Vate nzika no nginya andũ ma Nasaleti methĩwe matanie mũno yĩla Yesũ wasyokie kw’o. Yesũ atambĩte kũthi akavatiswe nĩ Yoana, eesĩkĩe ta vundi wa mbwaũ kĩsionĩ kya Nasaleti. Ĩndĩ yĩla wasyokie kĩsionĩ kĩu, eesĩkĩe ta mũndũ wa kwĩka syama syĩ vinya. Ekali ma kĩsio kĩu kya Nasaleti maĩ na wendi mwingĩ wa kwona ayĩka syama kĩsionĩ kyoo.

Wendi woo wa kwona Yesũ ayĩka syama wongelekile yĩla waendie ĩsinakokenĩ, o tondũ weekaa kĩla ĩvinda. Yĩla andũ meũthaithĩa ĩsinakokenĩ, nĩmavoyaa na maisoma ũvoo kuma mavukunĩ ma Mose, o tondũ kweekawa “masinakokenĩ kĩla mũthenya wa savato.” (Meko ma Atũmwa 15:21) O na ĩngĩ, andũ nĩmasomaa ilungu imwe kuma mavukunĩ ma athani. Yĩla Yesũ waũngamie nĩ kana asome, nũtonya kwĩthĩwa oonie andũ aingĩ woonaa tene yĩla waendaa ĩsinakokenĩ yĩu. Aũngamie asome ĩvuku ya kũkũnzwa ya mwathani Isaia. Ĩvukunĩ yĩu nĩwasomie maandĩko mawetete ĩũlũ wa mũndũ wetĩkĩiw’e mauta nĩ veva wa Yeova. Maandĩko ala mawetete ũndũ ũsu ũmũnthĩ me ĩvukunĩ ya Isaia 61:1, 2.

Yesũ nĩwasomie ĩũlũ wa ũndũ mũndũ ũsu wathanĩtwe waĩ atavany’e ũvoo wa kũthasya ala ove, kũvow’a kwa ilalinda, na kũtavany’a ĩũlũ wa mwaka wa Yeova ũla wĩtĩkĩlĩtwe. Amina kũsoma, nĩwanengie mũsũvĩi ĩvuku ya kũkũnzwa, na ekala nthĩ. Andũ onthe ala maĩ ĩkalũnĩ mamũketee Yesũ mũno. Yesũ nĩwambĩĩe kũneena, na nĩvatonyeka akethĩwa aneenie kwa ĩvinda yĩasa. Ũndũ ũmwe wa vata katĩ wa maũndũ ala waneenie waĩtye atĩĩ: “Ũmũnthĩ ĩandĩko yĩu mweew’a nĩyeanĩa.”—Luka 4:21.

Andũ nĩmaseng’ie mũno “nũndũ wa ndeto sya mumo ila syaumaa kanyw’anĩ [wa Yesũ],” na nũndũ wa ũu makũlany’a atĩĩ: “Ũũ nĩ mwana wa Yosevu, kana ti w’o?” Ĩndĩ nũndũ Yesũ nĩwamanyie andũ asu mendaa kwona ayĩka syama ta ila meew’ĩte nĩwĩkaa, aendeeie kũmea atĩĩ: “Vate nzika mũkandavya ndeto ii: ‘Mũiiti ĩvosye. Ĩka vaa kĩsionĩ kyenyu maũndũ ala twĩw’ĩte maneekiwe Kavelinaumi.’” (Luka 4:22, 23) Andũ asu, ala maĩ atũi ma Yesũ tene, moonaa Yesũ aĩle kwambĩĩsya kwĩka syama sya kũvosya andũ kĩsionĩ kĩla weanĩie, nĩ kana andũ make mambe kũtetheka. Kwoou no kwĩthĩwa moonaa kana Yesũ nĩwamavũthĩĩisye na nĩwoolĩtwe nĩmo.

Nũndũ Yesũ nĩwamanyie mosũanĩo moo, nĩwawetie maũndũ amwe meekĩkie Isilaeli myaka mingĩ mĩvĩtu. Awetie kana ĩvindanĩ ya mwathani Eliya, kwaĩ iveti mbingĩ ndiwa nthĩ ya Isilaeli, ĩndĩ o na Eliya ndaatũmwa kwa iveti isu. Ĩndĩ vandũ va ũu, Eliya aendie kwa mũndũ mũka ndiwa ũtaĩ Mũisilaeli na wekalaa Nzelavathi, ndũa ĩla yaĩ vakuvĩ na Sitoni, vala Eliya weekie kyama na atangĩĩa thayũ. (1 Asumbĩ 17:8-16) Nayo ĩvindanĩ ya mwathani Elisa, kwaĩ Aisilaeli aingĩ maĩ awau mangũ, ĩndĩ mwathani ũsu avoisye Naamani e weka, ũla waumĩte Silia.—2 Asumbĩ 5:1, 8-14.

Andũ asu ma kuma kĩsionĩ kya Nasaleti, kĩla Yesũ weanĩie, meekie ata yĩla Yesũ wamatavisye ĩũlũ wa maũndũ asu meekĩkie tene ala moonanisye kana nĩmeeyendete mo ene na mayaĩ na mũĩkĩĩo? Andũ ala maĩ ĩsinakokenĩ nĩmathatie mũno, mookĩla, na mamumaalya Yesũ na mĩtũkĩ kuma ndũanĩ ĩsu. Mamũtwaie ĩũlũ wa kĩĩma kĩla ndũa ĩsu yaakĩtwe, na menda kũmwĩkya kuma vau kĩĩmanĩ. Ĩndĩ Yesũ avĩtĩla katĩ woo na athi. Auma vau aendie Kavelinaumi, ĩla yaĩ ngalĩko ya ĩũlũ ya Ũkanga wa Kalilii kwelekela ũthũĩlonĩ wa syũa.