Dika badana ta ia vara neganai, ia be kerere lasi bema inai bamona ita henanadai: “Dahaka dainai inai ia vara?” Ita moale badina Baibel ese unai henanadai ia haerelaia namonamo!

1. Edena dala ai Satani ese tanobada ai dika ia havaraia?

Satani Diabolo ese Dirava ia gwau-edeede henia. Satani ia ura haida do ia lohiaia, unai dainai ia ese taunimanima ginigunadia, Adamu bona Heva ia koia bona idia ese Dirava idia gwau-edeede henia danu. Unai ia vara dalana be Satani ese Heva dekenai hereva koikoi ta ia gwauraia. (Genese 3:​1-5) Unai dainai Heva ia laloa Iehova ese ia amo gau namona ta be ia hunia. Satani ia ura hahedinaraia, taunimanima be do idia moale diba bema Dirava idia kamonai henia lasi. Satani ese ia gwauraia hereva koikoi ginigunana be, Heva ia hamaoroa do ia mase lasi. Unai dainai, Baibel ese Satani ia gwauraia “koikoi tauna bona koikoi ena tamana.”​​—Ioane 8:44.

2. Adamu bona Heva ese dahaka abia hidi idia karaia?

Iehova ese Adamu bona Heva dekenai harihari bada karana ia hahedinaraia. Ia hamaorodia, Eden umana ai idia noho au huahua ibounai idia ania diba, to au tamona sibona ena huahua do idia ania lasi. (Genese 2:​15-17) To, idia kamonai lasi bona unai au ena huahua idia ania. Heva ese “au ena huahua ia abia bona ia ania.” Unai murinai, Adamu dekenai ia henia bona “ia ania danu.” (Genese 3:6) Idia ruaosi ese Dirava idia kamonai henia lasi. Adamu bona Heva be goevadae taudia dainai, kara maorona idia karaia diba. To, mai ura ida Dirava idia kamonai henia lasi dainai, idia kara dika bona ena lohia dalana idia dadaraia. Unai disisen dainai dika bada idia davaria.​​—Genese 3:​16-19.

3. Adamu bona Heva edia disisen dainai dahaka ia vara?

Adamu bona Heva idia kara dika neganai, idia be goevadae lasi taudia ai idia lao, bona idia ese unai goevadae lasi maurina, be edia natudia ibounai dekenai idia henia hanai. Adamu totona, Baibel ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai ia hanaia lao.”​​—Roma 5:12.

Badina idauidau dainai hisihisi ita davaria. Nega haida, ita karaia abia hidi dikadia dainai hisihisi ita davaria. To nega haida, taunimanima haida edia abia hidi dikadia dainai hisihisi ita davaria. Danu nega haida, nega bona gabu kererena ai ita noho dainai dika ita davaria.​​—Hadibaia Tauna 9:11 duahia.

 DIBA MA HAIDA ABIA

4. Ita dekenai hisihisi ia havaraia tauna

Taunimanima momo idia abia dae Dirava ese tanobada ibounai ia biagua. To unai be momokani, a? VIDIO itaia.

Iamesi 1:​13, bona 1 Ioane 5:19 duahia, bena inai henanadai herevalaia:

• Ita dekenai idia vara hisihisi bona dika be Dirava ese ia havaraia, a?

5. Satani ia lohia matamaia negana amo idia vara gaudia mani oi laloa

1. Adamu bona Heva be goevadae taudia bona Paradaiso ai idia noho. To Satani idia kamonai henia bona Iehova dekenai idia gwau-edeede.

2.   Gwau-edeede karana murinai tanobada ai kara dika, hisihisi bona mase idia vara momo

3. Iehova ese kara dika, hisihisi bona mase do ia haorea. Bona taunimanima be do idia goevadae bona Paradaiso ai do idia noho

6. Iehova ese iseda hisihisi ia laloa

Dirava ese iseda hisihisi ia laloa, a? Mani King Davida bona aposetolo Petero ese idia torea herevana oi laloa. Salamo 31:7 bona 1 Petero 5:7 duahia, bena inai henanadai herevalaia:

• Iehova ese iseda hisihisi ia itaia bona ita ia laloa bada dainai emu hemami be edena bamona?

 POINT BADANA

Satani Diabolo bona taunimanima ginigunadia rua dainai tanobada ai dika idia vara. Iehova be ita davaria hisihisi dainai ita ia laloa bada bona kahirakahira unai do ia kokia.

Riviu

• Satani Diabolo ese Heva dekenai dahaka hereva koikoi ia gwauraia?

• Adamu bona Heva edia gwau-edeede karana dainai ita dekenai dahaka ia vara?

• Edena dala ai ita diba Iehova ese ita davaria hisihisi dainai ita ia laloa bada?