Content de lai

Malawm Ni Hpe Lai U

Kabu Gara Ai​—⁠Karai Kasang Kaw Nna Lu La Ai Atsam Ningja Langai

Kabu Gara Ai​—⁠Karai Kasang Kaw Nna Lu La Ai Atsam Ningja Langai

SHINGGYIM masha ni gaw ngwi pyaw mayu ai. Raitim, ya aten gaw “yak la ai” hpang jahtum nhtoi re ai majaw, yawng mayawng gaw manghkang ni hkrum nga ai. (2 Timohti 3:1) N tara ai lam ni hkrum ai, machyi ai, bungli n nga mat ai, tsawra ai ni si mat ai, myit yawn ai (sh) myit tsang hpa lam amyu myu hkrum ai. Dai majaw, masha nkau kabu gara ai lam n nga mat ai. Yehowa hpe nawku nga ai ni pyi, myit daw myit hten nna kabu gara ai lam, angwi ngwi yawm wa chye ai. Lama na, nang dai zawn hkamsha nga yang, na a kabu gara ai myit hpe bai lu hkra gara hku galaw mai na kun?

Dai ga san a mahtai hpe lu na matu, jet ai kabu gara lam gaw hpa re ai hte yakhkak ai lam ni nga tim pyi, kabu gara ai myit matut nga hkra kaga masha ni gara hku galaw wa ai hpe chye da ra ai. Anhte a kabu gara ai myit matut nga na matu hte law htam wa na matu, gara hku galaw mai na hpe yu yu ga.

Kabu Gara Ai Ngu Ai Gaw Hpa Rai Kun?

Kabu gara ai gaw pyaw ai hte n bung ai. Ndai lam hpe myit yu u: Masha langai gaw chyaru lu nna grai mani ai. Raitim, shi bri ai kaw nna bai bran wa ai shaloi, n kam mani sai. Shi hta manghkang ni naw nga ai hpe mung bai dum wa ai. Shi a pyaw ai lam gaw chyahkring sha rai nna, jet ai kabu gara lam n re.​—⁠Ga Shagawp 14:13.

Raitim, kaja ai lama ma hpe anhte myit mada ai (sh) lu la ai shaloi, anhte a salum hta grai kabu na re. Kabu gara ai ngu ai gaw, kaja ai masa hta raitim, n kaja ai masa hta raitim, ngwi pyaw nga ai hpe tsun mayu ai re. (1 Htesaloni 1:6) Gaja wa nga yang, lama ma a majaw anhte myit n pyaw tim, matut nna kabu gara mai ai. Ga shadawn, kasa ni gaw Yesu hte seng nna hkaw tsun ai majaw, kayat hkrum ai. Raitim, shanhte gaw “amying ningsang de a majaw she, kaya hkrum na gaw, ging nga ga ai, nga nna myit la ai majaw, kabu gara ai myit hte dai salang hpawng na pru wa ma ai.” (Kasa 5:41) Shanhte kayat hkrum ai majaw n pyaw tim, Karai Kasang a ntsa matut nna sadi dung lu wa ai majaw kabu gara nga ai.

Kabu gara ai gaw shangai ai shaloi kaw nna lawm wa ai atsam n re. Hpa majaw kun? Jet ai kabu gara lam gaw Karai Kasang a chyoi pra ai wenyi a majaw byin wa ai asi re. Karai a chyoi pra ai wenyi gaw, kabu gara lam lawm ai “gawng shing-yan ningnan” rawt jat wa hkra karum ya ai. (Ehpesu 4:24; Galati 5:22) Anhte hta kabu gara ai myit nga yang, manghkang ni hpe atsawm hparan lu na re.

Anhte Hkan Sa Mayu Ai Kasi Ningli

Yehowa gaw mungkan ga hta kaja ai lam ni byin nga ai hpe sha mu mayu ai. Dai ni na aten hta anhte mu nga ai n kaja ai lam ni hpe shi n kam mu ai. Masha ni n kaja ai lam ni galaw tim, Yehowa gaw shi hta nga ai kabu gara ai myit hpe n shayawm kau ai. Chyum Laika hta ndai hku tsun da ai: “N-gun atsam hte kabu gara ai gaw shi a Nawku Htingnu hta hpring nga ai.” (1 Hkawhkam Labau 16:27, JCLB) Dai hta n-ga, Yehowa a mayam ni kaja ai lam ni hpe galaw ai nga yang, shi myit pyaw ai.​—⁠Ga Shagawp 27:11.

