Thutha wa kũhonia ndungata ya mũthigari, Jesu akoima Kaperinaumu agathiĩ Naini, taũni ĩrĩ kilomita makĩria ma 32 mwena wa mũhuro. Ndarĩ wiki. Arĩ na arutwo ake o hamwe na kĩrĩndĩ kĩnene kĩa andũ. Magakuhĩrĩria taũni ya Naini hihi kũrorete hwaĩ-inĩ. Magacemania na gĩkundi kĩnene kĩa Ayahudi gĩgĩthiĩ mathiko. Gĩkuuĩte mwĩrĩ wa mwanake ũmwe kuuma itũũra rĩu gĩgĩthiĩ kũũthika.

Ũrĩa ũrĩ na kĩeha mũno harĩ gĩkundi kĩu nĩ nyina wa mwanake ũcio. Nĩ mũtumia wa ndigwa, na rĩu nĩ akuĩrĩirũo nĩ mwana wake na ndarĩ ũngĩ. Rĩrĩa mũthuri wake aakuire, aatigirũo na mũriũ wake ũrĩa endete. Ta wĩcirie ũrĩa araiguaga amwendete, tondũ mwĩhoko wake wa mahinda mokĩte ũrarĩ harĩ mũriũ ũcio wake. Rĩu o nake nĩ mũkuũ. Marĩikaraga naũ rĩu na arĩteithagio nũ?

Jesu ona mũtumia ũcio akahutio mũno nĩ ruo na kĩeha kĩnene kĩrĩa arĩ nakĩo. Akamwarĩria arĩ na tha na akamũhe mwĩhoko akamwĩra: “Tiga kũrĩra.” Agacoka ageka ũndũ ũngĩ makĩria. Agakuhĩrĩria na akahutia karĩrĩ karĩa mwĩrĩ ũcio ũkuuĩtwo nako. (Luka 7:​13, 14) Ageka ũguo na njĩra ĩgũtũma andũ acio marathiĩ mathiko marũgame o rĩmwe. Aingĩ ao no mũhaka makorũo mareyũria ũũ: ‘Arenda kuuga atĩa, na nĩ ũndũ ũrĩkũ egwĩka?’

Ĩ nao arĩa maratwarana hamwe na Jesu na nĩ mamuonete agĩka maũndũ manene, akĩhonagia mĩrimũ mĩingĩ? No kũhoteke matirĩ mona Jesu akĩriũkia mũndũ mũkuũ. O na gũtuĩka andũ manariũkio mahinda mahĩtũku-rĩ, hihi Jesu nĩ egwĩka ũndũ ta ũcio? (1 Athamaki 17:17-23; 2 Athamaki 4:​32-37) Jesu akoiga: “Mwanake, ndakwĩra ũkĩre!” (Luka 7:14) Na gũgekĩka o ũguo. Mwanake ũcio agaikara thĩ na akambĩrĩria kwaria! Jesu akamũnengera nyina ũrĩa ũkenete mũno o na gũtuĩka ũndũ ũcio nĩ wamũmakia. Rĩu ndarĩ wiki rĩngĩ.

 Andũ mona atĩ mwanake ũcio ti itherũ arĩ muoyo, makagooca Jehova, o we Mũheani-Muoyo, makoiga: “Nĩ kũgĩte mũnabii mũnene thĩinĩ witũ.” Angĩ magataũkĩrũo nĩ ũndũ ũcio wa magegania Jesu eka makoiga: “Ngai nĩ aririkanĩte andũ ake.” (Luka 7:16) Ndeto cia ũndũ ũcio wa magegania igatherema na ihenya icigo-inĩ iria ithiũrũrũkĩirie na kwahoteka nginya Nazarethi, itũũra rĩrĩa Jesu aarereirũo, kilomita ta 10 kuuma Naini. Igakinya nginya mwena wa mũhuro gĩcigo-inĩ kĩa Judea.

Johana Mũbatithania arĩ o njera, na nĩ arakenio mũno nĩ maũndũ marĩa Jesu areka. Arutwo a Johana makamwĩra ũhoro wĩgiĩ ciama icio. Hihi erũo egwĩka atĩa?