1. Yehowa a masha ni gaw gara mayak manghkang ni hte hkrum chye ai kun?

GRAI sawng ai mayak manghkang ni hte nang hkrum nga ai kun? Nawku hpung kaw na marai langai gaw nang hpe hkra machyi hkra galaw ai rai na re. (Yak 3:2) Shing n rai, Yehowa hpe nawku ai majaw jawng manang, bungli manang ni a jahpoi asawng ai hkrum nga ai kun? (1 Pe 4:3, 4) Na a nta masha ni gaw nang zuphpawng n lung na matu hkum pat ai (sh) na a makam masham hpe kaga ni hpe n tsun na matu hkum pat ai rai chye ai. (Mat 10:35, 36) Lak san hku na, grai sawng wa ai aten ni hta nang asum jaw kau mayu wa na re. Gara manghkang mi hkrum tim dai hpe hparan lu ai n-gun atsam hte nyan hpaji hpe Yehowa jaw na hpe kam mai ai.

2. Roma 15:4 hku nga yang Karai a mungga hpe hti ai shaloi hpa akyu lu la na kun?

² N hkum tsup ai shinggyim masha ni hku nna mayak manghkang ni hpe gara hku hkam jan lu wa ai lam, shi a Mungga hta Yehowa ahkri ahkrai ka shalawm da ya ai. Hpa majaw kun? Dai kaw na anhte sharin la na matu re. Dai majaw, Roma 15:4 (Hti u.) hpe ka na matu Pawlu hpe Yehowa shadut ya wa ai. Dai labau ni hpe hti yang, anhte shalan shabran lam lu nna myit mada lam nga wa na re. Raitim akyu lu na matu, hti ai daram hte sha n mai ai. Chyum daw ni gaw anhte a myit mang ai lam ni hpe shingkang ka-up nna, anhte a masin salum hpe shadut ya ra ai. Mayak manghkang hpe hparan na matu lam matsun tam ai shaloi, gara hku galaw lu ai kun? Ndai lam yan mali hpe galaw mai ai: (1) Akyu hpyi ai, (2) Shingran yu ai, (3) Myit sawn sumru ai, (4) Tatut hkan sa ai. Ndai lam yan langai hpra hta hpa ni lawm ai  hpe hkaja yu ga. * Hkawhkam Dawi hte kasa Pawlu a kasi hpe hkaja ai shaloi, ndai lam yan mali hpe lang mat na re.

3. Chyum Laika hpe garai n hti shi yang hpa galaw ging ai kun? Hpa majaw kun?

³ (1) Akyu hpyi ai. Chyum Laika garai n hti shi yang, hti ai kaw na akyu hkam la lu na matu Yehowa kaw shawng akyu hpyi u. Ga shadawn, manghkang langai hpe gara hku hparan na hte seng nna lam matsun tam ai shaloi, Karai a Mungga kaw na npawt tara hpe tam mu na matu Yehowa kaw akyu hpyi u.​—Hpl 4:6, 7; Yak 1:5.

4. Chyum Laika mabyin ni hpe pra pra mu wa hkra hpa gaw karum ya lu ai kun?

⁴ (2) Shingran yu ai. Shingran yu lu ai mauhpa atsam hpe Yehowa anhte hpe jaw da ai. Chyum Laika hta lawm ai mabyin hpe pra pra mu lu hkra, byin nga ai lam hpe shingran yu u. Shi na shara hta shang nna myit yu u. Shi mu wa ai lam ni hpe mu hkra, shi a hkamsha lam ni hpe chye hkra shakut u.

