MOMO be inai sivarai idia diba, Iesu be henaohenao taudia rua huanai au dekenai idia kokoa kau. (Mat. 27:35-38) Baibel ia gwau Iesu ena tauanina idia hagoevaia bona guria gabuna ai idia atoa, to momo idia laloa Baibel ena hereva be kerere.​—Mar. 15:42-46.

Diba bada taudia haida idia abia dae lasi, au dekenai ia mase tauna be guria gabu maorona ai idia atoa. To idia abia dae, au dekenai idia tauadae tauna be dala idauna ai idia kara henia. Nius torea tauna ta ladana Ariel Sabar be Smithsonian magasin ta dekenai ia gwau: “Au dekenai ta kokoa kau bona hamasea karana be kerere badana ia karaia tauna panisia dalana. Bona diba bada taudia haida idia gwau Roma taudia ese kerere tauna be guria gabuna maorona dekenai idia atoa lasi.” Roma taudia idia ura henaohenao taudia idia hahemaraia dainai, nega momo au dekenai edia tauanina idia rakatania dagedage animal ese idia ania totona. Bona idia ania lasi gaudia be mase taudia idia guria gabuna dekenai idia negea.

To, akioleji taudia ese Iuda taudia haida edia turia amo gau haida idia davaria. Lagani 1968 ai, aposetolo edia nega ai idia hamasea tauna ta ena turia idia davaria. Unai be Ierusalema kahirakahira ai Iuda taudia edia guria gabuna dekenai idia davaria. Unai turia be turia idia udaia mauana [eiava ossuary] lalonai idia noho bona aena geduna ena turia ta ia noho danu. Unai aena geduna ena turia be au ta latanai idia kokoa kau bona ikoko ena lata be 11.5 sentimita bamona. Sabar ia gwau: “Unai be tau ta ladana Yehochanan ena aena turia. Unai ese Evanelia bukadia ai Iesu be guria gabuna ai idia atoa ena sivarai ia hamomokania. Yehochanan ena aena geduna ena turia ese ia hamomokania, ia be Iesu ena nega ai au dekenai idia tauadae tauna ta bona Roma taudia ese maoro idia henia Iuda taudia edia guria gabuna dekenai idia atoa totona.”

Yehochanan ena aena geduna ena turia dainai, taunimanima ese Iesu idia taua dae dalana dekenai lalohadai idauidau idia abia. To ita dibaia gauna be, henaohenao taudia haida idia hamasea neganai edia tauanina be guria gabu maorona ai idia atoa bona idia negea kava lasi. Unai ese ia hahedinaraia, Baibel ese Iesu ena tauanina be guria gabuna maorona ai idia atoa karana ia herevalaia dalana be maoro. Oibe, hamomokania gaudia ese Baibel ena hereva idia durua.

Mai anina bada gauna be, Iehova ia peroveta Iesu be taga taudia idia guria gabuna dekenai do idia guria, bona Dirava ena hereva ia guguru totona ta ese ia koua diba lasi.​—Isa. 53:9; 55:11.