Wa Kyan Elp Yu Fi Lov Yu Nyuu Kanggrigieshan?
YU EVA muuv go a wan nyuu kanggrigieshan yet? Ef yu eva du dat, yu mait-a fiil laik Jean-Charles. Im se: “It did aad fi mi get fi lov mi nyuu kanggrigieshan, an gwaan du di sitn dem we a-go kip mi an mi fambili kluos tu Jeuova.” An tingk bout it: Sumadi we muuv go somwe nyuu afi go get wan wok, fain somwe fi liv, an ef dem av pikni dem mait-a afi sen dem go a wan difrant skuul. An pan tap a dat, wich paat dem muuv go mait-a ata ar kuola dan wich paat dem a kom fram, an di piipl dem we liv de mait-a du tingz difrant fram ou dem yuus tu it, an wich paat dem afi priich mait-a difrant fram wa dem yuus tu.
Fi Nicolas an Céline, tingz did kain-a likl difrant fi dem. A di branch afis iina Frans did sen dem fi go a wan nyuu kanggrigieshan. Dem se: “Wen wi did dis go de, wi did fiil gud, bot den likl afta dat, wi staat fi mis wi fren dem kaa wi an di nyuu breda an sista dem neehn so kluos yet.” a Wid aal a di ting dem we apm wen yu staat fi go a wan nyuu kanggrigieshan, wa yu kyan go du so dat yu api an lov yu nyuu kanggrigieshan? An wa di ada breda an sista dem kyan du fi elp sumadi we staat kom a dem miitn? An wa a som a di blesn dem we yu mait-a get, an ou yu kyan elp di breda an sista dem fi jraa kluos tu Jeuova tu?
FUOR TINGZ WE WI KYAN YUUZ DI BAIBL FI RIIZN PAN WE KYAN ELP WI WEN WI STAAT GO A WAN NYUU KANGGRIGIESHAN
Chos iina Jeuova fi elp yu
1. Chos iina Jeuova fi elp yu. (Sa. 37:5) Luk pan Kazumi we did iina Japan. Shi did iina wan kanggrigieshan fi 20 ier an en op afi go a wan difrant wan kaaz ar ozban get wan difrant wok. A wa shi did du fi mek Jeuova elp ar? Shi se: “Mi prie tu Jeuova an tel im evriting we a gwaan iina mi aat, laik ou mi did a wori an fret an fiil laik se mi no av nobadi. Evritaim mi prie, Jeuova gi mi di chrent we mi niid fi go aan.”
Wa kyan elp yu fi chos iina Jeuova muor? Jos laik ou sopm we yu plaant niid waata an ada tingz iina di dot fi gruo, a siem so wi afi du tingz fi mek wi chos iina Jeuova muor an muor. Nicolas, we wi did taak bout aredi, se wen im tingk bout man laik Iebriyam an Jiizas an Paal, we did gi op nof tingz fi sorv Jeuova, it mek im chos iina Jeuova muor an nuo se Jeuova a-go di de fi im. Wen wi du wi uona Baibl stodi aafn, it wi elp wi fi diil wid di difrant difrant ting dem we a-go chienj op chienj op iina wi laif, an elp wi fi du tingz fi elp di breda an sista dem iina wi kanggrigieshan fi get kluosa an kluosa tu Jeuova.
Wi no fi aalwiez a luk bak pan ou tingz did stie
2. Wi no fi aalwiez a luk bak pan ou tingz did stie. (Iik. 7:10) Wen Jules did muuv go a Merika fram Benin, im fain se tingz did difrant fram wen im did de a Benin. Im se: “Mi fain se evritaim mi miit sumadi nyuu, mi did afi a tel dem di stuori bout mi laif uova an uova agen.” Im se im neehn yuus tu dat so it did mek im staat fi kip we fram di breda an sista dem iina di kanggrigieshan. Bot afta im get fi nuo di breda an sista dem, it kaaz im fi chienj di wie ou im fiil bout dem. Im se: “Mi get fi si se no mata wich paat yu kom fram, evribadi a di siem. Dem jos mait-a du tingz likl difrant fram wi. Wi fi tek piipl fi uu dem bi, an dis a sitn we aal a wi fi andastan.” So wi no fi a luk bak pan ou wi breda an sista dem did stie iina di kanggrigieshan we wi a kom fram an se dem wan ya difrant fram dem. Jos laik wa wan paiyanier sista we niem Anne-Lise se, shi se: “Mi neehn muuv go somwe difrant an a ekspek fi fain di siem kain-a breda an sista dem de.”