5. Myit sawn sumru ai ngu ai gaw hpa rai kun? Dai hpe gara hku galaw lu ai kun?

⁵ (3) Myit sawn sumru ai. Myit sawn sumru ai ngu ai gaw, hti ai lam hpe gara hku hkan sa mai na lam sung sung myit yu ai hpe tsun ai re. Dai hku galaw ai gaw hti ai lam ni hpe atsawm chye na wa shangun ai. Chyum Laika hpe hti nna myit sawn sumru ai lam n galaw ai gaw, shat mai shadu ai shaloi shakau shaban n bang ai sha shadu ai hte bung ai. Dai shat mai gaw sha mu na n re. Nang myit sawn sumru lu na matu ndai zawn ga san ni hpe san mai ai: ‘Manghkang ni hpe hparan lu hkra shi hpa galaw wa ai kun? Yehowa shi hpe gara hku karum ya ai kun? Mayak manghkang ni hpe hkam jan lu hkra ndai lam hpe ngai gara hku akyu jashawn na?’

6. Chye wa ai lam ni hpe hpa majaw tatut hkan sa ra ai kun?

⁶ (4) Tatut hkan sa ai. Tatut hkan sa ai lam n nga ai wa gaw, zaibru jang hta nta gap ai wa hte bung ai ngu Yesu tsun ai. Shi shakut shaja let galaw ai. Raitim, kaman sha re. Hpa majaw kun? Nbung laru ru nna hka tung wa yang, dai nta gaw run mat na re. (Mat 7:24-27) Dai hte maren, anhte akyu hpyi ai, shingran yu ai, myit sawn sumru ai lam ni galaw tim, ta tut n hkan sa ai nga yang, kaman sha re. Mayak manghkang ni, zingri zingrat lam ni hte chyam dinglik hkrum wa yang, hkam jan lu na n re. Raitim, anhte hkaja ai lam hpe tatut hkan sa na nga yang kaja ai dawdan lam hpe jahkrat lu na, grau nna simsa wa na, makam masham grau nna ngang kang wa na re. (Esa 48:17, 18) Anhte bawngban wa ai lam yan mali hpe akyu jashawn nna, Hkawhkam Dawi a prat hkrun lam kaw na hpa sharin la lu na hpe hkaja yu ga.

7. Chyum Laika hta lawm ai gara mabyin hpe anhte hkaja na kun?

⁷ Na a manang (sh) nta masha langai gaw na ntsa sadi n dung ai kun? Rai yang, Hkawhkam Dawi a kasha Absalom a labau hpe hkaja nna akyu lu la mai ai. Absalom gaw kawa hpe sadi run nna hkawhkam aya lu na matu shakut wa ai.​—2 Sa 15:5-14, 31; 18:6-14.

8. Yehowa a karum madi shadaw lam lu na matu nang hpa galaw mai ai kun?

⁸ (1) Akyu hpyi ai. Dai mabyin hpe myit hta bang da nna, nang hkrum nga ai n tara ai lam hte seng nna, gara hku hkamsha nga ai lam Yehowa hpe tsun dan u. (Shk 6:6-9) Ahkri ahkrai tsun dan u. Dai hpang, dai manghkang hpe hparan lu hkra karum ya lu ai npawt tara hpe mu wa hkra, Yehowa kaw akyu hpyi u.

9. Dawi hte Absalom a mabyin hpe kadun dawk tsun dan u.

⁹ (2) Shingran yu ai. Dai mabyin a masa lam hpe myit yu nna, Hkawhkam Dawi hpe gara hku  hkra machyi wa na lam shingran yu u. Absalom gaw masha ni shi hpe tsawra wa hkra shaning law law galaw wa ai. (2 Sa 15:7) Aten du sai ngu shi shadu ai shaloi, masha ni shi hpe hkawhkam hku na hkap la hkra galaw na matu, masha nkau hpe Israela mungdan ting de dat dat ai. Dawi a manang mung rai, hpaji jaw ai wa mung re ai Ahihtohpela hpe pyi, lau la lu wa ai. Absalom gaw shi hkum shi hkawhkam hku nna ndau shana wa ai. Dawi hpe rim nna sat na matu pyi lajang wa ai. Dai aten hta Dawi gaw grai machyi sawng nga na masa nga ai. (Shk 41:1-9) Absalom a lamang hpe Dawi chye mat nna, Yerusalem kaw na hprawng mat ai. Hpang hta Absalom a hpyen dap gaw Dawi a hpyen ma ni hpe sa gasat ai. Gumlau ai ni sum mat ai. Dawi a kasha Absalom mung sat kau hkrum ai.

