TANOBADA hegegemadai, kastom bona tomadiho ibounai lalonai taunimanima be idia guriguri. Sibona idia noho neganai idia guriguri; ma haida ida idia noho neganai idia guriguri, o dubu momo lalodiai idia guriguri. Idia guriguri neganai, idia gaukaralaia gaudia haida be inai: Rosary ageva, Maria o Iesu ena laulau, guriguri bukadia, o bodi maragidia dekenai guriguri herevadia idia torea.

Guriguri karana dainai taunimanima be tanobada ena mauri gaudia amo idia idau. Momokani, gau haida dekenai ita be animal ida ita hegeregere. Animal bamona, ita ese aniani, hodahoda bona ranu ita abia. Animal bamona, ita vara, ita mauri bona ita mase diba. (Hadibaia Tauna 3:19) To taunimanima sibona idia guriguri diba. Dahaka dainai?

Reana haere be auka lasi, ita guriguri be namo. Taunimanima idia ura guriguri karana amo helaga o noho hanaihanai tauna ta idia hereva henia. Baibel ese ia hahedinaraia Dirava ese ita ia karaia neganai, ita dekenai unai ura ia henia. (Hadibaia Tauna 3:11) Nega ta Iesu Keriso ia gwau: “Dirava dibaia totona idia hitolo taudia be idia moale.”​—Mataio 5:3, NW.

Taunimanima be “Dirava dibaia totona idia hitolo” dainai, edia dubu mai hairaidia dekenai hora momo lalodiai idia guriguri. Oibe, taunimanima haida be Dirava dibaia totona idia sibona o ma haida dekenai heduru idia tahua. To, oi mamia taunimanima be hegeregere lasi heduru maorona idia henia totona, a? Ita manoka bona eda mauri be kwadogi dainai, ita hegeregere lasi heduru maorona ita henia totona. To mai ena aonega bada, siahu bona ia noho hanaihanai tauna ta ese iseda ura gaudia ia henia diba. Dahaka gaudia dainai ita ura ita guriguri?

Inai oi laloa: Oi ura dikadika ta ese oi ia durua, oi dekenai aonega ia henia, o taunimanima ese idia haerelaia diba lasi henanadai oi dibaia, a? Emu lalokau tauna ta ena mase oi lalohisihisilaia neganai, oi ura ta ese oi ia hagoadaia, a? Abia hidi ta dainai oi lalohisihisi neganai, oi ura ta ese oi ia durua, a? Eiava kerere badana ta oi karaia neganai, oi ura ta ese emu dika ia gwauatao, a?

Baibel ia gwau, unai badina idauidau dainai ita guriguri. Baibel ese guriguri karana ia herevalaia namonamo, bona ia lalonai abidadama tatau bona hahine momo ese idia gwauraia guriguri idia noho. Unai taudia be goada, heduru, dika gwauatao karana bona taunimanima ese idia haerelaia diba lasi henanadai edia haere abia totona idia guriguri.​—Salamo 23:3; 71:21; Daniela 9:4, 5, 19; Habakuku 1:3.

Ena be unai guriguri be idauidau, to dala ta ai idia be hegeregere. Unai abidadama taudia be mai anina bada gauna ta idia dibaia, idia diba daika idia guriguri henia be namo. To hari inai negai taunimanima momo be unai idia diba lasi.