Marũa Kũrĩ Tito 3:1-15
3 Thiĩ na mbere kũmaririkania menyihagĩrie na magathĩkĩra thirikari na athani,+ makoragwo mehaarĩirie kũruta wĩra wothe mwega,
2 matikaragie ũũru igũrũ rĩa mũndũ o na ũrĩkũ, matigakoragwo marĩ andũ a ngũĩ, ĩndĩ makoragwo na ũigananĩru,+ makĩonanagia ũhooreri wothe kwerekera andũ othe.+
3 Nĩ gũkorũo o na ithuĩ kũrĩ hĩndĩ twarĩ andũ matarĩ na wĩcirio, matarĩ athĩki, mahĩtithĩtio, tũrĩ ngombo cia merirĩria na ikeno itiganĩte, twarũmagĩrĩra maũndũ moru na ũiru, maũndũ marĩ magigi, tũgĩthũũranaga ithuĩ ene.
4 No rĩrĩa ũtugi wa Ngai, o we Mũhonokia witũ,+ o hamwe na wendo wake harĩ andũ cioonanirio
5 (ti tondũ harĩ ciĩko o ciothe cia ũthingu twekĩte,+ no nĩ ũndũ wa tha ciake mwene),+ nĩ aatũhonokirie na njĩra ya gũtũthambia, ũndũ ũrĩa watũrehire muoyo-inĩ,+ na gũtwerũhia kũgerera roho mũtheru.+
6 Agĩtũitĩrĩria na ũtaana roho wake kũgerera Jesu Kristo Mũhonokia witũ,+
7 nĩgetha twarĩkia gũtuwo athingu kũgerera ũtugi wake mũnene,+ hihi twahota gũgaatuĩka agai+ kũringana na kĩĩrĩgĩrĩro kĩa muoyo wa tene na tene.+
8 Ciugo icio nĩ cia kwĩhokeka, na ngwenda ũthiĩ na mbere gũtĩtĩrithia maũndũ macio, nĩguo arĩa metĩkĩtie Ngai maigage meciria mao harĩ gũtũũria ciĩko njega. Maũndũ macio nĩ mega na nĩ marĩ ũguni harĩ andũ.
9 No wĩthemage biũ ngarari cia ũrimũ na ũhoro wa ndĩra na ngucanio na haaro ciĩgiĩ Watho, nĩ gũkorũo maũndũ macio matirĩ uumithio na nĩ ma tũhũ.+
10 Nake mũndũ o wothe ũtũmaga kũgĩe gĩkundi kĩa nyamũkano,+ reganaga nake+ thutha wa kũmũtaara* riita rĩa mbere na rĩa kerĩ,+
11 tondũ nĩ ũĩ atĩ mũndũ ta ũcio nĩ eherete njĩra-inĩ na nĩ arehia na nĩ etuĩrĩire we mwene.
12 Rĩrĩa ndĩrĩtũma Aritema kana Tikiko+ kũrĩ wee, ũrĩka ũrĩa wothe ũngĩhota ũũke Nikopoli kũrĩ niĩ, tondũ kũu nĩkuo nduĩte gũikara hĩndĩ ya heho.
13 Tigĩrĩra atĩ nĩ wateithĩrĩria Zena, o ũcio ũĩ Watho wega marĩ na Apolo nĩgetha matikage kĩndũ o na kĩ rũgendo-inĩ rwao.+
14 No andũ aitũ o nao nĩ merute gũtũũria ciĩko njega nĩgetha mateithagie hĩndĩ ĩrĩa kwagĩa bata mũhiũ,+ nĩguo matikagage gũkorũo na maciaro.+
15 Arĩa othe tũrĩ nao nĩ makũgeithia. Ngeithĩria arĩa matwendete thĩinĩ wa wĩtĩkio.
Ũtugi mũnene wa Ngai ũroikara hamwe na inyuĩ inyuothe.
Tũũhoro twa magũrũ-inĩ
^ Kana “kũmũkaania.”