10. Dawi gara hku myit wa chye ai kun?

¹⁰ Dawi gara hku hkamsha na hpe shingran yu u. Absalom hpe shi grai tsawra ai. Ahihtohpela hpe grai kam ai. Raitim, dai lahkawng yan sadi run wa ai. Shi hpe grai hkra machyi shangun wa ai. Sat na matu pyi shakut wa ai. Kaga manang ni mung Absalom maga de lawm sam ai ngu na ntsen ai myit ni Dawi hta nga wa chye ai. Shi maga de kadai n nga sai ngu hkamsha nna, shi langai hkrai hprawng na matu myit wa chye ai. Shing n rai, grai myit daw mat chye ai. Raitim, dai zawn Dawi n byin wa ai. Dai mayak manghkang ni hpe shi tawt lai wa ai. Hpa majaw dai hku galaw lu wa ai kun?

11. Yakhkak ai masa lam ni hpe Dawi gara hku bai htang wa ai kun?

¹¹ (3) Myit sawn sumru ai. Dai mabyin kaw na gara npawt tara ni hpe sharin la lu ai kun? Ndai ga san hpe htai yu u: “Dawi hpa galaw wa ai kun?” Grai myit tsang nna kalang ta dawdan lam jahkrat ai baw n galaw wa ai. Hpa galaw ra na hpe pyi n chye mat hkra hkrit tsang ai baw n byin ai. De a malai, karum lam lu na matu Yehowa kaw akyu hpyi ai. Manang ni kaw mung karum hpyi ai. Shi dawdan da ai hte maren alawan galaw ai. Dawi gaw grai hkra machyi wa tim, myit machyi nna kaga ni hpe ntsen mat ai baw n byin ai. Yehowa hte manang ni hpe matut nna kam ai.

12. Dawi hpe karum na matu Yehowa hpa galaw wa ai kun?

¹² Dawi hpe Yehowa gara hku karum ya wa ai kun? Kahtap nna loi mi hkaja na nga yang, mayak manghkang ni hpe Dawi hkam jan lu hkra ra nga ai n-gun atsam hpe Yehowa jaw wa ai lam nang chye lu na re. (Shk 3:1-8; ntsa na ga yan) Dawi a dawdan lam hpe Yehowa shaman chyeju jaw wa ai. Dawi a matu gasat ya ai sadi dung ai manang ni hpe mung Yehowa madi shadaw ya ai.

13. Marai langai ngai gaw nang hpe grai hkra machyi hkra galaw ai nga yang Dawi hpe gara hku kasi la lu na kun? (Mahte 18:15-17)

¹³ (4) Tatut hkan sa ai. “Dawi hpe gara hku kasi la lu na kun?” ngu nna tinang hkum tinang san yu u. Manghkang hpe alawan hparan na matu ahkyak ai. Byin nga ai masa lam hta hkan nna, Mahte daw kaba 18 hta lawm ai Yesu a hpaji jaw ga hpe ding tawk hku na mi rai rai, npawt tara hku na mi rai rai hkan sa mai ai. (Mahte 18:15-17 hpe hti u.) Raitim, myit daw nga ai aten (sh) grai pawt mayu nga ai aten hta dawdan lam n jahkrat ging ai. Myit simsa na matu hte manghkang hpe hparan lu ai nyan hpaji jaw na matu Yehowa kaw akyu hpyi ging ai. Manang ni hpe ntsen ai myit hkum nga. De a malai manang ni karum ya ai hpe hkap la u. (Gsh 17:17) Ahkyak htum gaw, Chyum Laika hta lawm ai Yehowa a hpaji jaw ga hpe hkan sa ai re.​—Gsh 3:5, 6.

14. 2 Timohti 1:12-16; 4:6-11, 17-22 gaw gara masa ni hta nang hpe n-gun jaw ya lu ai kun?

