Taunimanima momo be Ioane 3:16 ena hereva idia diba bona buka momo lalonai idia torea hanai. Haida idia gwau, Baibel ai unai siri sibona be “Dirava ena lalokau taunimanima dekenai bona idia ia hamauria dalana ia herevalaia.” Unai dainai tano haida ai, nega momo taunimanima ese unai siri o inai toretore, “Ioane 3:16,” be edia hebou badadia, motuka edia stika, eiava gabu ma haida ai idia torea o gaukaralaia.

Unai hereva idia torea taudia idia laloa Dirava ena lalokau dainai idia ese mauri hanaihanai do idia abia. Oi be edena bamona? Dirava ena lalokau ese oi ia durua, a? Bona oi laloa Dirava be dahaka ia karaia, unai amo ia hahedinaraia Ia be oi ia lalokau henia?

Momo idia abia dae Dirava ese iunives, tubutubu gaudia, animal bona taunimanima ia havaraia. Unai mauri gaudia ia karaia namo herea dainai, ita gwau diba Dirava ena aonega be bada herea. Momo ese Dirava idia tanikiu henia, badina dina ta ta ai harihari gaudia idia abia. Idia diba danu idia ura henia gaudia​—hodahoda, ranu, aniani, bona tanobada durua gaudia​—be Dirava ese ia henia, unai amo taunimanima do idia mauri bona gaukara idauidau idia karaia namonamo diba.

Momokani, Dirava ita tanikiu henia be maoro, badina Ia be iseda Havaraia Tauna bona Durua Tauna. (Salamo 104:10-28; 145:15, 16; Kara 4:24) Dirava ese ita mauri  totona ia karaia gaudia ibounai ita itaia neganai, ita laloparara Dirava be ita ia lalokau henia. Aposetolo Paulo ia gwau: “[Dirava] ese taunimanima ibounai dekenai mauri, laga bona gau ibounai ia henia. Badina ia dainai ita mauri, ita loaloa bona ita noho.”​—Kara 17:25, 28.

Dirava ena lalokau be unai dala sibona amo ia hahedinaraia lasi. To, Ia ese ita ia karaia namonamo dainai ita be animal ita hereaia, Ia be ita ia matauraia, Ia do ita dibaia urana be ita ia henia, bona ita ia durua Ia ita dibaia totona. (Mataio 5:3) Unai dainai, kamonai taudia be Dirava ena “natudia,” o ena famili taudia ai idia lao diba.​—Roma 8:19-21.

Ioane 3:16 ma ia gwau, Dirava be ita ia lalokau henia bada dainai, ena Natuna Iesu be tanobada dekenai ia siaia, unai amo ena Dirava bona Tamana ena sivarai be ita ia hadibaia, bona ita totona do ia mase. To, momo idia gwau idia daradara noho dahaka dainai Iesu be taunimanima durua totona ia mase be namo bona edena dala ai Iesu ena mase ese ia hahedinaraia Dirava be ita ia lalokau henia. Baibel ese unai henanadai ia haerelaia dalana mani ita itaia.

Taunimanima ibounai be goevadae lasi dainai, idia gorere, buruka, bona mase. To matamana neganai, Iehova Dirava ena ura be unai bamona lasi. Ia ese Adamu bona Heva ia hamaoroa tanobada paradaisona ai idia mauri hanaihanai diba. To kara badana be inai: Dirava idia kamonai henia be namo. Dirava ia gwau, bema idia kamonai lasi, do idia mase. (Genese 2:17) Adamu ese Dirava ena lohia siahuna ia dadaraia dainai, ia bona ena bese idia mase. Aposetolo Paulo ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.”​—Roma 5:12.

