Adamu na Hawa moima mũgũnda-inĩ wa Edeni, nĩ maagĩire na ciana nyingĩ. Mũriũ wao wa mbere, Kaini, aarĩ mũrĩmi, nake wa kerĩ, Habili, aarĩ mũrĩithi.

Mũthenya ũmwe Kaini na Habili nĩ maarutĩire Jehova magongona. Hihi nĩ ũĩ igongona nĩ kĩĩ? Nĩ kĩheo kĩa mwanya. Jehova nĩ aakenirio nĩ igongona rĩa Habili, no ndakenirio nĩ rĩa Kaini. Ũndũ ũcio nĩ warakaririe Kaini mũno. Jehova nĩ aamũkanirie na akĩmwĩra atĩ marakara macio no matũme eke ũndũ mũũru. No Kaini ndaiguire.

Handũ ha ũguo, Kaini eerire Habili ũũ: ‘Ũka tũthiĩ mũgũnda.’ Rĩrĩa maarĩ mũgũnda-inĩ marĩ oiki, Kaini nĩ  aatharĩkĩire mũrũ wa nyina na akĩmũũraga. Jehova angĩekire atĩa nĩ ũndũ wa gĩĩko kĩu? Aamũherithirie na njĩra ya kũmũingata kuuma famĩlĩ-inĩ yao. Ndangĩetĩkĩririo acoke famĩlĩ-inĩ yao rĩngĩ.

Hihi harĩ ũndũ tũngĩĩruta? Rĩmwe no twambĩrĩrie kũrakara angĩkorũo maũndũ matirathiĩ ũrĩa tũrenda. Tũngĩigua twambĩrĩria kũrakara kana andũ angĩ matwĩre twĩmenyerere nĩ ũndũ nĩ mona tũrĩ na marakara, twagĩrĩire kũgarũrĩra o na ihenya marakara macio matanatũtooria.

Tondũ Habili nĩ eendete Jehova na eekaga ũrĩa kwagĩrĩire, Jehova ndarĩ hingo akariganĩrũo nĩwe. Ngai nĩ akaariũkia Habili hĩndĩ ĩrĩa agatua thĩ paradiso.