Aposetolo edia negai ia noho histori torea tauna, Flavius Josephus ese ena buka ta (Jewish Antiquities, Volium 10) lalonai, Iamesi ena mase ia herevalaia ia gwau “Iamesi be Iesu, idia gwauraia ia be Keriso, ena tadina.” Diba bada taudia momo idia gwau unai hereva be momokani. To, ma haida be Josephus ese unai buka lalonai ia torea herevana ma ta idia abia dae lasi. Unai hereva ena ladana be Testimonium Flavianum, bona ia gwau:

“Unai nega ai Iesu, aonega bona hoa karadia momo ia karaia tauna​—⁠bema maoro ia ita gwauraia diba tau ta​—⁠be momo ese iena hahediba hereva momokanidia idia kamonai bona moalelaia. Iuda taudia bona Idau Bese taudia momo be iena murinai idia raka. Ia be Keriso; bona gunalaia taudia edia hereva dainai Pilato ese korosi ai ia hamasea, to iena murinai idia raka taudia ginigunadia ese ia idia rakatania lasi, badina dina namba 3 ai idia dekenai ia hedinarai lou, peroveta taudia ese unai bona Keriso totona do idia guguru gaudia 10,000 idia perovetalaia hegeregerena; bona Keristani taudia, iena ladana idia abia taudia unai, be unai nega amo idia noho ema bona hari.”​—⁠Josephus​—⁠The Complete Works, William Whiston ese ia hahanaia.

Lagani 1500 ena dokona amo ema bona hari, unai hereva dainai hepapahuahu badana ta ia vara. Haida idia gwau Josephus ese unai hereva ia torea, to ma haida idia gwau ia ese ia torea lasi. France ena histori bona buka momo ia torea tauna ladana, Serge Bardet be ia hekwarahi bada unai hepapahuahu ia hamaoromaoroa totona. Ena tahua gaukara ai ia davaria gaudia be buka ta ladana, Le Testimonium Flavianum​—⁠Examen historique considérations historiographiques (The Testimonium Flavianum​—⁠A Historical Study With Historical Considerations) lalonai ia torea.

Josephus be Keristani tauna lasi; ia be Iuda taudia edia histori ia torea tauna. Unai dainai, ena buka lalonai Iesu ia gwauraia “ia be Keriso” neganai, unai ese hepapahuahu ia havaraia. Bardet ena tahua gaukara amo ia davaria Grik gado ai inai hereva ton (ia be) be taunimanima edia ladana vairanai idia torea, bona Josephus be unai dala ia badinaia. Bardet ma ia gwau, “Josephus ese inai hereva Christos (Keriso) ia gaukaralaia be kerere lasi,” bona danu unai ese ia hamomokania Iesu be guna ia noho momokani. Danu ia gwau, Josephus ena “toretore idia hepapahuahulaia taudia be idia kerere, badina idia abia dae lasi Iesu be guna ia noho momokani.”

Josephus ia mase murinai, koikoi tauna ta ese iena toretore dekenai, hereva ma haida ia torea, a? Bardet be unai toretore bona guna gaudia ma haida ia stadilaia murinai, ia gwau ta be unai bamona ia karaia diba lasi. Bema koikoi tauna ta ia noho, ia ese Josephus ena toretore dalana ia tohotohoa diba lasi, badina Josephus ena sitailo be idau momokani.

Vadaeni, dahaka dainai momo ese Josephus ena toretore idia hepapahuahulaia? Bardet ese unai hepapahuahu ia vara ena badina be inai bamona ia herevalaia: “Haida be toretore gunadia momo idia abia dae. To, Testimonium idia abia dae lasi, badina momo be unai hereva idia daradaralaia.” Ma ia gwau, lagani handred momo lalonai diba bada taudia haida ese Testimonium idia abia dae lasi, badina “idia ura lasi abia dae, Iesu be Keriso.” Unai dainai, tahua gaukara idia karaia namonamo lasi, to hepapahuahu idia havaraia kava.

Ita diba lasi, bema Bardet ia davaria gaudia ese Testimonium Flavianum herevana idia abia dae lasi taudia edia lalohadai ia haidaua o lasi. To, Bardet ena hereva ese Pierre Geoltrain ena lalohadai ia haidaua. Geoltrain be Grik basileia ia lohia negana ai ia noho Iuda tomadiho bona Keristani taudia edia histori ia stadilaia tauna badana. Nega daudau lalonai Geoltrain ia gwau, koikoi tauna ta ese Josephus ena toretore lalonai hereva ma haida ia torea, bona Josephus ena hereva idia abia dae taudia ia kirikirilaia. To gabeai, Bardet ena buka ia duahia murinai, ena lalohadai ia haidaua. Hari Geoltrain ia gwau, ‘namo lasi ta ia gwau unai toretore be Josephus ese ia torea lasi.’

Iehova ena Witnes taudia be badina namona dainai idia abia dae momokani, Iesu be Keriso, badina Baibel ese unai ia hamomokania.​—⁠2 Tim. 3:16.