Kwestiyan We Piipl Aks
A uu a di “uman” we Aizaiya 60:1 taak bout, an a ou shi “git op” an “mek piipl si [ar] lait”?
Aizaiya 60:1 se: “Uman, git op an mek piipl si yu lait kaa fi yu Gad kom fi siev yu. Yu si Jeuova we big an powaful, a im a shain im lait pan yu.” Wen wi luk pan da vors ya an di ada vors dem we kom afta it, wi si se a riili wan plies it a taak bout. It did a taak bout Zaiyan, ar Jeruusilem, di mien siti we did iina Juuda dem taim de. a (Aiz. 60:14; 62:1, 2) Som a di taim wen di Baibl taak bout Jeruusilem, it riili a taak bout di wol a di piipl dem we liv iina Izrel. Bot wa wi riid a Aizaiya 60:1 mek wi afi aks tuu kwestiyan. Di fos wan a: A wen Jeruusilem did “git op” an mek ada piipl si ar lait, an a ou dat did apm? An di neks kwestiyan a: Ou wa Aizaiya rait se a kom chuu iina fi wi taim?
A wen Jeruusilem did “git op” an mek ada piipl si ar lait, an a ou dat did apm? Jeruusilem an Gad ous did mash dong wen di Izrelait dem did iina Babilan fi 70 ier. Bot wen di piipl dem fram Miidiya an Porja did tek uova Babilan, di Izrel piipl dem we did de iina aal a di plies dem we Babilan did a ruul uova kuda go baka dem yaad an staat fi worship Jeuova agen iina Jeruusilem. (Ezra 1:1-4) An iina 537 B.C.E., piipl fram di 12 difrant chraib dem did staat fi go baka Jeruusilem. (Aiz. 60:4) Dem staat gi op sakrifais tu Jeuova agen, kip di difrant difrant festival dem, an staat fi bil op bak Gad ous. (Ezra 3:1-4, 7-11; 6:16-22) Dem taim de it did komiin laik se Jeuova we big an powaful did staat fi shain im lait pan Jeruusilem agen. An kaaz a dis, piipl fram aal bout we neehn nuo bout Gad kuda kom a Jeruusilem fi kom lorn bout im agen.
Bot a onggl paat a wa Aizaiya did se did kom chuu wid di Izrelait dem, kaa muos a di Izrelait dem did en op ton dem bak pan Jeuova an neehn du wa im se. (Nii. 13:27; Mal. 1:6-8; 2:13, 14; Mat. 15:7-9) An dem did aal ton dem bak pan Jiizas Krais an se im a neehn di Mesaiya. (Mat. 27:1, 2) An iina 70 C.E., Jeruusilem an Gad ous did get mash dong agen.
A lang taim bifuo dem sitn ya apm Jeuova did se dem wuda apm. (Dan. 9:24-27) So wi si klier klier se Jeuova neehn plan se evriting we iina Aizaiya chapta 60 wuda kom chuu wid di Izrel piipl dem we liv iina Jeruusilem.
Di sitn dem we Aizaiya chapta 60 se wuda apm, a apm iina fi wi taim tu. Dem a apm wid ‘di Jeruusilem we de a evn.’ Di apasl Paal did taak bout da Jeruusilem ya laik se it a wan uman wen im se: “Shi a wi mada.” (Gya. 4:26) Da Jeruusilem ya we Paal a taak bout a di paat a Jeuova aaganaizieshan we de a evn. Aal a Jeuova ienjel dem we de a evn mek op da Jeruusilem ya. An da paat ya a Jeuova aaganaizieshan komiin laik wan mada kaa Jiizas an Paal an di res a di 144,000 piipl we get pik fi go a evn wuda komiin laik ar “pikni dem.” Di Baibl kaal di wan dem we get pik fi go a evn wan “speshal piipl” an se dem a “[Gad] piipl.”—1 Pii. 2:9; Gya. 6:16.
A ou di Jeruusilem we de a evn “git op” an “mek piipl si ar lait”? Wi kyan si ar lait a shain wen wi luk pan ar pikni dem we de pan ort we get pik fi go a evn. An wi nuo dat kaaz wi si se wa Aizaiya chapta 60 se wuda apm a apm wid dem.
