1-3. Dahaka gaudia ese idia hamomokania, histori lalonai Iesu ena mase be taunimanima edia mase amo ia idau?

 LAGANI 2,000 bamona gunanai, kerere lasi tauna ta be idia kota henia bona idia hamasea. Unai kara be histori lalonai ia vara dagedage karana ginigunana lasi; bona madi, gabeai unai bamona kara momo idia vara danu. To, unai mase be taunimanima edia mase amo ia idau.

² Unai tauna be ena hora ginigabedia lalonai hisihisi bada ia abia lalonai, guba ai idia vara gaudia ese idia hahedinaraia ena mase be mai anina bada. Herevana unai be dina tubua, to karaharaga gabu ibounai ia dibura. Baibel ia torea tauna ta ena hereva bamona, “dina ena diari ia hedinarai lasi.” (Luka 23:44, 45) Bena, unai tauna be ena nega ginigabena ia hahodi murinai, inai ita laloaboio lasi herevadia ia gwauraia: “Lau hagugurua vadaeni!” Momokani, iena mauri ia atoa diho karana amo, gau hereadaena ta ia hagugurua. Iena boubou gauna amo lalokau karana hereadaena ia hahedinaraia.​—Ioane 15:13; 19:30.

³ Oibe, unai tauna be Iesu Keriso. Unai dibura dinana Nisan 14, 33 C.E. ai, ia mamia hisihisina bona ena mase sivaraina be taunimanima ibounai idia diba. To, taunimanima ese nega momo mai anina bada gauna ta idia laloa lasi. Ena be Iesu ese hisihisi bada ia mamia, to ma tau ta be hisihisi bada herea momokani ia mamia. Oibe, unai tauna be unai dina ai mai anina bada gauna ta ia bouboulaia—guba bona tanobada ibounai lalonai unai be lalokau karana hereadaena. Unai kara be dahaka? Unai henanadai ena haere ese mai anina bada gauna ta ia hahedinaraia: Iehova ena lalokau.

4. Edena dala ai Roma tuari biaguna be gabeai ia laloparara Iesu be taunimanima ibounai amo ia idau, bona dahaka ia gwau?

⁴ Iesu hamasea gaukarana ia naria Roma tuari biaguna be Iesu  ia do mase lasi neganai ia vara dibura bona gabeai ia vara tano mareremarere dainai ia hoa bada. Ia gwau: “Momokani, inai be Dirava ena Natuna.” (Mataio 27:54) Oibe, Iesu be taunimanima amo ia idau. Unai tuari tauna ese Ataiai Momokani Diravana ena Natuna tamona sibona hamasea karana ia durua! Tamana ese unai Natuna ia lalokau henia ena bada be edena bamona?

5. Iesu be tanobada dekenai ia do mai lasi neganai, ena Tamana ida ia noho negana ena daudau be edena bamona?

⁵ Baibel ia gwau Iesu be “havaraia gaudia ibounai amo ia be ginigunana.” (Kolose 1:15) Mani inai oi laloa—guba bona tanobada idia do vara lasi neganai, Iehova ena Natuna ia noho vadaeni. Tamana bona Natuna idia noho negana ena daudau be edena bamona? Saiens taudia haida idia gwau reana iunives be lagani bilioni 13 bamona ia noho vadaeni. Unai nega ena daudau oi laloa diba, a? Ena be reana unai hereva be ia maoro, to Iehova ena Natuna be lagani daudau herea ia noho vadaeni, lagani bilioni 13 ia hanaia! Unai nega daudau herea lalonai dahaka ia karaia?

6. (a) Iehova ena Natuna be guba dekenai ia noho neganai, dahaka ia karaia? (b) Edena bamona hetura karana be Iehova bona ena Natuna huanai ia noho?

⁶ Natuna be “gaukara [ia] karaia namonamo tauna,” bona ia moale Tamana ida ia gaukara hebou. (Aonega Herevadia 8:30) Baibel ia gwau: Gau ta be “dala idauna ta amo ia vara lasi.” (Ioane 1:3) Iehova bona ena Natuna idia gaukara hebou gau iboudiai idia havaraia totona. Nega namodia idia moalelaia hebou! Momo do idia abia dae, tama sina bona edia natuna huanai ia noho lalokauna be goada momokani. Bona lalokau be ita ia “hatamonaia gauna hereadaena.” (Kolose 3:14) Iesu bona ena Tamana edia hetura karana goadana unai nega daudau herea lalonai, ita lalopararalaia diba lasi. Momokani, Iehova Dirava bona ena Natuna be lalokau goadana ese ia hatamonaia.

