Iehova Ena Hereva be Ia Mauri Noho

Mareko Bukana Ena Hereva Badadia

EVANELIA bukana Mareko be buka kwadogina, to Evanelia bukadia ma haida be lata. Iesu ia mase, ia toreisi lou, bena lagani 30 idia ore murinai Ioane Mareko ese inai buka ia torea. Mareko ese Iesu be lagani toi mai kahana lalonai ia karaia haroro gaukara ena sivarai ia torea.

Mareko bukana be Iuda lasi taudia, hegeregere Roma taudia totona ia torea. Unai buka ese ia hahedinaraia Iesu be Dirava ena Natuna, hoa karadia ia karaia, bona haroro gaukara ia karaia goadagoada. Mareko bukana ese Iesu ia karaia gaudia ia herevalaia momo, to ena hadibaia herevadia momo ia torea lasi. Inai Evanelia bukana ese iseda abidadama Mesia dekenai ia hagoadaia bona ita ia durua Dirava ena hereva ita harorolaia goadagoada totona.​​—Heb. 4:​12.

HARORO GAUKARA GALILEA DEKENAI

(Mareko 1:1–​9:​50)

Mareko karoa 1:​1-​14 lalonai, Mareko ese Ioane Bapatiso ena gaukara bona dina 40 Iesu be taunimanima idia noho lasi gabuna dekenai ia noho sivaraina ia torea. Unai murinai, Iesu be Galilea dekenai ia haroro sivaraina ia torea. Mareko bukana lalonai idia torea herevana, “nega tamona” ese duahia tauna dekenai karaharaga lalohadaina ia henia.​​—Mar. 1:​10, 12.

Lagani toi lalodiai, Iesu be nega toi Galilea dekenai ia haroro. Mareko ese idia vara gaudia be edia nega edia nega hegeregerena ai ia torea. Iesu ena haroro hereva latadia haida, hegeregere Ororo Haroro herevana danu be ia torea lasi.

Baibel Henanadaidia Edia Haere:

1:​15​​—“Dirava ena nega” ena anina be dahaka bona edena negai ia guguru? Unai hereva amo, Iesu ia hahedinaraia nega ia ginidae iena haroro gaukara ia hamatamaia totona. Iesu be Dirava ese ia abia hidi King bona unai negai ia noho dainai, ia hahedinaraia Dirava ena Basileia be ia kahirakahira. Kudou-maoro taudia be iena haroro herevadia idia kamonai bona Iehova idia hamoalea totona, edia mauri idia haidaua diba.

1:​44; 3:​12; 7:​36​​—Dahaka dainai Iesu ia ura lasi ia karaia hoa karadia idia gwauraia loaloa? Iesu ia ura lasi taunimanima edia lalona veria totona, ma haida be ia ese ia karaia hoa karadia idia gwauraia loaloa. Ia ura taunimanima be sibodia unai hoa karadia do idia itaia bona idia hamomokania ia be Keriso. (Isa. 42:​1-4; Mat. 8:4; 9:​30; 12:​15-​21; 16:20; Luka 5:​14) To, Gerasa hanua dekenai guna demoni ese ia abia tauna ia hanamoa neganai, ia hamaoroa do ia giroa lao ena hanua dekenai bona iena varavara ibounai do ia hamaoroa. Gerasa taudia ese Iesu idia noia edia hanua do ia rakatania dainai, Iesu ese unai taudia ia haroro henidia diba lasi. Taunimanima ese Iesu ia hanamoa tauna idia itaia bona iena hereva idia kamonai neganai, boroma idia mase dainai do idia badu lasi.​​—Mar. 5:​1-​20; Luka 8:​26-​39.

2:​28​​—Dahaka dainai Iesu idia gwauraia “Sabati ena biaguna”? Paulo ia gwau: “Taravatu be dohore idia vara gau namodia edia laulau.” (Heb. 10:1) Mose ena taravatu ia hahedinaraia hegeregerena, Sabati be gaukara dinadia 6 murinai idia hahelagaia dinana. Iesu be Sabati dinana ai hoa karadia momo ia karaia. Unai ese ia hahedinaraia Keriso ena lohia negana lagani 1,000 lalonai, taunimanima be maino bona hahenamo momo do idia davaria. Unai bamona do ia vara badina Satani ena lohia dalana dikana be do ia ore vadaeni. Unai dainai, unai Basileia ena King idia gwauraia “Sabati ena biaguna.”​​—Mat. 12:8; Luka 6:5.