Di wan dem we get pik fi go a evn did afi “git op” outa di daaknis we dem did iina. Dem did iina daaknis kaa afta di apasl dem ded, muos a di Kristiyan dem dem taim de did ton dem bak pan di chuut an neehn de tiich wa di Baibl se. (Mat. 13:37-43) So it did komiin laik se Powaful Babilan, we a aal a di rilijan dem we naa worship Gad di rait wie, did kyapcha dem. An a so tingz did tan wid dem til ‘di laas die dem.’ Da taim de staat iina 1914. (Mat. 13:39, 40) Bot iina 1919, dem get frii fram Powaful Babilan an staat fi wok aad iina di priichin wok agen fi mek ada piipl nuo di chuut we de iina di Baibl. b Fram dem taim de til nou, piipl fram aal uova di worl a lorn di chuut, an som a dem piipl de we lorn di chuut get pik fi go a evn tu. A dem wan ya a di king dem we Aizaiya 60:3 taak bout.—Rev. 5:9, 10.
Iina di fyuucha, di wan dem we get pik fi go a evn a-go mek di lait fram Jeuova shain iina wan biga an beta wie. Kaa wen dem ded an gaan a evn, dem an di res a di 144,000 a-go ton king an priis iina evn. An aal a dem a-go mek op “di Nyuu Jeruusilem” we a di uman we Krais Jiizas a-go marid tu.—Rev. 14:1; 21:1, 2, 24; 22:3-5.
Jeuova a-go yuuz di Nyuu Jeruusilem fi mek wa Aizaiya 60:1 se a-go apm, apm fi chuu. (Luk pan Aizaiya 60:1, 3, 5, 11, 19, 20 an Revilieshan 21:2, 9-11, 22-26.) Jos laik ou di king dem iina Izrel did ruul fram Jeruusilem, a siem so di Nyuu Jeruusilem an Krais Jiizas a-go bi di govament we a-go ruul uova Gad nyuu worl. Wen di Baibl se di Nyuu Jeruusilem “kom dong fram Gad outa evn,” it a taak bout aal a di blesn dem we Gad govament a-go gi di piipl dem we de pan ort. Di Baibl tel wi se di piipl dem we a du wa rait fram aal a di konchri dem “a-go liv iina di lait we a shain fram di siti.” An it mek wi nuo se sin an det a-go gaan fi eva. (Rev. 21:3, 4, 24) A dis ya taim ya Aizaiya an di ada prafit dem did a taak bout, di taim wen Gad a-go “mek evriting nyuu.” (Aks 3:21) An da taim de did staat wen Krais Jiizas ton King iina evn, an it a-go don wen di Touzn Ier we im a ruul fa don.
a Iina Aizaiya 60:1, di Nyuu Worl Chransilieshan yuuz di wod “uman” insted-a yuuz “Zaiyan” ar “Jeruusilem” fi mek di sumadi we a riid nuo se di wod dem we dem yuuz iina di Iibruu langwij fi “git op” an ‘mek piipl si ar lait’ a di wod dem we dem wuda yuuz ef dem a taak bout wan uman.
b Iziikel 37:1-14 an Revilieshan 11:7-12 a tuu ada paat iina di Baibl we taak bout wa did gwaan iina 1919 wen Jeuova piipl dem did staat worship im di rait wie agen. Iziikel did taak bout wa wuda apm wid aal a di wan dem we get pik fi go a evn wen dem wuda staat worship Jeuova agen afta it did komiin laik se dem get kyapcha fi wan lang lang taim. Bot iina Revilieshan, it a taak bout di likl bit a breda dem we did a liid Gad piipl we get pik fi go a evn, an ou dem enimi dem wuda lak dem op iina prizn fi wan shaat taim an den ou dem wuda get frii op agen. A dem breda ya get pik iina 1919 fi ton “di waiz sorvant we di maasta kyan chos.”—Mat. 24:45; luk pan Pure Worship of Jehovah—Restored At Last!, p. 118.