7. Iesu be bapatiso ia abia neganai, Iehova ese edena bamona iena natuna dekenai ena hemami ia hahedinaraia?

⁷ To ena be unai bamona, Tamana ese tanobada dekenai ena  Natuna ia siaia taunimanima ta bamona do ia vara. Unai bamona ia karaia dainai, lagani 30 mai kahana lalonai, Iehova be guba dekenai ena Natuna lalokauna ena hebamo ia reaia. Guba amo mai ena ura bada ida ia itaia, Iesu be tau goevadaena ai ia tubu daekau. Iesu ena mauri lagani be 30 neganai, bapatiso ia abia. Iehova ena hemami ena Natuna dekenai be ita diba vadaeni. Tamana be guba amo ia hereva: “Inai be egu Natuna, egu lalokau, ia lau lalonamo henia.” (Mataio 3:17) Tamana ia itaia Iesu be mai kamonai ida idia perovetalaia gaudia ibounai ia karaia neganai, Ia moale bada herea!​—Ioane 5:36; 17:4.

8, 9. (a) Nisan 14, 33 C.E. ai, Iesu dekenai dahaka ia vara bona ena guba Tamana ena hemami be edena bamona? (b) Dahaka dainai Iehova ese ena Natuna ena hisihisi bona mase ia koua lasi?

⁸ Nisan 14, 33 C.E. ai, Iehova ena hemami be edena bamona? Iesu idia samania bona hutuma ese hanuaboi ai ia idia dogoatao neganai? Ena turadia ese ia idia rakatania bona ia dekenai kota kererena idia karaia neganai? Idia kirikirilaia, idia kanudia, bona idia paisia neganai? Idia kwadia bona ena doruna ena kopina idia darea neganai? Bona au ta latanai ena imana bona aena idia kokoa bona idia rakatania taunimanima ese idia hevasehalaia neganai? Tamana ena hemami be edena bamona, ia lalokau henia Natuna be hisihisi bada dainai ia dekenai ia boiboi neganai? Nega ginigabena Iesu ia hahodi murinai, Iehova ia itaia, gau ibounai ia havaraia matamaia negana amo ela bona unai nega ai, ena Natuna be ia noho lasi, ia mase. Oi laloa ena hemami be edena bamona?​—Mataio 26:14-16, 46, 47, 56, 59, 67; 27:38-44, 46; Ioane 19:1.

⁹ Iehova be mai ena hemami dainai, ena Natuna ena mase ia mamia hisihisina be hereva ta amo ita gwauraia diba lasi. To ita herevalaia diba gauna be Iehova ese unai ia koua lasi ena badina. Dahaka dainai Tamana be ia sibona dekenai unai hisihisi bada ia koua lasi? Iehova ese ita dekenai gau hereadaena ta ia hahedinaraia Ioane 3:16 ai, unai siri be mai anina bada dainai, haida idia gwau unai siri tamona ese Evanelia bukadia edia hereva ibounai ia gwauraia. Ia gwau: “Dirava ese tanobada ia  lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” Unai dainai Iehova ese unai ia koua lasi ena badina be inai: lalokau. Iehova ena harihari gauna—ena Natuna ia siaia ita dainai do ia hisihisi bona ia mase—be lalokau karana hereadaena.

10. Taunimanima dekenai dahaka be mai anina bada kara hereadaena ta, bona inai hereva “lalokau” ena anina dekenai dahaka ia vara?

¹⁰ Inai hereva “lalokau” ena anina be dahaka? Taunimanima dekenai lalokau be mai anina bada kara hereadaena ta. Taunimanima idia vara negana amo ela bona idia mase, idia ura lalokau idia mamia bona unai idia mamia neganai idia moale, bema lalokau be lasi idia gorere bona idia mase diba. To, lalokau ena anina ita gwauraia hedinarai be auka. Momokani, nega momo taunimanima ese lalokau idia herevalaia, buka, ane bona ane toretoredia lalonai. Unai hereva be idia gaukaralaia momo dainai, ena anina korikorina be ia boio.

