa ũkirĩrĩria-rĩ, niĩ na niĩ nĩngagũikaria ihinda rĩrĩa rĩa kũgerio, rĩrĩa rĩgoka mabũrũri mothe rĩgerie arĩa matũire gũkũ thĩ. Nĩngũka o narua; gwatagĩria maũndũ marĩa wĩ namo, mũndũ o na ũrĩkũ ndakanae gũthiĩ na thũmbĩ yaku.” (Kũg. 3:10, 11) Mũkristiano mũitĩrĩrie maguta angĩaga gũtũũria wĩhokeku wake, ndakaheo “thũmbĩ ĩrĩ riri, o ĩrĩa ĩtacokaga kũũma” ĩrĩa ĩrĩirũo arĩa athuure matũũra marĩ ehokeku nginya gũkua.—1 Pet. 5:4; Kũg. 2:10.
GŨTONYA THĨINĨ WA ŨTHAMAKI
7. Nĩ kĩĩrĩgĩrĩro kĩrĩkũ kĩa magegania Judasi aagwetire marũa-inĩ make?
7 Kĩndũ mwaka wa 65 M.M., Judasi mũrũ wa nyina na Jesu akĩandĩkĩra Akristiano aitĩrĩrie maguta, aametire “arĩa metĩtwo.” (Jud. 1; ringithania Ahibirania 3:1.) Muoroto wa kũmaandĩkĩra warĩ kwarĩrĩria kĩĩrĩgĩrĩro kĩrĩ na riri kĩa ũhonokio, kĩrĩa Akristiano arĩa metĩtwo mathiĩ igũrũ Ũthamaki-inĩ wa Ngai ‘magwatanĩire.’ (Jud. 3) O na gũtuĩka nĩ aarĩrĩirie maũndũ mangĩ ma bata, akĩrĩkĩrĩria marũa make makuhĩ nĩ aaririe ũhoro wa kĩĩrĩgĩrĩro kĩa Akristiano aitĩrĩrie maguta akiuga ũũ: “Na rĩu-rĩ, we ũrĩa ũngĩhota kũmũgitĩra mũtikanahĩngwo, na kũmũrũgamia harĩa atũũraga harĩ riri, mũtarĩ na kaũũgũ, na mũkenete gĩkeno o kĩrĩa kĩnene-rĩ, o we ũrĩ Ngai we wiki na Mũtũhonokia ũtũhoneketie na ũndũ wa Mwathani witũ Jesu Kristo, arogĩaga na riri, na ũkaru, na wathani, o na ũhoti, o mbere ya mĩndĩ na mĩndĩ, o na rĩu, o na nginya tene na tene.”—Jud. 24, 25.
8. Kũringana na Judasi 24, nĩ kĩĩ kĩonanagia atĩ nĩ gũkoragwo na gĩkeno igũrũ rĩrĩa Mũkristiano mũitĩrĩrie maguta arũmia wĩkindĩru wake nginya mũico?
8 Hatarĩ nganja, Mũkristiano o wothe mũitĩrĩrie maguta nĩ abataraga kũgitĩrũo na ũndũ o wothe ũngĩthũkia wĩhokeku wake. Kũringana na Bibilia, merĩgagĩrĩra atĩ Jesu Kristo nĩ akaamariũkia, maingĩre mbere ya Ngai marĩ na mĩĩrĩ mĩkinyanĩru ya kĩĩroho marĩ na gĩkeno kĩnene. Mũkristiano mũitĩrĩrie maguta aakua arĩ mwĩhokeku, akoragwo arĩ na kĩĩrĩgĩrĩro kĩrũmu gĩa ‘kũriũkio arĩ na mwĩrĩ wa kĩĩroho ũrĩ na riri ũtangĩbutha.’ (1 Kor. 15:42-44) Angĩkorũo nĩguo gũkoragwo na ‘gĩkeno igũrũ nĩ ũndũ wa mwĩhia ũmwe wĩrirĩte,’ ta hũra mbica ũrĩa gũkoragwo na gĩkeno igũrũ hingo ĩrĩa Mũkristiano mũitĩrĩrie maguta arũmia wĩkindĩru wake nginya mũico. (Luk. 15:7) Jehova na ciũmbe njĩhokeku cia kĩĩroho nĩ makenaga hamwe na ũrĩa mũitĩrĩrie maguta akĩamũkĩra ngerenwa yake arĩ na ‘gĩkeno kĩnene.’—Thoma 1 Johana 3:2.
