Content de lai

N Hkungran Ai Sha Rau Nga Sha Ai Hte Seng Nna Chyum Laika Hta Gara Hku Tsun Ai Kun?

N Hkungran Ai Sha Rau Nga Sha Ai Hte Seng Nna Chyum Laika Hta Gara Hku Tsun Ai Kun?

Chyum Laika Mahtai

Karai Kasang gaw masha ni hpe “hpye ai amu hpe koi gam” shangun mayu ai lam, Chyum Laika hta tsun da ai. (1 Htesaloni 4:3) Chyum Laika hta na “hpye ai amu” ngu ai ga si gaw num shaw la shaw ai, num shada la shada nga sha ai hte n hkungran da ai sha arau nga ai lam ni hpe tsun ai re.

 Hkungran ai shing nrai n hkungran ai gaw Karai Kasang a matu hpa majaw ahkyak ai kun?

  • Dinghku lamang hpe Karai Kasang hpang da ai re. Shi gaw shawng nnan na la hte num hpe hkungran ya wa ai. (Ningpawt 2:22-24) N hkungran ai sha num hte la arau nga sha na matu shi n yaw shada wa ai.

  • Masha ni a matu kaja htum hpe Karai Kasang chye ai. Hkungran ai hku nna num hte la shada da prat dingsa kahkyin gumdin nga na matu yaw shada da ai. Dai hku galaw yang, nta masha yawng makawp maga hkrum nna akyu lu na re. Ga shadawn langai hpe yu yu ga. Arai langai hpe atsawm shachyaw lu na matu, de a matsun laika hta madun da ya ai. Awng dang ai dinghku hpe gawgap lu na matu mung, Karai Kasang gaw lam matsun ni anhte hpe tsun dan ai. Karai Kasang a tsang madang ni hpe hkan sa yang galoi mung akyu lu na re.​—Esaia 48:17, 18.

    Arai langai hpe atsawm shachyaw lu hkra lam matsun ni hta madun da ya ai. Awng dang ai dinghku langai gawgap lu na matu Karai Kasang gaw anhte hpe lam matsun ni tsun dan ya ai

  • Tinang a ningrum ningtau n re ai wa hte nga sha ai gaw grai hkra machyi ai lam ni byin wa chye ai. Ga shadawn, tinang n ra sharawng ai ma hkum kap wa chye ai, ngang hte seng ai ana zinli ni hte myit daw myit hten ai lam ni hkamsha chye ai. *

  • Karai Kasang gaw num hte la kanawn nna ma shaprat lu ai atsam jaw da ai. Ma shaprat lu ai atsam gaw Karai Kasang jaw ai kumhpa re. Karai Kasang gaw asak hpe manu shadan ai. Karai Kasang gaw anhte hku nna, dai kumhpa hpe hkungga ai myit hte akyu jashawn nna, dinghku lamang hpe shagrau shangun mayu ai.​—Hebre 13:4.

 N hkungran shi yang shawng nnan arau nga chyam yu ai gaw gara hku kun?

Awng dang ai dinghku lu na matu, hkungran ga shaka n galaw shi ai shaloi rau nga sha lu na n re. De a malai, ningrum ningtau shada manghkang ni hpe arau hparan ai rai yang, hkungran ga shaka grau nna ngang kang na re. * Hkungran ga shaka ngang kang hkra galaw ra ai.​—Mahte 19:6.

 Ngang kang ai dinghku gara hku gawgap mai na kun?

Hkum tsup ai dinghku ngu ai gaw n nga ai. Raitim, Chyum Laika lam matsun ni hpe hkan sa ai hku nna, awng dang ai dinghku hpe gawgap lu ai. Ga shadawn nkau mi hpe yu u:

  • Tinang hta grau nna ningrum ningtau hpe lanu lahku u.​—1 Korinhtu 7:3-5; Hpilipi 2:3, 4.

  • Shada da tsawra nna hkungga lara u.​—Ehpesu 5:25, 33.

  • Tsun shaga ai ga hpe hkang chye na matu sharin la u.​—Ga Shagawp 12:18.

  • Myit galu nna alawan mara raw u.​—Kolose 3:13, 14.