Akristiano amwe nĩ mahũthagĩra indo cia kĩĩrĩu kwaranĩria na andũ ao a famĩlĩ o hamwe na Akristiano arĩa angĩ. Akristiano arĩa agimaru kĩĩroho nĩ maririkanaga ũtaaro ũyũ: “Mũndũ mũũgĩ onaga ũgwati akehitha, no arĩa matarĩ na ũmenyeru mathiaga o na mbere magacemania na maũndũ moru.”—Thim. 27:12.

Nĩ tũmenyaga atĩ Jehova nĩ endaga gũtũgitĩra. Nĩ ũndũ ũcio, tũtithiaga thiritũ na andũ arĩa matũmaga kũgĩe ngayũkano, arĩa meheretio kĩũngano-inĩ, kana arĩa marutanaga morutani mahĩtanu. (Rom. 16:17; 1 Kor. 5:11; 2 Joh. 10, 11) Andũ amwe arĩa manyitanagĩra na kĩũngano no makorũo matarĩ na mĩthiĩre ĩrĩa yagĩrĩire. (2 Tim. 2:20, 21) Kwoguo tũgĩthuura nĩa megũtuĩka arata aitũ, nĩ twagĩrĩirũo kũririkanaga ũndũ ũcio. Gũthuura arata ega no ũkorũo ũtarĩ mũhũthũ angĩkorũo tũraranĩria kũgerera programu ya gũtũma na kwamũkĩra ndũmĩrĩri.

Nĩ ũndũ wa bata makĩria gũthuura arata arĩa magĩrĩire, makĩria angĩkorũo mũraranĩria mũrĩ ngurubu nene ya andũ. Akristiano amwe manaingĩra thĩinĩ wa ngurubu nene cia kwaranĩria na ũndũ ũcio ũgakorũo ũtarĩ na moimĩrĩro mega. Hihi mũrũ wa Ithe witũ kana mwarĩ wa Ithe witũ angĩĩmenyerera atĩa angĩkorũo thĩinĩ wa ngurubu ya andũ magana kana makiri? No ũkorũo ũrĩ ũndũ mũritũ mũno kũmenya o ũrĩa mũndũ thĩinĩ wa ngurubu ĩyo atariĩ kĩĩroho. Thaburi 26:4 yugaga: “Ndinyitanagĩra na andũ a maheeni, na nĩ ndĩĩthemaga arĩa mehithaga ũrĩa matariĩ.” Ũndũ ũcio ũronania atĩ nĩ ũndũ wa ũũgĩ gũtũma na kwamũkĩra ndũmĩrĩri kũrĩ o andũ arĩa tũyaine nao.

O na angĩkorũo Mũkristiano arĩ thĩinĩ wa ngurubu ĩtarĩ nene ya kwaranĩria, nĩ wega kũrora mahinda marĩa ahũthagĩra gũtũma na kwamũkĩra ndũmĩrĩri na maũndũ marĩa andũ a ngurubu ĩyo maragĩrĩria. Ndwagĩrĩirũo kũigua atĩ no mũhaka ũcokie ndũmĩrĩri ciothe iria iratũmwo ngurubu-inĩ gũtekũmakania irarĩrĩria maũndũ marĩkũ kana ũkũhũthĩra mahinda maigana atĩa gwĩka ũguo. Paulo eerire Timotheo emenyerere andũ arĩa “maheanaga mũcene, na makaingĩrĩra maũndũ ma andũ arĩa angĩ.” (1 Tim. 5:13) Nĩ ũndũ mũhũthũ gũkora tũgĩĩka ũguo mahinda-inĩ maya tũkĩhũthĩra indo cia kĩĩrĩu.

Mũkristiano mũgimaru kĩĩroho ndangĩenda kwaria kana kũigua ndeto cia kũmenereria Akristiano arĩa angĩ, kana gũthikĩrĩria ndeto ciao cia hitho. (Thab. 15:3; Thim. 20:19) Ningĩ ndangĩenda kũheana kana gũthikĩrĩria ndeto ciĩkĩrĩtwo cumbĩ kana itarĩ njĩkĩre mũkonde. (Ef. 4:25) Kũgerera Website itũ ya jw.org na programu cia o mweri cia JW Broadcasting^® nĩ twamũkagĩra irio cia kũigana cia kĩĩroho na ũhoro mũkinyanĩru.

Akristiano amwe nĩ mahũthagĩra programu cia gũtũma na kwamũkĩra ndũmĩrĩri kwendia, kũgũra, na kũgathĩrĩria indo kana kwĩrĩra andũ arĩa angĩ mawĩra. Macio nĩ maũndũ ma biacara na matihutanĩtie na maũndũ ma kĩĩroho. Mũkristiano ũrenda gwathĩkĩra watho wa ‘kwaga kwenda mbeca’ ndangĩenda kũhũthĩra aarĩ na ariũ a Ithe witũ nĩguo athondeke mbeca.—Ahib. 13:5.

Ĩ ũhoro wĩgiĩ kũhũthĩra programu ta icio kũhothithia mbeca nĩ ũndũ wa aarĩ na ariũ a Ithe witũ arĩa marĩ na thĩna kana magũmĩirũo nĩ icanjama? Nĩ twendete aarĩ na ariũ a Ithe witũ, na kwoguo nĩ tũmateithagia kaingĩ na tũkamekĩra ngoro. (Jak. 2:15, 16) No tũngĩgeria gwĩka ũguo tũkĩhũthĩra ngurubu nene cia kwaranĩria, no tũkorũo tũkĩingĩrĩra mĩbango mĩega ya kũmateithia ĩrĩa ĩngĩkorũo ĩkĩbangwo nĩ wabici ya rũhonge kana kĩũngano. (1 Tim. 5:3, 4, 9, 10, 16) Na tũtingĩenda andũ mambĩrĩrie kuona ta tũheetwo wĩra wa mwanya wa kũrũmbũiya aarĩ na ariũ a Ithe witũ.

Twendaga gwĩka maũndũ marĩa mekũgoocithia Ngai. (1 Kor. 10:31) Kwoguo rĩrĩa ũratua kana nĩ ũkũhũthĩra programu cia gũtũma na kwamũkĩra ndũmĩrĩri kana indo ingĩ ta icio, nĩ wega gwĩciria nĩ mogwati marĩkũ ũngĩcemania namo na wĩmenyerere.