3:5; 7:​34; 8:​12​​—Mareko be edena bamona Iesu ena hemami ia diba? Mareko be Iesu ena aposetolo tauna ta lasi bona hanaihanai Iesu ia bamoa lasi. To, sivarai gunadia ese idia hahedinaraia Mareko be aposetolo Petero ena turana namona,  bona Petero amo Iesu ena sivarai momo ia kamonai.​​—1 Pet. 5:​13.

6:​51, 52​​—Dahaka dainai Iesu ia gwau ena hahediba taudia be “paraoa hoa kara idia itaia, to ena anina idia diba namonamo lasi”? Hora haida gunanai, Iesu ese paraoa faiv bona gwarume rua amo tatau 5,000 bona hahine bona natudia ia ubua. Iesu ena hahediba taudia be “paraoa hoa kara” idia itaia, to idia laloparara lasi Iehova Dirava ese Iesu dekenai siahu ia henia unai hoa karadia ia karaia totona. (Mar. 6:​41-​44) Iesu be davara latanai ia raka neganai idia hoa bada herea, badina idia do laloparara lasi Iesu be mai ena siahu bada.

8:​22-​26​​—Dahaka dainai Iesu ese matakepulu tauna ena matana be metairametaira ia hanamoa? Iesu be unai tauna ia laloa bada dainai, unai bamona ia karaia. Ia matakepulu tauna ena matana be dina ena diari dekenai ia manada lasi dainai, Iesu ese ena matana be metairametaira ia hanamoa karana ese ia durua, diari sisina ia itaia ela bona ena matana be diari ia itaia karana dekenai ia manada lou.

Ita Dibaia Gaudia:

2:​18; 7:​11; 12:18; 13:3. Mareko be idau bese taudia ese idia diba lasi Iuda taudia edia hahediba herevadia, kastom bona gabu idauidau ia gwauraia hedinarai, unai amo duahia tauna ia laloparara diba. Ia hahedinaraia Farisea taudia be “aniani lasi taravatu idia karaia,” Kobana anina be gau ta be ‘Dirava dekenai idia atoa vadaeni,’ Sadukea taudia idia gwau “mase taudia do idia toreisi lou lasi” bona “Olive Ororona” be “Dubu Helaga kahanai.” Iuda taudia sibona ese Mesia ena bese taudia ladadia idia laloa bada dainai, Mareko be unai ia torea lasi. Mareko be haheitalai namona ia hahedinaraia ita dekenai. Haroro gaukara ita karaia o kongrigeisen lalonai tok ita henia neganai, namona be iseda kamonai taudia ita laloa.

3:​21. Iesu ena varavara be hereva momokani idia abia dae lasi. Unai dainai, bema Witnes ruma bese taudia be edia murimuri varavara ese idia dagedage eiava hevaseha henidia, Iesu be edia hekwakwanai ia diba.

3:​31-​35. Iesu be bapatiso ia abia neganai, Dirava ena Natuna ai ia lao bona ‘guba dekenai ia noho Ierusalema’ be iena sinana ai ia lao. (Gal. 4:​26) Unai nega amo, Iesu be iena hahediba taudia ia ura henia bona ia bamoa momo, to iena varavara korikori taudia ia bamoa lasi. Unai ese ita ia hadibaia namona be iseda mauri lalonai, Dirava tomadiho henia karadia ita laloa guna.​​—Mat. 12:​46-​50; Luka 8:​19-​21.

8:​32-​34. Bema ita itaia, ma haida be dala kererena ai hebogahisi idia hahedinaraia ita dekenai, namona be ita dadaraia. Keriso ena murinai ia raka tauna be sibona ena ura do ia laloa lasi, bona ia ura karaia gaudia do ia dadaraia. Mai ena ura ida “satauro do ia huaia”​​—anina be ia be Keristani tauna dainai, do idia hevaseha henia, idia dagedage henia bona idia hamasea. Bona Iesu “murina dekenai do ia raka” noho, anina be Iesu ena mauri do ia badinaia. Hahediba tauna ai ita  lao anina be sibona iseda ura do ita dadaraia, Iesu ia karaia hegeregerena.​​—Mat. 16:​21-​25; Luka 9:​22, 23.

