LAGANI 1931 ena siahu negana ai, Paris ena ruma badana ladana Pleyel be tano idauidau 23 amo idia mai vadivadi taudia ese idia hahonua. Idia ibounai be dabua namodia idia hahedokilaia bona teksi motuka amo idia mai. Daudau lasi murinai, taunimanima 3,000 bamona ese unai ruma idia hahonua. Idia be Joseph F. Rutherford ena hereva kamonai totona idia mai. Unai nega ai, Tadikaka Rutherford be iseda haroro gaukara ia gunalaia. Iena tok be French, German, bona Polish gado ai idia hahanaia. Iena gadona be bada dainai, ibounai ese idia kamonai.

Unai hebouhebou dainai, France ai Basileia harorolaia gaukarana ia bada. Tadikaka Rutherford ese tano idauidau amo idia mai taudia, Keristani matamata taudia unai, ia hagoadaia France ai kolpota eiava painia gaukara idia karaia totona. England amo ia mai tadikaka, John Cooke, ese inai hereva ia laloaboio diba lasi: “Umui matamata taudia e, namo lasi gau ta ese umui ia koua, painia gaukara umui karaia totona!” *

John Cooke be gabeai misinari tauna ai ia lao. Bona momo ese Makedonia amo ia mai boiboi herevana idia abia dae danu. (Kara 16:9, 10) Oibe, lagani 1930 ai, France ai painia taudia be 27 sibona, to lagani 1931 ai, unai namba ia bada daekau 104. Lagani tamona sibona lalonai unai ia vara. Unai painia ginigunadia be French gado idia diba lasi dainai, edena bamona ma haida ida idia herevahereva diba?

Idau tano amo idia mai painia taudia be haroro kadi amo Basileia helarona be ma haida dekenai idia herevalaia. Mai gari lasi ida Paris ai ia haroro Germany tadikakana ia gwau: “Ai diba emai Dirava ena siahu be bada. To ai haroro lalonai, emai kudouna be ia pidipidi haragaharaga. Taunimanima ai gari henia dainai lasi, to dika inai hereva kwadogi ai gwauraia kerere: ‘Voulez-vous lire cette carte, s’il vous plaît? [Ia namo inai kadi oi duahia?]’ Ai diba emai gaukara be mai anina bada.”

Ruma latadia dekenai idia haroro neganai, gabu naria taudia ese painia taudia idia lulua. Nega ta French gado idia diba sisina England taihu rua be gabu naria tauna ta idia davaria, bona ia be mai badu ida ia hereva. Ia hamanaua totona, taihu ta be iduara ai hereva ta ia itaia, ia gwau: “Tournez le bouton [Gaba oi botaia].”  Taihu ia laloa unai be ruma tauna ena ladana dainai, mai moale ida ia gwau: “Ai mai ‘Tournez le bouton’ ai itaia totona.” Unai bamona ekspiriens ese idia ia durua edia gaukara idia moalelaia totona!

Lagani 1930 lalodiai, France ai momo be idia ogogami, bona idau tano amo idia mai painia taudia be unai idia mamia danu. English gado ia diba taihu, Mona Brzoska, ia gwau: “Ai noholaia rumadia be namo momokani lasi, unai dainai keru neganai, ruma ena lalona be ia keru bada. Daba ibounai ranu be ia aisi dainai, ai ura digu neganai, aisi ai makohia bena emai vairana ai huria.” Unai bamona noho dalana dainai idia lalohisihisi, a? Lasi momokani! Idia ta ia gwau: “Aiemai kohu be lasi, to ai dabu lasi.”—Mat. 6:33.

Inai painia taudia be sibona noho karana idia haheaukalaia danu. Lagani 1930 lalodiai, France ai, Basileia harorolaia pablisa taudia be 700 sibona, bona idia momo be gabu idauidau dekenai idia noho. Dahaka ese unai painia taudia ia hamoalea? Taihu ladana Mona ia gwau: “Sibona noho karana ena hemami ai dadaraia totona, nega ibounai orea ena buka bona magasin ai stadilaia hebou. Badina unai nega ai, lou henia eiava Baibel stadi ai karadia lasi. Unai dainai adorahi kahanai, ai be mai emai nega emai famili bona painia turadia ma haida ai tore henia totona, unai amo ta ta emai ekspiriens ai herevalaia diba bona ai hagoadaia heheni.”—1 Tes. 5:11.

Ena be hekwakwanai idia davaria, to unai painia taudia be idia moale. Brens ofesi dekenai idia siaia revarevadia ese unai ia hahedinaraia. Lagani 1931 ia lao lagani 1935 lalonai, horoa taihuna, Annie Cregeen, bona ena adavana be France ena gabu idauidau dekenai idia loaloa. Ia gwau: “Unai negadia ai moalelaia bada! Ai painia taudia be ai gaukara hebou namonamo. Aposetolo Paulo ia hereva bamona, ‘Lau ese uhe lau hadoa, Apolo ese ia dairia, to Dirava ese ia hatubua noho.’ Lagani momo lalonai unai gaukara ai karaia taudia dekenai unai be moale negana.”—1 Kor. 3:6.

Unai painia taudia ginigunadia be mai haheauka ida edia haroro gaukara idia karaia goadagoada. Edia haroro gaukara idia ura habadaia taudia dekenai idia be haheitalai namona. Hari, France dekenai regula painia taudia ibounai be 14,000. Idia momo be idau gado taudia edia grup o kongrigeisen dekenai idia noho. * Oibe, idia danu be gau ta ese ia koudia lasi!—Orea ena histori France amo.