PUSIKASI be hanuaboi ai idia loaloa. Edia wiska huina be dibura lalonai idia ia durua, idia kahirakahira idia noho gaudia idia diba, bona idia labana totona.

Inai oi laloa: Pusikasi edia wiska huina be tauanina ai idia noho varovaro ida idia konekt dainai, hodahoda lalonai gau maragina ta ia marere neganai, idia mamia diba. Unai dainai hanuaboi ai, dibura lalonai pusikasi ese gau idia itaia lasi, to idia kahirakahira idia noho gaudia idia mamia diba.

Pusikasi idia labana neganai, edia wiska huina ese ia durua gau idauidau be edeseniai idia noho idia diba totona. Danu, idia diba do idia vareai matu ena bada be ia hegeregere eiava lasi. Buka ta ladana Encyclopoedia Britannica ia gwau, “Unai wiska huina (vibrissae) edia gaukara dalana ma haida idia do diba namonamo lasi, to idia diba gauna be, bema unai wiska huina be ta ese ia utua oho, pusikasi ena loaloa ia hadikaia.”

Saiens taudia be pusikasi edia wiska huina idia tohotohoa totona, idia ura robot mai ena sensor idia karaia, unai amo robot ia loaloa neganai gau idauidau edia noho gabuna do ia diba bona do ia bampa lasi. Unai sensor idia gwauraia e-whiskers. University of California, Berkeley dekenai saiens tauna ta ladana Ali Javey ia gwau, “Unai e-whiskers ena teknoloji do idia abia neganai, taunimanima be masini idauidau ida do idia gaukara hebou diba edia gaukara karaia totona, bona gorere idauidau durua totona muramura idauidau idia karaia diba danu.”

Dahaka oi laloa? Pusikasi ena wiska huina be evolusen amo ia vara, a? Eiava ta ese ia havaraia, a?