NDAI “hpang jahtum na nhtoi hta” anhte a prat gaw grau nna yak wa na re ai majaw, myit galu ai lam grau nna madun ra ai. (2 Timohti 3:1-5) Anhte a makau grup-yin na masha law law gaw myit n galu ma ai. Tingkyeng akyu tam nna dang rang hkat na matu sharawng ma ai. Tinang hkum tinang n hkang lu ai. Dai majaw, anhte ndai hku san ra ai: ‘Makau grup-yin na masha ni zawn ngai mung myit n galu wa sai kun? Teng sha myit galu ai ngu ai gaw hpa hpe tsun ai kun? Myit galu ai gaw ngai na atsam ningja langai byin hkra, gara hku galaw mai na kun?’

Chyum Laika hta tsun da ai “myit galu kaba ai” ngu ai gaw hpa lachyum rai kun? Hkam sharang ai hta n-ga lawm ai. Myit galu ai masha langai gaw, masa ni grau kaja wa na ngu myit mada let hkam sharang ai. Shi a matu sha n myit ai. Kaga masha ni hte shi ntsa n kaja ai masha ni a hkamsha lam hpe pyi myit tau ya ai. Shanhte hte hku hkau lam rawt jat wa na ngu myit mada ai. Myit galu ai lam gaw, tsawra myit a majaw re ai ngu nna Chyum Laika hta tsun da ai. * (1 Korinhtu 13:4) Myit galu ai lam gaw, “wenyi a asi” ni hta mung lawm ai. (Galati 5:22, 23) Rai yang, myit galu chye hkra anhte hpa galaw ra na kun?

Myit galu na matu Yehowa a chyoi pra ai wenyi hpe hpyi shawn ra ai. Yehowa gaw shi hpe kam hpa ai ni hpe chyoi pra ai wenyi jaw ai. (Luka 11:13) Chyoi pra ai wenyi gaw karum ya lu ai atsam grai kaba ai. Raitim, anhte maga hku nna mung, akyu hpyi ga hte maren hkan galaw ra ai. (Shakawn 86:10, 11) Tsun mayu ai gaw, shani shagu myit galu na matu anhte dang lu ai daram shakut ra nna, dai hpe anhte a atsam ningja langai byin hkra galaw ra ai. Raitim, kalang lang myit n galu ai aten ni mung nga chye ai. Anhte hpe hpa gaw karum ya lu na kun?

Yesu madun wa ai hkum tsup ai kasi ningli hpe anhte hkaja ra ai. Kasa Pawlu gaw, myit galu ai atsam ningja mung lawm ai “gawng shing-yan ningnan” hte seng nna tsun ai shaloi, anhte hpe shi ndai hku n-gun jaw ai: “Hkristu a ngwi pyaw ai lam a up nga u ga.” (Kolose 3:10, 12, 15) Dai zawn byin lu na matu, Yesu a kasi hpe anhte hkan sa ra nna, aten du jang manghkang ni hpe Karai Kasang hparan ya na hpe tsep kawp kam ra ai. Anhte hta dai myit nga yang, makau grup-yin hta hpa mi byin nga tim, matut nna myit galu nga na re.​—⁠Yawhan 14:27; 16:33.

Anhte yawng gaw, mungkan nnan hpe lawan du shangun mayu na re. Raitim, anhte hpe Yehowa kade daram myit galu ai hpe myit na nga yang, anhte grau nna myit galu na re. Chyum Laika hta ndai hku ga sadi jaw da ai: “Nkau mi gaw, Ala nga ai, nga nna myit ma ai hte maren, dai Madu gaw shi a ga madat hpe shadik na ala nga ai n rai: rai ti mung, yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai majaw, shi nanhte hpe myit galu kaba madun nga ai.” (2 Petru 3:9) Anhte hpe Yehowa kade daram myit galu wa ai lam hpe myit ai shaloi, kaga ni  hpe mung myit galu na matu shadut ya na re. (Roma 2:4) Gara masa lam ni hta myit galu ai lam madun ra na kun?