To, Dirava be “kara maoromaoro ia ura henia.” (Salamo 37:28) Ena be Dirava ese Adamu ena kerere ia laloa maragi lasi, to ia gwau lasi Adamu ia gwau-edeede dainai, taunimanima ibounai do idia hisihisi bona mase. To, Dirava ese “mauri davana be mauri do ia henia” taravatuna ia badinaia neganai, ia be hahemaoro goevana ia karaia unai, bona dala ia kehoa, kamonai taudia ese mauri hanaihanai idia abia totona. (Esodo 21:23, BHḡ) To henanadai be inai: Edena dala ai Adamu ese ia haboioa mauri goevadaena ita abia lou diba? Haere be inai: Tau ta ese ena mauri​—Adamu ena mauri goevadaena hegeregerena​—ia henia o bouboulaia be namo.

Adamu ena bese taudia ibounai be goevadae lasi dainai, edia mauri idia henia be hegeregere lasi, to Iesu sibona be ena mauri ia henia diba. (Salamo 49:6-9) Ia vara negana amo ia be goevadae, guna Adamu bamona. Iesu ena mauri davalaia boubouna dainai, taunimanima be kara dika amo ia ruhadia. Danu dala ia kehoa, Adamu  bona Heva ese idia haboioa mauri goevadaena be edia bese ese idia abia totona. (Roma 3:23, 24; 6:23) Dahaka ita karaia be namo, Dirava ena lalokau hereadaena ena hahenamo ita abia totona?

Ioane 3:16 ma ia gwau: “[Iesu] idia abidadama henia taudia ibounai be do idia mase lasi, to mauri hanaihanai do idia abia.” Anina be, haida sibona be mauri hanaihanai do idia abia. Bema ita ura “mauri hanaihanai” ita abia, namona be Iesu ita abidadama henia bona ena hereva ita badinaia.

Reana oi henanadai: ‘Edena dala ai Iesu ena hereva lau badinaia? Iesu ia gwau, “ia idia abidadama henia taudia ibounai” be mauri hanaihanai do idia abia.’ Oibe, ita abidadama be namo. To, gau badana be ita laloatao, Baibel lalonai inai hereva, Iesu ita abidadama henia, sibona be hegeregere lasi. Bema ta ia ura Dirava ena lalonamo ia abia, vadaeni Iesu ia gwauraia ena Hahemauri Tauna be hegeregere lasi. Namona be ia gaukara goada danu Iesu ena hahediba herevadia ia badinaia totona. Bema kara ta ia karaia lasi, iena abidadama be anina lasi. Baibel ia gwau: “Abidadama mai ena kara lasi be mase gauna.” (Iamesi 2:26) Unai dainai, namona be Iesu ia abidadama henia tauna be ia karaia gaudia amo ia hahedinaraia ia be mai ena abidadama.

Paulo ia gwau: “Keriso ena lalokau ese ai ia hagoadaia, badina be hari ai diba momokani, tau tamona [Iesu] be taunimanima ibounai dainai ia mase . . . Oibe, ia be taunimanima ibounai dainai ia mase, unai amo idia mauri taudia be sibona totona do idia mauri lasi, to idia dainai ia mase bona ia toreisi lou tauna totona do idia mauri.” (2 Korinto 5:14, 15) Iesu ena mauri davalaia boubouna ita laloa bada neganai, unai ese ita do ia doria eda mauri ita haidaua, anina be, iseda ura gaudia haida do ita dadaraia bona Iesu do ita badinaia. Anina be iseda mauri lalonai Iesu ia hadibaia gaudia ita badinaia bona atoa guna. Unai ese eda laloa bada gaudia, disisen, bona ita karaia gaudia ibounai do ia haidaua. Iesu idia abidadama henia taudia be dahaka hahenamo do idia abia?

Ioane 3:16 ena hereva dokona be Dirava ena gwauhamata ia herevalaia, ia hahedinaraia Iesu ena mauri davalaia boubouna idia abidadama henia bona Dirava ena taravatu idia badinaia taudia be hahenamo do idia abia. Dirava ia ura unai bamona taudia be “do idia mase lasi, to mauri hanaihanai do idia abia.” Dirava ena lalokau ese orea rua ia durua vaira nega ai gaukara namodia idia karaia totona.

