Jusufu na Mariamu magaikara o Bethilehemu handũ ha gũcoka Nazarethi. Jesu akinyia thikũ inyanya, makamũruithia o ta ũrĩa Watho ũrĩa Ngai aaheete Isiraeli woigĩte. (Maũndũ ma Alawii 12:​2, 3) Ningĩ mũthenya ũcio noguo mwana wa kahĩĩ aaheagwo rĩĩtwa. Mageeta mũrũ wao Jesu, o ta ũrĩa meerĩtwo nĩ mũraika Gaburieli.

Ihinda rĩa makĩria ma mweri ũmwe rĩkahĩtũka, na Jesu arĩ na thikũ 40. Hihi aciari ake mekũmũtwara kũ? Mekũmũtwara hekarũ-inĩ Jerusalemu, kilomita cigana ũna kuuma kũrĩa marĩ. Watho woigĩte atĩ thikũ 40 thutha wa mũtumia kũgĩa mwana wa kahĩĩ, aagĩrĩirũo gũtwara igongona rĩa gũtherio thĩinĩ wa hekarũ.​—Maũndũ ma Alawii 12:4-8.

Mariamu ageka ũguo na agatwara tũnyoni twĩrĩ tũrĩ igongona rĩake. Ũndũ ũcio nĩ ũratũteithia kũmenya ũndũ wĩgiĩ ũhoti wa kĩĩmbeca wa Jusufu na Mariamu. Kũringana na Watho mũtumia aagĩrĩirũo kũruta gatũrũme na ndutura ĩmwe. No angĩakorirũo atarĩ na ũhoti wa kũruta gatũrũme, aagĩrĩirũo kũruta ndirahũgĩ igĩrĩ kana ndutura igĩrĩ. Mariamu akaruta icio tondũ ũcio nĩguo ũhoti wake.

Kũu hekarũ-inĩ, mũthuri ũmwe mũkũrũ agathiĩ harĩ Jusufu na Mariamu. Etagwo Simeoni. Ngai nĩ amũguũrĩirie atĩ ndegũkua atonete Kristo, kana Mesia ũrĩa Jehova eeranĩire. Roho mũtheru nĩguo watongoria Simeoni oke hekarũ-inĩ na agakora Jusufu na Mariamu marĩ na kaana kao. Simeoni akoya kaana kau agakanyita.

O anyitĩte Jesu, Simeoni agacokeria Ngai ngatho akoiga: “Mwathani Ũrĩa Mũnene, rĩu ndungata yaku no ĩkue ĩrĩ na thayũ kũringana na uuge waku, nĩ gũkorũo maitho makwa nĩ mona njĩra yaku ya kũhonokania ĩrĩa ũhaarĩirie yonwo nĩ andũ othe, ũtheri wa kweheria taama ũrĩa ũgiragia andũ a ndũrĩrĩ mone, na riri wa andũ aku Isiraeli.”​—Luka 2:​29-32.

Jusufu na Mariamu makagega maigua ciugo icio. Simeoni akamarathima na akeera Mariamu atĩ mũrũwe “nĩ amũrĩtwo nĩguo andũ aingĩ thĩinĩ wa Isiraeli magwe na angĩ mokĩre,” na atĩ Mariamu nĩ angĩkagĩa na kĩeha ahaane ta athecwo na rũhiũ rũũgĩ.​—Luka 2:34.

Mũthenya ũyũ harĩ mũndũ ũngĩ ũrĩ hekarũ-inĩ. Nĩ mũnabii Anna ũrĩa ũrĩ na mĩaka 84. Ndagaga hekarũ-inĩ. Ihinda-inĩ rĩrĩ agathiĩ harĩ Jusufu, Mariamu, na kaana kao Jesu. Anna akambĩrĩria gũcokeria Ngai ngatho na kũheana ũhoro wĩgiĩ Jesu kũrĩ arĩa megũthikĩrĩria.

Ta wĩcirie ũrĩa Jusufu na Mariamu makenete nĩ ũndũ wa maũndũ macio mekĩka hekarũ-inĩ! Hatarĩ nganja, maũndũ macio nĩ matũma magĩe na ma atĩ mũrũ wao nĩwe Ũrĩa Weranĩirũo nĩ Ngai.