ENA be iseda tama sina ginigunana, Adamu bona Heva edia gwau-edeede karana dainai, taunimanima ibounai dekenai kara dika bona mase ia vara, to unai ese Dirava ena ura taunimanima totona ia haidaua lasi. Baibel ai Dirava ese ena ura ia haidaua lasi karana ia gwauraia loulou.

• “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Salamo 37:29.

• “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​—Isaia 25:8.

• “Mase, iseda inai tauna ginigabena unai, be do ia ore momokani.” ​—1 Korinto 15:26.

• “Mase be do ia ore, bona lalohisihisi, taitai, bona hisihisi danu be do idia ore.”​—Apokalupo 21:4.

Edena dala ai Dirava ese iseda inai tauna, “mase do ia haorea” bona “do ia ore momokani”? Baibel ese ia hahedinaraia goevagoeva, “kara maoromaoro taudia . . . do idia noho ela bona hanaihanai.” To Baibel ma ia gwau, “tanobada ai kara namo sibona ia karaia kara maoromaoro tauna ta ia noho lasi.” (Hadibaia Tauna 7:20) Dirava be mase ia haorea totona, ena kara maoromaoro taravatu do ia haidaua, a? Dirava be unai bamona do ia karaia lasi! Badina Dirava “ia koikoi diba lasi.” (Tito 1:2) Dirava ese dahaka do ia karaia ena ura taunimanima totona do ia hagugurua?

Iehova Dirava ena lalokau dainai, mauri davana ia henia taunimanima be mase amo ia hamauria. Mauri davana ena anina be hegeregere, bema tau ta ese gau ta ia hadikaia, namona be ia henia davana be ia hadikaia gauna ena davana ida ia hegeregere. Taunimanima ibounai be kara dika taudia bona mase ena igui henunai idia noho dainai, Baibel ia gwau: “Momokani, tau ta ese sibona ena mauri, be moni dekena amo ia hoia diba lasi. Ia be hegeregere lasi, Dirava dekenai moni do ia henia, iena mauri davaria totona. Lasi momokani. Badina be iena mauri ena davana be bada herea, bona tau ta ena moni be hegeregere lasi.”​—Salamo 49:7, 8.

Ia goevadae lasi tauna ta ia mase neganai, ia be sibona ena kara dika ena davana ia henia diba; ia be sibona do ia hamauria lasi, eiava ta ena kara dika davana do ia henia diba lasi. (Roma 6:7) Ita ura ena mauri do ia bouboulaia tauna be goevadae tauna badina ia be sibona ena kara dika totona lasi to iseda kara dika totona ena mauri do ia henia.​—Heberu 10:1-4.

Momokani, Dirava be ia ura unai bamona do ia karaia. Guba amo ia ese ena goevadae Natuna, Iesu be tanobada dekenai ia siaia mai. (1 Petero 2:22) Iesu ia gwau, ia mai “ena mauri ia henia, taunimanima momo edia mauri davana karaia totona.” (Mareko 10:45) Ia mase badina iseda kara dika ena davana ia henia bona mase amo ita ia ruhaia unai amo mauri ita abia diba.​—Ioane 3:16.

Hari inai negai, Baibel ena peroveta hereva ia guguru, ita be “nega aukadia do idia vara” negana ai ita noho, unai ese ia hamomokania ita be inai tanobada dikana ena “dina gabediai” ita noho. (2 Timoteo 3:1) Dina gabediai ena dokona be “hahemaoro negana, unai negai Dirava idia badinaia lasi taudia be do idia ore momokani.” (2 Petero 3:3, 7) To, Dirava idia lalokau henia taudia be unai dika amo do idia roho mauri bona “mauri hanaihanai” do idia abia.​—Mataio 25:46.

 Taunimanima milioni momo be do idia toreisi lou neganai, mauri hanaihanai do idia abia. Iesu be Naina hanuana ia vadivadi henia neganai, ta be mase amo ia hatoreaisi lou. Vabu ena natuna tamona sibona ia mase, bona Iesu be “ia hebogahisi henia,” bona mase amo ia hamauria lou. (Luka 7:11-15) Aposetolo Paulo ia gwau: “Lau be mai egu abidadama Dirava dekenai . . . kara maoromaoro taudia bona kara maoromaoro lasi taudia be do idia toreisi lou.” Unai helaro ese Dirava ena lalokau, taunimanima totona ia hahedinaraia.​—Kara 24:15.

Taunimanima bilioni momo idia naria noho, mauri hanaihanai idia abia totona. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Unai negai, idia ese mai moale ida lagani 2,000 mai kahanai aposetolo Paulo ese ia gwauraia hagoadaia herevana ena guguru dalana do idia itaia, ia gwau: “Mase e, oiemu kwalimu be edeseniai? Mase e, oiemu hisihisi be edeseniai?” (1 Korinto 15:55) Taunimanima edia inai tauna, mase be do ia ore momokani!