9. Arĩa aitĩrĩrie maguta ehokeku magetĩkĩrio atĩa na ‘ũtugi matonye’ Ũthamaki-inĩ, na kĩĩrĩgĩrĩro kĩu gĩteithagia atĩa arĩa aitĩrĩrie maguta matigarĩte gũkũ thĩ?
9 Akĩaria o ũndũ-inĩ ũcio, Petero aandĩkĩire Akristiano arĩa aitĩrĩrie maguta atĩ mangĩtũũra marĩ ehokeku nĩ ‘mageetĩkĩrio na ũtugi matonye ũthamaki-inĩ ũrĩa ũtagathira, o ũrĩa wa Mwathani witũ na Mũtũhonokia Jesu Kristo.’ (2 Pet. 1:10, 11) ‘Mageetĩkĩrio na ũtugi’ magwate kĩheo kĩao igũrũ marĩ na riri mũnene. Ningĩ kuuga atĩ ‘mageetĩkĩrio na ũtugi’ no kuonanie irathimo nyingĩ iria igaakenerũo nĩ acio merutanagĩria thĩinĩ wa kĩhĩtahĩtano kĩa muoyo. Makaaririkanaga mũtũũrĩre wao wa wĩhokeku marĩ na ngoro ciyũrĩtwo nĩ gĩkeno na ngatho nyingĩ. Hatarĩ nganja, kĩĩrĩgĩrĩro kĩu nĩ kĩheaga Akristiano aitĩrĩrie maguta arĩa matigarĩte gũkũ thĩ hinya wa ‘kwĩhotora meciria mao, na gũikaraga materigĩtwo’ ũtungata-inĩ.—1 Pet. 1:13.
‘KĨĨRĨGĨRĨRO’ KĨA NG’ONDU IRIA INGĨ
10, 11. (a) Arĩa a ng’ondu ingĩ marĩ na kĩĩrĩgĩrĩro kĩrĩkũ? (b) Gũkinyanĩra gwa kĩĩrĩgĩrĩro gĩa gũtũũra thĩ gũkonainie atĩa na Kristo na “kũguũranĩrio gwa ciana cia Ngai”?
10 Mũtũmwo Paulo nĩ aandĩkire ũhoro wa kĩĩrĩgĩrĩro kĩrĩ na riri kĩa ‘ariũ a Ngai,’ arĩa aitĩrĩrie maguta marĩ ‘agai hamwe’ na Kristo. Agĩcoka akĩandĩka ũhoro wa kĩĩrĩgĩrĩro kĩa magegania kĩrĩa Jehova aigĩire kĩrĩndĩ gĩtangĩgereka kĩa ng’ondu ingĩ: “Indo ciothe iria ciombirũo [andũ] itũire o cietereire kũguũranĩrio gwa ciana cia Ngai [arĩa aitĩrĩrie maguta], . . . irĩ na mĩĩto mĩnene. Nĩ ũndũ ciũmbe icio, . . . ciathĩrĩirio atĩ itũũre ciagĩte kĩene-rĩ, itiathĩrĩirio ũguo ciĩyendeire cio nyene, no nĩ ũndũ wa Ũrĩa waciathĩrĩire ciikare ũguo, kũrĩ na wĩrĩgĩrĩro; tondũ-rĩ, ciũmbe icio, cio nyene, no ikohorũo ciume ũkombo-inĩ wa ũhoro wa kũbutha ikinye ũhoro-inĩ ũrĩa ũtarĩ wa ũkombo o na hanini, o ũrĩa ũkonainie na riri ũrĩa ũkaheo ciana cia Ngai.”—Rom. 8:14-21.
11 Jehova aaheire andũ ‘kĩĩrĩgĩrĩro’ rĩrĩa eeranĩire kũmahonokia kuuma kũrĩ Shaitani Mũcukani, kũgerera “mbeũ” ĩrĩa yeranĩirũo. (Kũg. 12:9; Kĩam. 3:15) “Mbeũ” ĩyo nĩ Jesu Kristo. (Gal. 3:16) Kũgerera gĩkuũ na kũriũka gwake, Jesu nĩ aarutire ũira mũrũmu wa kĩĩrĩgĩrĩro atĩ andũ nĩ magaakũũrũo kuuma ũkombo-inĩ wa mehia na gĩkuũ. Gũkinyanĩra gwa kĩĩrĩgĩrĩro kĩu nĩ gũkonainie na “kũguũranĩrio gwa ciana cia Ngai.” Akristiano aitĩrĩrie maguta matũũgĩrĩtio nĩo gĩcunjĩ gĩa kerĩ kĩa “mbeũ” ĩyo. ‘Makaaguũranĩrio’ makĩnyitanĩra na Kristo kũniina mũtabarĩre ũyũ mũũru wa Shaitani. (Kũg. 2:26, 27) Ũndũ ũcio ũkaarehera arĩa a ng’ondu ingĩ ũhonokio, arĩa magaakorũo moimĩte mĩnyamaro-inĩ ĩrĩa mĩnene.—Kũg. 7:9, 10, 14.
