1, 2. Ki prubléma Juzué pasa pa el dipôs ki Muizes móre?

JEOVÁ fla Juzué: ‘Muizes, nha sérvu, dja móre. Gósi pripara, trabesa Jurdon, bo ku tudu kel povu li, i bai pa téra ki N ta ben da povu di Israel.’ (Jos. 1:1, 2) Kel-li foi un grandi mudansa pa Juzué, pamodi dja el tinha 40 anu ta djudaba Muizes.

² Muizes dja tinha txeu ténpu ta lideraba Israel. Má gósi é Juzué ki ten ki lidera-s. Talvês el pergunta si povu ta setaba el pa el sérba ses líder. (Deut. 34:8, 10-12) Un livru inportanti ki ta pâpia sobri Bíblia faze un komentáriu sobri Josué 1:1, 2. El ta fla: “Désdi ténpu antigu ti gósi, un di kes momentu más difísil pa un nason é óras ki trokadu líder.”

3, 4. (a) Modi ki Deus abênsua Juzué pamodi el kúnfia na el? (b) Talvês ki pergunta nu pode faze?

³ Juzué tinha razon pa el staba preokupadu. Má, el kúnfia na Jeová i el staba prontu pa sigi se orientasons. (Jos. 1:9-11) Deus abênsua Juzué pamodi el kúnfia na el i el uza un anju pa gia Juzué ku israelitas. Pode ser ki kel anju é  kel primeru Fidju di Deus, ki Bíblia ta txoma di Palavra. — Êxo. 23:20-23; João 1:1.

⁴ Jeová djuda nason di Israel lida dretu ku kel mudansa di líder. Pur isu, ka kontise ninhun prubléma pamodi kel mudansa. Na nos ténpu tanbê, sta ta kontise txeu mudansa na organizason di Jeová. Talvês nu pode pergunta: ‘Ku tudu kes mudansa ki sta ta kontise na organizason, nu ten razon pa nu kúnfia na nos Líder ki é Kristu?’ (Lé Mateus 23:10.) Pa responde kel pergunta li, nu ta ben odja modi ki Jeová lidera se povu na ténpu antigu kantu kontise mudansas.

5. Ken ki Juzué nkontra ku el pértu di Jerikó? (Odja dizenhu na komésu di studu.)

⁵ Lógu dipôs ki israelitas trabesa riu Jurdon, kontise un kuza ki Juzué ka sta speraba. Kantu el staba ta txiga Jerikó, Juzué nkontra ku un ómi ku spada na mô. Juzué pergunta-l: ‘Bu sta di nos ladu ô bu sta di ladu di nos inimigus?’ El fika spantadu kantu kel ómi fla-l ma el é ‘xéfi di trópas di Jeová’ i el staba prontu pa difende povu di Deus. (Lé Josué 5:13-15 i nóta di rodapé.) Na otus párti di Bíblia ta fla ma Jeová pâpia dirétu ku Juzué. Má ta parse ma el uza un anju pa pâpia ku el sima dja el fazeba antis. — Êxo. 3:2-4; Jos. 4:1, 15; 5:2, 9; Atos 7:38 ; Gál. 3:19.

6-8. (a) Pamodi ki orientasons di Jeová pode parseba stranhu pa israelitas? (b) Pamodi ki kes orientason staba dretu i dadu na óra sértu? (Tanbê odja nóta di rodapé.)

⁶ Kel anju fla Juzué klaru kuzê ki el tinha ki fazeba pa el tomaba sidadi di Jerikó. Na komésu, talvês alguns di kes orientason ta parseba stranhu. Pur izénplu, kel anju fla Juzué pa el manda tudu kes trópa pa faze sirkunsizon. Kel-li ta poba es ku dór i es ta fikaba alguns dia sen ba géra. Má, kel-la éra óra sértu di kes ómi fazeba sirkunsizon? — Gén. 34:24, 25; Jos. 5:2, 8.

⁷ Talvês kes trópa pergunta: ‘Modi ki nu ta proteje nos família si inimigus ben ataka-nu?’ Má, kontise un kuza ki es ka sta speraba. Envês di kes ómi di Jerikó ataka israelitas, es fika xeiu di medu. Bíblia ta fla: ‘Jerikó staba fitxadu pa tudu ladu pamodi israelitas; ningen ka ta saíba i ningen ka ta entraba.’ (Jos. 6:1) Di sertéza israelitas pasa ta kúnfia más txeu na orientasons di Jeová, kantu es da kónta di kel-li.