Anhte myit mada da ai lam ni n byin wa ai shaloi, kabu gara lam matut nga hkra shakut ai hku  nna Yehowa hpe kasi la lu ai. Myit tsang nga na malai, ya anhte hta nga ai kaja ai lam ni hpe myit maju jung mai ai. Htawm hpang hta grau kaja ai lam ni byin wa na hpe myit galu let la nga mai ai. *

Manghkang ni grai law nga tim pyi, kabu gara ai myit matut nga wa ai masha ni a kasi ningli hpe Chyum Laika hta grai law hkra mu lu ai. Abraham gaw, shi a aprat hta shoi hpa nga ai shaloi, kaga masha ni gaw shi hpe manghkang sa tam ai shaloi, matut nna kabu gara ai myit nga wa ai. (Ningpawt 12:10-20; 14:8-16; 16:4, 5; 20:1-18; 21:8, 9) Gara lam hku nna kabu gara ai myit shi hta matut nga wa ai kun? Meshia uphkang na mungkan nnan hta asak hkrung na ngu ai shi a myit mada lam hpe myit mang ai hku nna re. (Ningpawt 22:15-18; Hebre 11:10) Yesu ndai hku tsun wa ai: “Nanhte a kawa Abraham gaw nye a nhtoi mu lu na hpe, sharawng awng nga ai rai nna, mu lu ai hte kabu gara nga ai.” (Yawhan 8:56) Htawm hpang hta lu la na shaman chyeju ni hpe myit nna matut kabu gara nga yang, anhte gaw Abraham hpe kasi la nga ai re.​—⁠Roma 8:21.

Pawlu hte Sila mung mayak mahkak amyu myu hkrum wa tim, makam masham ngang kang nna, kabu gara ai myit matut nga wa ai. Ga shadawn, shan hpe laja lana kayat nna htawng jahkrat kau tim, “akyu hpyi ai hte, Karai Kasang hpe mahkawn mangoi” nga ai. (Kasa 16:23-25) Shan yan gaw, htawm hpang hte seng nna Karai a ga sadi hpe myit ai majaw, yakhkak jamjau hkrum ai hpe matut nna hkam sharang lu wa ai. Hkristu hpang hkan nna, yakhkak jamjau hkrum nga ai hpe chye ai majaw mung kabu gara lu ai re. Karai Kasang hpe sadi dung let magam gun ai kaw nna, kaja ai akyu ni lu la na hpe myit dum ai gaw, Pawlu hte Sila hpe kasi la nga ai re.​—⁠Hpilipi 1:12-14.

Dai ni na aten hta mung, mayak mahkak ni hkrum nga tim, matut nna kabu gara nga ai hpunau nauna law law a kasi ningli hpe mu lu ai. Ga shadawn, Hpilipai mung kaw 2013 November hta, Haiyan Nbung Laru Kaba a majaw Sakse Hkam dinghku 1,000 jan a nta hten za mat ai. Tekloban mare hta nga ai Jawk a nta gaw tsep kawp hten za mat ai. Shi ndai hku tsun ai: “Ndai zawn hkrum tim pyi, hpunau ni gaw ngwi pyaw nga ma ai. Yak tim anhte kabu gara nga ai.” Yehowa anhte a matu galaw ya ai lam ni hpe anhte myit nna, shi hpe chyeju dum ai nga yang, ladu lai hkra mayak mahkak hkrum tim, matut nna kabu gara lu na re. Kabu gara ai hte seng nna Yehowa lajang ya ai kaga lam gaw hpa ni kun?

Kabu Gara Na Lam

Yehowa hte hku hkau lam nga ai gaw, anhte a madung kabu gara ai lam re. Shi gaw ninggawn tawa hta Hkawhkam re. Shi gaw anhte a Kawa, Karai Kasang hte Jinghku re.​—⁠Shakawn 71:17, 18.

Yehowa gaw anhte hpe asak jaw da nna kabu gara lu ai atsam jaw da ai majaw mung anhte chyeju dum ga ai. (Hpaji 3:12, 13) Shi hpang de sit sa na matu, anhte hpe lau la da ai majaw, anhte gara hku asak hkrung hkawm sa na hte anhte a matu shi a yaw shada lam hpe anhte chye lu ai. (Kolose 1:9, 10) Raitim, masha law malawng gaw aprat hte seng ai yaw shada lam hpe n chye na ma ai. Dai zawn shai nga ai lam hpe ahkyak shatai tsun mayu ai majaw Pawlu ndai hku ka wa ai: “Myi e n mu, na hte n na yu nna, Masha myit hta n hkawn pru ai lam, Karai Kasang gaw shi hpe tsaw ra ai ni a matu mara lajang da ai hpa rai ti mung, anhte tsun dan ga ai. Karai Kasang chyawm gaw, Wenyi a lata hte ndai lam hte hpe anhte kaw shapraw shadan dan mi ai.” (1 Korinhtu 2:9, 10) Yehowa a myit ra ai hte yaw shada lam hpe chye na ai gaw anhte hpe kabu gara shangun ai.

Anhte a matu Yehowa galaw ya ai lam ni hpe myit yu u. Anhte a mara ni raw kau hkrum ai majaw pyaw ai n rai ni? (1 Yawhan 2:12) Kade nna yang du wa sana re ai mungkan nnan hta asak hkrung lu na myit mada lam mung anhte hpe shi jaw da ai. (Roma 12:12) Ya aten hta pyi Yehowa gaw anhte hpe manang grai law hkra jaw da nna, shanhte hte arau Yehowa hpe nawku lu nga ai. (Shakawn 133:1) Satan hte nat ni a hpyen kaw nna mung anhte hpe makawp maga ya ai. (Shakawn 91:11) Yehowa anhte hpe lajang da ya ai dai lam ni hpe matut myit nga yang, anhte grau nna kabu wa na re.​—⁠Hpilipi 4:4.

