OI BE idaunegai peroveta taudia edia kara oi tohotohoa, a? New World Translation Baibel matamata ena “Glossary of Bible Terms” ese peroveta tauna be inai bamona ia herevalaia: “Ia amo Dirava ese ena ura ia hahedinaraia. Peroveta taudia be Dirava ena gwaukau taudia bamona, idia ese vaira negai do idia vara gaudia idia gwauraia sibona lasi, to Iehova ena hahediba herevadia, taravatu, bona hahemaoro herevadia danu idia gwauraia.” Ma haida dekenai Baibel ena hereva oi gwauraia neganai, oi be Dirava totona oi hereva, to oi peroveta lasi.​—Mat. 24:14.

Iseda Dirava, Iehova, bona ena ura be ma haida dekenai ita herevalaia be hahenamo badana! Ita be guba ai idia roho “aneru” ida ita gaukara. (Apok. 14:6) To, ita davaria hahetoho idauidau dainai, iseda hahenamo namona ita haboioa diba. Unai hahetoho haida be dahaka? Reana ita hesiku bada, lalomanoka, eiava ita laloa ita be anina lasi. Idaunegai abidadama peroveta taudia danu be unai bamona idia mamia, to idia hesiku lasi. Bona Iehova ese idia ia durua edia hesiai gaukara idia hagugurua totona. Mani haheitalai haida ita itaia, bona idia ita tohotohoa dalana ita herevalaia.

Dina ta ta ai ita karaia gaukara idauidau dainai, reana do ita hesiku ita haroro totona. Momokani, ita laga-ani be namo, Iesu bona ena aposetolo taudia bamona. (Mar. 6:31) To mani Esekiela ita laloa, ia be Babulonia ai ia noho bona Ierusalema amo idia abia mauri Israela taudia ia durua. Nega ta Dirava ese Esekiela ia hamaoroa biriki do ia abia bona iena latanai Ierusalema hanua ena laulau do ia koroa. Bena dina 390 lalonai unai hanua ena lauri kahanai do ia hekure bona dina 40 lalonai iena idiba kahanai do ia hekure, hegeregere unai hanua be taunimanima ese idia koua hagegea bona idia tuari henia. Iehova ese Esekiela  ia hamaoroa: “Lau ese varo dekenai oi do lau guia, vadaeni oi be oiemu hekure dekenai do oi giroa diba lasi, ela bona oi ese inai piksa gaukara oi haorea.” (Ese. 4:1-8) Reana unai ese idia abia mauri Israela taudia edia lalona ia veria. Badina lagani ta mai kahana lalonai, Esekiela be unai bamona do ia karaia. Edena dala ai unai peroveta tauna ese ia abia gaukarana do ia hagugurua?

Esekiela be peroveta tauna bona ia abia maduna ia lalopararalaia. Dirava ese Esekiela ia siaia neganai, ia hamaoroa: “Sedira unai [Israela] taudia ese oi dekenai do idia kamonai, o oi do idia kamonai lasi. To idia be do idia diba momokani, peroveta tauna ta be idia edia huanai ia mai vadaeni.” (Ese. 2:5) Esekiela be ia idia siaia ena badina ia laloa. Unai dainai mai ura ida ia koroa laulauna badinai ia hekure. Unai amo ia hahedinaraia ia be peroveta tauna momokanina. Ia bona Israela taudia be inai idia kamonai: “Hanua be ia moru vadaeni, idia halusia vadaeni.” Oibe, Israela taudia idia laloparara, peroveta tauna ta be idia ida ia noho.​—⁠Ese. 33:21, 33.

Hari inai negai, ita ese taunimanima dekenai Dirava ese Satani ena tanobada do ia hadikaia ore negana ita herevalaia. Ena be iseda tauanina ia hesiku, to iseda goada ita gaukaralaia Dirava ena Hereva ita harorolaia, lou henia ita karaia bona Baibel stadi ita karaia. Dina gabedia edia peroveta herevadia idia guguru noho dainai, ita moale badina ita amo “Dirava ese ena ura ia hahedinaraia.”

Iehova ena lauma ese ita ia durua dainai, ita gaukara goadagoada. To nega haida ita lalomanoka diba, badina taunimanima idia ura lasi iseda hereva idia kamonai. Unai bamona negadiai, namona be peroveta tauna Ieremia ita laloa. Ia ese Dirava ena sivarai be Israela taudia dekenai ia gwauraia neganai, ia idia hevasehalaia bona idia gwauraia dika. Unai dainai Ieremia ia gwau: “Lau ese Lohiabada do lau laloaboio, bona iena ladana dekenai do lau hereva lasi.” Ieremia be ita hegeregerena mai ena hemami. To, Dirava ena sivarai ia gwauraia noho. Dahaka dainai? Ieremia ia gwau: “Unai neganai oiemu hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea, to lau koua hegeregere lasi.”​—Ier. 20:7-9.