¹⁴ Nta masha ni a ninghkap ai hpe nang hkrum nga ai kun? Yehowa Sakse ni a bungli nkau hpe hkum pat da ai (sh) tsep kawp hkum pawt da ai mungdan hta nang nga nga ai kun?  Re ai nga yang, 2 Timohti 1:12-16; 4:6-11, 17-22 * hpe hti nna n-gun lu la mai ai. Pawlu gaw dai laika ni hpe htawng rawng nga ai aten hta ka wa ai re.

15. Hpa a matu Yehowa kaw akyu hpyi mai ai kun?

¹⁵ (1) Akyu hpyi ai. Dai Chyum daw ni hpe n hti shi yang, na a manghkang ni hte seng nna Yehowa hpe tsun dan u. Gara hku hkamsha ai hpe mung tsun dan u. Ahkri ahkrai tsun dan u. Dai hpang, kasa Pawlu a mabyin kaw na npawt tara ni hpe tam mu na matu Yehowa kaw akyu hpyi u. Rai yang manghkang hpe gara hku hparan na hte seng nna chye wa na re.

16. Pawlu a mabyin hpe kadun dawk tsun dan u.

¹⁶ (2) Shingran yu ai. Nang gaw Pawlu a shara hta re ngu shingran yu u. Roma hta htawng hkrat nna hpri sumri hte gyit hkang da hkrum ai. Shawng de mung htawng hkrat ga ai. Raitim, ndai kalang gaw sat hkrum sana re ai hpe shi chye ai. Manang nkau gaw shi hpe kau da ai. Shi grai pu ba nga ai.​—2 Tm 1:15.

17. Pawlu gara hku myit wa chye ai kun?

¹⁷ Kaga lam hpe she lata wa yang rim hkrum na n re wa, ngu na pawlu myit wa chye ai. Asi mung kaw na shi hpe kau da ai ni hte seng nna myit machyi nga chye ai. Shi a kaga manang ni hpe mung ntsen ai myit nga wa chye ai. Raitim, Pawlu dai hku n byin wa ai. Hpa majaw shi a manang ni hpe matut kam nna, htawm hpang myit mada lam shi hta nga nga ai kun?

18. Mayak manghkang ni hpe Pawlu gara hku bai htang ai kun?

¹⁸ (3) Myit sawn sumru ai. Ndai ga san hpe htai yu u. Pawlu hpa galaw wa ai kun? Si ai lam hte jahkrit shama hkrum tim pyi, Yehowa hpe shagrau sha-a ra na ngu ai ahkyak ai lam hpe Pawlu n malap wa ai. Kaga ni hpe gara hku n-gun jaw ya mai na lam hpe shi matut nna myit ai. Ayan akyu hpyi ai hku na Yehowa hpe kamhpa wa ai. (2 Tm 1:3) Shi hpe kau da mat ai ni hte seng nna matut n myit taw ai. Shi hpe madi shadaw ya ai, karum ya wa ai sadi dung ai manang ni hpe grai chyeju dum ai lam tsun wa ai. Karai a Mungga hpe matut nna hkaja ai. (2 Tm 3:16, 17; 4:13) Ahkyak htum gaw, Yehowa hte Yesu shi hpe tsawra ai lam tsep kawp kam wa ai. Shi hpe n kau da ai, shi sadi dung let magam gun wa ai majaw kumhpa jaw na hpe kam wa ai.

19. Pawlu hpe Yehowa gara hku karum ya wa ai kun?

¹⁹ Hkristan langai re ai majaw zingri zingrat hkrum na ngu, Pawlu hpe Yehowa sadi jaw wa ai. (Kas 21:11-13) Pawlu hpe Yehowa gara hku karum ya wa ai kun? Pawlu a akyu hpyi ga hpe mahtai jaw nna, n-gun atsam jaw wa ai. (2 Tm 4:17) Bungli grai shakut shaja ai majaw kumhpa hkam la lu na re ngu kam shangun wa ai. Pawlu hpe tatut karum ya na matu, sadi dung ai manang ni hpe Yehowa shadut ya wa ai.