Di elda dem we staat go a wan nyuu kanggrigieshan no fi luk bak an se tingz did betaraaf iina di kanggrigieshan we dem a kom fram niida. Kaa di wie ou wan kanggrigieshan du tingz mait-a no rang, it mait-a dis difrant. So it beta dem get fi nuo wa mek di breda dem mait-a du tingz a sortn wie, so dem no fi kwik fi tel dem ou fi du tingz. (Iik. 3:1, 7b) It beta dem du tingz an den di ada breda dem iina di nyuu kanggrigieshan kyan fala dem insted-a fi a tel di breda dem ou fi du tingz.—2 Kor. 1:24.
Du tingz wid di breda an sista dem
3. Du tingz wid di breda an sista dem. (Fil. 1:27) Wen sumadi muuv go somwe nyuu, it tek uol iip outa dem. Bot dem fi stil du evriting we dem kyan du fi go a di miitn dem fies tu fies kwik kwik ef dem kyan dwi’it. Kaa wen yu tingk bout it, ef di breda dem iina di nyuu kanggrigieshan no get fi si yu aafn, ou dem a-go kyan di de fi yu? Lucinda, we did muuv go iina wan big siti iina Sout Afrika wid ar tuu daata dem, se: “Dem tel mi se mi fi du evriting we mi kyan du wid di breda an sista dem iina di nyuu kanggrigieshan we mi staat go, laik mi fi go iina sorvis wid dem an put op mi an an ansa kwestiyan a di miitn dem. An wan neda ting we mi du a dat mi mek dem kom a mi yaad fi av di miitn fi fiil sorvis.”
Wen wi “tan op chrang tugeda” an du tingz wid di breda an sista dem iina wi nyuu kanggrigieshan, it a-go elp wi fi ‘fait fi wa wi biliiv iina bout di gud nyuuz.’ Di elda dem did tel Anne-Lise, we wi did taak bout aredi, se shi fi du evriting we shi kyan du fi priich wid aal a di breda an sista dem iina di kanggrigieshan. An wen shi du dat, shi se: “Iina no taim mi staat fi fiil laik mi a paat a di nyuu kanggrigieshan.” An wan neda ting a dat wen yu elp out fi kliin di Kindom Aal an tek kier a it an dem ting de, it mek yu fiil laik se yu nyuu kanggrigieshan a fi yu kanggrigieshan tu. So di muor wi staat fi du tingz iina di nyuu kanggrigieshan we wi a go, a di kwika wi a-go fiil laik se dem a wi fambili.
Chrai fi fain som nyuu fren
4. Chrai fi fain som nyuu fren. (2 Kor. 6:11-13) Wen yu mek sumadi si se yu kier bout dem, dat a wan a di bes wie yu kyan bi dem fren. So wa yu kyan du a mek shuor se yu go a miitn orli an stie likl afta di miitn don so dat yu kyan taak tu difrant difrant breda an sista an get fi nuo dem beta. An chrai fi memba dem niem, kaa wen yu memba sumadi niem an yu chriit dem nais an mek dem si se dem kyan kom tu yu kom taak tu yu, dat a-go mek yu an dem ton gud fren.
No wori an fret ef di breda an sista dem a-go laik yu. Wa yu fi du a jos bi yuself so dat dem kyan riili get fi nuo yu. Du laik wa Lucinda did du. Shi se: “Kaa wi did invait som a di breda an sista dem a wi yaad, wi av som gud fren nou.”
“TEK UNU WAN ANEDA”
Sumadi mait-a fried fi go iina wan Kindom Aal we ful op a piipl we dem no nuo. So wa yu kyan du fi dem wan de a du laik wa di apasl Paal tel wi. Im se: “Tek unu wan aneda siem laik ou Krais Jiizas did tek unu.” (Ruo. 15:7) So wen di elda dem du laik Jiizas Krais, dem kyan elp di wan dem we staat kom a dem miitn fi fiil gud. (Luk pan di paat we niem “ Som Tingz We Yu Kyan Du So Dat Wen Yu Muuv, Tingz Kyan Wok Out Gud Fi Yu.”) Bot memba se evribadi iina di kanggrigieshan, aal di pikni dem tu, kyan du sopm fi mek sumadi we staat go a fi dem kanggrigieshan bi dem fren.