 Grau Nna Kabu Gara Lu Na Lam

Kabu gara nga ai Hkristan langai gaw grau nna kabu gara lu na kun? Yesu ndai hku tsun ai: “Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu, ga ndai ngai nanhte hpe tsun da made ai.” (Yawhan 15:11) Dai hku tsun da ai majaw, anhte grau nna kabu gara mai ai. Anhte a kabu gara ai hpe wan hte shing daw mai ai. Wan grau nna kahtet wa hkra, hpun grau bang ra ai. Ndai lam hpe dum u: Anhte kabu gara lu hkra, chyoi pra ai wenyi gaw karum ya lu ai. Dai majaw grau nna kabu gara mayu yang, Karai a chyoi pra ai wenyi lu na matu, matut nna akyu hpyi ra ai. Chyoi pra ai wenyi shadut ya ai hte ka da ai Chyum Laika hpe anhte matut nna myit sawn sumru ra ai.​—⁠Shakawn 1:1, 2; Luka 11:13.

Anhte hpe grau nna kabu gara shangun lu ai lam langai gaw, Yehowa hpe myit shapyaw ya ai lam ni hta bungli law nga ai hku nna re. (Shakawn 35:27; 112:1) Hpa majaw ta? Anhte hte seng nna Chyum Laika hta ndai hku tsun da ai: “Karai Kasang hpe hkrit hkungga nna, shi hkang da ai ga hpe madat mara nga u; dai gaw shinggyim masha ni a lam madung rai nga ai.” (Hpaji 12:13) Karai a myit ra ai hpe galaw na matu anhte hpe hpan da ai. Dai majaw, Yehowa hpe anhte nawku yang, anhte a prat hta jet ai kabu gara lam lu la na re. *

Kabu Gara Ai Kaw Nna Lu La Ai Akyu Ni

Kabu gara ai lam law htam wa hkra galaw na nga yang, kaga akyu ni law law mung hkamsha lu na re. Ga shadawn, anhte hta manghkang ni nga tim, Yehowa hpe kabu gara let matut nawku ai nga yang, shi grau myit pyaw na re. (Tara Jahprang 16:15; 1 Htesaloni 5:16-18) Sutgan arung arai law law lu da ai gaw, anhte a prat hta ahkyak htum re nga nna n myit ai majaw mung, jet ai kabu gara lam hpe anhte lu la ai. Karai a Mungdan a matu anhte grau nna sak jaw na matu mung shakut ai. (Mahte 13:44) Yehowa a matu grau sak jaw ai kaw nna kaja ai akyu ni lu la ai hpe mu ai shaloi, anhte grau kabu gara wa na re. Tinang hkum tinang kaja ai hku mu mada wa nna, kaga ni hpe mung ngwi pyaw shangun lu ai.​—⁠Kasa 20:35; Hpilipi 1:3-5.

Grau nna kabu gara yang, grau nna hkam kaja lam lu la na re. Chyum Laika hta ndai hku tsun da ai: “Kabu gara ai myit hkam kaja ai tsi rai nga ai.” (Ga Shagawp 17:22) Amerikan Mungdan Nebraska Dakkasu hta, hkam kaja lam hte seng nna sawk tam ai wa tsun ai ga gaw, Chyum Laika hte hkrak re. Shi ndai hku tsun ai: “Ya aten hta, na a prat hpe myit dik nna ngwi pyaw ai nga yang, htawm hpang hta hkam kaja lam grau nna nga wa na re.”

Myit tsang ai lam ni hpring nga ai aten hta anhte asak hkrung nga tim, Karai a Mungga hpe hkaja na, myit sawn sumru na, akyu hpyi nna chyoi pra ai wenyi lu la na nga yang, jet ai kabu gara lam anhte hta nga na re. Ya aten hta Yehowa lajang da ya ai kaja ai lam ni hpe myit na, sadi dung ai kaga masha ni hpe kasi la na, Karai a myit ra ai hpe shakut nna galaw na nga yang, grau nna kabu gara lu na re. Rai yang, Shakawn Kungdawn 64:10 hta tsun da ai shaman chyeju hpe lu la na re. Ndai hku tsun da ai: “Ding man ai ni Yehowa hta kabu gara nga nna, shi hta shingbyi nga na ma ra ai.”

^ စာပိုဒ်၊ 10 “Wenyi a asi” re ai myit galu kaba ai atsam ningja hte seng nna du wa na ra ai sumhpa hta anhte hkaja lu wa na re.

^ စာပိုဒ်၊ 20 Grau nna kabu gara lu na matu lam matsun ni hpe “ Kabu Gara Lam Law Htam Wa Shangun Ai Lam Ni” ngu ai lawk hpe yu u.