Baibel be medikol bukana lasi, to ena hakaua herevadia bona sisiba be mai ena namo. Unai ese mentol helt ena hekwakwanai idia davaria taudia ia durua diba. Haheitalai haida itaia.

“Gorere lasi taudia be doketa idia tahua lasi, to gorere taudia sibona ese idia tahua.”​—MATAIO 9:12.

Baibel ese ita ia hadibaia, namona be medikol heduru ita tahua. Mentol helt gorerena idia abia taudia momo be heduru maorona idia abia bona doketa dekenai idia lao dainai edia gorere amo idia namo.

“Eksasais karana be mai ena namo emu tauanina totona.”​—1 TIMOTEO 4:8. Contemporary English Version

Emu helt durua totona oi karaia gaudia ese emu laloa dalana do ia hanamoa. Hegeregere dina ta ta ai oi eksasais, aniani maorona oi ania, bona nega maorona ai oi mahuta.

“Ia moale kudouna be muramura namona, to lalohisihisi kudouna ese ta ena goada ia haorea.”​—AONEGA HEREVADIA 17:22.

Baibel ena hagoadaia herevadia duahia bona oi hagugurua diba tahua gaudia atoa guna karana ese oi dekenai moale do ia henia. Mauri ai gau namodia laloa, bona oi diba vaira  negana ai gau ibounai do idia namo karana ese emu laloa dalana do ia hamaoromaoroa bona emu mentol helt do ia durua.

“Manau taudia be aonega idia abia noho.”​—AONEGA HEREVADIA 11:2.

Do oi itaia oi sibona ese gau ibounai oi karaia totona be hegeregere lasi, unai dainai mai ura ida haida edia heduru oi abia dae. Turadia bona famili idia ura oi idia durua, to reana idia diba lasi dahaka do idia karaia. Idia oi hadibaia dahaka heduru oi ura. Idia karaia diba gaudia oi abia dae bona hanaihanai idia oi tanikiu henia.

“Lau mamia lau dekenai gau ta ia maoro lasi dainai, doketa ena heduru lau tahua. Doketa ese egu gorere ia lalopararalaia. Unai dainai egu gorere lau diba bona medikol heduru maorona amo egu helt lau naria dalana lau dibaia.”​—Nicole, a bipolar disorder gorerena ia abia.

“Lau davaria dina ta ta ai egu hahine ida Baibel ai duahia karana ese lau dekenai lalohadai maorona ia henia. Bona lalometau gorerena lau mamia neganai, lau ia hagoadaia Baibel siri ta lau laloa.”​—Peter, lalometau gorerena ia abia.

“Ia auka egu hekwakwanai be haida dekenai lau herevalaia totona, badina lau hemarai. To egu tura namona ta be lau ia kamonai henia namonamo bona egu hemami ia lalopararalaia. Iena heduru amo lau mamia lau be sibona lau noho lasi.”​—Ji-yoo, eating disorder gorerena ia abia.

“Baibel ese lau ia durua egu gaukara bona laga-ani karana dekenai lalohadai maorona lau abia. Baibel ena aonega herevadia ese lau ia durua hanaihanai lau ia hahisia hemami idauidau lau haheaukalaia totona.”​—Timothy, obsessive-compulsive disorder gorerena ia haheaukalaia.