Beibi ia vara ena hora ginigunana be mai anina bada. Dahaka dainai? Badina unai nega lalonai, sina be ena natuna badinai ia noho be namo, badina unai ese beibi ena tubu dalana ia durua diba.  *

Dahaka ese sina ia durua ena beibi matamata ia naria namonamo totona? Professor Jeannette Crenshaw ese buka ladana The Journal of Perinatal Education ai, ia gwau, hormone ladana oxytocin ese “sina ena hemami ena natuna naria karana dekenai ia hagoadaia unai dainai ia mara murinai, ena beibi matamata ia dogoatao, ia raraia bona rata amo ia ubua.” Danu unai negai hormone ma ta ese sina ia durua ena beibi ena ura ia hagugurua bona ena lalokau ia bona natuna huanai ia hagoadaia totona. Dahaka dainai unai be mai anina bada?

Iseda lalokau guba tamana, Iehova Dirava  * ese sina bona natu edia huanai ia noho lalokau karana ia havaraia. King Davida be Dirava ia hanamoa badina “sinana ena bogana, dekena amo” ia naria, bona ia vara neganai sinana ena gimaia karana ia mamia. Unai dainai ia guriguri bona ia gwau: “Lauegu vara dinana dekena amo, oi dekenai lau abidadama, bona egu sinana ena bogana dekena amo, oi be lauegu Dirava.”​—Salamo 22:9, 10.

MANI OI LALOA: Bema sina ta bona ena natuna huanai ia noho lalokau be Dirava ese ia havaraia, vadaeni unai ese ia hahedinaraia ita be “Dirava ena natudia” dainai, ita ta ta ia laloa bada, ani?​—Kara 17:29.

Havaraia tauna ia diba namonamo tauna, Iesu Keriso, ia gwau: “Manu maragidia rua be koini ta dekenai oi hoihoilaia, ani? To idia ta be tano dekenai ia moru neganai, emui Tamana be ia diba. Umui emui kwarana huina ibounai ia duahia vadaeni. Unai dainai umui gari lasi, umui ese manu maragidia ibounai umui hereaia.”​—Mataio 10:29-31.

Ita haida sibona ese manu maragidia ita itaia idia roho loaloa, bona manu ta ia moru neganai ita itaia danu. To eda guba Tamana ese idia ta ta ia laloa bada! Bona manu​—herevana idia be momo​—ese taunimanima idia hereaia lasi. Ita dibaia gauna be inai: Ita “gari lasi” be namo badina Dirava be ita ia laloa. Danu ia ura ita ia durua!

Baibel ese ita ia hadibaia

• “Lohiabada ese gabu ibounai ia itaia noho, bona dahaka idia vara gaudia ibounai ia diba. Iseda kara ibounai ia itaia noho, kara dikadia bona kara namodia danu.”​—AONEGA HEREVADIA 15:3.

• “Lohiabada ese kara maoromaoro taudia ia naria noho. Edia taitai be ia ese ia kamonai henia noho.”​—SALAMO 34:15.

• “Do lau moale bada, oiemu noho hanaihanai lalokauna dainai do lau moale, badina oi ese egu laloa hekwarahi oi itaia, bona egu lauma ena hisihisi oi diba.” ​—SALAMO 31:7.

Iseda mauri lalonai, Dirava ese ita ia laloa bona mai lalokau ida ita ia naria namonamo karana be mai ena namo, a? Oibe, England dekenai ia noho kekeni ta Hannah * ese unai ia herevalaia:

“Nega momo lau mamia Iehova be lau ia lalokau henia lasi bona egu guriguri ia kamonai henia lasi. Lau laloa ia lau abidadama henia lasi dainai unai ia vara. Danu lau mamia Dirava be lau ia panisia o ia dadaraia, badina lau be anina lasi. Lau mamia Dirava be lau ia laloa lasi.”

To hari, Hannah ia abia dae momokani Iehova ese ia ia laloa bada bona lalokau henia. Dahaka ese ia durua ena lalohadai ia haidaua totona? Ia gwau: “Metairametaira egu laloa dalana lau haidaua. Lagani momo gunanai lau kamonai Baibel tok ta lau laloatao, unai tok ese Iesu ena mauri davalaia boubouna ia herevalaia bona lau abia dae momokani Iehova ese lau ia lalokau henia. Bona egu guriguri ena haere lau abia neganai, nega momo lau taitai, badina lau diba momokani Iehova be lau ia lalokau henia. Danu, Baibel stadilaia karana bona Keristani heboudia ese lau ia durua Iehova, ena kara bona ita ia laloa dalana lau dibaia namonamo. Hari, Iehova ena heduru bona lalokau ita ibounai totona, bona mai ena ura ida ita ta ta ia naria karana lau mamia momokani.”

Hannah ena hereva ese ita ia hagoadaia. To, edena dala ai oi abia dae momokani Dirava ese emu hemami ia lalopararalaia bona laloatao? Atikol gabena ai unai henanadai do ita herevalaia.