Iesu ia gwauhamata, orea ginigunana be guba ai do ia mauri hanaihanai. Ia ese ena aposetolo taudia ia hamaoroa, ia be idia totona gabu ta do ia hegaegaelaia, unai amo ia ida do idia lohia. (Ioane 14:2, 3; Filipi 3:20, 21) Mase amo idia toreisi lou bena guba idia lao taudia be “Dirava bona Keriso edia hahelaga taudia bona lagani 1,000 lalonai Keriso ida do idia lohia.”​—Apokalupo 20:6.

Keristani taudia haida sibona ese unai hahenamo do idia abia. Iesu ia gwau, “Seri maragi e, umui gari lasi, emui Tamana be umui dekenai ia moale dainai, umui dekenai Basileia do ia henia.” (Luka 12:32) Unai “seri maragi” edia namba be hida? Apokalupo 14:1, 4 ia gwau: “Vadaeni lau itaia, Mamoe Natuna [Iesu Keriso, mase amo ia toreisi lou tauna] be Siona Ororo [guba] dekenai ia gini bona ia ida be taunimanima 144,000, bona edia baguna ai iena ladana bona iena Tamana ena ladana idia noho. . . . Idia be huahua ginigunadia bamona, bona Dirava ese taunimanima huana amo ia hoidia, bona idia be Dirava bona Mamoe Natuna edia.” Unai namba bona tanobada ai idia noho taudia bilioni momo ita hahegeregerea neganai, 144,000 taudia be “seri maragi” sibona. Idia be king ai do idia lao, to daidia do idia lohiaia?

Iesu ese orea iharuana danu ia herevalaia, idia be guba Basileia amo hahenamo do idia abia. Ioane 10:16 ai Iesu ia gwau: “Lau be mai egu mamoe ma haida, idia be inai magu lalonai lasi, idia danu do lau mailaia bona idia ese egu gadona do idia kamonai, bona idia be mamoe serina tamona ai do idia lao, bona mamoe naria tauna be  tamona.” Unai “mamoe” idia moale badina vaira negana ai tanobada ai mauri hanaihanai do idia abia​—matamanai Adamu bona Heva ese idia moalelaia gauna hegeregerena. Edena dala ai ita diba idia be tanobada ai do idia mauri?

Nega momo Baibel be tanobada paradaisona ia herevalaia. Unai oi diba totona, emu Baibel ai inai siri oi duahia: Salamo 37:9-11; 46:8, 9; 72:7, 8, 16; Isaia 35:5, 6; 65:21-23; Mataio 5:5; Ioane 5:28, 29; Apokalupo 21:4. Unai siri idia peroveta tuari, hitolo, gorere, bona mase do idia ore. Idia gwau, nega ta taunimanima namodia ese gabu namona ai idia sibona edia ruma do idia haginia, uma do idia karaia, bona natudia do idia havaraia. a Oi ura unai bamona gabu ai oi noho, a? Badina namona dainai ita abia dae, unai gwauhamata edia anina be kahirakahira do idia guguru.

Dirava ese oi bona taunimanima ibounai totona ia karaia gaudia ibounai oi laloa neganai, do oi itaia Ia be gau momo herea ia karaia vadaeni. Ia ese ita dekenai mauri, aonega, goada, bona eda mauri durua gaudia momo ia henia. To Ioane 3:16 amo ita dibaia gau hereadaena be inai: Dirava ese Iesu​—ita totona ia mase tauna​—ia siaia bona iena mauri davalaia boubouna amo dala ia kehoa hahenamo momo ita abia totona.

Paradaiso ai gorere, tuari, hitolo bona mase be lasi dainai, do oi noho namonamo mai moale bona maino danu, bona hahenamo momo do oi abia ela bona hanaihanai. Henanadai badana be inai: Oi be Dirava totona dahaka oi karaia be namo?