AJUDA PA KES KI SES FAMÍLIA MÓRE

Midjór ajuda pa kes ki perde un algen

TOKA

NA KES ÚLTIMU ANU, SPESIALISTAS TEN STADU TA STUDA TXEU SOBRI KEL DÓR KI UN ALGEN TA XINTI ÓRAS KI MORE-L UN ALGEN KI EL TA AMA. Má, sima nu odja na kes otu artigu, kes midjór konsedju ki spesialistas ta da txeu bês ta lenbra-nu di kuzê ki Bíblia ta fla. Kel-li ta mostra ma kel ki Bíblia ta fla inda ta sirbi pa nos ténpu. Má, Bíblia ka ten sô bons konsedju. El ten tanbê informasons ki nu ka ta atxa na ninhun otu lugar i ki pode konsola kes ki perde un algen ki es ta ama.

Kes algen ki nu ta ama ki móre ka sta ta sufri

Bíblia ta fla na Eclesiastes 9:5 ma ‘mortus ka sabe di más nada’ i ma ses ‘pensamentus ta kaba.’ (Salmo 146:4) É pur isu ki Bíblia ta konpara mórti ku un sónu trankilu. — João 11:11.
Kunfia na un Deus di amor ta da-nu konsolu

Bíblia ta fla na Salmo 34:15: ‘Jeová * sta ku odju na kes algen justu, i se obidu ta obi ses gritu di ajuda.’ Pâpia ku Deus na orason é ka sô un manera di nu dizabafa ô kontrola kes kuza ki nu ta pensa. Na verdadi, kel-li ta djuda-nu ten un amizadi ku nos Kriador, ki pode uza se puder pa konsola-nu.
Speransa di un futuru midjór

Imajina óras ki kes algen ki sta mortu ben resusitadu pa vive li na Téra! Bíblia ta pâpia txeu di kel ténpu li. Tanbê el ta splika modi ki vida ta ben ser na Téra óras ki kel-li kontise. El ta fla ma Deus ‘ta ben linpa di nos odju tudu lágua, i ka ta ten más mórti, nen ka ta ten más tristéza, nen txoru, nen dór.’ — Apocalipse 21:3, 4.

Txeu algen ki ta kridita na Jeová, kel Deus di Bíblia, ta konsigi ten forsa pa lida ku kel dór di perde un algen ki es ta ama pamodi es ten speransa di odja-s otu bês. Pur izénplu, Ana, ki se maridu móre dipôs di 65 anu kazadu, fla: “Bíblia ta garanti-nu ma kes algen ki nu ta ama ki móre ka sta ta sufri i ma Deus ta ben resusita tudu kes ki sta na se mimória. N ta lenbra di kel promésa li sénpri ki N ta pensa na nha maridu, i kel-li ta djuda-m lida ku kel piór kuza ki dja kontise na nha vida!”

Tina, ki dja nu papiaba di el antis na kel revista li, fla: “Désdi ki Timo móre, N xinti ma Deus apoia-m. N ka ten palavras pa splika modi ki Jeová sta ta djuda-m na es ténpu difísil li. N ten sertéza ma kel speransa di resureison ki sta na Bíblia ta ben kontise. I é kel-li ki ta da-m forsa pa N kontinua ku nha vida ti ki txiga kel dia ki N ta ben odja Timo otu bês.”

Milhons di algen ki ta kunfia na kuzê ki Bíblia ta fla ta xinti di mésmu manera. Mésmu ki bu ta atxa ma é difísil kridita na kuzê ki Bíblia ta fla, nu ta insentiva-u pa bu sabe más sobri se konsedjus i promésas. Talvês bu pode diskubri ma Bíblia é kel midjór ajuda pa kes algen ki sta ta lida ku dór di perde un algen ki es ta ama.