BAIBEL ENA LALOHADAI

“Spot Gadara Dikadia”—Oi Karaia be Namo, A?

“HARI INAI NEGAI, ITA MOMO BE GADARA ITA ITAIA SIBONA LASI TO UNAI GARADA LALONAI ITA VAREAI. HEGEREGERE, PARACHUTE AMO ROHO, ORORO ATAIAI AMO DIHO, KAYAKING BE ORORO AMO IA ARU DIHO WATERFALL AI ITA KARAIA BONA KWALAHA IDA ITA NAHU.”—THE WILLOW GLEN RESIDENT NEWSPAPER.

INAI be hari idia bada idia lao noho spot gadara matamata ia herevalaia. Idia karaia momo spot gadara haida be hegeregere, skydiving, ice climbing, paragliding, bona BASE jumping a gadara idia ura karaia ena be edia mauri idia hadikaia o haboioa diba. Ororo badadia bona latadia ataiai Snowboard, mountain bike, skateboard, bona in-line skate amo, daudau momokani amo idia roho diho, bona idia karaia diba lasi gaudia ena hetoana idia laloa lasi. Time magasin ia gwau bamona idia bada noho “spot gadara dikadia”​—unai spot gadara idia karaia taudia be edia mauri idia laloa lasi​—unai ese ia hahedinaraia taunimanima milioni momo be idia ura unai wikeni gadara ai edia kwalimu toana bona edia diba unai gadara dekenai idia hahedinaraia dainai, unai gadara ena dika idia laloa lasi bona idia gari lasi.”

To, momo be unai gadara idia karaia dainai moni bada idia negea. Taunimanima momo be bero idia abia badina gadara be seif gabuna ai idia karaia lasi. Lagani 1997 lalonai, United States dekenai, emejensi-daiutu ai idia abia mai taudia momo be skateboarding amo bero idia abia bona edia namba be 33 pesen, snowboarding be 31 pesen bona mountain climbing be 20 pesen amo ia bada daekau. Spot ma haida dekenai be dika momokani, badina mase ena namba ia bada ia herea. Gadara idia karaia taudia be ia vara dika idia diba. Skiing gadara ia karaia hahine ta ia gwau: “Hanaihanai mase be egu lalohadai dekenai ia noho.” Snowboard gadara ia diba momo tauna ia gwau bema “bero oi abia lasi, anina be oi hekwarahi momokani lasi.”

Keristani taudia ese unai bamona gadara idauidau be edena bamona idia laloa be namo? Edena dala ai Baibel ese ita ia durua diba spot gadara dikadia do ita karaia eiava lasi? Dirava ese mauri ia laloa bada karana ita lalohadailaia neganai, unai ese ita do ia durua unai henanadai ena haere ita diba totona.

Dirava Ena Lalohadai Mauri Totona

Baibel ese ita ia hadibaia Iehova be “mauri ena badina.” (Salamo 36:9) Taunimanima ia havaraia neganai, iseda mauri ita moalelaia gaudia ia henia danu. (Salamo 139:14; Kara 14:16, 17; 17:24-28) Unai dainai ita gwau diba ia ura ia ese mai moale ida ita dekenai ia henia gaudia do ita naria namonamo. Idaunegai Israela dekenai Dirava ese ia henia Taravatu bona hakaua herevadia ese ita ia durua unai gaudia ita laloa bada totona.

Mose ena Taravatu ia gwau taunimanima ese gau haida idia karaia be namo haida edia mauri idia gimaia totona. Bema unai idia karaia lasi bona ta be ena mauri ia haboioa, unai tauna be rara dekenai ia kerere. Hegeregere, Israela tauna ta ese ruma ta ia haginia neganai, guhi ena isena ai magu maragina ia haginia be namo. Bema unai ia karaia lasi bona ta be iena ruma ena guhi amo ia moru bona ia mase, ruma biaguna be rara dekenai ia kerere. (Deuteronomi 22:8) Bema biaguna ia diba lasi ena boromakau ese tau ta ia hamasea, unai be biaguna ena kerere lasi. To bema, biaguna ia diba ena boromakau be ia dagedage bona taunimanima ese biaguna idia hadibaia, to biaguna ese boromakau ia gimaia namonamo lasi bona boromakau ese ena doana amo ta ia haberoa, biaguna be rara dekenai ia kerere bona ia idia hamasea diba. (Esodo 21:28, 29) Iehova be mauri ia laloa bada dainai, iena Taravatu amo ia hahedinaraia mauri be gau badana bona ita gimaia be namo.

Unai bamona hakaua herevadia amo Dirava ena hesiai taudia idia laloparara ta ese sibona ena mauri do ia haboioa karana be kerere danu. Baibel ena sivarai ta lalonai, Davida ia gwau “Betelehema ena geiti badinai ia noho ranu guri amo ranu lau inua be namo.” Unai nega ai Betelehema be Filistia taudia ese idia biagua. Davida ena tuari tatau toi be Davida ena noinoi idia kamonai neganai, maoromaoro Filistia taudia edia kamepa lalonai idia vareai, bona Betelehema ena ranu guri amo ranu idia abia bona Davida dekenai idia mailaia. Davida be dahaka ia karaia? Unai ranu ia inua lasi to tano dekenai ia bubua. Ia gwau: “Egu Dirava ena vairanai, lau be inai ranu do lau inua diba lasi! Unai tatau be edia mauri idia haboioa diba, bona lau ese edia rara do lau inua, a? Unai ranu idia abia totona do idia mase diba.” (1 Sivarai 11:17-19) Davida ia laloa, sibona iena ura hagugurua totona idia ese edia mauri do idia haboioa be namo lasi.

Iesu danu be unai hegeregerena ia kara. Diabolo ese matahanai ta amo Iesu ia tohoa totona dubu helaga ena magu latanai ia haginia, bona Iesu ia hamaoroa unai gabu dekena amo do ia roho diho bema aneru ese ia do ia gimaia bona bero do ia abia lasi. Iesu ia haere: “Namo lasi Iehova oiemu Dirava oi tohoa.” (Mataio 4:5-7) Oibe, Davida bona Iesu be idia laloparara Dirava ena matana ai ta ese anina lasi gauna totona ena mauri ia hadikaia be kerere.

Unai sivarai amo reana do ita laloa, ‘Edena bamona spot gadara dikana ena idau do ita diba? Badina gadara namodia haida be gadara dikadia ai idia lao, to ena hetoana be edena bamona do ita diba?’

Dika Ia Havaraia Diba, A?

Ita ura karaia spot gadara be mai momokani ida ita tahua namonamo, unai ese ita ia durua haere maorona ita diba totona. Hegeregere, sibona dekenai ita henanadai, ‘Inai spot gadara ese ia havaraia dika ena bada be edena bamona? Inai gadara totona treinini lau abia vadaeni, a? Bero lau abia lasi totona mai egu seifti kohudia, a? Bema lau moru eiava nega maorona ai lau roho lasi, o lau karaia seifti kohudia ta ia dika dahaka do ia vara? Aksiden maragina sibona do ia vara eiava bero badana do lau abia o do lau mase diba, a?’

Moale karadia totona iseda mauri ita laloa bada lasi karana ese Keristani tauna ena hetura karana namona Iehova Dirava ida do ia hadikaia bona ena hahenamo kongrigeisen lalonai ia haboioa diba. (1 Timoteo 3:2, 8-10; 4:12; Tito 2:6-8) Unai ese ia hahedinaraia moale gadara idauidau lalonai, Keristani taudia ese Dirava ena lalohadai idia laloa danu be namo. Ia dekenai mauri be helaga.

[Futnout]