11, 12. (a) Edeseni amo lalokau dekenai gau momo ita dibaia diba, bona dahaka dainai unai bamona oi haere? (b) Idaunegai Grik gado ese edena “lalokau” idauidau ia gwauraia, bona edena hereva lalokau totona be nega momo Keristani Grik Revarevadia lalonai idia gaukaralaia? (Futnout itaia danu.) (c) Baibel lalonai nega momo A·gaʹpe ena anina be edena bamona idia gwauraia?

¹¹ To, Baibel ese lalokau ena anina ia hahedinaraia goevagoeva. Diksenari ta (Expository Dictionary of New Testament Words) ia gwau: “Lalokau be ia havaraia karadia sibona amo ita dibaia diba.” Iehova ia karaia karadia ena sivarai Baibel lalonai ese ita dekenai gau momo ia hadibaia ena lalokau dekenai—Ia karaia taudia be mai hebogahisi ida ia ura henidia bada. Unai bamona lalokau be guna ita herevalaia, Iehova ena lalokau karana hereadaena ese ia hahedinaraia namo herea. Inai buka ena karoa ma haida dekenai Iehova ena lalokau idia hahedinaraia karadia edia haheitalai momo do ita itaia. Ma danu, Baibel lalonai “lalokau” totona idia gaukaralaia hereva ginigunadia amo diba ma haida do ita abia. Idaunegai Greek gado ai, “lalokau” totona  hereva foa idia gaukaralaia. a Idia foa amo, Keristani Greek Revarevadia lalonai nega momo idia gaukaralaia herevana be a·gaʹpe. Baibel diksenari ta ia gwau “unai hereva be lalokau totona idia gaukaralaia hereva mai siahuna.” Dahaka dainai?

¹² Baibel lalonai nega momo a·gaʹpe be hakaua herevadia ese ia biagua lalokauna ena lalohadai ia hahedinaraia. Ia be ta ena lalokau oi haloua karana lasi. Ia be mai ena anina idauidau, hereva oi laloa namonamo bona mai emu ura ida oi hahedinaraia karana. Gau hereadaena be inai, Keristani lalokau be sibona ena namo ia tahua lasi. Hegeregere, mani Ioane 3:16 oi itaia lou. Dirava ese ia lalokau henia bada “tanobada” be dahaka, ia dainai ena lalokau Natuna tamona ia henia? Unai tanobada be Dirava ese ia hoia lou diba taudia, ia herevalaia. Kara dika maurina idia badinaia noho taudia momo danu. Iehova ese idia ta ta be turana ta bamona ia lalokau henia, kamonai tauna Aberahamo ia lalokau henia hegeregerena, a? (Iamesi 2:23) Lasi, to Iehova be mai ena lalokau ida taunimanima ibounai ia kara namo henia, herevana unai ia karaia totona ena natuna ia mase. Ia ura taunimanima ibounai idia helalo-kerehai bona edia kara idia haidaua. (2 Petero 3:9) Taunimanima momo be unai bamona idia karaia. Unai taudia be mai moale ida ena turadia bamona ia abia dae.

13, 14. Dahaka ese ia hahedinaraia nega momo Keristani lalokau be mai ena hebogahisi?

¹³ To, a·gaʹpe ena anina Baibel lalonai be haida ese idia lalohadailaia kerere. Idia laloa ia be mai ena hemami lasi. To, nega momo Keristani lalokau ena anina be mai hebogahisi ida ta oi ura henia. Hegeregere, Ioane ia gwau, “Tamana ese Natuna  ia lalokau henia,” unuseniai inai hereva, a·gaʹpe, ia gaukaralaia. Unai bamona lalokau be hemami lasi lalokauna, a? Lasi. Iesu ia gwau, “Tamana ese Natuna ia lalokau henia” ia herevalaia neganai, ia be inai hereva phi·leʹo ia gaukaralaia. (Ioane 3:35; Ioane 5:20) Nega momo Iehova ena lalokau be mai ena hebogahisi. To, ena hemami ese ena lalokau karana ia biagua lasi. Unai lalokau be hanaihanai ena hakaua hereva namodia bona maorodia ese idia biagua.