Shani shagu myit galu lam madun ra ai masa lam ni grai law hkra nga ai. Ga shadawn, anhte ahkyak ai lama ma tsun mayu tim, kaga masha ni ga shaga nga yang, lapran shang nna n tsun na matu myit galu ra ai. (Yaku 1:20) Kaga ni anhte hpe masin shapawt ai shaloi hta mung myit galu lam madun ra ai. Myit n galu ai hku bai htang na malai, anhte a gawng kya lam ni hpe Yehowa hte Yesu gara hku mu mada ai lam dum ra ai. Anhte galaw shut ai kaji kajaw lam ni hpe shan yan myit maju n jung ai. De a malai, anhte hta nga ai kaja ai atsam ningja ni hpe yu nna, anhte rawt jat wa na matu myit galu let la ya ai.​—⁠1 Timohti 1:16; 1 Petru 3:12.

Anhte tsun ai hte galaw ai lam gaw shut nga ai ngu kaga masha ni sa tsun ai shaloi mung, myit galu lam madun ra ai. Anhte masin pawt nna tinang hkum tinang maga ai baw byin chye ai. Raitim, Chyum Laika hta dai hku n galaw na matu tsun da ai: “Hkam sharang ai myit gaw, gumrawng ai myit hta grau kaja nga ai. Pawt sindawng hkra myit hkum gadun et; kaning rai nme law, pawt sindawng ai gaw angawk ai wa a kraw hta e de nga ai.” (Hpaji 7:8, 9) Dai majaw, anhte hte seng nna kaga ni tsun ai shut yang pyi, lama ma bai n htang shi yang, myit galu let atsawm myit yu ra ai. Yesu gaw, shi hte seng nna kaga ni n teng ai hku tsun ai shaloi, dai zawn sha galaw wa ai.​—⁠Mahte 11:19.

Laksan hku nna, kanu kawa ni gaw, shanhte a ma ni a n kaja ai ra marin ai lam hte myit jasat hpe shading sharai ya ai shaloi myit galu ra ai. Uyawpa kaw nna Behtela langai hta magam gun nga ai hpunau Matia a mabyin hpe myit yu ga. Matia ramma aten hta, shi a makam masham a majaw, jawng manang ni gaw shi hpe jahpoi asawng ma ai. Shawng nnan hta, shi kanu yan kawa gaw dai hpe n chye ai. Raitim, shi gaw makam masham lam hta ntsen ai myit nga wa ai hpe kanu yan kawa sadi hkrup mat ai. Matia a kawa Gili gaw, shi hte shi madu jan grai myit galu wa ra ai lam tsun dan ai. Matia gaw ndai zawn ga san ni san ai: “Karai Kasang gaw kadai rai? Chyum Laika gaw Karai a mungga teng sha re ai kun? Anhte hpe Karai hpyi shawn da ai lam ni gaw, gaja wa shi hpyi shawn ai re ai kun? Awa kam sham ai hku ngai n hkap la yang, hpa majaw ngai hpe Awa ni mara shagun na kun?”