12. Kũguũranĩrio kwa arĩa aitĩrĩrie maguta gũkaarehera andũ irathimo irĩkũ irĩ na riri?
12 Andũ nĩ magaakorũo na ũhurũko mũnene hĩndĩ ya Wathani wa Mĩaka Ngiri wa Kristo. Hĩndĩ ĩyo ‘ariũ a Ngai’ marĩ igũrũ ‘nĩ makaguũranĩrio’ makĩria rĩrĩa magaakorũo marĩ athĩnjĩri Ngai hamwe na Kristo, marehere andũ irathimo cia igongona rĩa ũkũũri rĩa Jesu. Marĩ raia a Ũthamaki wa igũrũ, andũ thĩinĩ wa thĩ nĩ makambĩrĩria kuona moimĩrĩro ma gũkũũrũo kuuma mehia-inĩ na gĩkuũ-inĩ. Kahora kahora andũ athĩki nĩ magaakũũrũo moime ‘ũkombo-inĩ wa kũbutha, makinye ũrĩa ũtarĩ wa ũkombo.’ Mangĩgatũũra marĩ ehokeku harĩ Jehova ihinda rĩothe rĩa Mĩaka Ngiri na hĩndĩ ya igerio rĩrĩa rĩgooka mũico-inĩ wa mĩaka ĩyo, marĩtwa mao makaandĩkwo thĩinĩ wa “ibuku rĩa muoyo” mĩndĩ na mĩndĩ. Magaatonya ‘riri-inĩ ũrĩa wa ciana cia Ngai.’ (Kũg. 20:7, 8, 11, 12) Kaĩ kĩu nĩ kĩĩrĩgĩrĩro kĩrĩ na riri mũnene-ĩ!
GŨTŨŨRIA KĨĨRĨGĨRĨRO GIITŨ
13. Kĩĩrĩgĩrĩro giitũ kiumanaga na kĩĩ, na Kristo akaguũranĩrio rĩ?
13 Marũa marĩa merĩ Petero aandĩkire atongoretio nĩ roho nĩ makoragwo na ũhoro mũingĩ wa gũteithia arĩa aitĩrĩrie maguta na arĩa a ng’ondu ingĩ matũũrie ciĩrĩgĩrĩro ciao. Oigire atĩ kĩĩrĩgĩrĩro kĩao gĩtiumanaga na kĩyo kĩao, ĩndĩ kiumanaga na tha nyingĩ cia Jehova. Aandĩkire ũũ: “Wĩhotorei meciria-inĩ manyu, na mũikarage mũterigĩtwo, mũkĩĩrĩgagĩrĩra o kwĩrĩgĩrĩra Wega wa Ngai, ũrĩa mũkareherũo hĩndĩ ĩrĩa Jesu Kristo akaguũranĩrio.” (1 Pet. 1:13) Kristo akaguũranĩrio rĩrĩa agooka kũhe arũmĩrĩri ake ehokeku kĩheo na kũniina arĩa matetigĩrĩte Ngai.—Thoma 2 Athesalonike 1:6-10.
14, 15. (a) Nĩguo tũtũũrie kĩĩrĩgĩrĩro giitũ-rĩ, twagĩrĩirũo kũiga meciria maitũ harĩ kĩĩ? (b) Petero aaheanire ũtaaro ũrĩkũ?
14 Nĩguo tũtũũrie kĩĩrĩgĩrĩro giitũ, no mũhaka tũige meciria maitũ na mũtũũrĩre witũ harĩ “mũthenya wa Jehova” ũrĩa ũroka. Mũthenya ũcio nĩguo “igũrũ” rĩrĩa rĩ ho, kana wathani wa andũ, na “thĩ” ĩrĩa ĩrĩ ho, nĩyo andũ arĩa aganu na “indo cia gũkũ thĩ” ikaaniinwo. Petero aandĩkire ũũ: “Mwagĩrĩirũo gũikara na mĩikarĩre ĩtariĩ atĩa . . . , mũgĩtanyaga na mũkĩĩriragĩria mũno mũthenya ũcio wa Jehova ũgĩgakinya, naguo wakinya-rĩ, nĩrĩo igũrũ rĩkagwatio mwaki rĩthire, nacio indo cia gũkũ thĩ ihĩe nĩ mwaki mũnene itweke!”—2 Pet. 3:10-12, New World Translation.