¹⁴ Ita herevalaia vadaeni bamona, Iehova ena kara ibounai be namo, goevadae, bona ita ura henia. To unai ibounai amo lalokau be hereadae. Lalokau dainai Iehova kahirakahira ita lao. Moale gauna be, lalokau be iena kara badana. Edena bamona unai ita diba?

15. Baibel ese dahaka ia gwauraia Iehova ena lalokau dekenai, bona edena dala ai unai hereva be ia idau? (Futnout itaia danu.)

¹⁵ Baibel ese hereva ta ia gwauraia Iehova ena lalokau dekenai, to ena kara ma haida be unai bamona ia herevalaidia lasi. Baibel ia gwau lasi Dirava be siahu eiava Dirava be hahemaoro goeva eiava Dirava be aonega. Unai be iena kara, ia be unai kara toi edia Badina bona ia sibona ese unai kara toi ia hahedinaraia goevagoeva. To Baibel ese ena kara namba foa dekenai mai anina bada herevana ta ia gwauraia: “Dirava be lalokau.” b (1 Ioane 4:8) Unai ena anina be dahaka?

16-18. (a) Dahaka dainai Baibel ia gwau “Dirava be lalokau”? (b) Tanobada ai idia noho mauri gaudia ibounai amo, dahaka dainai taunimanima be hegeregere Iehova ena kara, lalokau, idia hahedinaraia diba?

¹⁶ Namo lasi ita laloa inai hereva “Dirava be lalokau” ena anina be “Dirava be lalokau hegeregerena,” eiava ita gwau diba lasi “lalokau be Dirava.” Iehova be kara ta sibona ia hahedinaraia  tauna lasi. Ia be Tau korikorina ta, mai ena hemami bona kara idauidau danu, lalokau sibona lasi. To, Iehova ena kara ibounai lalonai lalokau ia hahedinaraia. Buka ta ese unai siri be inai bamona ia gwauraia: “Dirava ena kara korikorina be lalokau.” Reana inai bamona ita laloa diba: Iehova ena siahu dainai ia hegeregere kara ta ia karaia diba. Iena hahemaoro goeva bona aonega ese kara ta ia karaia dalana idia hakaua. To Iehova ena lalokau ese iena lalona ia veria kara ta ia karaia totona. Bona ena kara ma haida gaukaralaia dalana ai nega ibounai lalokau ia hahedinaraia.

¹⁷ Nega momo idia gwau Iehova be lalokau. Unai dainai, bema ita ura a·gaʹpe lalokauna ita dibaia, Iehova ita dibaia be namo. Oibe, unai kara hereadaena be taunimanima dekenai ita itaia danu. To dahaka dainai unai kara idia hahedinaraia? Hamatamaia negana ai, Iehova ese ena Natuna dekenai inai hereva ia gwauraia: “Namona be taunimanima ita karaia iseda toana hegeregerena.” (Genese 1:26) Inai tanobada ai idia noho mauri gaudia ibounai amo, taunimanima sibona ese lalokau idia hahedinaraia diba bona unai amo edia guba Tamana idia tohotohoa. Laloaboio lasi, Iehova ese animal idauidau ia gaukaralaia ena kara badadia ia hahedinaraia totona. To, Iehova ese tanobada ai ia havaraia gaudia ibounai amo, taunimanima ia gaukaralaia Iena kara badana, lalokau, ia hahedinaraia totona.​—Esekiela 1:10.

¹⁸ Sibona eda namo laloa lasi dalanai bona hakaua herevadia hegeregerena lalokau ita hahedinaraia neganai, ita be Iehova ena kara badana ita hahedinaraia unai. Inai be aposetolo Ioane ena hereva bamona: “Ita ese lalokau ita hahedinaraia, badina ia ese ita ia lalokau henia guna.” (1 Ioane 4:19) To edena dala ai Iehova ese ita ia lalokau henia guna?

