“Dirava be Daudau Lasi Ita Ta Ta Dekenai”
Dirava Kahirakahira Oi Lao
“Dirava be Daudau Lasi Ita Ta Ta Dekenai”
UNIVES ibounai lalonai taunimanima be maragi herea. Reana oi laloa, ‘Taunimanima be Siahu Ibounai Diravana idia hetura henia momokani diba, a?’ Unai bamona ia vara diba, bema Iehova Dirava ia ura Ia kahirakahira ita lao. Oi laloa Iehova ia ura Ia kahirakahira ita lao, a? Unai henanadai ena haere be aposetolo Paulo ese Atena ena diba bada taudia dekenai ia gwauraia herevana amo ita abia, unai hereva be Kara 17:24-27 ai ia noho. Paulo be Iehova ia herevalaia neganai, gau foa ia herevalaia.
Ginigunana be, Paulo ia gwau, Dirava ese “tanobada bona ena lalonai noho gaudia ibounai ia karaia.” (Kara karoa 17 Siri 24) Mauri gaudia be idauidau bona mai edia hairai dainai, mauri ita moalelaia diba. Unai ese iseda Havaraia Tauna ena diba bona lalokau ia hahedinaraia. (Roma 1:20) Bema ita laloa, aonega bona lalokau bada Diravana be ia lalokau henia taudia amo ia daudau, vadaeni unai be kavakava lalohadaina.
Iharuana be, Iehova ese “mauri bona laga bona gau ibounai ia henia noho taunimanima dekenai.” (Kara karoa 17 Siri 25) Iehova be mauri ibounai ena badina. (Salamo 36:9) Iseda mauri idia durua gaudia hegeregere, hodahoda, ranu, bona aniani be iseda Havaraia Tauna ena amo idia mai harihari gaudia. (Iamesi 1:17) Bema ita laloa iseda hariharibada Diravana be ia ura lasi sibona ia hahedinaraia Ia be daika bona ia ura lasi ia kahirakahira ita lao, unai be lalohadai maorona, a?
Ihatoina be, Dirava ese “rara tamona dekenai ia ese taunimanima bese ibounai ia karaia.” (Kara karoa 17 Siri 26) Iehova be kopi o gabu idauidau taudia ia laloa bada bona ia inai henidia kava lasi. (Kara 10:34) Dahaka dainai ia be unai bamona ia karaia? Badina Ia ese “tau tamona” Adamu amo bese bona kopi idauidau taudia ia havaraia. “Dirava ia ura taunimanima ibounai ese mauri do idia davaria.” (1 Timoteo 2:4) Unai dainai, ena be ita be kopi o gabu idauidau taudia, to dala ia noho Iehova kahirakahira ita lao totona.
Bona namba foa be, Paulo be inai hereva momokanina ia gwauraia: Iehova be “daudau lasi ita ta ta dekenai.” (Kara karoa 17 Siri 27) Ena be Iehova be atai herea momokani ia noho, to mai momokani ida Ia kahirakahira idia ura lao taudia dekenai Ia be daudau lasi. Paulo ena hereva ese ita ia hagoadaia, ia gwau: “Lohiabada be ia dekenai idia boiboi taudia dekenai ia noho.”—Salamo 145:18.
Paulo ena hereva amo ia hahedinaraia goevagoeva Dirava ia ura ia kahirakahira ita lao. To, ma ia gwau, Iehova be ia idia “tahua noho” taudia kahirakahira ia noho. (Kara karoa 17 Siri 27) Baibel hahanaia taudia edia buka ta ia gwau, unai hereva ese ia hahedinaraia ita be Dirava kahirakahira ita lao diba. Haheitalai ta be inai: Oiemu daiutu ia dibura neganai, swits be edeseni ia noho eiava daiutu ena iduara oi diba dainai, do oi tahua bona oi davaria. Unai hegeregerena, bema Dirava ita tahua noho, ita diba momokani iseda hekwarahi ena anina do ia vara. Paulo ese ita ia hagoadaia, ita be Iehova “do ita davaria.”—Kara karoa 17 Siri 27.
Oi ura dikadika Dirava kahirakahira oi lao, a? Bema mai emu abidadama ida Dirava do ‘oi tahua noho,’ do oi moale. Iehova be ita kahirakahira ia noho, badina Ia “be daudau lasi ita ta ta dekenai.”