15 Ithenya rĩa “Igũrũ” na “thĩ” iria ciĩ ho hagaacokio “igũrũ rĩerũ [thirikari ya Ũthamaki ya Kristo] na thĩ njerũ [andũ athingu gũkũ thĩ].” (2 Pet. 3:13) Petero nĩ aacokire akiuga wega ũrĩa twagĩrĩirũo nĩ gwĩka o ‘tũgĩtanyaga’ kĩĩrĩgĩrĩro giitũ kĩa igũrũ rĩerũ na thĩ njerũ iria ciĩranĩirũo: “Hakĩrĩ ũguo-rĩ, endwa akwa, kuona atĩ nĩmũtanyaga kuona maũndũ macio, ĩkagĩrai kĩyo nĩ getha mũgakorũo mũrĩ na thayũ, na mũtarĩ na kĩmeni ngoro o na kana ũcuke mũkĩonagwo nĩwe.”—2 Pet. 3:14.
GŨTŨŨRA KŨRINGANA NA KĨĨRĨGĨRĨRO GIITŨ
16, 17. (a) Nĩ ‘mĩtũũrĩre ĩrĩkũ ya ũtheru’ na “ya kwĩamũrĩra Ngai” twagĩrĩirũo gũkorũo nayo? (b) Kĩĩrĩgĩrĩro giitũ gĩgaakinyanĩra atĩa?
16 Tũtirabatara o gũtũũria kĩĩrĩgĩrĩro giitũ, ĩndĩ no mũhaka tũtũũre kũringana nakĩo. Nĩ twagĩrĩirũo gwĩcũrania ũrĩa tũtariĩ kĩĩroho. Gũkorũo na “mĩtũũrĩre ya ũtheru” nĩ hamwe na gũkorũo na ‘mĩtũũrĩre mĩagĩrĩru, tũikaranĩtie na andũ a ndũrĩrĩ’ tũrĩ na mĩtugo mĩrũngĩrĩru. (2 Pet. 3:11; 1 Pet. 2:12) No mũhaka ‘tũtũũre twendaine.’ Ũguo nĩ kuuga twĩkage o ũrĩa wothe tũngĩhota tũgitagĩre ũrũmwe wa thĩ yothe wa aarĩ na ariũ a Ithe witũ, nginya arĩa marĩ kĩũngano-inĩ gĩa gwitũ. (Joh. 13:35) ‘Mĩtũũrĩre ya kwĩamũrĩra Ngai’ nĩ maũndũ marĩa monanagia atĩ tũrĩ na ũkuruhanu wa hakuhĩ na Jehova. Ũndũ ũcio wonanagio nĩ ũrĩa mahoya maitũ matariĩ, o hamwe na ũthomi witũ wa Bibilia wa o mũthenya, wĩruti mũrikĩru wa mũndũ kĩũmbe, ũthathaiya wa famĩlĩ, na kũhunjia na kĩyo “Ũhoro-ũyũ-Mwega wa ũthamaki.”—Mat. 24:14.
17 Ithuothe twendaga gũkorũo tũrĩ mũthemba wa andũ arĩa Jehova etĩkagĩra, arĩa akahonokia rĩrĩa ‘akaniina’ mũtabarĩre ũyũ mũũru wa maũndũ. Hĩndĩ ĩyo nĩguo tũgaakinyanĩria kĩĩrĩgĩrĩro giitũ kĩa “muoyo ũrĩa ũtagathira, o muoyo ũcio weranĩirũo mbere ya mĩndĩ na mĩndĩ nĩ Ngai, o we ũtangĩhota kũhenania.”—Tit. 1:2.
[Ciũria cia wĩruti]
[Mbica karatathi ka 22]
Akristiano aitĩrĩrie maguta nĩ ‘maciaragwo rĩngĩ nĩguo magĩe na kĩĩrĩgĩrĩro kĩrĩ muoyo’
[Mbica karatathi ka 24]
Tũũria kĩĩrĩgĩrĩro thĩinĩ wa famĩlĩ