⁸ Tanbê, Jeová fla israelitas pa es ka ataka Jerikó. Má el manda-s da vólta sidadi. Es tinha ki fazeba kel-la un bês duránti 6 dia. I na sétimu dia es tinha ki daba 7 vólta. Talvês kes trópa fika ta pensa: ‘Asi nu sta ta perde ténpu i forsa!’ Má Jeová ki é Líder di Israel, sabia kuzê ki el staba ta faze. Sigi orientasons di Jeová, poi fé di israelitas ta fika más fórti i tanbê es ka tevi ki ba géra kóntra kes trópa poderozu di Jerikó. — Jos. 6:2-5; Heb. 11:30. *

9. Pamodi ki nu debe sigi kalker orientason ki nu ta resebe di organizason di Deus? Da un izénplu.

⁹ Kuzê ki nu ta prende ku kel stória li? Alvês organizason di Jeová ta da novus orientason i nen sénpri nu ka ta  ntende pamodi. Pur izénplu, alvês nu ka ta atxa ma nu meste uza tablet ô telemóvel na nos studu pesoal, na pregason ô na runion. Má talvês gósi, nu pode odja vantaji di uza-s si nu ten es. Óras ki nu ta odja bons rezultadu, na sigi kes mudansa, nos fé ta fika más fórti i nu ta fika más unidu ku nos irmons i irmans.

10. Kenha ki orienta kel runion inportanti ki grupu enkaregadu di óbra faze na Jiruzalen?

¹⁰ Uns 13 anu dipôs ki Kornéliu, ki ka éra judeu, bira kriston, alguns kriston judeu ta flaba ma inda es tinha ki fazeba sirkunsizon. (Atos 15:1, 2 ) Na sidadi di Antiokia, irmons staba ta diskuti sobri kel asuntu li. Nton, ansions manda apóstlu Polu pa bai pâpia ku grupu enkaregadu di óbra sobri kel asuntu. Má na verdadi, kenha ki manda Polu pa bai? Polu fla: ‘N subi pamodi un vizon’. Nton fika klaru, ma éra Kristu ki orienta grupu enkaregadu pa rezolve kel asuntu. — Gál. 2:1-3.

11. (a) Ki prubléma ta mostra ma alguns judeu inda ta kriditaba na sirkunsizon? (b) Modi ki Polu mostra umildadi na apoia ansions na Jiruzalen? (Tanbê odja nóta di rodapé.)

¹¹ Kristu orienta grupu enkaregadu di óbra pa splika di manera klaru, ma kes kriston ki ka éra judeu, ka meste fazeba sirkunsizon. (Atos 15:19, 20 ) Má simé, alguns anu dipôs, kristons judeu kontinua ta faze ses fidju sirkunsizon. Tanbê ansions na Jiruzalen obi ta fladu ma Polu ka sta ruspetaba Lei di Muizes. Nton es txoma-l i es da-l alguns orientason ki el ka sta speraba. * (Atos 21:20-26 ) Es fla-l pa el bai ténplu djuntu ku kuatu ómi. Asi, pesoas ta odjaba ma Polu ta ruspetaba Lei. Polu podia flaba: ‘Kel-li ka ta faze sentidu! Pamodi ki nhos sta ta pidi-m pa N faze kel-li? Prubléma é kristons judeu ki ka  sta ntende asuntu di sirkunsizon.’ Má Polu ntende ma ansions kreba pa tudu kristons fikaba unidu. Pur isu, el foi umildi i el sigi ses orientason. Talvês nu pode pergunta: ‘Si mórti di Jizus kaba ku Lei di Muizes, pamodi ki el dexa pa sirkunsizon kontinua ta ser un prubléma pa txeu ténpu?’ — Col. 2:13, 14.

12. Talvês, pamodi ki Kristu dexa pasa algun ténpu antis di rezolve kel asuntu di sirkunsizon?

¹² Kel-li ta mostra ma pode leba algun ténpu, pa algen seta novu orientason. Alguns kriston judeu mesteba ténpu pa es ntendeba ma es ka staba más dibaxu di Lei. (João 16:12) Inda es ta pensaba ma sirkunsizon éra un sinal spesial na ses amizadi ku Deus. (Gén. 17:9-12) Tanbê, otus tinha medu pa kes otu judeu ka pirsigiba es, pamodi es éra diferenti. (Gál. 6:12) Má ku ténpu, Kristu da-s más orientason na kes karta ki Polu skrebe. — Rom. 2:28, 29; Gál. 3:23-25.

13. Oji, kuzê ki pode djuda-nu apoia lideransa di Kristu?

¹³ Inda oji Kristu é Líder di kongregason. Nton, si organizason faze un mudansa i bu ka ntende, pensa modi ki Kristu lidera kongregason na pasadu. Na ténpu di Juzué i na ténpu di apóstlus, Kristu sénpri da orientasons ku sabedoria pa proteje povu di Deus. Kel-la poi ses fé bira más fórti i djuda-s kontinua unidu. — Heb. 13:8.

