KWOONA mĩnyololo ĩĩ yovete Vaulo, na kwasisya mũsikalĩ ũya Mũlomi ũkũmũsunga. Vaulo ovewe Lomi. Eteele nginya Kaisali Mũlomi atw’e ũndũ ũkwĩkana nake. Na e o mwove, andũ nĩmanengawa mwanya wa kũmwona

Mĩthenya ĩtatũ ĩtina wa Vaulo kũvika Lomi nĩwatũmanie nĩ kana atongoi amwe Ayuti moke kũmwona. Na kwoou, Ayuti aingĩ kũu Lomi mooka. Vaulo nĩwamatavisye ĩũlũ wa Yesũ na ũsumbĩ wa Ngai. Amwe nĩmaĩkĩĩie na matw’ĩka Aklĩsto, ĩndĩ angĩ mayaaĩkĩĩa.

Na ĩngĩ Vaulo nĩwamatavisye ũvoo mũseo asikalĩ me kĩvathũkany’o ala mamũsungaa. Kwa myaka ĩlĩ ĩla Vaulo wekalile vaa e mwove, nĩwamatavasya ũvoo mũseo andũ onthe ala waĩ atonya kũmatavya. Na nũndũ wa kwĩka ũu, o na andũ ma nyũmba ya Kaisali meew’a ũvoo mũseo wa Ũsumbĩ, na amwe moo matw’ĩka Aklĩsto.

Ĩndĩ mũeni ũũ wĩ mesanĩ ũkũandĩka nũũ? We nũtonya ũtalĩthya? Ũũ nĩ Timotheo. Timotheo o nake aĩ kolokolonĩ nũndũ wa kũtavany’a ĩũlũ wa Ũsumbĩ, ĩndĩ yu aĩ mũthasye. Nake ookĩte vaa kũtetheesya Vaulo. We nĩwĩsĩ Timotheo eandĩka kyaũ? Ekai twone.

We nũũlilikana ndũa sya Vilivi na Eveso nthĩnĩ wa Ngewa ya 110? Vaulo nĩwatetheeisye kwambĩlĩĩlw’a kwa ikundi sya Kĩklĩsto ndũanĩ isu. Ĩndĩ e o kolokolonĩ, Vaulo nĩwaandĩkĩie Aklĩsto asu valũa. Valũa isu syĩ Mbivilianĩ, na syĩtawa Aeveso na Avilivi. Vaulo yu etavya Timotheo ũndũ ũkũandĩkĩa Aklĩsto anyanyae ndũanĩ ya Vilivi.

Avilivi maĩ na ĩnee mũno kwa Vaulo. Nĩmamũtũmĩie mũthĩnzĩo e vaa kolokolonĩ, na kwoou Vaulo amatũngĩa mũvea nũndũ wa w’o. Evavilotito nĩwe waetie mũthĩnzĩo ũsu. Ĩndĩ awaa na eethĩwa e vakuvĩ kũkw’a. Yu aĩ mũima ĩngĩ na nĩweeyũmbanĩtye kwĩnũka. Na aĩ akue valũa ũsu kuma kwa Vaulo na Timotheo na aisyoka naw’o Vilivi.

E o kolokolonĩ Vaulo nĩwaandĩkie valũa ingĩ ilĩ ila twĩ nasyo Mbivilianĩ. Ũmwe aandĩkĩie Aklĩsto ma ndũa ya Kolosai. We nĩwĩsĩ ũndũ valũa ũsu wĩtawa? Wĩtawa Akolosai. Ũla ũngĩ aandĩkie mũnyanyae wake weetawa Vilemona ũla o nake wekalaa Kolosai. Valũa ũsu wĩelesya ĩũlũ wa Onesimo mũthũkũmi wa Vilemona.

Onesimo nĩwaĩ anatoloka kuma kwa Vilemona akoka Lomi. Kwa nzĩa na, Onesimo nĩwamanyie kana Vaulo aĩ kolokolonĩ Lomi. Nake ooka kũmũsisya, na Vaulo amũtavya ũvoo mũseo. O kwa mĩtũkĩ, Onesimo o nake nĩwatw’ĩkie Mũklĩsto. Nĩweelilile nũndũ wa kũtoloka. Kwoou we nĩwĩsĩ kĩla Vaulo waandĩkie valũanĩ wake kwa Vilemona?

Vaulo akũlilye Vilemona amũekee Onesimo. Vaulo aandĩkie, ‘Nĩngũmũtũma we mwene asyoke kwaku. Ĩndĩ yu we nĩ mũthũkũmi waku na mwana-a-asa Mũklĩsto mũseo.’ Yĩla Onesimo wakee kũsyoka Kolosai, nĩwakuie valũa isu syelĩ, ũmwe kwa Akolosai na ũngĩ kwa Vilemona. Nĩtũtonya kũsũanĩa ũndũ Vilemona watanie nĩkũmanya kana mũthũkũmi wake nũtw’ĩkĩte Mũklĩsto.

Yĩla Vaulo waandĩkĩie Avilivi na Vilemona, aĩ na ũvoo mũseo mũno. Vaulo eeie Avilivi: ‘Nĩtũma Timotheo kwenyu. Ĩndĩ o nakwa ngooka kũmwona inyw’ĩ o mĩtũkĩ.’ Na kwa Vilemona aandĩka ũũ: ‘Nzeũvĩsya vandũ va kwĩkala kũu.’

Vaulo athaw’a nĩwathokeie ana-a-asa na eĩtu-asa Aklĩsto kũndũ kwingĩ. Ĩndĩ ĩtina Vaulo nĩwooviwe ĩngĩ kũu Lomi. Ĩvinda yĩu nĩweesĩ nũkũawa. Kwoou aandĩkĩa Timotheo na amũkũlya oke mĩtũkĩ. Vaulo aandĩkie: ‘Nĩthĩĩtwe nĩ mũĩkĩĩku kwa Ngai. Na Ngai nũkanduva.’ Myaka mĩvũthũ ĩtina wa Vaulo kũawa, Yelusaleme nĩyaanangiwe ĩngĩ, ĩvinda yĩu nĩ Alomi.

Ĩndĩ kwĩ maũndũ maingĩ Mbivilianĩ. Yeova Ngai nĩweeie mũtũmwa Yoana aandĩke mavuku mayo ma mũthya, o vamwe na ĩvuku ya Ũvuany’o. Ĩvuku yĩĩ yĩtavanasya ĩũlũ wa ĩvinda yĩla yũkĩte. Ekai yu twĩmanyĩsye ĩũlũ wa maũndũ ala makekĩka ĩvinda yĩla yũkĩte.

Meko 28:16-31; Avilivi 1:13; 2:19-30; 4:18-23; Aevelania 13:23; Vilemona 1-25; Akolosai 4:7-9; 2 Timotheo 4:7-9.