Unai hegeregerena, bema taunimanima ese sivarai namona idia kamonai lasi, ita lalomanoka diba, to namona be ita harorolaia sivaraina ita laloa dobu. Ia be ‘lahi bamona, iseda lalona ia gabua noho, ela bona iseda turiana dekenai.’ Dina ta ta ai Baibel ita duahia neganai, iseda lalonai unai lahi do ia ara noho.

Keristani taudia haida be idia diba lasi gaukarana idia abia neganai, reana idia laloa momo. Peroveta tauna Hosea be reana unai bamona ia mamia. Iehova ese ia hamaoroa: “Oi lao, ariara hahine ta do oi adavaia, bona ariara natudia do oi havaraia.” (Hos. 1:2) Mani oi laloa, bema oi ura headava, to Dirava be oi ia hamaoroa ariara hahinena do oi adavaia, emu hemami be edena bamona? Hosea be unai ia abia dae. Ia ese Gomere ia adavaia bona natuna mero ta ia havaraia. Gabeai, natuna kekeni ta bona mero ma ta ia havaraia. To, unai natudia rua be Gomere ena heudahanai karana amo idia vara. Iehova ese Hosea ia hamaoroa do ia adavaia hahinena be “ia ura henia tatau edia murinai do ia heau lao.” Bena Hosea dekenai do ia giroa lou toho. Bema oi be unai peroveta tauna, emu adavana do oi abia dae lou, a? Iehova ese Hosea ia hamaoroa unai bamona do ia karaia! Bona iena adavana be moni bada amo ia hoia lou.​—Hos. 2:7; 3:1-5.

Reana Hosea ia laloa, bema Dirava ena hereva ia badinaia, dahaka namo do ia vara. Hosea ena sivarai amo ita diba, Israela taudia be Siahu Ibounai Diravana idia gwau-edeede henia neganai, iena lalona ia hisihisi bada. Bona  kudou-maoro Israela taudia haida be Dirava dekenai idia giroa lou.

Hari Dirava ese ta ia hamaoroa lasi ‘ariara hahine ta do ia adavaia.’ To, Hosea ena kara amo dahaka ita dibaia? Namona be mai iseda ura ida “taunimanima vairanai bona ruma ta ruma ta ai” sivarai namona ita harorolaia, herevana ia auka unai ita karaia totona. (Kara 20:20) Reana Basileia harorolaia daladia haida oi karaia be auka. Iehova ena Witnes taudia ida Baibel idia stadilaia taudia momo idia gwau, edia Baibel stadi idia moalelaia, to ruma-ta-ruma-ta haroro gaukara idia karaia lasi. To gabeai idia momo idia haroro, herevana guna idia laloa idia karaia diba lasi. Unai amo gau ta oi dibaia, a?

Hosea ena kara amo gau ma ta ita dibaia. Hosea be badina momo dainai Dirava ena hereva ia dadaraia diba. Bema Hosea ese iena sivarai ia torea lasi, ta be ia vara gauna do ia diba lasi, ani? Reana ita dekenai dala do ia kehoa ma ta dekenai Iehova ita herevalaia totona, bona ma ta be unai do ia diba lasi. Anna dekenai unai ia vara, ia be United States ena haisikuli studen ta. Dina ta, iena tisa ese klas taudia ia noia idia laloa bada gauna ta ena sivarai do idia torea bena klas vairanai do idia gwauraia. Anna ia laloa, inai be nega namona ia haroro totona. Unai dainai, Iehova ia guriguri henia bona lalogoada ia abia. Bena ia ese sivarai ta ia torea, ena sinado be, “Evolusen: Hamomokania Gaudia Laloa.”

Anna ese ena sivarai be klas taudia vairanai ia duahia neganai, evolusen ia abia dae kekeni ta be henanadai momo ia henia. To Anna ese haere maorodia ia henia. Iena tisa ia hoa bada bona Anna dekenai kwalimu ahuna ia henia. Unai nega amo Anna be unai kekeni ida Dirava ia havaraia gaudia ia herevalaia. Anna ia diba unai be Iehova ese ia henia “asainmen” bona unai ia abia dae dainai, ia gwau: “Hari mai gari lasi ida sivarai namona lau harorolaia diba.”

Ena be ita be peroveta taudia lasi, to bema peroveta taudia hegeregere Esekiela, Ieremia, bona Hosea edia haheitalai ita tohotohoa, ita danu hari Iehova ena ura do ita hagugurua! Ruma bese ena tomadiho eiava sibona emu stadi lalonai, namona be peroveta taudia gunadia edia sivarai oi duahia bona edia haheitalai oi tohotohoa daladia oi laloa dobu.