Duahia Taudia Edia Henanadai

Levitiko 3:​17 ai inai Taravatu herevana ia gwau, “Israela taudia ese digara do idia ania lasi momokani,” to Nehemia 8:​10, (BHğ) ia gwau, “digara do umui ania”​—⁠Edena dala ai unai hereva rua be hegeregere?

Heberu gado ai Nehemia 8:​10 bona Levitiko 3:​17 dekenai idia gaukaralaia herevadia idia hahanaia, “digara” edia anina be idauidau. Levitiko 3:​17 dekenai, Heberu gado herevana cheʹlev, idia hahanaia “digara” be animal edia digara eiava taunimanima edia tauanina ena bada ia herevalaia. (Lev. 3:3; Gun. 3:​22) Levitiko karoa 3 Siri 17 ena badina siridia ese idia hahedinaraia Israela taudia be animal ena bogarauna ena digara ibounai, nadinadi ibounai mai edia digara, bona mamuna ena digara do idia ania lasi badina “digara ibounai be Lohiabada ena.” (Lev. 3:​14-​16) Unai ese ia hahedinaraia Iehova dekenai do idia bouboulaia animal ena digara be do idia ania lasi.

To, Nehemia 8:​10 dekenai Heberu gado herevana mash·man·nimʹ  idia gaukaralaia bona ena anina danu be “digara.” Heberu Revarevadia ai mash·man·nimʹ  be nega tamona sibona idia gaukaralaia. Mash·man·nimʹ  be inai hereva sha·menʹ  amo idia abia bona sha·menʹ  ena anina be “tauanina ia bada ia lao.” Sha·menʹ  amo idia abia herevadia momo edia anina be taunimanima edia noho ia namo bona idia moale. (Isaia 25:6 hahegeregerea.) sha·menʹ, amo ia mai herevana ta be sheʹmen bona ena anina be “dehoro” o “olive au huahua ena dehoro.” (Deu. 8:8; Lev. 24:⁠2) Nehemia 8:​10 dekenai idia gaukaralaia herevana, mash·man·nimʹ  be dehoro amo idia nadua aniani mai ena vamu sisina ia herevalaia, to ia be animal ena digara ia herevalaia lasi.

Ena be Israela taudia ese animal edia digara idia ania be taravatu, to idia be dehoro o olive dehoro ida idia nadua aniani idia ania diba. Aniani haida hegeregere, uiti amo idia karaia keke be animal edia digara ida idia gabua lasi, to dehoro eiava olive dehoro ida idia gabua. (Lev. 2:⁠7) Unai dainai, Insight on the Scriptures ese “digara” ena anina ia herevalaia neganai, ia gwau unai be “aniani digaradia, aniani kaukaudia lasi, to dehoro ida idia nadua aniani digaradia mai edia mamina namona.”

Hari inai negai Keristani taudia idia laloparara animal ena digara ania lasi karana be Mose ena Taravatu ta. To, Keristani taudia be Mose ena Taravatu henunai lasi. Unai dainai, idia be animal bona edia digara bouboulaia eiava ena taravatu ma haida idia badinaia lasi.​​—⁠Roma 3:​20; 7:​4, 6; 10:4; Kol. 2:​16, 17.