14-16. Modi ki orientasons ki skravu fiel i prudenti ta da-nu, ta prova ma Kristu krê djuda-nu ten un fé fórti?

¹⁴ Oji, ‘skravu fiel i prudenti’, ta da-nu orientason ki nu meste déntu di óra. (Mat. 24:45) Kes orientason ta mostra ma Kristu sta ta kuida di nos. Marc ki ten kuatu fidju, fla: “Satanás sta ta ataka famílias pa el pode frakise kongregason. Gósi nu ta insentivadu pa nu faze adorason na família tudu simana. Kel mensaji é klaru pa kada xéfi di família: nhos proteje nhos família!”

¹⁵ Óras ki nu odja modi ki Kristu sta ta orienta-nu, nu ta ntende ma el krê djuda-nu mante nos fé fórti. Pur izénplu, un ansion ki txoma Patrick, fla: “Na komésu, alguns ta fikaba dizanimadu na bai runion pa pregason na grupus pikinoti, na fin di simana.” Má el fla ma kel mudansa pa grupus di pregason más pikinoti, ta mostra ma Jizus ta preokupa ku tudu algen na kongregason. Pur izénplu, kes grupu pa pregason djuda kes irmon ku irmans ki é tímidu ô ki kuazi ka ta baba pregason, xinti ma es ten valor i ses fé fika más fórti.

¹⁶ Tanbê Kristu ta djuda-nu mante konsentradu na nos trabadju di pregason, ki é trabadju más inportanti ki sta fazedu oji. (Lé Marcos 13:10.) André ki é un novu ansion, sénpri el ta tenta sigi kes novu orientason ki organizason di Jeová ta da. El fla: “Kes nunbru di betelitas ki partidu, ta lenbra-nu ma nu sta vive na ténpu di fin i ma nu meste uza tudu nos forsa na trabadju di pregason.”

17, 18. Pamodi ki nu debe konsentra na kes bon rezultadu di sigi kes novu orientason?

¹⁷ Orientason ki nu ta resebe di nos Rei Jizus Kristu, ta djuda-nu gósi i na futuru. Pur isu, pensa modi ki sigi kes  novu orientason ki bu resebe djuda-u. Na bu adorason na família, bu pode pâpia di kes mudansa ki fazedu na runion ô na pregason ki djuda bu família.

¹⁸ Si bu lenbra ma sigi kes orientason di organizason di Jeová ta da bons rezultadu, é más faxi bu sigi un novu orientason ku alegria. Pur izénplu, gósi nu ka sta inprimi txeu publikason sima nu ta fazeba antis i nu sta ta uza tekinolojia más txeu. Kel-li ta djuda organizason ten más dinheru pa apoia trabadju di pregason i txiga na más algen. Si ta da, bu ta pode uza publikasons na formatu dijital i uza vídius más txeu? Kel-li é un manera di nu apoia Kristu, ki krê pa organizason uza dretu kes kontribuison.

19. Pamodi ki nu debe apoia orientasons di Kristu?

¹⁹ Óras ki nu ta apoia orientasons ki Kristu ta da, nu sta djuda nos irmons ten un fé más fórti i nu ta fika más unidu. Sobri kel mudansa ki kontise na nunbru di família di Betel na mundu interu, André fla: “Kel bon atitudi ki kes betelita mostra dipôs ki es sai di Betel, ta da-m txeu kunfiansa i ruspetu. Es kunpanha karu di Jeová ka ta nporta diziginason ki es dadu.”

20, 21. (a) Pamodi ki nu pode kúnfia na Kristu ki é nos Líder? (b) Ki pergunta nu sta ben responde na kel otu studu?

²⁰ Ka ta dura, Jizus Kristu ki é nos Líder ta ben ‘konpleta se vitória.’ (Apo. 6:2; Sal. 45:4) Má mésmu gósi, el sta pripara-nu pa kel vida na mundu novu i pa trabadju ki el ta ben da-nu. Nu ta ben inxina kes resusitadu i bira Téra un paraízu.

²¹ Si nu kontinua ta kúnfia na nos Líder i Rei, ka ta nporta kuzê ki kontise, el ta leba-nu pa kel mundu novu. (Lé Salmo 46:1-3.) Oji, pode ser difísil seta mudansas, prinsipalmenti, óras ki nu ka sta spéra. Óras ki kel-li kontise, modi ki nu pode kontinua ku pas déntu nos i un fé fórti na Jeová? Na kel otu studu, nu ta ben responde kel pergunta li.