Koikoi ena anina be, oi diba oi gwauraia herevana be momokani lasi to oi gwauraia. Nega ta hereva koikoi oi gwauraia, a?​— a Dirava idia lalokau henia taudia haida danu be idia koikoi. Reana Baibel ai hereva koikoi ia gwauraia tauna ta ena sivarai oi diba. Iena ladana be Petero, ia be Iesu ena aposetolo taudia 12 ta. Ia koikoi ena badina mani ita itaia.

Iesu idia dogoatao bona idia guia murinai hahelaga tauna badana ena ruma dekenai idia hakaua lao. Unai be hanuaboi 12 oklok ia hanaia. Petero be hahelaga tauna ena ruma ena ariara dekenai ia vareai neganai ta ese ia itaia lasi. Lahi ena diari ai, hahelaga tauna ena hesiai kekenina ese Petero ena toana ia itaia namonamo, bena ia gwau: “Oi danu be . . . Iesu oi bamoa!” Petero ia gari dainai ia gwau: “Oi herevalaia gauna be lau diba lasi.”

Baibel ia gwau, gabeai “kekeni ma ta ese ia itaia” neganai ia gwau: ‘Inai tau be guna Iesu ia bamoa.’ Petero ese unai hereva ia gorea lou. Daudau lasi murinai, unuseniai idia gini taudia be Petero dekenai idia lao, bona idia gwau: “Momokani oi danu be idia ta.”

Petero ia gari dainai, nega ihatoina ia koikoi, ia gwau: “Unai tau lau diba lasi!” Bena kokoroku ia tai. Iesu ese Petero ia itaia, bena Petero ese Iesu ena hereva ia laloatao, hora haida gunanai Iesu ese ia hamaoroa, ia gwau: “Kokoroku ia do tai lasi neganai, oi ese nega toi lau do oi gorea.” Petero ia tai dikadika. Ia sori bada!

Oi dekenai unai ia vara danu, a?​— Reana oi be sikuli gabunai, bona oi kamonai stiuden haida be Iehova ena Witnes taudia idia herevalaia. Idia ta ia gwau: “Idia be fleg idia saluti lasi.” Ma ta ia gwau: “Idia be tuari lalonai idia vareai lasi.” Bona ma ta ia gwau: “Idia be Iesu idia abia dae lasi, badina Krismas idia moalelaia lasi.” Bena ta be oi ia nanadaia: “Oi be Iehova ena Witnes tauna ta, a?” Dahaka do oi gwau?​—

 Unai ia do vara lasi neganai, namona be oi hegaegae guna, haere maorona oi henia totona. Petero ia hegaegae lasi dainai hahetoho ia vara neganai, ia koikoi! To, gabeai ia karaia karana dainai ia sori bada, bona Dirava ese ena dika ia gwauatao.

Iesu ena hahediba tauna ta, Anania danu ia koikoi. To Dirava ese ia bona ena adavana, Sapira, edia dika ia gwauatao lasi. Sapira be ena adavana ida ia lalotamona idia koikoi totona. Dirava ese edia dika ia gwauatao lasi ena badina mani ita itaia.

Iesu be ena aposetolo taudia ia rakatania bona guba ai ia daekau, bena dina ten murinai taunimanima 3,000 bamona be Ierusalema dekenai bapatiso idia abia. Idia momo be daudau tanodia amo idia mai Pentekoste aria moalelaia totona. Iesu ena hahediba taudia ai idia lao murinai, idia ura Ierusalema ai do idia noho sisina, unai amo edia diba idia habadaia. Unai dainai Iesu ena hahediba taudia haida be edia moni idia henia unai taudia idia durua totona.

Anania bona ena adavana ese edia tano idia hoihoilaia, unai amo moni idia abia bena bapatiso taudia matamatadia idia durua. Anania ese aposetolo taudia dekenai ena heduru monina ia henia neganai, ia gwau unai be ena tano ia hoihoilaia moni ibounai. To unai be koikoi! Ia ese hehuni ai moni haida ia dogoatao! Dirava ese ia vara gauna be Petero ia hadibaia dainai, Petero ese Anania ia hamaoroa, ia gwau: “Oi be taunimanima oi koia lasi, to Dirava oi koia.” Unai negai, Anania be ia moru bena ia mase! Hora toi murinai, iena adavana ia vareai. Ia be Anania dekenai ia vara gauna ia diba lasi. Ia danu be ia koikoi dainai ia moru bena ia mase.

Unai sivarai amo ita dibaia gauna badana be inai: Hereva momokani ita gwauraia be mai anina bada! Oibe, namona be ita ibounai ese unai ita laloatao! To, ita ibounai be kerere do ita karaia. Oi moale badina Iehova ese oi ia lalokau henia bona emu dika do ia gwauatao, Petero dekenai ia karaia bamona, a?​— To laloatao, namona be hereva momokani ita gwauraia. Bona bema hereva koikoi ita gwauraia, namona be Dirava ita noia eda dika ia gwauatao totona. Petero be unai bamona ia karaia, bona Dirava ese ena dika ia gwauatao. Bema ita hekwarahi ita koikoi lasi totona, Dirava ese eda dika do ia gwauatao danu!