NTHĨNĨ wa Mbivilia ũkeethĩa ĩvuku yĩtawa Luthi. Ĩvuku yĩu yĩna ngewa ya andũ ma mũsyĩ maĩ thayũ ĩvinda yĩla Aisilaeli maĩ na asili. Luthi aĩ mũndũ mũka wa mũika kuma nthĩ ya Moavi. We ndaĩ wa andũ ma Ngai ma nthĩ ya Aisilaeli. Ĩndĩ yĩla Luthi weemanyĩisye ĩũlũ wa Yeova Ngai wa w’o, amwenda mũno vyũ. Naomi aĩ mũndũ mũka mũkũũ na nĩwatetheeisye Luthi kwĩmanyĩsya ĩũlũ wa Yeova.

Naomi aĩ Mũisilaeli. We na mũũme na ana moo elĩ nĩmathamĩĩie nthĩ ya Moavi ĩvinda yĩmwe kwaĩ yũa nthĩ ya Isilaeli. Na ĩndĩ mũthenya ũmwe mũũme wa Naomi akw’a. Ĩtina ana make elĩ matwaa eĩtu Amoavi meetawa Luthi na Oliva. Ĩndĩ ĩtina wa ta myaka 10, ana asu elĩ ma Naomi makw’a. Naomi na eĩtu asu elĩ meewie kyeva ta kĩ! Naomi aĩ atonya kwĩka ata yu?

Mũthenya ũmwe Naomi nĩwatwie kũthi kyalo kĩasa asyoke mũsyĩ kwa andũ moo. Luthi na Oliva nĩmendaa kwĩkala nake, na kwoou o namo mathi nake. Ĩndĩ ĩtina wa kũendanga ĩvinda ĩnini, Naomi eethyũũa kwelekela eĩtu asu na amea: ‘Endai mũsyoke mũsyĩ na mũyĩkala na aa-inyia menyu.’

Naomi nĩwamamumunyie eĩtu asu amatiĩe ũvoo. Na ĩndĩ mambĩĩa kũĩa nũndũ nĩmamwendete Naomi mũno, na masya: ‘Aiee! Ithyĩ twĩthi vamwe naku kwa andũ maku.’ Ĩndĩ Naomi asũngĩa: ‘No nginya mũsyoke, eĩtu makwa. Ũkeethĩwa waĩlu kwenyu mwĩ mũsyĩ.’ Kwoou Oliva akwata nzĩa enũka. Ĩndĩ Luthi alea kũthi.

Nake Naomi eethyũũa amwelekela na asya: ‘Sisya Oliva nĩwathi. O naku mũatĩĩe mwĩnũkany’e.’ Ĩndĩ Luthi asũngĩa: ‘Eka ũnthing’ĩĩsya ngũtie! Eka nĩendany’e naku. Vala wĩthi ngathi, na vala wĩĩkala ngekala. Andũ maku makeethĩwa andũ makwa, na Ngai waku akeethĩwa Ngai wakwa. Vala wĩkw’ĩĩa novo nĩkw’ĩĩa, na novo nĩthikwa.’ Yĩla Luthi waisye ũu, Naomi ndaatata ĩngĩ kũmwĩa asyoke mũsyĩ.

Ĩtina vyũ aka asu elĩ nĩmavikie Isilaeli. Na matũa kũu. Na vate kweteela Luthi ambĩlĩlya kũthũkũma mĩũndanĩ, nũndũ yaĩ ĩvinda ya kũketha mbaale. Mũndũ ũmwe weetawa Mboasi nĩwamũekie ombany’e iia sya mbaale mĩũndanĩ yake. We nĩwĩsĩ inyia wa Mboasi aĩ ũũ? Aĩ Laavi ũla wa ndũa ya Yeliko.

Mũthenya ũmwe Mboasi nĩweeie Luthi: ‘Nĩnĩw’ĩte ũvoo w’onthe ĩũlũ waku, na ũndũ wĩthĩĩtwe wĩ mũseo kwa Naomi. Nĩnĩsĩ ũndũ watiie ĩthe na inyia waku na nthĩ yaku, na ũndũ wookie kwĩkala na andũ ũtamesĩ nongi. Yeova nĩakũathime!’

Nake Luthi asũngĩa: ‘Nĩwĩthĩĩtwe wĩna tei kwakwa, mwĩaĩi. Nĩwatuma nĩw’a nesa nũndũ wa nzĩa ĩla waneena nakwa.’ Mboasi nĩwamwendie Luthi mũno, na ĩtina wa ĩvinda ĩnini matwaana. Ũndũ ũsu nĩwatanĩthisye Naomi mũno vyũ! Ĩndĩ Naomi nĩwatanie ĩa mũno yĩla Luthi na Mboasi makwatie mwana woo wa mbee weetawa Oveti. Ĩtina Oveti nĩwatw’ĩkie ũmae wa Ndaviti, ũla tũkemanyĩsya maũndũ maingĩ ĩũlũ wake ĩtina.

Ĩvuku ya Mbivilia ya Luthi.