9:​24. Namona be ita hemarai lasi, to ma haida dekenai iseda abidadama ita gwauraia hedinarai, bona ita guriguri Dirava ese iseda abidadama ia habadaia totona.​​—Luka 17:5.

HUA GINIGABENA

(Mareko 10:1–​16:8)

Lagani 32 C.E. dokonai, “Iesu ia toreisi, ia lao Iudea kahanai, bona Ioridane Sinavai unai kahanai” bona hutuma be ia dekenai idia lao. (Mar. 10:1) Unuseniai ia haroro murinai, Ierusalema dekenai ia lao.

Nisan 8 ai, Iesu be Betania dekenai ia noho. Ia aniani noho lalonai, hahine ta ia mai bona bonana namo dehoro ia bubua Iesu ena kwarana dekenai. Iesu be doniki latanai ia helai bona Ierusalema hanua dekenai ia vareai negana amo ia lao bona mase amo ia toreisi lou edia sivarai be idia vara edia nega edia nega hegeregerena ai ia torea.

Baibel Henanadaidia Edia Haere:

10:​17, 18​​—Dahaka dainai tau ta be Iesu ia boiria “Hadibaia Tauna Namona” neganai, Iesu ese ena lalohadai ia hamaoromaoroa? Iesu ia ura lasi unai ladana namona ia abia dae, bona ia hahedinaraia namona be Iehova sibona ita hanamoa badina gau namodia ibounai be Ia amo ita abia. To, Iesu be mai anina bada gauna ta ia hahedinaraia, Iehova Dirava, gau ibounai ia Havaraia Tauna sibona ese dahaka be namo bona dahaka be dika ia gwauraia hidi diba.​​—Mat. 19:​16, 17; Luka 18:​18, 19.

14:25​​—Dahaka dainai Iesu ese iena aposetolo taudia ia hamaoroa: “Lau ese uaina do lau inua lou lasi, ela bona Dirava ena Basileia lalonai uaina matamata do lau inua”? Iesu ia gwau lasi guba dekenai uaina korikori ia noho. To, uaina ese moale ia laulaulaia, unai dainai Iesu ena hereva ena anina be ia bona idia toreisi lou horoa taudia be guba Basileia lalonai idia hedavari lou neganai, do idia moale bada.​​—Sal. 104:15; Mat. 26:29.

14:​51, 52​​—“Kopina kavakava ia heau” uhau tauna be daika? Evanelia bukadia lalonai Mareko sibona be unai sivarai ia torea dainai, ita gwau diba unai be ia sibona ia gwauraia.

15:34​​—Iesu ena abidadama ia manoka dainai ia gwau, “Lauegu Dirava e, lauegu Dirava e, dahaka dainai oi rakatania lau,” a? Lasi. Ita diba lasi dahaka dainai Iesu be unai bamona ia hereva. To, iena hereva ese ia hahedinaraia, ia laloparara iena Tamana ese ia amo ena henari siahuna ia kokia. Unai amo Iesu do ia hahedinaraia ena abidadama Dirava dekenai be ia goada momokani. Danu, reana Iesu be unai bamona ia hereva badina ia ura Salamo 22:1 ena peroveta herevana ia totona do ia hagugurua.​​—Mat. 27:46.

Ita Dibaia Gaudia:

10:​6-9. Dirava ena ura be headava taudia be do idia noho hebou ela bona idia mase. Unai dainai, namo lasi hekwakwanai idia vara neganai, karaharaga headava idia hadokoa. To, namona be tau bona hahine ese Baibel ena hakaua herevadia idia badinaia, edia hekwakwanai do idia hamaoromaoroa totona.​​—Mat. 19:​4-6.

12:​41-​44. Vabu burukana ena haheitalai ese ita ia hadibaia namona be ita sibona ita laloa lasi, to iseda moni ita henia Dirava tomadiho henia gaukarana ita durua totona.

[Picture on page 29]

Dahaka dainai Iesu ese inai tauna ia hamaoroa ia dekenai idia vara gaudia ibounai be ena varavara dekenai do ia herevalaia?