19. Dahaka dainai ita gwau diba Iehova be lalokau dainai gau ibounai ia havaraia?

¹⁹ Lalokau be gau matamatana lasi. Oibe, dahaka dainai Iehova ese gau ibounai ia havaraia? Namo lasi ita gwau, Ia be sibona  ia noho bona hebamo ia tahua dainai, unai bamona ia karaia. Lasi. Iehova be gau ibounai dekenai ia hegeregere momokani, tau ta ese ia dekenai dabu gauna ta ia henia diba lasi. To ena lalokau dainai, ia ura mauri ena moale gaudia be idia abia dae taudia, aneru bona taunimanima ida, do ia moalelaia hebou. “Dirava ese ia havaraia tauna ginigunana” be ena lalokau Natuna tamona. (Apokalupo 3:14) Bena Iehova ese unai Gaukara Karaia Namonamo Tauna ia gaukaralaia gau ibounai idia havaraia totona, aneru idia karaia guna. (Iobu 38:4, 7; Kolose 1:16) Unai lauma taudia goadadia be mai edia ura kwalimu, aonega bona hemami dainai, idia be mai edia dala sibodia edia hetura karadia idia karaia—idia ta ta dekenai bona Iehova Dirava ida. (2 Korinto 3:17) Unai dainai, lalokau idia hahedinaraia badina Dirava ese ia lalokau henidia guna.

20, 21. Adamu bona Heva be dahaka gaudia amo idia hamomokania diba Iehova be idia ia lalokau henia, to dahaka idia karaia?

²⁰ Taunimanima dekenai danu be unai bamona. Matamana negana amo, Iehova ese Adamu bona Heva ia lalokau henidia bada. Edia Tamana ena lalokau idia totona be edia noho gabuna Eden ena gabu ibounai dekenai idia itaia diba. Mani Baibel ena hereva oi itaia: “Iehova Dirava ese Eden ai uma ta ia karaia, unai be ist kahanai ia noho, bona ia havaraia tauna be unuseniai ia atoa.” (Genese 2:8) Loaloa uma gabuna mai hairaina ta dekenai oi lao vadaeni, a? Dahaka oi moalelaia bada? Keru gabuna dekenai idia gini au momo edia raurau huanai amo ia mai diarina ena toana oi ura henia, a? Eiava idia gini hebou flaoaflaoa edia kala idauidau, a? O sinavai, manu, eiava manumanu edia regena, a? Eiava au, huahua, bona flaoaflaoa edia bonana be edena bamona? To hari idia noho loaloa uma gabu ta be Eden umana bamona lasi. Dahaka dainai?

²¹ Unai uma be Iehova sibona ese ia havaraia! Reana ia be mai ena hairai bada herea. Au mai edia hairai bada bona huahua namodia idia havaraia audia ibounai be unuseni idia noho. Unai uma be mai ena ranu gabuna, ena tano be bada herea, bona ia lalonai animal idauidau momo idia noho. Adamu bona Heva dekenai gau ibounai be hegeregere edia mauri idia moalelaia totona, bona mai edia gaukara namona bona hebamo goevadaena  danu. Iehova ese idia ia lalokau henia guna, unai dainai ia dekenai danu unai bamona idia karaia be namo. To unai idia karaia lasi. Mai lalokau ida edia guba Tamana idia kamonai henia lasi, to ia idia gwau-edeede henia.​—Genese, karoa 2.

22. Eden ai ia vara gwau-edeede karana dekenai, edena dala ai Iehova ese ena ‘noho hanaihanai lalokauna’ ia hamomokania?

²² Unai ese Iehova ena lalona ia hahisia bada! To unai gwau-edeede karana ese ena lalokau karana idia dekenai ia koua, a? Lasi! “Iena lalokau be ia noho hanaihanai.” (Salamo 136:1) Unai dainai, maoromaoro dala ia karaia Adamu bona Heva edia kudou-maoro natudia be kara dika amo do ia hoia lou. Ita herevalaia vadaeni bamona, ena be Tamana ena lalona ia hisihisi bada, to unai ia karaia totona ena lalokau Natuna be mauri davalaia boubouna bamona ia henia.​—1 Ioane 4:10.

23. Dahaka badina ta dainai Iehova be “moale Diravana,” bona edena mai anina bada henanadai be karoa gabena dekenai do ita herevalaia?

²³ Oibe, matamana negana amo Iehova ese kara ta ia karaia guna taunimanima dekenai lalokau ia hahedinaraia totona. Dala momo herea ai “ita ia lalokau henia guna.” Lalokau ese lalotamona bona moale ia havaraia, unai dainai Baibel ese Iehova ia gwauraia “moale Diravana.” (1 Timoteo 1:11) To, mai anina bada henanadai ta ia vara? Iehova ese momokani ita ta ta ia lalokau henia, a? Karoa gabena ese unai do ia haerelaia.