20. Roma 8:38, 39 hta lawm ai Pawlu madun wa ai makam masham hpe anhte gara hku kasi la mai ai kun?

²⁰ (4) Tatut hkan sa ai. “Pawlu hpe gara hku kasi la lu na kun?” ngu nna tinang hkum tinang san yu u. Pawlu zawn sha, makam masham a majaw zingri zingrat hkrum na ngu anhte myit mada da ging ai. (Mrk 10:29, 30) Manghkang ni lapran hta matut sadi dung lu na matu, Yehowa kaw akyu hpyi nna shi hpe kamhpa ra ai. Hkaja lamang hpe ayan galaw ra ai. Yehowa a amying hpe shagrau na matu gaw ahkyak htum re ngu ai hpe anhte ayan na myit dum ra ai. Yehowa gaw anhte hpe galoi mung kau da na n re. Yehowa a tsawra myit anhte n hkamsha lu hkra kadai mung, hpa mung galaw lu na n re.​—Roma 8:38, 39 hpe hti u; Heb 13:5, 6.

21. Chyam dinglik lam ni hpe tawt lai lu hkra Aya hte Hek-ta hpe hpa gaw karum ya wa ai kun?

²¹ Anhte a masa gaw gara hku mi raitim, Chyum Laika a kasi ningli kaw na n-gun lu la mai ai. Ga shadawn, Japan mung kaw na  ningshawng nauna Aya hpe, Yona a labau gaw shawa man sakse hkam ai hta n hkrit hkra karum ya wa ai. Indonisha kaw na ramma hpunau Hek-ta a kanu kawa ni gaw Yehowa hpe n nawku ai. Raitim, Yehowa a lam sharin la nna nawku wa hkra, Ruhta a kasi ningli gaw shi hpe shadut ya ai ngu na tsun dan ai.

22. Chyum Laika kamung naura (sh) “Shanhte A Makam Masham Hpe Kasi La U” ngu ai sumhpa ni kaw na akyu lu hkra hpa gaw nang hpe karum ya na kun?

²² Nang hpe shangang shakang ya na Chyum Laika kasi ningli ni hpe gara kaw tam mai na kun? Anhte a video ni, nsen kamung naura ni hte “Shanhte A Makam Masham Hpe Kasi La U” ngu ai sumhpa ni gaw Chyum Laika hta lawm ai mabyin ni hpe pra pra mu wa hkra karum ya na re. * Dai lam ni hpe n yu shi yang, n madat shi yang, n hti shi yang nang hkan sa lu na lam ni hpe tam mu hkra Yehowa kaw akyu hpyi u. Shanhte a shara hta shang nna shingran yu u. Yehowa a sadi dung ai mayam ni hpa galaw wa ai, shanhte a mayak manghkang ni hpe tawt lai lu hkra Yehowa gara hku karum ya wa ai hpe myit sawn sumru u. Chye wa ai lam ni hpe tatut hkan sa u. Yehowa lajang da ya ai lam ni a matu chyeju dum u. Kaga ni hpe n-gun jaw ai, karum madi shadaw ya ai hku nna chyeju dum ai lam hpe madun u.

23. Esaia 41:10, 13 hku nga yang, Yehowa gaw anhte hpe hpa galaw ya na ngu ga sadi jaw da ai kun?

²³ Satan a mungkan hta asak hkrung ai gaw grai yak ai. Kalang marang hpa galaw ra na hpe pyi n chye ai. (2 Tm 3:1) Raitim anhte n tsang ra ai, n hkrit ra ai. Anhte hpa byin nga ai hpe Yehowa chye ai. Anhte kataw mat yang, shi a ding hpring ai hkra lata hte sharawt la na ngu ga sadi jaw da ai. (Esaia 41:10, 13 hpe hti u.) Shi a karum madi shadaw lam, Chyum daw ni kaw na lu la ai n-gun atsam hte gara chyam dinglik lam hpe raitim anhte tawt lai lu na hpe kam mai ai.