Deus faze nos korpu ku kapasidadi inkrível di kura. Óras ki nu ta panha algun tipu di pankada, nu ta korta ô nu ta fri, nos korpu ta kumesa “un prosésu konplikadu ku obijetivu di kura kel frida, ka ta nporta si el é grandi ô pikinoti.” * Nos korpu ta aji lógu pa para kel sangi, pa kura kel frida i pa konpo kel péli.

PENSA NA KEL-LI: Nos Kriador faze nos korpu ku kapasidadi di kura frida. Nton, bu ka ta atxa ma nu pode kunfia na se promésa di djuda-nu rekupera di kes dór ki nu pode ten na korason? Bíblia ta fla ma Deus ‘ta kura kes ki tene korason dizanimadu; el ta trata ses fridas.’ (Salmo 147:3) Má, imajina ma bu sta ta sufri txeu pamodi algun kuza ki kontise ô ki bu sta ta pasa pa el. Modi ki bu pode ten sertéza ma Jeová ta kuida di bu korason ki sta ku dór, gósi i na futuru?

Deus promete: ‘Ka bu xinti medu, pamodi N sta ku bo. Ka bu fika preokupadu dimás, pamodi mi é bu Deus. N ta da-u forsa, sin, N ta djuda-u.’ (Isaías 41:10) Óras ki un algen sabe ma Jeová ta preokupa ku el, el ta xinti pas i el ta ten forsa pa lida ku diferentis tipu di difikuldadi. Apóstlu Polu txoma kel pas li di ‘pas di Deus, ki ningen ka ta konsigi ntende’. Tanbê el fla: ‘Pa tudu kuza N ten forsa pamodi kel ki ta da-m puder.’ — Filipenses 4:4-7, 9, 13.

Bíblia ta djuda-nu ten fé na kes promésa di Jeová pa futuru. Pur izénplu, Apocalipse 21:4, 5 ta fla kuzê ki Deus ta ben faze i pamodi ki nu pode kunfia na el:

• ‘El ta ben linpa tudu lágua’ di odju di pesoas. Jeová ta ben kaba ku tudu nos sufrimentu i preokupasons, ti kes preokupason ki pa otus algen ta parse ma é ka nada.

• Nos Kriador sta ‘xintadu na se tronu’ gloriozu na Séu. El é Rei Tudu-Poderozu i el ta ben uza se puder i autoridadi pa ka dexa ningen sufri más i pa el djuda-nu.

• Jeová ta garanti-nu ma se promésas é ‘fiel i verdaderu.’ Kel-li krê fla ma el ta uza se nómi i se reputason pa garanti-nu ma el ta kunpri se promésas.

‘“El ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór. Kuzas di pasadu ka ta ben más.” Kel ki staba xintadu na tronu fla: “Odja! N sta poi tudu kuza ta bira novu.” El fla tanbê: “Skrebe, pamodi kes palavra li é fiel i verdaderu.”’ — Apocalipse 21:4, 5.

Kriason di Deus i Bíblia ta djuda-nu konxe nos Pai na Séu i se kualidadis. Nu pode fla ma kes kuza ki Deus kria é un konviti pa nu konxe-l. Es ta pô-nu ku gana di krê konxe-l sima un grandi amigu. Bíblia ta faze-nu kel konviti li di un manera klaru. El ta fla: ‘Nhos ser amigu di Deus i el ta ser nhos amigu.’ (Tiago 4:8) Tanbê Atos 17:27 ta fla: ‘El ka sta lonji di kada un di nos.’

Si bu tra ténpu pa konxe Deus, bu ta fika ku más sertéza ma el ta ‘kuida di bo.’ (1 Pedro 5:7) Modi ki sabe kel-li ta djuda-nu?

Odja stória di Tomi, di Japon. Se mai éra kriston, má el nvolve ku un grupu di máfia violéntu di Japon, ki txoma Iakuza. El fla: “N ta atxaba ma Deus ka gostaba di mi. Sénpri ki un algen pértu mi ta moreba, prinsipalmenti si éra un algen ki N ta amaba txeu, N ta atxaba ma éra Deus ki staba ta kastiga-m.” Tomi rekonhese ma se manera di vive i se manera di pensa pô-l ta bira “un algen duru i sen korason.” I ta lenbra di un kuza ki el kreba txeu, el konta: “N krê moreba jóven dipôs di mata un algen más famozu ki mi, sô pa N sérba un algen konxedu.”

Má dipôs, Tomi ku se mudjer, Ana, kumesa ta studa Bíblia djuntu. Kel-li poi Tomi ta faze txeu mudansa na se vida i na se manera di pensa. Ana fla: “N odja ku nhas odju nha maridu ta faze mudansas.” Gósi, Tomi ta fla ku tudu sertéza: “Ten un Deus ki ta preokupa ku kada un di nos. El ka krê  pa ningen móre i el krê púrdua kes algen ki rapende di korason di kuza ki es faze. Deus ta obi óras ki nu ta konta-l kuzas ki nu ka ta kontaba ningen ô ki ningen ka ta ntendeba. Ka ta dura, Jeová ta ben kaba ku tudu nos prublémas, sufrimentu i frónta. I mésmu gósi, el ta djuda-nu di maneras ki nu ka sta ta spéra. El ta ama-nu i el ta djuda-nu óras ki nu sta la na txon.” — Salmo 136:23.

Stória di Tomi ta mostra-nu ma Deus ta konsigi kaba ku tudu sufrimentu i linpa kada lágua di nos odju, i ma ka ta dura el ta ben faze-l. Kel-li ta djuda-nu ten sertéza ma nu ta ben ten un futuru rei di sábi i ma désdi gósi nu pode ten un vida midjór. Mésmu na un mundu xeiu di sufrimentu, sabe ma Deus ta ama-u ta djuda-u ten un vida mutu más midjór.