Wen di Baibl tel wi se wi fi tek sumadi, it miin tu se wi fi du tingz fi mek dem si se wi di de fi dem. Laik wi kyan invait dem fi kom a wi yaad, an du ada tingz fi elp dem. Laik wan sista did yuuz ar taim fi shuo sumadi we did dis kom iina ar kanggrigieshan ou dem kyan tek taksi an bos an dem ting de iina di ieriya. Wa di sista du did riili elp di ada sista so dat shi kuda get yuus tu di nyuu plies we shi muuv go.
IT KYAN ELP YU FI BI WAN BETA SUMADI
Wan biebi bod mait-a fried fi kom outa dem nes an go flai, bot wans dem kom outa dem nes an go flai, dem a-go kyan flai aiya an aiya. A siem so wen sumadi muuv go iina wan nyuu kanggrigieshan, dem mait-a fiil fried fi go miit uol iip a difrant difrant breda an sista, bot wans dem staat fi taak tu di breda an sista dem iina di kanggrigieshan, dem a-go fiil laik se dem a flai ai laik da bod de an a du nof fi Jeuova. Nicolas an Céline se: “Wen sumadi muuv go a wan nyuu plies, a sitn we kyan du dem uol iip a gud. Wen wi get yuus tu di difrant difrant breda an sista dem iina di kanggrigieshan, an wi get yuus tu di ieriya we wi de, it mek wi get som nais wiez.” Jean-Charles, we wi did taak bout aredi, tel wi ou it did elp im an im fambili. Im se: “Kaa wi did afi chienj op chienj op tingz, it elp wi pikni dem fi staat du tingz iina di kanggrigieshan. So afta kopl mont, wi daata staat fi du taak iina di miitn we kip iina di wiik, an wi bwai pikni staat fi priich wid di breda an sista dem iina di kanggrigieshan.”
Wa ef yu kyaahn muuv go no we, laik fi muuv fi go du muor we dem niid elp fi du di priichin wok? Yu kyan stie siem plies wich paat yu de iina yu kanggrigieshan an du di sopm dem we wi jos luk pan. So gwaan dipen pan Jeuova fi elp yu, an du aal a wa yu kyan du iina yu kanggrigieshan. Laik fi wok wid difrant difrant breda an sista iina di priichin wok so dat yu an dem kyan ton gud fren. Ar du tingz so dat yu an yu fren dem kyan get kluosa an kluosa. An luk ef yu si nobadi iina yu kanggrigieshan we jos kom de ar sumadi we niid elp, an si wa yu kyan du fi elp dem. An memba se di Baibl mek wi nuo se a wen wi lov wi wan aneda piipl a-go kyan nuo se wi riili a fala Jiizas Krais. So wen yu du dat, it a-go elp yu fi get kluosa an kluosa tu Jeuova. (Jan 13:35) An yu kyan go nuo fi shuor se “Gad lov dem kain-a sakrifais de.”—Iib. 13:16.
Aalduo it no so iizi, nof a di breda an sista dem we muuv go a wan nyuu kanggrigieshan api, an yu kyan dwi’it an api tu. Anne-Lise se: “Wen mi did muuv fram mi kanggrigieshan, it elp mi fi get fi nuo muor a di breda an sista dem.” An Kazumi se im nuo fi shuor se “wen yu muuv go an wan neda plies, yu kyan si se Jeuova di de fi yu iina som wiez we yu neva si se im di de fi yu bifuo.” An tingk bout Jules. Im se: “Kaa mi ton fren wid difrant difrant breda an sista, it elp mi fi no fiil laik se mi no av nobadi agen. Mi fiil laik se mi a paat a di nyuu kanggrigieshan we mi muuv go iina, an nou mi wudn waahn fi lef go no we els.”
a Ef yu waahn fi nuo ou fi diil wid it wen yu lef yu yaad fi go du Jeuova wok an yu mis yu yaad bad, yu kyan luk pan di paat we niem “Coping With Homesickness in God’s Service,” we de iina di The Watchtower fi Mie 15, 1994.