 Gili ndai hku matut tsun ai: “Kalang lang shi gaw masin pawt ai nsen hte ga san ni san ai. Ngai hte shi kanu hpe ninghkap ai hku gaw n re. Raitim, teng man ai tara gaw shi a prat hpe yak shangun ai ngu hkamsha ai majaw, teng man ai tara hpe ninghkap mayu wa ai.” Gili gaw shi kasha hpe gara hku karum ya wa ai kun? “An wa arau dung nna aten na na ga shaga ai” ngu Gili tsun ai. Shi kasha tsun ai hpe madat ya nna, kasha a hkamsha lam hte ningmu hpe chye hkra ga san ni san ai. Kalang lang, Gili gaw lam langai ngai hpe sang lang ya nna, dai lam hpe langai, lahkawng ya daram myit sumru na matu shi kasha hpe n-gun jaw ai. Dai hpang she dai lam bai bawng ban ai. Shi kasha tsun ai lam hpe mung, shi nhtoi loi mi aten la nna myit sumru ra ai ngu Gili tsun ai. Dai zawn, ayan tsun shaga ai lam ni a majaw, gawng malai jahpu a lam hte Yehowa gaw anhte hpe tsawra nna, uphkang na ahkaw ahkang nga ai hpe Matia chye na wa ai. Gili ndai hku tsun ai: “Aten gaw la ra ai. Yak mung yak ai. Raitim, gau ngwi ngwi Yehowa hpe tsawra ai myit, shi hta nga wa ai. Shakut shaja nna karum ya ai lam gaw, akyu nga nna shi a salum hpe shadut ya ai lam mu lu ai majaw, an grai kabu ai.”

Gili hte shi a madu jan gaw, shan a kasha hpe myit galu let karum ya ai shaloi, Yehowa mung madi shadaw ya na ngu kam wa ai. Gili gaw shi kasha hte seng nna ndai hku tsun ai: “An shi hpe tsawra ai majaw, karum ya na matu Yehowa hpang grau nna aja awa akyu hpyi wa ai lam, shi hpe ngai jahkring hkring tsun dan ai.” Myit galu nna asum n jaw ai kanu kawa ni gaw, grai kabu ma ai.

Machyi jung nga ai nta masha (sh) manang langai ngai hpe yu lanu lahku ra ai shaloi mung myit galu ra ai. Uyawpa hta nga ai Elen * a mabyin hpe myit yu ga.

Lai wa sai 8 ning kaw nna, Elen a madu wa gaw grai machyi sawng nna bawnu hkra machyi mat ai. Dai majaw, shi madu wa gaw ngwi pyaw lam, yawn hpa lam hte matsan dum ai lam zawn re ai hkamsha lam ni n nga sai. De a majaw, Elen grai yak hkak jamjau hkrum ai. Shi ndai hku tsun ai: “Grai myit galu ra nna law law lang akyu hpyi ra ai. Ngai ra dik htum Chyum daw Hpilipi 4:13 hta tsun da ai lam a majaw shalan shabran lam lu la ai. Ndai hku tsun da ai: ‘Ngai hpe n-gun lagaw shaja ya ai wa a majaw, lam shagu hpe ngai hkam lu nngai.’” Yehowa jaw ai atsam marai hte madi shadaw lam a majaw, Elen gaw dai manghkang ni hpe myit galu let hparan lu wa ai.​—⁠Shakawn 62:5, 6.

Myit galu ai lam hta kasi kaja dik htum gaw Yehowa re. (2 Petru 3:15) Yehowa myit galu ai lam madun wa ai mabyin law law hpe Chyum Laika hta mu lu ai. (Nehemia 9:30; Esaia 30:18) Sodom mare hpe jahten na hte seng nna Abraham ga san san ai shaloi, Yehowa gara hku htai ya ai lam myit yu u. Abraham tsun nga ai lam hpe Yehowa n jahkring kau ya ai. Abraham san ai ga san shagu hte myit tsang ai lam hpe myit galu let madat ya nna bai htai ya ai. Hpang jahtum, dai mare hta ding hpring ai masha marai shi nga yang n jahten na ngu nna Abraham hpe tsun dan wa ai. (Ningpawt 18:22-33) Yehowa gaw ayan myit galu let madat ya nna lai lai jan jan bai htang ai lam galoi mung n galaw ai.

Myit galu ai lam gaw, Hkristan ni yawng hta nga ra ai gawng shing-yan ningnan a grai ahkyak ai atsam ningja langai re. Myit galu ai lam anhte madun yang, myit galu ai Yehowa hpe shagrau lu nna, “makam masham hte shakut sharang ai a majaw, ga ndat ni a sali wunli hkam la lu” na re.​—⁠Hebre 6:10-12.